ເອເຊກຽນ 28:1-26
28 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດເອີ້ຍ ໃຫ້ເຈົ້າບອກຜູ້ປົກຄອງຂອງເມືອງຕີເຣແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ
“ເຈົ້າຈອງຫອງ+ແລະເວົ້າຕະຫຼອດວ່າເຈົ້າເປັນພະເຈົ້າ
ແລະເຈົ້ານັ່ງຢູ່ບັນລັງຂອງພະເຈົ້າຢູ່ກາງທະເລ.+
ແຕ່ເຈົ້າກໍເປັນພຽງມະນຸດບໍ່ແມ່ນພະເຈົ້າເຖິງເຈົ້າຈະຄິດໃນໃຈວ່າເຈົ້າເປັນພະເຈົ້າ.
3 ເຈົ້າສະຫຼາດກວ່າດານີເອນບໍ?+
ແລະເຈົ້າຮູ້ເລື່ອງທຸກຢ່າງທີ່ເປັນຄວາມລັບບໍ?
4 ເຈົ້າເຮັດໃຫ້ໂຕເອງລວຍດ້ວຍສະຕິປັນຍາແລະຄວາມເຂົ້າໃຈຂອງເຈົ້າ.ເຈົ້າມັກສະສົມເງິນຄຳໄວ້ໃນຄັງຊັບສິນຂອງເຈົ້າ.+
5 ເຈົ້າລວຍຫຼາຍຍ້ອນຄ້າຂາຍເກັ່ງ+ແລະເຈົ້າກໍຈອງຫອງຍ້ອນເຈົ້າລວຍ.”’
6 ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈຶ່ງເວົ້າວ່າ:
“ຍ້ອນເຈົ້າຄິດໃນໃຈວ່າເຈົ້າເປັນພະເຈົ້າ
7 ເຮົາຈະພາຊາດໜຶ່ງທີ່ໂຫດຫ້ຽມທີ່ສຸດມາຕໍ່ສູ້ເຈົ້າ.+ເຂົາເຈົ້າຈະເອົາດາບທຳລາຍທຸກສິ່ງທີ່ງາມໆທີ່ເຈົ້າຫາມາໄດ້ດ້ວຍສະຕິປັນຍາຂອງເຈົ້າແລະຈະເຮັດໃຫ້ຄວາມຈະເລີນຮຸ່ງເຮືອງຂອງເຈົ້າໝົດໄປ.+
8 ເຂົາເຈົ້າຈະເອົາເຈົ້າລົງໄປໃນຂຸມແລະຈະຂ້າເຈົ້າຢ່າງໂຫດຫ້ຽມຢູ່ກາງທະເລ.+
9 ໃນຕອນນັ້ນ ເຈົ້າຍັງຊິເວົ້າກັບຜູ້ທີ່ຂ້າເຈົ້າບໍວ່າ ‘ຂ້ອຍເປັນພະເຈົ້າ’?
ເມື່ອຕົກຢູ່ໃນມືຂອງຄົນທີ່ດູຖູກເຈົ້າ ເຈົ້າກໍເປັນພຽງມະນຸດ ບໍ່ແມ່ນພະເຈົ້າ.”’
10 ‘ເຈົ້າຈະຖືກຄົນຕ່າງຊາດຂ້າ ແລະຈະຕາຍແບບດຽວກັບຄົນທີ່ບໍ່ໄດ້ຮັບສິນຕັດຍ້ອນເຮົາໄດ້ເວົ້າໄວ້ແລ້ວ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າໄວ້ແບບນີ້.”
11 ພະເຢໂຫວາເວົ້າກັບຂ້ອຍອີກວ່າ:
12 “ລູກມະນຸດ ໃຫ້ເຈົ້າຮ້ອງເພງໄວ້ອາໄລເຖິງກະສັດຂອງຕີເຣ. ໃຫ້ບອກລາວວ່າ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ
“ເຈົ້າດີໝົດທຸກຢ່າງແລະບໍ່ມີບ່ອນຕິ.ເຈົ້າສະຫຼາດຫຼາຍ+ແລະງາມທີ່ສຸດ.+
13 ເຈົ້າເຄີຍຢູ່ສວນເອເດັນຂອງພະເຈົ້າ.
