ເອເຊກຽນ 22:1-31
22 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດ ເຈົ້າພ້ອມແລ້ວບໍທີ່ຈະປະກາດຄຳຕັດສິນຕໍ່ເມືອງທີ່ມີຄວາມຜິດຂໍ້ຫາຂ້າຄົນ+ ແລະພ້ອມແລ້ວບໍທີ່ຈະບອກເມືອງນີ້ໃຫ້ຮູ້ວ່າມັນໄດ້ເຮັດສິ່ງທີ່ເປັນຕາຂີ້ດຽດຫຍັງແດ່?+
3 ເຈົ້າຕ້ອງເວົ້າຈັ່ງຊີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຈົ້າເປັນເມືອງທີ່ຂ້າປະຊາຊົນຂອງໂຕເອງ+ ແລະເຈົ້າເຮັດໃຫ້ໂຕເອງບໍ່ສະອາດດ້ວຍຮູບບູຊາທີ່ເປັນຕາຂີ້ດຽດ.*+ ເວລາຂອງເຈົ້າໃກ້ຈະມາຮອດແລ້ວ.+
4 ການຂ້າຄົນເຮັດໃຫ້ເຈົ້າມີຄວາມຜິດ+ ແລະຮູບບູຊາທີ່ເປັນຕາຂີ້ດຽດເຮັດໃຫ້ເຈົ້າບໍ່ສະອາດ.+ ເຈົ້າຈະຖືກລົງໂທດໄວກວ່າເກົ່າ. ມັນຈະເກີດຂຶ້ນໄວໆນີ້. ເຮົາຈະເຮັດໃຫ້ຊາດຕ່າງໆເຍາະເຍີ້ຍເຈົ້າແລະເຮັດໃຫ້ແຜ່ນດິນຕ່າງໆເວົ້າໃສ່ເຈົ້າ.+
5 ແຜ່ນດິນທີ່ຢູ່ໃກ້ແລະໄກຈະເວົ້າເຍາະເຍີ້ຍເຈົ້າ.+ ເຈົ້າເປັນເມືອງທີ່ມີຊື່ສຽງບໍ່ດີແລະມີແຕ່ຄວາມວຸ່ນວາຍ.
6 ພວກຫົວໜ້າທຸກຄົນຂອງອິດສະຣາເອນທີ່ເປັນຄົນຂອງເຈົ້າໃຊ້ອຳນາດເພື່ອຂ້າຄົນ.+
7 ປະຊາຊົນຂອງເຈົ້າດູຖູກພໍ່ແມ່ຂອງໂຕເອງ+ ສໍ້ໂກງຄົນຕ່າງຊາດ ແລະຂົ່ມເຫງແມ່ໝ້າຍກັບລູກກຳພ້າ.”’”+
8 “‘ເຈົ້າໝິ່ນປະໝາດບ່ອນບໍລິສຸດຂອງເຮົາແລະດູຖູກວັນຊະບາໂຕຂອງເຮົາ.+
9 ປະຊາຊົນຂອງເຈົ້າມັກໃສ່ຮ້າຍແລະຕັ້ງໃຈຂ້າຄົນ.+ ເຂົາເຈົ້າກິນເຄື່ອງບູຊາຢູ່ເທິງພູແລະບໍ່ເຊົາເຮັດສິ່ງທີ່ເປັນຕາໜ້າລັງກຽດ.+
10 ເຂົາເຈົ້ານອນກັບເມຍຂອງພໍ່+ແລະນອນກັບຜູ້ຍິງທີ່ບໍ່ສະອາດຍ້ອນເປັນປະຈຳເດືອນ.+
11 ປະຊາຊົນຂອງເຈົ້າບາງຄົນນອນກັບເມຍຂອງຄົນອື່ນ.+ ບາງຄົນເຮັດສິ່ງທີ່ເປັນຕາໜ້າລັງກຽດຕໍ່ລູກໃພ້ຂອງໂຕເອງ+ ແລະບາງຄົນບັງຄັບລູກສາວຂອງພໍ່ໂຕເອງໃຫ້ນອນນຳ.+
12 ປະຊາຊົນຂອງເຈົ້າຮັບສິນບົນເພື່ອຂ້າຄົນ.+ ເຂົາເຈົ້າເອົາເງິນໃຫ້ຄົນອື່ນຢືມແລ້ວເອົາດອກເບ້ຍນຳ+ ແລະຊອກຫາກຳໄລຈາກ*ຜູ້ທີ່ເຂົາເຈົ້າໃຫ້ຢືມ. ເຂົາເຈົ້າຂູດຮີດເອົາເງິນຈາກຄົນອື່ນ.+ ເຈົ້າລືມເຮົາອີ່ຫຼີ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
13 ‘ເຮົາຂີ້ດຽດທີ່ເຈົ້າຊອກຫາກຳໄລແບບບໍ່ສັດຊື່ແລະຂ້າປະຊາຊົນຂອງໂຕເອງ.
