ເອເຊກຽນ 3:1-27
3 ຈາກນັ້ນ ເພິ່ນບອກຂ້ອຍວ່າ: “ລູກມະນຸດ ໃຫ້ກິນສິ່ງທີ່ຢູ່ຕໍ່ໜ້າເຈົ້າ. ກິນມ້ວນໜັງສືນີ້ ແລ້ວໄປບອກຊາດອິດສະຣາເອນ+
2 ຂ້ອຍຈຶ່ງອ້າປາກແລະເພິ່ນກໍໃຫ້ຂ້ອຍກິນມ້ວນໜັງສືນັ້ນ.
3 ເພິ່ນເວົ້າຕໍ່ອີກວ່າ: “ລູກມະນຸດ ໃຫ້ເຈົ້າກິນມ້ວນໜັງສືທີ່ເຮົາເອົາໃຫ້ເຈົ້າ. ໃຫ້ເຈົ້າກິນຈົນອີ່ມ.” ເມື່ອຂ້ອຍກິນ ມັນກໍຫວານຄືກັບນ້ຳເຜີ້ງ.+
4 ເພິ່ນເວົ້າກັບຂ້ອຍວ່າ: “ລູກມະນຸດ ໃຫ້ເຈົ້າໄປຫາຊາດອິດສະຣາເອນແລະບອກເຂົາເຈົ້າຕາມທີ່ເຮົາເວົ້າ.
5 ເຮົາບໍ່ໄດ້ສົ່ງເຈົ້າໄປຫາຊາດທີ່ເວົ້າພາສາທີ່ເຂົ້າໃຈຍາກຫຼືພາສາທີ່ເຈົ້າເວົ້າບໍ່ໄດ້ ແຕ່ເຮົາສົ່ງເຈົ້າໄປຫາຊາດອິດສະຣາເອນ.
6 ເຮົາບໍ່ໄດ້ສົ່ງເຈົ້າໄປຫາຊາດຕ່າງໆທີ່ເວົ້າພາສາທີ່ເຂົ້າໃຈຍາກຫຼືພາສາທີ່ເຈົ້າເວົ້າບໍ່ໄດ້ ຖ້າເຮົາສົ່ງເຈົ້າໄປຫາຊາດເຫຼົ່ານັ້ນ ເຂົາເຈົ້າຈະຟັງເຈົ້າ.+
7 ແຕ່ຊາດອິດສະຣາເອນຈະບໍ່ຟັງເຈົ້າ ຍ້ອນເຂົາເຈົ້າບໍ່ຢາກຟັງເຮົາ.+ ທຸກຄົນໃນຊາດນີ້ຫົວແຂງແລະດື້ດ້ານ.+
8 ເຮົາໄດ້ເຮັດໃຫ້ເຈົ້າດື້ດ້ານແລະບໍ່ຍອມໃຜຄືກັບທີ່ເຂົາເຈົ້າເປັນ.*+
9 ເຮົາໄດ້ເຮັດໃຫ້ຫົວເຈົ້າແຂງກວ່າຫີນທີ່ແຂງໆ*+ແລະແຂງກວ່າເພັດອີກ. ບໍ່ຕ້ອງຢ້ານເຂົາເຈົ້າແລະບໍ່ຕ້ອງຢ້ານສີໜ້າຂອງເຂົາເຈົ້າ+ ຍ້ອນເຂົາເຈົ້າເປັນຊາດທີ່ມັກກະບົດ.”
10 ເພິ່ນເວົ້າກັບຂ້ອຍຕໍ່ວ່າ: “ລູກມະນຸດ ໃຫ້ຕັ້ງໃຈຟັງແລະຈື່ທຸກສິ່ງທີ່ເຮົາເວົ້າກັບເຈົ້າ.
11 ໃຫ້ເຈົ້າໄປເວົ້າກັບຄົນຊາດດຽວກັນກັບເຈົ້າທີ່ເປັນຊະເລີຍ+ ບໍ່ວ່າເຂົາເຈົ້າຈະຟັງຫຼືບໍ່ຟັງເຈົ້າ.+ ໃຫ້ບອກເຂົາເຈົ້າວ່າ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.’”