ເຈົ້າໃສ່ເຄື່ອງປະດັບທີ່ເປັນເພັດນິນຈິນດາທຸກຊະນິດເຊິ່ງມີແກ້ວພິລາ ແກ້ວໂທພັດສ໌ ຫີນແຈສະເປີ ແກ້ວຄຣິດໂຊໄລທ໌ ຫີນໂອນິກ ຢົກ ແກ້ວໄພລິນ ຫີນເທີຄອຍສ໌+ ແລະມໍລະກົດ.ເຮືອນແລະເບົ້າຂອງເພັດນິນຈິນດາເຫຼົ່ານີ້ເປັນຄຳ.
ສິ່ງເຫຼົ່ານີ້ຖືກກຽມໄວ້ໃນມື້ທີ່ເຈົ້າຖືກສ້າງ.
14 ເຮົາເຄີຍເລືອກເຈົ້າໃຫ້ເປັນຄືກັບເຄຣູບທີ່ເຝົ້າຍາມ.
ເຈົ້າເຄີຍຢູ່ເທິງພູບໍລິສຸດຂອງພະເຈົ້າ+ແລະຍ່າງຢູ່ກອງຫີນທີ່ມີໄຟລຸກຢູ່.
15 ຕັ້ງແຕ່ມື້ທີ່ເຈົ້າຖືກສ້າງ ເຈົ້າເຮັດດີຕະຫຼອດຈົນຮອດມື້ທີ່ເຈົ້າເລີ່ມເຮັດສິ່ງທີ່ຊົ່ວ.+
16 ຍ້ອນການຄ້າຂາຍຂອງເຈົ້າຈະເລີນຮຸ່ງເຮືອງ+ເຈົ້າກໍເລີຍໂຫດຫ້ຽມແລະເລີ່ມເຮັດຜິດ.+
ດັ່ງນັ້ນ ເຮົາຈະໂຍນເຈົ້າຖິ້ມຄືກັບໂຍນແນວທີ່ເປື້ອນອອກຈາກພູຂອງພະເຈົ້າ ແລະໄລ່ເຈົ້າອອກຈາກກອງຫີນທີ່ມີໄຟລຸກຢູ່.ເຄຣູບທີ່ເຝົ້າຍາມເອີ້ຍ ເຮົາຈະທຳລາຍເຈົ້າ.+
17 ເຈົ້າຈອງຫອງຍ້ອນເຈົ້າງາມ.+
ເຈົ້າທຳລາຍຄວາມສະຫຼາດຂອງໂຕເອງຍ້ອນຄວາມຈະເລີນຮຸ່ງເຮືອງຂອງເຈົ້າ.+
ເຮົາຈະຖິ້ມເຈົ້າລົງພື້ນ.+
ເຮົາຈະໃຫ້ພວກກະສັດແນມເບິ່ງຄວາມຈິບຫາຍຂອງເຈົ້າ.
18 ຍ້ອນເຈົ້າເຮັດຜິດຮ້າຍແຮງແລະຄ້າຂາຍແບບບໍ່ສັດຊື່ ເຈົ້າຈຶ່ງເຮັດໃຫ້ບ່ອນນະມັດສະການຂອງເຈົ້າບໍ່ສະອາດ.
ເຮົາຈະເຮັດໃຫ້ໄຟໄໝ້ເຈົ້າຈົນໝົດ.+
ເຮົາຈະເຮັດໃຫ້ເຈົ້າກາຍເປັນຂີ້ເທົ່າຕໍ່ໜ້າທຸກຄົນທີ່ແນມເບິ່ງເຈົ້າ.
