ເອັດສະເທີ 9:1-32
9 ໃນວັນທີ 13 ຂອງເດືອນທີ 12 ເຊິ່ງແມ່ນເດືອນອາດາ*+ ເປັນມື້ທີ່ຕ້ອງເຮັດຕາມຄຳສັ່ງແລະກົດໝາຍຂອງກະສັດ.+ ມື້ນີ້ສັດຕູຂອງຄົນຢິວຫວັງວ່າຈະໄດ້ກຳຈັດຄົນຢິວ ແຕ່ຄົນຢິວພັດໄດ້ເອົາຊະນະຄົນທີ່ຊັງເຂົາເຈົ້າ.+
2 ຄົນຢິວໃນທຸກແຂວງທີ່ກະສັດອາຫະສຸເອຣັດ+ປົກຄອງລວມກຸ່ມກັນຢູ່ໃນເມືອງຂອງໂຕເອງເພື່ອຕໍ່ສູ້ກັບຄົນທີ່ຢາກທຳຮ້າຍເຂົາເຈົ້າ. ບໍ່ມີໃຜເອົາຊະນະເຂົາເຈົ້າໄດ້ຍ້ອນຄົນຊາດຕ່າງໆຢ້ານຄົນຢິວ.+
3 ພວກເຈົ້າແຂວງ+ ພວກຂ້າລາຊະການລະດັບສູງ ພວກເຈົ້ານາຍ ແລະພວກທີ່ເບິ່ງແຍງວຽກຕ່າງໆຂອງກະສັດກໍຊ່ວຍຄົນຢິວ ຍ້ອນເຂົາເຈົ້າຢ້ານມໍເດກາຍ.
4 ມໍເດກາຍໄດ້ເປັນຄົນສຳຄັນໃນວັງຂອງກະສັດ.+ ມໍເດກາຍມີຊື່ສຽງໄປທົ່ວທຸກແຂວງຍ້ອນລາວມີອຳນາດຫຼາຍຂຶ້ນເລື້ອຍໆ.
5 ຄົນຢິວເອົາຊະນະພວກສັດຕູໂດຍໃຊ້ດາບຂ້າແລະກຳຈັດເຂົາເຈົ້າ. ມື້ນັ້ນຄົນຢິວເຮັດກັບຄົນທີ່ຊັງເຂົາເຈົ້າຕາມທີ່ຢາກເຮັດ.+
6 ຄົນຢິວໄດ້ຂ້າ 500 ຄົນຢູ່ວັງໃນເມືອງຊູຊາ.+
7 ເຂົາເຈົ້າຍັງໄດ້ຂ້າປາຊານດາທາ ດານໂຟນ ອັດສະປາທາ
8 ໂປຣາທາ ອາດາເລຍ ອາຣີດາທາ
9 ປາມາສະຕາ ອາຣີສາຍ ອາຣີດາຍ ແລະວາເຢຊາທາ.
10 ທັງສິບຄົນນີ້ແມ່ນລູກຊາຍຂອງຮາມານສັດຕູຂອງຄົນຢິວ+ແລະເປັນຫຼານຂອງຮຳເມດາທາ. ຫຼັງຈາກຄົນຢິວຂ້າພວກສັດຕູແລ້ວ ຄົນຢິວກໍບໍ່ໄດ້ເອົາຫຍັງຂອງເຂົາເຈົ້າໄປເລີຍ.+
11 ແລ້ວກໍມີຄົນມາບອກກະສັດໃຫ້ຮູ້ວ່າໃນມື້ນັ້ນມີຈັກຄົນທີ່ຖືກຂ້າຢູ່ວັງໃນເມືອງຊູຊາ.
12 ກະສັດເວົ້າກັບລາຊີນີເອັດສະເທີວ່າ: “ຂະໜາດຢູ່ວັງໃນເມືອງຊູຊາແຕ່ບ່ອນດຽວ ຄົນຢິວໄດ້ຂ້າຕັ້ງ 500 ຄົນກັບລູກຊາຍ 10 ຄົນຂອງຮາມານ ຢູ່ແຂວງອື່ນໆກໍແຮ່ງຊິຫຼາຍກວ່ານີ້.+ ຕອນນີ້ນ້ອງຢາກຂໍຫຍັງ? ອ້າຍຊິເອົາໃຫ້. ນ້ອງຢາກໄດ້ຫຍັງຕື່ມອີກບໍ? ອ້າຍຈະເຮັດຕາມທີ່ນ້ອງຂໍ.”