12 ຈາກນັ້ນ ພະລັງຂອງພະເຈົ້າ*ກໍພາຂ້ອຍໄປ+ ແລະຂ້ອຍໄດ້ຍິນສຽງດັງໆຢູ່ທາງຫຼັງຂ້ອຍເວົ້າວ່າ: “ຂໍໃຫ້ພະເຢໂຫວາໄດ້ຮັບການສັນລະເສີນຈາກບ່ອນທີ່ເພິ່ນຢູ່ ຍ້ອນສະຫງ່າລາສີຂອງເພິ່ນ.”
13 ຂ້ອຍໄດ້ຍິນສຽງສິ່ງທີ່ມີຊີວິດຕົບປີກ+ ສຽງກົງລໍ້ທີ່ຢູ່ທາງຂ້າງເຂົາເຈົ້າ+ ແລະສຽງດັງໆອີກເທື່ອໜຶ່ງ.
14 ພະລັງຂອງພະເຈົ້າ*ໄດ້ພາຂ້ອຍໄປ. ຂ້ອຍຄຽດແລະໃຈຮ້າຍຫຼາຍ ແຕ່ພະລັງຂອງພະເຢໂຫວາກໍມາຢູ່ນຳຂ້ອຍ.*
15 ຂ້ອຍໄປຫາປະຊາຊົນທີ່ເປັນຊະເລີຍຢູ່ເຕນອາບີບທີ່ອາໄສຢູ່ແຄມແມ່ນ້ຳເກບາ.+ ຂ້ອຍຢູ່ຫັ້ນກັບເຂົາເຈົ້າແບບມຶນໆງົງໆ+ທັງໝົດ 7 ມື້.
16 ຫຼັງຈາກ 7 ມື້ ພະເຢໂຫວາກໍເວົ້າກັບຂ້ອຍວ່າ:
17 “ລູກມະນຸດ ເຮົາແຕ່ງຕັ້ງເຈົ້າໃຫ້ເປັນຄົນຍາມຂອງຊາດອິດສະຣາເອນ.+ ເຈົ້າໄດ້ຍິນເຮົາບອກແນວໃດ ເຈົ້າກໍຕ້ອງເຕືອນເຂົາເຈົ້າຕາມນັ້ນ.+
18 ຖ້າເຮົາບອກຄົນຊົ່ວວ່າ ‘ເຈົ້າຈະຕາຍ’ ແຕ່ເຈົ້າບໍ່ບອກລາວ ແລະບໍ່ໄດ້ເຕືອນລາວໃຫ້ປ່ຽນແນວທາງຊີວິດຂອງໂຕເອງ ລາວກໍຈະຕາຍ.+ ລາວຈະຕາຍຍ້ອນລາວເປັນຄົນຊົ່ວ+ ແລະເຈົ້າເອງກໍຕ້ອງຮັບຜິດຊອບທີ່ລາວຕາຍ.*+
19 ແຕ່ຖ້າເຈົ້າເຕືອນຄົນຊົ່ວຜູ້ນັ້ນແລ້ວ ແລະລາວບໍ່ໄດ້ປ່ຽນແນວທາງຊີວິດຂອງໂຕເອງ ລາວຈະຕາຍຍ້ອນລາວເປັນຄົນຊົ່ວ ແຕ່ເຈົ້າຈະລອດ.+
20 ຖ້າຄົນດີເຊົາເຮັດສິ່ງທີ່ຖືກຕ້ອງແລ້ວໄປເຮັດຊົ່ວ* ເຮົາຈະໃຫ້ມີແນວຂວາງທາງລາວ ລາວຈະສະດຸດແລະຕາຍ.+ ຖ້າເຈົ້າບໍ່ເຕືອນລາວ ລາວຈະຕາຍຍ້ອນຄວາມຜິດຂອງໂຕເອງ ແລະເຮົາກໍຈະລືມສິ່ງດີໆທີ່ລາວໄດ້ເຮັດ ແຕ່ເຮົາຈະໃຫ້ເຈົ້າຮັບຜິດຊອບທີ່ລາວຕາຍ.+
21 ແຕ່ຖ້າເຈົ້າເຕືອນຄົນດີຜູ້ນັ້ນ ແລະລາວກໍບໍ່ໄດ້ເຮັດຜິດ ລາວຈະບໍ່ຕາຍຍ້ອນວ່າເຈົ້າໄດ້ເຕືອນລາວ+ ແລະເຈົ້າກໍຈະລອດຄືກັນ.”