14 ໃນມື້ທີ່ເຮົາລົງໂທດເຈົ້າ ເຈົ້າຍັງຈະກ້າຫານແລະເຂັ້ມແຂງບໍ?+ ເຮົາເຢໂຫວາເວົ້າໄວ້ແນວໃດ ເຮົາກໍຈະເຮັດຕາມນັ້ນ.
15 ເຮົາຈະເຮັດໃຫ້ປະຊາຊົນຂອງເຈົ້າກະຈັດກະຈາຍກັນໄປຢູ່ນຳຫຼາຍຊາດ ແລະເຮົາຈະໄລ່ເຂົາເຈົ້າໜີໄປຢູ່ແຜ່ນດິນຕ່າງໆ.+ ເຮົາຈະກຳຈັດການກະທຳທີ່ບໍ່ສະອາດຂອງເຈົ້າ.+
16 ທຸກຊາດຈະດູຖູກເຈົ້າ ແລ້ວເຈົ້າຈະຮູ້ວ່າເຮົາແມ່ນເຢໂຫວາ.’”+
17 ພະເຢໂຫວາເວົ້າກັບຂ້ອຍອີກວ່າ:
18 “ລູກມະນຸດ ພວກອິດສະຣາເອນເປັນຄືກັບຂີ້ແຮ່ທີ່ບໍ່ມີຄ່າຫຍັງສຳລັບເຮົາ. ເຂົາເຈົ້າເປັນຄືກັບທອງແດງ ຊືນ ເຫຼັກ ແລະກົ່ວໃນເຕົາຫຼອມ. ເຂົາເຈົ້າເປັນຄືກັບຂີ້ແຮ່ຂອງເງິນ.+
19 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຍ້ອນພວກເຈົ້າເປັນຄືກັບຂີ້ແຮ່ທີ່ບໍ່ມີຄ່າຫຍັງ+ ເຮົາຈະລວບລວມພວກເຈົ້າໄວ້ນຳກັນຢູ່ເມືອງເຢຣູຊາເລັມ.
20 ຄືກັບທີ່ເງິນ ທອງແດງ ເຫຼັກ ກົ່ວ ແລະຊືນຖືກລວບລວມໄວ້ໃນເຕົາຫຼອມເພື່ອໃຫ້ໄຟຫຼອມຈົນເປື່ອຍ ເຮົາກໍຈະລວບລວມພວກເຈົ້າໄວ້ນຳກັນຍ້ອນວ່າເຮົາໃຈຮ້າຍຫຼາຍ ແລ້ວເຮົາຈະເປົ່າພວກເຈົ້າໃຫ້ເປື່ອຍຄືກັບແຮ່ທາດເຫຼົ່ານັ້ນ.+
21 ເຮົາຈະລວບລວມພວກເຈົ້າໄວ້ນຳກັນ ແລະເຮົາຈະເປົ່າຄວາມໃຈຮ້າຍຂອງເຮົາທີ່ເປັນຄືກັບໄຟໃສ່ພວກເຈົ້າ+ ແລ້ວພວກເຈົ້າຈະເປື່ອຍຢູ່ໃນເມືອງນີ້.+
22 ພວກເຈົ້າຈະເປື່ອຍຢູ່ໃນເມືອງນີ້ຄືກັບທີ່ເງິນເປື່ອຍຢູ່ໃນເຕົາຫຼອມ ແລ້ວພວກເຈົ້າຈະຮູ້ວ່າເຮົາເຢໂຫວາໄດ້ປ່ອຍຄວາມໃຈຮ້າຍໃສ່ພວກເຈົ້າ.’”
23 ພະເຢໂຫວາເວົ້າກັບຂ້ອຍອີກວ່າ:
24 “ລູກມະນຸດ ໃຫ້ເຈົ້າບອກເມືອງນີ້ວ່າ ‘ໃນມື້ທີ່ເຮົາໃຈຮ້າຍ ເຈົ້າຈະເປັນແຜ່ນດິນທີ່ບໍ່ສະອາດແລະຈະບໍ່ມີຝົນຕົກໃສ່.