13 ເອັດສະເທີຈຶ່ງບອກກະສັດວ່າ: “ຖ້າທ່ານເຫັນດີ+ ມື້ອື່ນຂໍທ່ານອະນຸຍາດໃຫ້ຄົນຢິວຢູ່ເມືອງຊູຊາປົກປ້ອງໂຕເອງຄືກັບທີ່ເຂົາເຈົ້າໄດ້ເຮັດໃນມື້ນີ້+ ແລະຂໍໃຫ້ເອົາສົບລູກຊາຍ 10 ຄົນຂອງຮາມານໄປແຂວນໄວ້ເທິງເສົາ.”+
14 ກະສັດກໍອອກຄຳສັ່ງໃຫ້ເຮັດຕາມນັ້ນ. ກົດໝາຍນີ້ໃຊ້ສະເພາະຢູ່ເມືອງຊູຊາ ແລະສົບລູກຊາຍ 10 ຄົນຂອງຮາມານກໍຖືກແຂວນໄວ້ເທິງເສົາ.
15 ຄົນຢິວທີ່ຢູ່ເມືອງຊູຊາກໍມາລວມກຸ່ມກັນອີກໃນວັນທີ 14 ຂອງເດືອນອາດາ+ແລະໄດ້ຂ້າ 300 ຄົນໃນເມືອງຊູຊາ ແຕ່ກໍບໍ່ໄດ້ເອົາຫຍັງຂອງເຂົາເຈົ້າໄປເລີຍ.
16 ຄົນຢິວໃນແຂວງອື່ນໆທີ່ກະສັດປົກຄອງກໍມາລວມກຸ່ມກັນເພື່ອຕໍ່ສູ້ສັດຕູແລະປົກປ້ອງຊີວິດຂອງໂຕເອງ.+ ເຂົາເຈົ້າຂ້າຄົນທີ່ຊັງເຂົາເຈົ້າ+ທັງໝົດ 75.000 ຄົນ ແຕ່ບໍ່ໄດ້ເອົາຫຍັງໄປເລີຍ.
17 ເຂົາເຈົ້າເຮັດແບບນັ້ນໃນວັນທີ 13 ຂອງເດືອນອາດາ. ໃນວັນທີ 14 ເຂົາເຈົ້າບໍ່ໄດ້ເຮັດອີກ ແຕ່ໄດ້ຈັດງານລ້ຽງສະຫຼອງຢ່າງມ່ວນຊື່ນໃນມື້ນັ້ນ.
18 ຄົນຢິວທີ່ຢູ່ເມືອງຊູຊາໄດ້ມາລວມກຸ່ມກັນໃນວັນທີ 13+ ແລະວັນທີ 14+ ເພື່ອຕໍ່ສູ້. ໃນວັນທີ 15 ເຂົາເຈົ້າບໍ່ໄດ້ເຮັດອີກ ແຕ່ໄດ້ຈັດງານລ້ຽງສະຫຼອງຢ່າງມ່ວນຊື່ນໃນມື້ນັ້ນ.
19 ສ່ວນຄົນຢິວທີ່ຢູ່ຕາມເມືອງຕ່າງໆໃນເຂດທາງນອກຂອງເມືອງຊູຊາໄດ້ໃຫ້ວັນທີ 14 ຂອງເດືອນອາດາເປັນມື້ຈັດງານລ້ຽງສະຫຼອງຢ່າງມ່ວນຊື່ນ+ແລະເອົາຂອງກິນໄປໃຫ້ກັນ.+
20 ມໍເດກາຍ+ຂຽນເລື່ອງທັງໝົດນີ້ໄວ້ແລະສົ່ງຈົດໝາຍທາງການໄປຫາຄົນຢິວທັງໝົດທີ່ຢູ່ໃກ້ແລະໄກໃນທຸກແຂວງທີ່ກະສັດອາຫະສຸເອຣັດປົກຄອງ.
21 ລາວສັ່ງໃຫ້ຄົນຢິວຈັດງານສະຫຼອງໃນວັນທີ 14 ແລະວັນທີ 15 ໃນເດືອນອາດາຂອງທຸກປີ.
22 ຍ້ອນວ່າ 2 ມື້ນັ້ນເປັນມື້ທີ່ຄົນຢິວໄດ້ເປັນອິດສະຫຼະຈາກສັດຕູຂອງເຂົາເຈົ້າ ແລະໃນເດືອນນັ້ນຄວາມທຸກໃຈຂອງເຂົາເຈົ້າໄດ້ປ່ຽນມາເປັນຄວາມສຸກ ຄວາມໂສກເສົ້າເສຍໃຈ+ໄດ້ປ່ຽນມາເປັນການລ້ຽງສະຫຼອງ. ໃນ 2 ມື້ນັ້ນເຂົາເຈົ້າຕ້ອງຈັດງານລ້ຽງສະຫຼອງຢ່າງມ່ວນຊື່ນ ເອົາຂອງກິນໄປໃຫ້ກັນ ແລະເອົາຂອງຂວັນໄປໃຫ້ຄົນທຸກ.
23 ຄົນຢິວເຫັນດີທີ່ຈະຈັດການສະຫຼອງນີ້ທຸກໆປີ ແລະເຮັດຕາມທີ່ມໍເດກາຍຂຽນສັ່ງໄວ້.