19 ທຸກຄົນຈາກຊາດຕ່າງໆທີ່ຮູ້ຈັກເຈົ້າຈະແນມເບິ່ງເຈົ້າດ້ວຍຄວາມຕົກໃຈ.+
ຈຸດຈົບຂອງເຈົ້າຈະເກີດຂຶ້ນແບບກະທັນຫັນແລະເປັນຕາຢ້ານແລະເຈົ້າຈະດັບສູນຕະຫຼອດໄປ.”’”+
20 ພະເຢໂຫວາເວົ້າກັບຂ້ອຍອີກວ່າ:
21 “ລູກມະນຸດເອີ້ຍ ໃຫ້ເຈົ້າປິ່ນໜ້າໄປທາງເມືອງຊີໂດນ+ແລະພະຍາກອນກ່ຽວກັບເມືອງນັ້ນ.
22 ໃຫ້ເຈົ້າເວົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ
“ຊີໂດນເອີ້ຍ ເຮົາຈະເປັນສັດຕູກັບເຈົ້າ ແລະເມື່ອຄົນເຫັນສິ່ງທີ່ເຮົາເຮັດກັບເຈົ້າ ເຂົາເຈົ້າກໍຈະຍົກຍ້ອງເຮົາ. ເມື່ອເຮົາລົງໂທດເຈົ້າແລະພິສູດວ່າເຮົາເປັນພະເຈົ້າທີ່ບໍລິສຸດທຸກຄົນຈະຮູ້ວ່າເຮົາແມ່ນເຢໂຫວາ.
23 ເຮົາຈະເຮັດໃຫ້ເກີດໂລກລະບາດໃນເມືອງນັ້ນ ແລະເລືອດຈະໄຫຼເຕັມຫົນທາງ.
ເມື່ອດາບມາຕໍ່ສູ້ເມືອງນັ້ນຈາກທຸກທາງ ຫຼາຍຄົນຈະຖືກຂ້າແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ.+
24 ຈາກນັ້ນ ຢູ່ອ້ອມຂ້າງພວກອິດສະຣາເອນກໍຈະບໍ່ມີຄົນທີ່ເວົ້າເຍາະເຍີ້ຍເຂົາເຈົ້າ ເຊິ່ງເຄີຍເຮັດໃຫ້ເຂົາເຈົ້າເຈັບຄືກັບຖືກໜາມແທງ+ ແລ້ວທຸກຄົນຈະຮູ້ວ່າເຮົາເຢໂຫວາແມ່ນພະເຈົ້າຜູ້ຍິ່ງໃຫຍ່ສູງສຸດ.”’
25 ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເມື່ອເຮົາລວບລວມພວກອິດສະຣາເອນທີ່ກະຈັດກະຈາຍກັນໄປຢູ່ນຳຊາດຕ່າງໆໃຫ້ຄືນມາອີກ+ ທຸກຊາດກໍຈະຍົກຍ້ອງເຮົາ.+ ພວກອິດສະຣາເອນຈະໄດ້ຢູ່ແຜ່ນດິນຂອງໂຕເອງ+ທີ່ເຮົາເອົາໃຫ້ຢາໂຄບຜູ້ຮັບໃຊ້ຂອງເຮົາ.+
26 ເຂົາເຈົ້າຈະຢູ່ຫັ້ນຢ່າງປອດໄພ.+ ເຂົາເຈົ້າຈະປຸກເຮືອນແລະເຮັດສວນໝາກລະແຊັງ.+ ເຂົາເຈົ້າຈະຢູ່ຢ່າງສະຫງົບສຸກເມື່ອເຮົາລົງໂທດຄົນທີ່ຢູ່ອ້ອມຂ້າງເຊິ່ງເຍາະເຍີ້ຍເຂົາເຈົ້າ+ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາພະເຈົ້າຂອງເຂົາເຈົ້າ.”’”