ເອເຊກຽນ 13:1-23
13 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດ ໃຫ້ເຈົ້າພະຍາກອນກ່ຽວກັບພວກຜູ້ພະຍາກອນຂອງອິດສະຣາເອນ+ ແລະເວົ້າກັບພວກທີ່ຄິດຄຳພະຍາກອນຂຶ້ນມາເອງວ່າ+ ‘ໃຫ້ພວກເຈົ້າຟັງສິ່ງທີ່ພະເຢໂຫວາເວົ້າ.
3 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ພວກຜູ້ພະຍາກອນໂງ່ທີ່ພະຍາກອນຕາມຄວາມຄິດຂອງໂຕເອງທັງໆທີ່ເຮົາບໍ່ໄດ້ໃຫ້ນິມິດຫຍັງ ພວກເຈົ້າຈະຕ້ອງຈິບຫາຍ!+
4 ພວກອິດສະຣາເອນ ພວກຜູ້ພະຍາກອນຂອງພວກເຈົ້າເປັນຄືກັບໝາໄນທີ່ຢູ່ທ່າມກາງຊາກຫັກພັງ.
5 ເຂົາເຈົ້າຈະບໍ່ໄດ້ແປງກຳແພງຫີນທີ່ແຕກໃຫ້ພວກອິດສະຣາເອນ.+ ຍ້ອນແນວນີ້ ພວກອິດສະຣາເອນຈະບໍ່ໄດ້ຢູ່ຕໍ່ສູ້ໃນວັນຂອງພະເຢໂຫວາ.”+
6 “ນິມິດແລະຄຳພະຍາກອນຂອງເຂົາເຈົ້າເປັນເລື່ອງຂີ້ຕົວະ. ເຂົາເຈົ້າເວົ້າວ່າ ‘ພະເຢໂຫວາເວົ້າຈັ່ງຊີ້’ ທັງໆທີ່ພະເຢໂຫວາບໍ່ໄດ້ສົ່ງເຂົາເຈົ້າໄປ ແລະເຂົາເຈົ້າຖ້າໃຫ້ຄຳພະຍາກອນຂອງໂຕເອງເກີດຂຶ້ນແທ້.+
7 ເຮົາບໍ່ໄດ້ເວົ້າຫຍັງເລີຍ ແຕ່ພວກເຈົ້າພັດເວົ້າວ່າ ‘ພະເຢໂຫວາເວົ້າຈັ່ງຊີ້.’ ນິມິດແລະຄຳພະຍາກອນຂອງພວກເຈົ້າເປັນເລື່ອງຂີ້ຕົວະ.”’
8 ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “‘ຍ້ອນນິມິດແລະຄຳພະຍາກອນຂອງເຂົາເຈົ້າເປັນເລື່ອງຂີ້ຕົວະ ເຮົາຈຶ່ງເປັນສັດຕູກັບເຂົາເຈົ້າ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າຈັ່ງຊີ້.”+
9 ເຮົາຈະເດ່ມືອອກໄປລົງໂທດພວກຜູ້ພະຍາກອນທີ່ເຫັນນິມິດແລະເວົ້າຄຳພະຍາກອນທີ່ຂີ້ຕົວະ.+ ເຂົາເຈົ້າຈະບໍ່ໄດ້ຢູ່ໃນກຸ່ມຄົນທີ່ເຮົາເຮັດດີນຳ. ຊື່ຂອງເຂົາເຈົ້າຈະບໍ່ຖືກຂຽນໄວ້ໃນລາຍຊື່ຄົນອິດສະຣາເອນ ແລະເຂົາເຈົ້າຈະບໍ່ໄດ້ກັບຄືນມາແຜ່ນດິນອິດສະຣາເອນ ແລ້ວເຂົາເຈົ້າຈະຮູ້ວ່າເຮົາເຢໂຫວາເປັນພະເຈົ້າຜູ້ຍິ່ງໃຫຍ່ສູງສຸດ.+