24 ຮາມານ+ທີ່ເປັນສັດຕູຂອງຄົນຢິວແລະເປັນລູກຊາຍຂອງຮຳເມດາທາຄົນອາກັກ+ໄດ້ວາງແຜນຊົ່ວທີ່ຈະຂ້າຄົນຢິວ.+ ລາວໄດ້ຈົກສະຫຼາກ*+ເພື່ອກຳນົດມື້ທີ່ຈະເຮັດໃຫ້ເຂົາເຈົ້າຢ້ານແລະກວາດລ້າງເຂົາເຈົ້າ.
25 ແຕ່ເມື່ອເອັດສະເທີເຂົ້າໄປຫາກະສັດ ກະສັດຈຶ່ງອອກຄຳສັ່ງ+ໃຫ້ແຜນຊົ່ວຂອງຮາມານທີ່ຈະຂ້າຄົນຢິວ+ກັບໄປຖືກລາວເອງ. ເຂົາເຈົ້າຈຶ່ງແຂວນຮາມານກັບພວກລູກຊາຍຂອງລາວໄວ້ເທິງເສົາ.+
26 ຍ້ອນແນວນີ້ການສະຫຼອງ 2 ມື້ນີ້ຈຶ່ງຖືກເອີ້ນວ່າເທດສະການປູຣິມ*ທີ່ມາຈາກຄຳວ່າປູເຣ.+ ຄົນຢິວໄດ້ເຮັດຕາມສິ່ງທີ່ຂຽນໄວ້ໃນຈົດໝາຍຂອງມໍເດກາຍ ລວມທັງຄິດເຖິງສິ່ງທີ່ເຂົາເຈົ້າໄດ້ເຫັນແລະສິ່ງທີ່ເກີດຂຶ້ນກັບເຂົາເຈົ້າ.
27 ຄົນຢິວ ລູກຫຼານຂອງເຂົາເຈົ້າ ແລະທຸກຄົນທີ່ມາຮ່ວມນຳເຂົາ+ເຈົ້າຈະຈັດການສະຫຼອງໃນ 2 ມື້ນີ້ ແລະເຮັດທຸກຢ່າງຕາມທີ່ມໍເດກາຍຂຽນໄວ້ກ່ຽວກັບເທດສະການນີ້ຕາມເວລາທີ່ກຳນົດໄວ້ໃນທຸກປີ.
28 ທຸກຄອບຄົວ ທຸກເມືອງ ແລະທຸກແຂວງຕ້ອງຈື່ 2 ມື້ນີ້ໄວ້ແລະສະຫຼອງໄປຈົນຮອດລຸ້ນລູກລຸ້ນຫຼານ. ຄົນຢິວຈະຕ້ອງຈັດການສະຫຼອງເທດສະການປູຣິມທຸກປີແລະລູກຫຼານຂອງເຂົາເຈົ້າຕ້ອງຈື່ການສະຫຼອງນີ້ຕະຫຼອດໄປ.
29 ຈາກນັ້ນ ລາຊີນີເອັດສະເທີລູກສາວຂອງອາບີຮາຍແລະມໍເດກາຍທີ່ເປັນຄົນຢິວໄດ້ໃຊ້ຕຳແໜ່ງຂອງເຂົາເຈົ້າເພື່ອຂຽນຈົດໝາຍສະບັບທີ 2 ຢືນຢັນກ່ຽວກັບການສະຫຼອງເທດສະການປູຣິມ.
30 ຈົດໝາຍນັ້ນຖືກສົ່ງໄປໃຫ້ຄົນຢິວໃນ 127 ແຂວງ+ທີ່ກະສັດອາຫະສຸເອຣັດປົກຄອງ.+ ຄຳເວົ້າໃນຈົດໝາຍນັ້ນຈິງໃຈແລະເຊື່ອຖືໄດ້
31 ເພື່ອຢືນຢັນການສະຫຼອງເທດສະການປູຣິມໃນເວລາທີ່ກຳນົດໄວ້ຕາມທີ່ມໍເດກາຍຄົນຢິວແລະລາຊີນີເອັດສະເທີໄດ້ສັ່ງໃຫ້ເຮັດ.+ ນອກຈາກນັ້ນ ຄົນຢິວກັບລູກຫຼານກໍໄດ້ຈັດການສະຫຼອງນີ້+ລວມທັງອົດເຂົ້າ+ແລະອະທິດຖານອ້ອນວອນ+ນຳ.
32 ເອັດສະເທີໄດ້ອອກຄຳສັ່ງຢືນຢັນເລື່ອງຕ່າງໆກ່ຽວກັບການສະຫຼອງເທດສະການປູຣິມ+ແລະຄຳສັ່ງນັ້ນຖືກຂຽນໄວ້ໃນປຶ້ມ.
ຂໍ
^ ເບິ່ງພາກຜະໜວກ ຂ15
^ ແປຕາມໂຕວ່າ “ປູເຣ.” ເບິ່ງຄຳວ່າ “ປູຣິມ” ໃນສ່ວນອະທິບາຍຄຳສັບ.
^ ເບິ່ງສ່ວນອະທິບາຍຄຳສັບ
