ເອັດສະເທີ 5:1-14
5 ໃນມື້ທີ 3+ ເອັດສະເທີນຸ່ງຊຸດລາຊີນີຂອງລາວແລະໄປເດີ່ນທາງໃນຂອງວັງກະສັດ. ເດີ່ນນັ້ນຢູ່ຕໍ່ໜ້າຫ້ອງໂຖງໃຫຍ່ຂອງກະສັດ. ຕອນນັ້ນ ກະສັດກຳລັງນັ່ງຢູ່ເທິງບັນລັງຂອງລາວທີ່ຢູ່ຊື່ກັບທາງເຂົ້າ.
2 ເມື່ອກະສັດເຫັນລາຊີນີເອັດສະເທີຢູ່ເດີ່ນກໍດີໃຈຫຼາຍ. ລາວຈຶ່ງເດ່ຄ້ອນຄຳ+ຂອງລາວໄປຫາເອັດສະເທີ ແລ້ວເອັດສະເທີກໍຍ່າງເຂົ້າໄປແລະເອົາມືແຕະປາຍຄ້ອນຄຳນັ້ນ.
3 ກະສັດຖາມລາວວ່າ: “ລາຊີນີເອັດສະເທີ ນ້ອງມີຫຍັງບໍ? ນ້ອງຢາກໄດ້ຫຍັງ? ເຖິງວ່ານ້ອງຢາກໄດ້ເຄິ່ງໜຶ່ງຂອງປະເທດນີ້ ອ້າຍກໍຈະເອົາໃຫ້ນ້ອງ.”
4 ເອັດສະເທີຕອບວ່າ: “ຖ້າກະສັດເຫັນດີ ມື້ນີ້ນ້ອງຢາກເຊີນກະສັດກັບທ່ານຮາມານ+ມາງານລ້ຽງທີ່ນ້ອງໄດ້ກຽມໄວ້ໃຫ້ກະສັດ.”
5 ກະສັດຈຶ່ງບອກຄົນຂອງລາວວ່າ: “ໃຫ້ຟ້າວໄປເອີ້ນຮາມານມາຕາມທີ່ເອັດສະເທີຂໍ.” ແລ້ວກະສັດກັບຮາມານກໍໄປງານລ້ຽງທີ່ເອັດສະເທີໄດ້ກຽມໄວ້.
6 ຫຼັງຈາກທີ່ເຂົາເຈົ້າກິນເຂົ້າແລ້ວໆແລະກຳລັງກິນເຫຼົ້າແວງນຳກັນ ກະສັດກໍຖາມເອັດສະເທີວ່າ: “ນ້ອງຢາກຂໍຫຍັງ? ບອກອ້າຍມາໂລດ ອ້າຍຊິເອົາໃຫ້. ນ້ອງຢາກໄດ້ຫຍັງ? ເຖິງວ່ານ້ອງຢາກໄດ້ເຄິ່ງໜຶ່ງຂອງປະເທດນີ້ ອ້າຍກໍຈະເອົາໃຫ້ນ້ອງ.”+
7 ເອັດສະເທີຕອບວ່າ: “ສິ່ງທີ່ນ້ອງຢາກໄດ້ແມ່ນ
8 ຖ້າກະສັດພໍໃຈນ້ອງແລະຢາກໃຫ້ຕາມທີ່ນ້ອງຂໍ ມື້ອື່ນນ້ອງຈະຈັດງານລ້ຽງອີກເທື່ອໜຶ່ງ ນ້ອງຢາກຂໍໃຫ້ກະສັດກັບທ່ານຮາມານມາອີກ ແລ້ວມື້ອື່ນນ້ອງຈະບອກກະສັດວ່ານ້ອງຢາກໄດ້ຫຍັງ.”
9 ມື້ນັ້ນຮາມານມ່ວນຫຼາຍແລະອອກມາຈາກວັງດ້ວຍຄວາມດີໃຈ. ແຕ່ເມື່ອຮາມານມາຮອດປະຕູວັງຂອງກະສັດແລະເຫັນວ່າມໍເດກາຍບໍ່ໄດ້ລຸກຂຶ້ນແລະບໍ່ໄດ້ຢ້ານລາວ ລາວກໍໃຈຮ້າຍໃຫ້ມໍເດກາຍຫຼາຍ.+
10 ແຕ່ຮາມານຄວບຄຸມອາລົມໄວ້ແລະກັບມາເຮືອນ. ຈາກນັ້ນ ລາວກໍໃຫ້ຄົນໄປເອີ້ນເຊເຣັດ+ເມຍຂອງລາວກັບພວກໝູ່ໃຫ້ມາຫາ.
11 ຮາມານເວົ້າອວດເຂົາເຈົ້າວ່າ ລາວລວຍສ່ຳໃດ ມີລູກຊາຍຫຼາຍສ່ຳໃດ+ ແລະເວົ້າອວດວ່າກະສັດໄດ້ເລື່ອນຕຳແໜ່ງລາວໃຫ້ສູງກວ່າພວກເຈົ້ານາຍແລະພວກຂ້າລາຊະການທຸກຄົນຂອງກະສັດ.+
12 ຮາມານຍັງເວົ້າອີກວ່າ: “ບໍ່ແມ່ນແຕ່ເທົ່ານີ້ໄດ໋. ງານລ້ຽງມື້ນີ້ທີ່ລາຊີນີເອັດສະເທີຈັດ ລາວບໍ່ໄດ້ເຊີນຜູ້ອື່ນນອກຈາກຂ້ອຍກັບກະສັດ+ ແລະງານລ້ຽງມື້ອື່ນກໍຈະມີແຕ່ຂ້ອຍຜູ້ດຽວເທົ່ານັ້ນທີ່ຈະໄດ້ໄປຮ່ວມກັບກະສັດແລະລາຊີນີ.+
13 ແຕ່ຂ້ອຍກໍຍັງບໍ່ມີຄວາມສຸກຍ້ອນມໍເດກາຍຄົນຢິວຜູ້ນັ້ນຍັງນັ່ງຢູ່ປະຕູວັງຂອງກະສັດ.”
14 ເຊເຣັດເມຍຂອງລາວແລະພວກໝູ່ກໍບອກລາວວ່າ: “ເຈົ້າໜ້າຈະໃຫ້ຄົນໄປຕັ້ງເສົາຕົ້ນໜຶ່ງສູງ 50 ສອກ* ແລະຕອນເຊົ້າກໍໄປບອກກະສັດໃຫ້ແຂວນມໍເດກາຍໄວ້ຢູ່ຫັ້ນ.+ ຈາກນັ້ນ ເຈົ້າກໍຈະໄດ້ໄປງານລ້ຽງກັບກະສັດຢ່າງມີຄວາມສຸກ.” ຮາມານມັກຂໍ້ສະເໜີນີ້ ລາວຈຶ່ງໃຫ້ຄົນໄປຕັ້ງເສົາຕົ້ນໜຶ່ງໄວ້.
ຂໍ ຄວາມ ໄຂ ເງື່ອນ
^ 22,3 ແມັດ. ເບິ່ງພາກຜະໜວກ ຂ14.