ເອເຊກຽນ 12:1-28
12 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດ ເຈົ້າຢູ່ກັບຊາດທີ່ມັກກະບົດ. ເຂົາເຈົ້າມີຕາແຕ່ເບິ່ງບໍ່ເຫັນ ມີຫູແຕ່ບໍ່ໄດ້ຍິນ+ ຍ້ອນເຂົາເຈົ້າເປັນຊາດທີ່ມັກກະບົດ.+
3 ລູກມະນຸດ ໃຫ້ເຈົ້າກຽມພົກເຄື່ອງຄືກັບຈະໄປເປັນຊະເລີຍ. ໃນຕອນກາງເວັນ ຕອນທີ່ເຂົາເຈົ້າແນມເບິ່ງຢູ່ ເຈົ້າຕ້ອງເຮັດຄືກັບວ່າຖືກຈັບໄປເປັນຊະເລີຍ ແລະຕອນທີ່ເຂົາເຈົ້າເບິ່ງຢູ່ນັ້ນ ໃຫ້ເຈົ້າເຮັດຄືກັບວ່າເຈົ້າຖືກຈັບຈາກເຮືອນໄປເປັນຊະເລີຍຢູ່ບ່ອນອື່ນ. ບາງເທື່ອເຂົາເຈົ້າຈະເຂົ້າໃຈໃນເລື່ອງນີ້ ເຖິງວ່າເຂົາເຈົ້າເປັນຊາດທີ່ມັກກະບົດ.
4 ໃນຕອນກາງເວັນ ຕອນທີ່ເຂົາເຈົ້າເບິ່ງຢູ່ນັ້ນ ໃຫ້ເຈົ້າເອົາພົກເຄື່ອງທີ່ກຽມໄວ້ສຳລັບໄປເປັນຊະເລີຍອອກມາ ແລະໃນຕອນແລງ ຕອນທີ່ເຂົາເຈົ້າເບິ່ງຢູ່ ໃຫ້ເຈົ້າອອກໄປຄືກັບຄົນທີ່ຖືກຈັບໄປເປັນຊະເລີຍ.+
5 ຕອນທີ່ເຂົາເຈົ້າແນມເບິ່ງຢູ່ ໃຫ້ເຈົ້າເຈາະຝາເຮືອນເປັນປ່ອງ ແລ້ວເອົາພົກເຄື່ອງອອກໄປທາງນັ້ນ.+
6 ຕອນທີ່ເຂົາເຈົ້າແນມເບິ່ງຢູ່ນັ້ນ ໃຫ້ເຈົ້າເອົາພົກເຄື່ອງພາດໃສ່ບ່າອອກໄປຕອນທີ່ມືດໆ. ໃຫ້ເຈົ້າເອົາຜ້າປົກໜ້າເພື່ອເຈົ້າຈະບໍ່ເຫັນພື້ນ. ເຮົາໃຫ້ເຈົ້າເຮັດແບບນີ້ເພື່ອເປັນສິ່ງທີ່ຈະເຕືອນພວກອິດສະຣາເອນ.”+
7 ຂ້ອຍເຮັດຕາມທີ່ເພິ່ນສັ່ງ. ຕອນກາງເວັນ ຂ້ອຍເອົາພົກເຄື່ອງທີ່ກຽມໄວ້ສຳລັບໄປເປັນຊະເລີຍອອກມາ ແລະຕອນແລງ ຂ້ອຍເຈາະຝາເຮືອນໃຫ້ເປັນປ່ອງ. ເມື່ອຮອດຕອນຄ່ຳ ຂ້ອຍກໍເອົາພົກເຄື່ອງພາດໃສ່ບ່າອອກໄປຕໍ່ໜ້າເຂົາເຈົ້າ.
8 ໃນຕອນເຊົ້າ ພະເຢໂຫວາເວົ້າກັບຂ້ອຍອີກວ່າ:
9 “ລູກມະນຸດ ພວກອິດສະຣາເອນທີ່ມັກກະບົດຖາມເຈົ້າແມ່ນບໍວ່າກຳລັງເຮັດຫຍັງຢູ່?
