ເອເຊກຽນ 11:1-25
11 ພະລັງຂອງພະເຈົ້າ*ພາຂ້ອຍໄປປະຕູທິດຕາເວັນອອກຂອງວິຫານຂອງພະເຢໂຫວາ.+ ຢູ່ທາງເຂົ້າປະຕູ ຂ້ອຍເຫັນພວກຜູ້ນຳ 25 ຄົນ. ໃນກຸ່ມນັ້ນມີຢາອາຊານີຢາລູກຊາຍຂອງອັດຊູເຣກັບເປລາຕີຢາລູກຊາຍຂອງເບນາຢາຢູ່ນຳ.+
2 ພະເຈົ້າເວົ້າກັບຂ້ອຍວ່າ: “ລູກມະນຸດ ພວກນີ້ກຳລັງວາງແຜນຊົ່ວແລະແນະນຳແນວຊົ່ວໆໃຫ້ເມືອງນີ້.
3 ເຂົາເຈົ້າເວົ້າວ່າ ‘ຕອນນີ້ເປັນເວລາປຸກເຮືອນປຸກຊານຕົ໋ວ.+ ເມືອງນີ້*ເປັນໝໍ້ແກງ+ແລະພວກເຮົາເປັນຊີ້ນທີ່ຢູ່ໃນໝໍ້.’
4 ລູກມະນຸດ ເຈົ້າຕ້ອງພະຍາກອນກ່ຽວກັບເຂົາເຈົ້າ.”+
5 ຈາກນັ້ນ ພະລັງຂອງພະເຢໂຫວາກໍມາຢູ່ນຳຂ້ອຍ.+ ເພິ່ນເວົ້າກັບຂ້ອຍວ່າ: “ໃຫ້ເຈົ້າເວົ້າແນວນີ້ ‘ພະເຢໂຫວາເວົ້າວ່າ “ພວກອິດສະຣາເອນ ພວກເຈົ້າເວົ້າຖືກແລ້ວແລະເຮົາກໍຮູ້ວ່າພວກເຈົ້າຄິດຫຍັງຢູ່.
6 ພວກເຈົ້າເຮັດໃຫ້ຫຼາຍຄົນຕາຍໃນເມືອງ ແລະເຮັດໃຫ້ຫົນທາງໃນເມືອງເຕັມແຕ່ສົບຄົນຕາຍ.”’”+
7 “ຍ້ອນແນວນີ້ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈຶ່ງເວົ້າວ່າ ‘ສົບທີ່ພວກເຈົ້າຖິ້ມຕາມຫົນທາງໃນເມືອງແມ່ນຊີ້ນແລະເມືອງນີ້ແມ່ນໝໍ້ແກງ.+ ແຕ່ພວກເຈົ້າຈະຖືກພາອອກໄປຈາກເມືອງນີ້.’”
8 “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ພວກເຈົ້າຢ້ານວ່າຈະຖືກຂ້າດ້ວຍດາບ+ ເຮົາກໍຈະໃຫ້ພວກເຈົ້າເຈິແບບນັ້ນແຫຼະ.
9 ເຮົາຈະເຮັດໃຫ້ພວກເຈົ້າຕ້ອງອອກຈາກເມືອງນີ້. ເຮົາຈະໃຫ້ຄົນຕ່າງຊາດຕໍ່ສູ້ຊະນະພວກເຈົ້າແລະເຮົາຈະລົງໂທດພວກເຈົ້າ.+
10 ພວກເຈົ້າຈະຖືກຂ້າດ້ວຍດາບ.+ ເຮົາຈະຕັດສິນພວກເຈົ້າຢູ່ຊາຍແດນຂອງອິດສະຣາເອນ+ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.+
11 ເມືອງນີ້ຈະບໍ່ເປັນໝໍ້ແກງສຳລັບພວກເຈົ້າ ແລະພວກເຈົ້າກໍຈະບໍ່ໄດ້ເປັນຊີ້ນຢູ່ໃນໝໍ້. ເຮົາຈະຕັດສິນພວກເຈົ້າຢູ່ຊາຍແດນຂອງອິດສະຣາເອນ
12 ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ. ພວກເຈົ້າບໍ່ໄດ້ເຮັດຕາມກົດໝາຍແລະການຕັດສິນຂອງເຮົາ+ ແຕ່ພວກເຈົ້າພັດເຮັດຕາມກົດໝາຍຂອງຊາດຕ່າງໆທີ່ຢູ່ອ້ອມຂ້າງ.’”+
13 ເມື່ອຂ້ອຍພະຍາກອນແລ້ວໆ ເປລາຕີຢາລູກຊາຍຂອງເບນາຢາກໍຕາຍ. ຂ້ອຍຈຶ່ງໝູບໜ້າລົງພື້ນແລ້ວຮ້ອງດັງໆວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດ ພະອົງຈະຂ້າພວກອິດສະຣາເອນທີ່ຍັງເຫຼືອຈົນໝົດເລີຍບໍ?”+
14 ພະເຢໂຫວາເວົ້າກັບຂ້ອຍອີກວ່າ:
15 “ລູກມະນຸດ ຄົນທີ່ຢູ່ໃນເມືອງເຢຣູຊາເລັມເວົ້າກັບພວກພີ່ນ້ອງຂອງເຈົ້າທີ່ມີສິດໄຖ່ຄືນແລະກັບພວກອິດສະຣາເອນໝົດທຸກຄົນວ່າ ‘ຢ່າໄປໃກ້ພະເຢໂຫວາ. ແຜ່ນດິນເປັນຂອງພວກເຮົາ. ພວກເຮົາໄດ້ຮັບແຜ່ນດິນນີ້ເປັນມໍລະດົກ.’