10 ມັນເປັນແບບນີ້ກໍຍ້ອນເຂົາເຈົ້າພາປະຊາຊົນຂອງເຮົາໄປຜິດທາງ. ເຂົາເຈົ້າເວົ້າວ່າ: “ມີຄວາມສະຫງົບສຸກແລ້ວ” ທັງໆທີ່ບໍ່ມີເລີຍ.+ ຕອນກໍ່ຝາທີ່ບໍ່ແຂງແຮງ ເຂົາເຈົ້າເອົາປູນຂາວມາໂບກຝານັ້ນ.’*+
11 ໃຫ້ເຈົ້າໄປບອກພວກທີ່ເອົາປູນຂາວມາໂບກຝາວ່າ ຝານັ້ນຈະພັງລົງມາ. ຝົນທີ່ຕົກລົງມາແຮງໆ ພາຍຸໝາກເຫັບ ແລະລົມທີ່ພັດແຮງໆຈະເຮັດໃຫ້ຝານັ້ນພັງລົງມາ.+
12 ເມື່ອມັນພັງລົງມາແລ້ວ ຄົນຈະເວົ້າວ່າ ‘ປູນຂາວທີ່ພວກເຈົ້າໃຊ້ໂບກຝາຈັ່ງແມ່ນດີເນາະ!’+
13 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະເຮັດໃຫ້ມີພາຍຸພັດແຮງໆແລະມີຝົນຕົກໜັກຍ້ອນເຮົາໃຈຮ້າຍຫຼາຍ. ເຮົາຈະໃຫ້ພາຍຸໝາກເຫັບທຳລາຍຝານັ້ນຍ້ອນເຮົາໃຈຮ້າຍແຮງ.
14 ເຮົາຈະທຸບຝາທີ່ພວກເຈົ້າເອົາປູນຂາວໂບກໃຫ້ກອງຢູ່ພື້ນແລະເຫຼືອແຕ່ຄານ. ເມື່ອເມືອງນີ້ຖືກທຳລາຍ ພວກເຈົ້າກໍຈະຕາຍຢູ່ໃນເມືອງນີ້ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.’
15 ‘ເມື່ອເຮົາປ່ອຍຄວາມໃຈຮ້າຍຂອງເຮົາອອກມາສຸດຂີດໃສ່ຝາແລະໃສ່ຄົນທີ່ເອົາປູນຂາວມາໂບກຝາ ເຮົາຈະເວົ້າກັບພວກເຈົ້າວ່າ “ຝາບໍ່ມີແລ້ວແລະພວກທີ່ໂບກຝາກໍຕາຍໝົດແລ້ວ.+
16 ພວກຜູ້ພະຍາກອນຂອງອິດສະຣາເອນດັບສູນແລ້ວ. ເຂົາເຈົ້າເປັນພວກທີ່ເຄີຍພະຍາກອນເລື່ອງເມືອງເຢຣູຊາເລັມ ແລະເຄີຍເຫັນນິມິດວ່າເມືອງນີ້ມີຄວາມສະຫງົບສຸກ ທັງໆທີ່ບໍ່ມີເລີຍ.”’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
17 ລູກມະນຸດ ໃຫ້ເຈົ້າປິ່ນໜ້າໄປທາງພວກຜູ້ຍິງທີ່ເປັນຄົນຊາດດຽວກັນກັບເຈົ້າທີ່ຄິດຄຳພະຍາກອນຂຶ້ນມາເອງ ແລະໃຫ້ເຈົ້າພະຍາກອນກ່ຽວກັບເຂົາເຈົ້າ.