10 ໃຫ້ເຈົ້າບອກເຂົາເຈົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ນີ້ແມ່ນຂ່າວສານສຳລັບຫົວໜ້າ+ໃນເມືອງເຢຣູຊາເລັມແລະສຳລັບພວກອິດສະຣາເອນທຸກຄົນທີ່ຢູ່ເມືອງນັ້ນ.”’
11 ໃຫ້ເຈົ້າເວົ້າວ່າ ‘ເຈົ້າເຮັດແບບນີ້ເພື່ອເປັນສິ່ງທີ່ຈະເຕືອນເຂົາເຈົ້າ.+ ສິ່ງທີ່ເຈົ້າເຮັດຈະເກີດຂຶ້ນກັບເຂົາເຈົ້າແທ້ໆ. ເຂົາເຈົ້າຈະຖືກຈັບໄປເປັນຊະເລີຍ.+
12 ຫົວໜ້າທີ່ຢູ່ນຳເຂົາເຈົ້າຈະເອົາພົກເຄື່ອງພາດໃສ່ບ່າອອກໄປຕອນທີ່ມືດໆ. ລາວຈະເຈາະຝາເຮືອນໃຫ້ເປັນປ່ອງແລະເອົາພົກເຄື່ອງອອກໄປທາງນັ້ນ.+ ລາວຈະເອົາຜ້າປົກໜ້າເພື່ອຈະບໍ່ເຫັນພື້ນ.’
13 ເຮົາຈະໂຍນຕານ່າງສຳລັບລ່າສັດງວມລາວ ແລະລາວຈະຄາຢູ່ຕານ່າງຂອງເຮົາ.+ ເຮົາຈະເອົາລາວໄປບາບີໂລນທີ່ເປັນແຜ່ນດິນຂອງພວກການເດອາ ແຕ່ລາວຈະເບິ່ງບໍ່ເຫັນແຜ່ນດິນນັ້ນແລະຈະຕາຍຢູ່ຫັ້ນ.+
14 ສ່ວນທຸກຄົນທີ່ຢູ່ອ້ອມຂ້າງລາວເຊິ່ງແມ່ນພວກຜູ້ຊ່ວຍກັບພວກທະຫານຂອງລາວ ເຮົາກໍຈະເຮັດໃຫ້ເຂົາເຈົ້າກະຈັດກະຈາຍໄປທຸກຈອກທຸກແຈ+ ແລະເຮົາຈະເອົາດາບໄລ່ນຳເຂົາເຈົ້າ.+
15 ເຂົາເຈົ້າຈະຮູ້ວ່າເຮົາແມ່ນເຢໂຫວາເມື່ອເຮົາໄລ່ເຂົາເຈົ້າໃຫ້ໜີໄປຢູ່ນຳຊາດຕ່າງໆ ແລະເຮັດໃຫ້ເຂົາເຈົ້າກະຈັດກະຈາຍກັນໄປຢູ່ແຜ່ນດິນຕ່າງໆ.
16 ແຕ່ເຮົາຈະໃຫ້ມີບາງຄົນລອດຈາກການຖືກຂ້າດ້ວຍດາບ ຈາກຄວາມອຶດຢາກ ແລະຈາກໂລກລະບາດ ເພື່ອເຂົາເຈົ້າຈະເລົ່າໃຫ້ຊາດຕ່າງໆທີ່ເຂົາເຈົ້າຈະໄປຢູ່ນຳນັ້ນຟັງກ່ຽວກັບສິ່ງທີ່ເປັນຕາຂີ້ດຽດທີ່ເຂົາເຈົ້າໄດ້ເຮັດ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ.”
