ເອັດຊະຣາ 9:1-15
9 ຫຼັງຈາກທີ່ພວກເຮົາເຮັດສິ່ງເຫຼົ່ານີ້ແລ້ວ ພວກຫົວໜ້າໄດ້ມາຫາຂ້ອຍແລະບອກວ່າ: “ພວກອິດສະຣາເອນ ພວກປະໂລຫິດ ແລະພວກເລວີບໍ່ໄດ້ແຍກໂຕຢູ່ຕ່າງຫາກຈາກຊາດຕ່າງໆທີ່ຢູ່ອ້ອມຂ້າງ. ເຂົາເຈົ້າເຮັດສິ່ງທີ່ພະເຈົ້າຂີ້ດຽດ+ຄືກັບພວກການາອານ ພວກເຮດ ພວກເປຣິຊີ ພວກເຢບຸດ ພວກອຳໂມນ ພວກໂມອາບ ພວກເອຢິບ+ ແລະພວກອາໂມ.+
2 ເຂົາເຈົ້າເອົາຜູ້ຍິງຈາກຊາດເຫຼົ່ານີ້ມາເປັນເມຍແລະມາເປັນລູກໃພ້.+ ຍ້ອນແນວນີ້ ເຂົາເຈົ້າຈຶ່ງເຮັດໃຫ້ໂຕເອງເຊິ່ງເປັນລູກຫຼານທີ່ບໍລິສຸດ+ໄປປົນກັບຄົນຂອງຊາດຕ່າງໆທີ່ຢູ່ອ້ອມຂ້າງ.+ ພວກເຈົ້ານາຍກັບພວກຜູ້ປົກຄອງເປັນຜູ້ທີ່ເຮັດຜິດກ່ອນໝູ່ ແລ້ວເຂົາເຈົ້າກໍພາຄົນອື່ນເຮັດຜິດຄືກັນ.”
3 ເມື່ອໄດ້ຍິນແນວນັ້ນ ຂ້ອຍກໍຈີກເສື້ອ ດຶງຜົມ ແລະດຶງໜວດດຶງເຄົາຂອງໂຕເອງ ແລ້ວກໍນັ່ງຊຶງຢູ່ຍ້ອນວ່າຕົກໃຈຫຼາຍ.
4 ທຸກຄົນທີ່ຢ້ານຢຳຄຳສັ່ງຂອງພະເຈົ້າຂອງອິດສະຣາເອນກໍມານັ່ງອ້ອມຂ້ອຍ ຍ້ອນເຂົາເຈົ້າກໍເສຍໃຈທີ່ໄດ້ຍິນວ່າພວກທີ່ກັບມາຈາກການເປັນຊະເລີຍໄດ້ເຮັດຜິດ. ຂ້ອຍນັ່ງຊຶງຈົນຮອດຕອນແລງເຊິ່ງເປັນເວລາທີ່ຕ້ອງເຜົາເຄື່ອງບູຊາທີ່ເຮັດຈາກເມັດເຂົ້າ.+
5 ຂ້ອຍນຸ່ງເສື້ອທີ່ຈີກແລ້ວ ແລະນັ່ງເສົ້າຢູ່ບ່ອນນັ້ນຈົນຮອດຕອນແລງເຊິ່ງເປັນເວລາທີ່ຕ້ອງເຜົາເຄື່ອງບູຊາທີ່ເຮັດຈາກເມັດເຂົ້າ.+ ຈາກນັ້ນ ຂ້ອຍກໍຄູ້ເຂົ່າລົງແລະຍໍມືຂຶ້ນຟ້າ ແລ້ວອະທິດຖານຫາພະເຢໂຫວາພະເຈົ້າຂອງຂ້ອຍ.
6 ຂ້ອຍອະທິດຖານວ່າ: “ພະເຈົ້າເອີ້ຍ ລູກຮູ້ສຶກອາຍຫຼາຍ ລູກຄິດວ່າບໍ່ສົມຄວນທີ່ຈະອະທິດຖານຫາພະອົງ. ພະເຈົ້າເອີ້ຍ ຄວາມຜິດຂອງພວກເຮົາມີຫຼາຍແທ້ໆຈົນກອງສູງສ່ຳຟ້າ.+
7 ພວກເຮົາເຮັດຜິດຫຼາຍຕັ້ງແຕ່ສະໄໝປູ່ຍ່າຕານາຍຂອງພວກເຮົາຈົນຮອດທຸກມື້ນີ້.+ ຍ້ອນແນວນີ້ ພະອົງຈຶ່ງໃຫ້ພວກເຮົາ ພວກກະສັດ ແລະພວກປະໂລຫິດຖືກມອບໄວ້ໃນມືຂອງພວກກະສັດຕ່າງຊາດ ຖືກຂ້າດ້ວຍດາບ+ ຖືກຈັບໄປເປັນຊະເລີຍ+ ຖືກປຸ້ນ+ ແລະຖືກເຮັດໃຫ້ອັບອາຍຄືກັບທີ່ເປັນຢູ່ໃນທຸກມື້ນີ້.+
8 ແຕ່ພະເຢໂຫວາພະເຈົ້າ ພະອົງໄດ້ອີ່ຕົນພວກເຮົາໄລຍະໜຶ່ງໂດຍໃຫ້ຄົນທີ່ຖືກຈັບໄປເປັນຊະເລີຍລອດກັບມາຢ່າງປອດໄພແລະໄດ້ມາຢູ່ໃນບ່ອນທີ່ບໍລິສຸດ+ແລະເຮັດໃຫ້ພວກເຮົາມີຄວາມສຸກ. ພະເຈົ້າເອີ້ຍ ພະອົງໄດ້ຊ່ວຍພວກເຮົາບໍ່ໃຫ້ເປັນທາດໜັກສ່ຳເກົ່າ.