22 ແລ້ວພະລັງ*ຂອງພະເຢໂຫວາກໍມາຢູ່ນຳຂ້ອຍ. ເພິ່ນເວົ້າກັບຂ້ອຍວ່າ: “ໃຫ້ເຈົ້າໄປທົ່ງພຽງ ແລ້ວເຮົາຈະເວົ້າກັບເຈົ້າຢູ່ຫັ້ນ.”
23 ຂ້ອຍຈຶ່ງລຸກຂຶ້ນແລະໄປທົ່ງພຽງ. ຂ້ອຍເຫັນແສງລັດສະໝີຂອງພະເຢໂຫວາຢູ່ຫັ້ນ.+ ແສງນັ້ນຄືກັບແສງລັດສະໝີທີ່ຢູ່ແຄມແມ່ນ້ຳເກບາ.+ ຂ້ອຍຈຶ່ງໝູບໜ້າລົງພື້ນ.
24 ຈາກນັ້ນ ຂ້ອຍກໍໄດ້ຮັບພະລັງຂອງພະເຈົ້າ ຂ້ອຍຈຶ່ງຢືນຂຶ້ນ+ ແລ້ວເພິ່ນກໍເວົ້າກັບຂ້ອຍວ່າ:
“ໃຫ້ເຈົ້າເຂົ້າໄປໃນເຮືອນແລະຂັງໂຕເອງຢູ່ຫັ້ນ.
25 ລູກມະນຸດເອີ້ຍ ຈະມີຄົນເອົາເຊືອກມາມັດເຈົ້າໄວ້ ແລະເຈົ້າຈະອອກໄປທາງນອກບໍ່ໄດ້.
26 ເຮົາຈະເຮັດໃຫ້ລີ້ນຂອງເຈົ້າຕິດຢູ່ເພດານປາກ. ເຈົ້າຈະເວົ້າກັບເຂົາເຈົ້າບໍ່ໄດ້ແລະເຕືອນເຂົາເຈົ້າບໍ່ໄດ້ ຍ້ອນເຂົາເຈົ້າເປັນຊາດທີ່ມັກກະບົດ.
27 ແຕ່ເມື່ອເຮົາເວົ້າກັບເຈົ້າ ເຮົາຈະໃຫ້ເຈົ້າເວົ້າໄດ້ ແລ້ວເຈົ້າຈະບອກເຂົາເຈົ້າວ່າ+ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.’ ຖ້າຜູ້ໃດຟັງເຈົ້າກໍໃຫ້ເຂົາເຈົ້າຟັງ+ ແຕ່ຖ້າຜູ້ໃດບໍ່ຢາກຟັງກໍບໍ່ຕ້ອງຟັງ ຍ້ອນເຂົາເຈົ້າເປັນຊາດທີ່ມັກກະບົດ.”+
ຂໍ ຄວາມ ໄຂ ເງື່ອນ
^ ແປຕາມໂຕວ່າ “ເຮົາໄດ້ເຮັດໃຫ້ໜ້າເຈົ້າແຂງຄືກັບໜ້າເຂົາເຈົ້າ ແລະເຮັດໃຫ້ໜ້າຜາກເຈົ້າແຂງຄືກັບໜ້າຜາກເຂົາເຈົ້າ”
^ ຫີນຊະນິດນີ້ແຂງກວ່າເຫຼັກ
^ ໃນພາສາເຮັບເຣີຄຳນີ້ອາດໝາຍເຖິງພະລັງຂອງພະເຈົ້າຫຼືທູດສະຫວັນ
^ ໃນພາສາເຮັບເຣີຄຳນີ້ອາດໝາຍເຖິງພະລັງຂອງພະເຈົ້າຫຼືທູດສະຫວັນ
^ ແປຕາມໂຕວ່າ “ມືຂອງພະເຢໂຫວາກໍວາງເທິງຂ້ອຍແຮງໆ”
^ ຫຼື “ເຮົາຈະເອົາເລືອດຂອງລາວຈາກເຈົ້າ”
^ ຫຼື “ເຮັດສິ່ງທີ່ບໍ່ຍຸຕິທຳ”
^ ແປຕາມໂຕວ່າ “ມື”