17 ພະເຢໂຫວາເວົ້າກັບຂ້ອຍອີກວ່າ:
18 “ລູກມະນຸດ ໃຫ້ເຈົ້າກິນເຂົ້າຈີ່ດ້ວຍຄວາມຢ້ານຈົນໂຕສັ່ນແລະກິນນ້ຳດ້ວຍຄວາມອຸກໃຈ.+
19 ໃຫ້ເຈົ້າບອກປະຊາຊົນແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດບອກຄົນຢູ່ເມືອງເຢຣູຊາເລັມໃນອິດສະຣາເອນວ່າ “ເຂົາເຈົ້າຈະກິນເຂົ້າຈີ່ດ້ວຍຄວາມອຸກໃຈແລະຈະກິນນ້ຳດ້ວຍຄວາມຢ້ານ ເພາະແຜ່ນດິນຈະຮ້າງເປົ່າແທ້ໆ+ຍ້ອນຄວາມຮຸນແຮງທີ່ຄົນໃນເມືອງນີ້ເຮັດ.+
20 ເມືອງຕ່າງໆທີ່ຄົນອາໄສຢູ່ຈະຖືກທຳລາຍແລະແຜ່ນດິນຈະຮ້າງເປົ່າ+ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.”’”+
21 ພະເຢໂຫວາເວົ້າກັບຂ້ອຍອີກວ່າ:
22 “ລູກມະນຸດ ໃນອິດສະຣາເອນຄົນມັກເວົ້າວ່າ ‘ເວລາກໍຜ່ານໄປດົນແລ້ວ ແຕ່ນິມິດກໍຍັງບໍ່ເກີດຂຶ້ນຈັກເລື່ອງ.’+
23 ໃຫ້ເຈົ້າບອກເຂົາເຈົ້າຈັ່ງຊີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຮົາຈະເຮັດໃຫ້ເຂົາເຈົ້າເຊົາເວົ້າແບບນີ້ ແລະເຂົາເຈົ້າຈະບໍ່ເວົ້າເຍາະເຍີ້ຍແບບນີ້ໃນອິດສະຣາເອນອີກຕໍ່ໄປ.”’ ແຕ່ໃຫ້ບອກເຂົາເຈົ້າວ່າ ‘ມື້ນັ້ນໃກ້ຈະມາຮອດແລ້ວ+ ແລະນິມິດທຸກເລື່ອງຈະເກີດຂຶ້ນແທ້.’
24 ໃນອິດສະຣາເອນຈະບໍ່ມີຜູ້ພະຍາກອນທີ່ເວົ້າຕົວະຫຼືໝໍມໍທີ່ເວົ້າຫຼອກລວງ*ອີກຕໍ່ໄປ.+
25 ‘“ເຮົາເຢໂຫວາເວົ້າໄວ້ແນວໃດ ມັນກໍຈະເປັນແນວນັ້ນ ແລະມັນຈະບໍ່ຊ້າເລີຍ.+ ຊາດທີ່ມັກກະບົດ ເຮົາຈະເຮັດໃຫ້ສິ່ງທີ່ເຮົາເວົ້າເກີດຂຶ້ນແທ້ໃນສະໄໝຂອງພວກເຈົ້າ.”+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.’”
26 ພະເຢໂຫວາເວົ້າກັບຂ້ອຍອີກວ່າ:
27 “ລູກມະນຸດ ຄົນອິດສະຣາເອນເວົ້າວ່າ ‘ນິມິດທີ່ລາວເຫັນຍັງອີກດົນຈຶ່ງຈະເກີດຂຶ້ນ ແລະລາວພະຍາກອນເລື່ອງໃນອະນາຄົດທີ່ຢູ່ໄກໆພຸ້ນ.’+
28 ໃຫ້ເຈົ້າບອກເຂົາເຈົ້າຈັ່ງຊີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “‘ທຸກສິ່ງທີ່ເຮົາເວົ້າຈະເກີດຂຶ້ນແທ້ ແລະມັນຈະບໍ່ຊ້າເລີຍ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”’”
ຂໍ
^ ຫຼື “ເວົ້າປະຈົບປະແຈງ”