9 ເຖິງວ່າພວກເຮົາຍັງເປັນທາດຢູ່+ ແຕ່ພະອົງກໍບໍ່ໄດ້ປະຖິ້ມພວກເຮົາ. ພະອົງສະແດງຄວາມຮັກທີ່ໝັ້ນຄົງຕໍ່ພວກເຮົາໂດຍເຮັດໃຫ້ພວກກະສັດເປີເຊຍມັກພວກເຮົາ.+ ພະອົງໃຫ້ພວກເຮົາມີກຳລັງທີ່ຈະສ້າງວິຫານຂອງພະເຈົ້າ+ທີ່ຖືກທຳລາຍແລ້ວຄືນໃໝ່ແລະປົກປ້ອງພວກເຮົາ*ໃນຢູດາແລະໃນເມືອງເຢຣູຊາເລັມ.
10 ພະເຈົ້າເອີ້ຍ ພວກເຮົາບໍ່ມີຫຍັງຊິແກ້ໂຕແລ້ວ ຍ້ອນພວກເຮົາບໍ່ເຊື່ອຟັງຄຳສັ່ງຂອງພະອົງ.
11 ພະອົງໃຫ້ຄຳສັ່ງພວກເຮົາຜ່ານທາງພວກຜູ້ພະຍາກອນທີ່ເປັນຜູ້ຮັບໃຊ້ຂອງພະອົງວ່າ ‘ແຜ່ນດິນທີ່ພວກເຈົ້າກຳລັງຈະໄປຍຶດເອົານັ້ນເປັນແຜ່ນດິນທີ່ບໍ່ສະອາດ ຍ້ອນຄົນທີ່ຢູ່ຫັ້ນເປັນຄົນທີ່ບໍ່ສະອາດ. ເຂົາເຈົ້າເຮັດແຕ່ສິ່ງທີ່ພະເຈົ້າຂີ້ດຽດຈຶ່ງເຮັດໃຫ້ທົ່ວແຜ່ນດິນນັ້ນບໍ່ສະອາດ.+
12 ຍ້ອນແນວນີ້ ຢ່າໃຫ້ລູກສາວຂອງພວກເຈົ້າໄປເປັນເມຍລູກຊາຍຂອງເຂົາເຈົ້າ ແລະຢ່າໃຫ້ລູກສາວຂອງເຂົາເຈົ້າມາເປັນເມຍລູກຊາຍຂອງພວກເຈົ້າ.+ ຢ່າຊ່ວຍເຂົາເຈົ້າໃຫ້ໄດ້ຢູ່ສຸກສະບາຍແລະຈະເລີນຮຸ່ງເຮືອງ.+ ຖ້າພວກເຈົ້າເຊື່ອຟັງເຮົາ ພວກເຈົ້າຈະເຂັ້ມແຂງແລະໄດ້ກິນຜົນລະປູກທີ່ດີຂອງແຜ່ນດິນນັ້ນແລະໄດ້ແຜ່ນດິນນັ້ນເປັນມໍລະດົກໃຫ້ລູກຫຼານຂອງພວກເຈົ້າຕະຫຼອດໄປ.’
13 ພະເຈົ້າເອີ້ຍ ຍ້ອນພວກເຮົາເຮັດຊົ່ວແລະເຮັດຜິດຮ້າຍແຮງຫຼາຍ ພວກເຮົາຈຶ່ງເຈິກັບຄວາມລຳບາກຫຼາຍຢ່າງ. ເຖິງວ່າຈະເປັນແນວນັ້ນ ພະອົງກໍບໍ່ໄດ້ລົງໂທດພວກເຮົາໃຫ້ສົມກັບຄວາມຜິດທີ່ພວກເຮົາໄດ້ເຮັດ+ ແຕ່ພະອົງໄດ້ຊ່ວຍພວກເຮົາທີ່ຢູ່ນີ້ໃຫ້ໜີລອດກັບມາຈາກການເປັນຊະເລີຍ.+
14 ຂະໜາດພະອົງເຮັດດີກັບພວກເຮົາສ່ຳນີ້ ພວກເຮົາກໍຍັງບໍ່ຫຼາບ ບໍ່ເຊື່ອຟັງຄຳສັ່ງຂອງພະອົງແລະໄປແຕ່ງດອງກັບຄົນຕ່າງຊາດທີ່ເຮັດສິ່ງທີ່ພະອົງຂີ້ດຽດ+ ກໍສົມແລ້ວທີ່ພະອົງໃຈຮ້າຍໃຫ້ພວກເຮົາຫຼາຍແລະຢາກທຳລາຍພວກເຮົາບໍ່ໃຫ້ເຫຼືອຈັກຄົນ.
15 ພະເຢໂຫວາພະເຈົ້າຂອງອິດສະຣາເອນ ພະອົງດີແທ້ໆ+ ພະອົງຊ່ວຍພວກເຮົາບາງຄົນໃຫ້ມີຊີວິດລອດຈົນຮອດທຸກມື້ນີ້. ຕອນນີ້ພວກເຮົາທີ່ເປັນຄົນເຮັດຜິດມາຢືນຢູ່ຕໍ່ໜ້າພະອົງທັງໆທີ່ພວກເຮົາບໍ່ມີສິດທີ່ຈະເຮັດແບບນີ້.”+
ຂໍ ຄວາມ ໄຂ ເງື່ອນ
^ ຫຼື “ໃຫ້ພວກເຮົາມີກຳແພງຫີນ”