18 ໃຫ້ບອກເຂົາເຈົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ພວກຜູ້ຍິງທີ່ຫຍິບສາຍຮັດແຂນ*ສຳລັບທຸກຄົນ ແລະເຮັດຜ້າປົກຫົວທຸກຂະໜາດເພື່ອລ່າຊີວິດຄົນ ພວກເຈົ້າຈະຕ້ອງຈິບຫາຍ. ພວກເຈົ້າລ່າຊີວິດປະຊາຊົນຂອງເຮົາ ແຕ່ພັດພະຍາຍາມປົກປ້ອງຊີວິດຂອງໂຕເອງໄວ້ບໍ?
19 ພວກເຈົ້າດູຖູກເຮົາຕໍ່ໜ້າປະຊາຊົນຂອງເຮົາເພື່ອຈະໄດ້ເຂົ້າບາເລເຕັມສອງສາມກຳມື ແລະໄດ້ເສດເຂົ້າຈີ່ສອງສາມອັນເທົ່ານັ້ນຫວະ?+ ພວກເຈົ້າຕົວະປະຊາຊົນຂອງເຮົາແລະເຂົາເຈົ້າກໍເຊື່ອສິ່ງທີ່ພວກເຈົ້າເວົ້າ.+ ຍ້ອນແນວນີ້ ພວກເຈົ້າຈຶ່ງຂ້າຄົນທີ່ບໍ່ຄວນຖືກຂ້າ ແຕ່ຈົ່ງຄົນທີ່ຄວນຖືກຂ້າໄວ້.”’
20 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ພວກຜູ້ຍິງເອີ້ຍ ເຮົາຈະທຳລາຍສາຍຮັດແຂນທີ່ພວກເຈົ້າໃຊ້ລ່າຄົນຄືກັບລ່ານົກ. ເຮົາຈະດຶງສາຍຮັດແຂນອອກຈາກແຂນຂອງພວກເຈົ້າ ແລະເຮົາຈະປ່ອຍຄົນເຫຼົ່ານັ້ນທີ່ພວກເຈົ້າລ່າຄືກັບນົກ.
21 ເຮົາຈະຈີກຜ້າປົກຫົວຂອງພວກເຈົ້າ ແລະຈະຊ່ວຍປະຊາຊົນຂອງເຮົາໃຫ້ລອດຈາກມືພວກເຈົ້າ. ເຂົາເຈົ້າຈະບໍ່ເປັນເຫຍື່ອໃຫ້ພວກເຈົ້າລ່າອີກຕໍ່ໄປ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.+
22 ພວກເຈົ້າເຮັດໃຫ້ຄົນດີທໍ້ໃຈຍ້ອນເລື່ອງຂີ້ຕົວະຂອງພວກເຈົ້າ+ ທັງໆທີ່ເຮົາບໍ່ໄດ້ເຮັດໃຫ້ລາວທໍ້ໃຈ. ພວກເຈົ້າສະໜັບສະໜູນຄົນຊົ່ວ.+ ຍ້ອນແນວນີ້ ລາວຈຶ່ງບໍ່ເຊົາເຮັດຊົ່ວເພື່ອຈະມີຊີວິດຢູ່ຕໍ່ໄປ.+
23 ພວກຜູ້ຍິງເອີ້ຍ ພວກເຈົ້າຈະບໍ່ເຫັນນິມິດທີ່ຫຼອກລວງ ແລະຈະບໍ່ໄດ້ທຳນາຍອີກຕໍ່ໄປ.+ ເຮົາຈະຊ່ວຍປະຊົນຂອງເຮົາໃຫ້ລອດຈາກມືພວກເຈົ້າ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.’”
ຂໍ
^ ໝາຍເຖິງກໍ່ຝາຂັ້ນຫ້ອງທີ່ບໍ່ແຂງແຮງແລ້ວພະຍາຍາມເອົາປູນຂາວມາທາທັບເພື່ອໃຫ້ເບິ່ງຄືແຂງແຮງ
^ ໝາຍເຖິງສາຍຮັດສອກຫຼືຂໍ້ມືທີ່ກ່ຽວຂ້ອງກັບຄາຖາອາຄົມ