16 ໃຫ້ເຈົ້າເວົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຖິງວ່າເຮົາໄດ້ໃຫ້ເຂົາເຈົ້າໄປຢູ່ນຳຫຼາຍໆຊາດທີ່ຢູ່ໄກໆ ແລະໃຫ້ເຂົາເຈົ້າກະຈັດກະຈາຍກັນໄປຢູ່ແຜ່ນດິນຕ່າງໆ+ ເຮົາຈະເປັນບ່ອນທີ່ປອດໄພໃຫ້ເຂົາເຈົ້າໄລຍະໜຶ່ງໃນແຜ່ນດິນຕ່າງໆທີ່ເຂົາເຈົ້າໄປຢູ່ນັ້ນ.”’+
17 “ໃຫ້ເຈົ້າເວົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະລວບລວມເຂົາເຈົ້າມາຈາກຫຼາຍໆຊາດແລະຈາກແຜ່ນດິນຕ່າງໆທີ່ເຂົາເຈົ້າກະຈັດກະຈາຍກັນໄປຢູ່ ແລ້ວເຮົາຈະເອົາແຜ່ນດິນອິດສະຣາເອນໃຫ້ເຂົາເຈົ້າ.+
18 ເຂົາເຈົ້າຈະກັບໄປບ່ອນນັ້ນແລ້ວຈັດການກັບການນະມັດສະການທີ່ເປັນຕາຂີ້ດຽດທຸກຢ່າງ.+
19 ເຮົາຈະເຮັດໃຫ້ຫົວໃຈຂອງເຂົາເຈົ້າເປັນອັນໜຶ່ງອັນດຽວກັນ+ ແລະເຮົາຈະໃຫ້ເຂົາເຈົ້າມີຄວາມຄິດໃໝ່.+ ເຮົາຈະເອົາຫົວໃຈທີ່ແຂງຄືຫີນອອກໄປຈາກໂຕເຂົາເຈົ້າ+ ແລະເອົາຫົວໃຈທີ່ອ່ອນໂຍນ*ມາໃສ່ແທນ.+
20 ແລ້ວເຂົາເຈົ້າຈະເຊື່ອຟັງກົດໝາຍຂອງເຮົາແລະເຮັດຕາມການຕັດສິນຂອງເຮົາ. ເຂົາເຈົ້າຈະເປັນປະຊາຊົນຂອງເຮົາ ແລະເຮົາຈະເປັນພະເຈົ້າຂອງເຂົາເຈົ້າ.”’
21 ‘“ແຕ່ສຳລັບຄົນທີ່ຈັ່ງໃດກະຍັງຊິເຮັດສິ່ງທີ່ເປັນຕາຂີ້ດຽດຕໍ່ໄປ ເຮົາຈະໃຫ້ເຂົາເຈົ້າໄດ້ຮັບຜົນຈາກການກະທຳຂອງໂຕເອງ.” ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າໄວ້ແນວນີ້.’”
22 ຈາກນັ້ນ ເຄຣູບກໍຍົກປີກຂຶ້ນ ກົງລໍ້ກໍຢູ່ທາງຂ້າງເຂົາເຈົ້າ+ ແລະແສງລັດສະໝີຂອງພະເຈົ້າຂອງອິດສະຣາເອນກໍຢູ່ເທິງເຂົາເຈົ້າ.+
23 ແລ້ວແສງລັດສະໝີຂອງພະເຢໂຫວາ+ໄດ້ລອຍຂຶ້ນຈາກເມືອງ ແລະໄປຢຸດຢູ່ເທິງພູທີ່ຢູ່ທາງທິດຕາເວັນອອກຂອງເມືອງ.+
24 ໂດຍທາງນິມິດ ພະລັງຂອງພະເຈົ້າ*ໄດ້ພາຂ້ອຍໄປຫາປະຊາຊົນທີ່ເປັນຊະເລີຍຢູ່ການເດອາ ແລ້ວນິມິດກໍຈົບ.
25 ຈາກນັ້ນ ຂ້ອຍກໍເລົ່າໃຫ້ປະຊາຊົນທີ່ເປັນຊະເລີຍຟັງກ່ຽວກັບທຸກສິ່ງທີ່ພະເຢໂຫວາໄດ້ໃຫ້ຂ້ອຍເຫັນ.
ຂໍ
^ ໃນພາສາເຮັບເຣີຄຳນີ້ອາດໝາຍເຖິງພະລັງຂອງພະເຈົ້າຫຼືທູດສະຫວັນ
^ ໝາຍເຖິງເມືອງເຢຣູຊາເລັມທີ່ຄົນຢິວຄິດວ່າຈະເປັນບ່ອນທີ່ປົກປ້ອງເຂົາເຈົ້າໄດ້
^ ໝາຍເຖິງຫົວໃຈທີ່ຍອມຮັບຄຳແນະນຳຈາກພະເຈົ້າ
^ ໃນພາສາເຮັບເຣີຄຳນີ້ອາດໝາຍເຖິງພະລັງຂອງພະເຈົ້າຫຼືທູດສະຫວັນ