25 ພວກຜູ້ພະຍາກອນຂອງເຈົ້າໄດ້ວາງແຜນຮ້າຍ.+ ເຂົາເຈົ້າເປັນຄືກັບໂຕສິງທີ່ແຜດສຽງຮ້ອງຕອນຈີກເຫຍື່ອ.+ ເຂົາເຈົ້າກັດກິນປະຊາຊົນ ຍຶດເອົາຊັບສົມບັດກັບເຄື່ອງຂອງທີ່ມີຄ່າ ແລະເຮັດໃຫ້ຫຼາຍຄົນເປັນແມ່ໝ້າຍ.
26 ພວກປະໂລຫິດຂອງເຈົ້າບໍ່ເຮັດຕາມກົດໝາຍຂອງເຮົາ+ແລະໝິ່ນປະໝາດບ່ອນບໍລິສຸດຂອງເຮົາຕະຫຼອດ.+ ເຂົາເຈົ້າບໍ່ຍອມແຍກລະຫວ່າງສິ່ງບໍລິສຸດກັບສິ່ງທີ່ບໍ່ບໍລິສຸດ.+ ເຂົາເຈົ້າບໍ່ໄດ້ສອນວ່າສິ່ງໃດສະອາດແລະສິ່ງໃດບໍ່ສະອາດ.+ ເຂົາເຈົ້າບໍ່ຖືວັນຊະບາໂຕຂອງເຮົາແລະເຂົາເຈົ້າດູຖູກເຮົາ.
27 ພວກເຈົ້ານາຍຂອງເຈົ້າເປັນຄືກັບໝາປ່າທີ່ຈີກເຫຍື່ອ. ເຂົາເຈົ້າທຳຮ້າຍແລະຂ້າປະຊາຊົນເພື່ອຈະໄດ້ເງິນ.+
28 ພວກຜູ້ພະຍາກອນຂອງເຈົ້າປົກປິດຄວາມຊົ່ວຂອງໂຕເອງຄືກັບເອົາປູນຂາວມາໂບກຝາທີ່ແຫງ. ເຂົາເຈົ້າເຫັນນິມິດທີ່ຫຼອກລວງແລະເວົ້າຄຳທຳນາຍຕົວະ.+ ເຂົາເຈົ້າເວົ້າວ່າ “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າຈັ່ງຊີ້” ທັງໆທີ່ເຮົາເຢໂຫວາບໍ່ໄດ້ເວົ້າແບບນັ້ນ.
29 ຄົນໃນແຜ່ນດິນນີ້ມັກສໍ້ໂກງແລະປຸ້ນຄົນອື່ນ.+ ເຂົາເຈົ້າຂົ່ມເຫງຄົນທຸກຍາກ. ເຂົາເຈົ້າສໍ້ໂກງຄົນຕ່າງຊາດແລະຕັດສິນຄະດີຂອງຄົນເຫຼົ່ານັ້ນແບບບໍ່ຍຸຕິທຳ.’
30 ‘ເຮົາໄດ້ຊອກຫາຄົນໜຶ່ງໃນເຂົາເຈົ້າທີ່ຈະແປງກຳແພງຫີນ ຫຼືຢືນຢູ່ຮອຍແຕກຂອງກຳແພງນັ້ນຕໍ່ໜ້າເຮົາເພື່ອປົກປ້ອງແຜ່ນດິນນີ້ບໍ່ໃຫ້ຖືກທຳລາຍ+ ແຕ່ເຮົາກໍບໍ່ເຫັນມີຈັກຄົນ.
31 ຍ້ອນແນວນີ້ ເຮົາຈະປ່ອຍຄວາມໃຈຮ້າຍຂອງເຮົາໃສ່ເຂົາເຈົ້າ ແລະຈະໃຊ້ຄວາມໃຈຮ້າຍຂອງເຮົາທີ່ເປັນຄືກັບໄຟທຳລາຍເຂົາເຈົ້າ. ເຮົາຈະໃຫ້ເຂົາເຈົ້າໄດ້ຮັບຜົນຈາກການກະທຳຂອງໂຕເອງ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
ຂໍ
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ
^ ຫຼື “ຂູດຮີດ”
