ເອເຊກຽນ 32:1-32
32 ໃນວັນທີ 1 ເດືອນທີ 12 ຂອງປີທີ 12* ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດ ໃຫ້ເຈົ້າຮ້ອງເພງໄວ້ອາໄລໃຫ້ກະສັດຂອງເອຢິບວ່າ‘ເຈົ້າເຄີຍເປັນຄືກັບໂຕສິງທີ່ແຂງແຮງໃນທ່າມກາງຊາດຕ່າງໆແຕ່ເຈົ້າຖືກທຳລາຍແລ້ວ.
ເຈົ້າເຄີຍເປັນຄືກັບສັດໃຫຍ່ໃນທະເລ+ທີ່ຟາດນ້ຳໃນແມ່ນ້ຳຂອງເຈົ້າໃຫ້ຟົ້ງຂຶ້ນ.ເຈົ້າເອົາຕີນກວນນ້ຳໃຫ້ຂຸ່ນແລະເຮັດໃຫ້ແມ່ນ້ຳເປື້ອນ.’
3 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ
‘ເຮົາຈະໃຫ້ຊາດຕ່າງໆມາລວມກັນເພື່ອໂຍນຕານ່າງລ່າສັດຂອງເຮົາງວມເຈົ້າແລະເຂົາເຈົ້າຈະໃຊ້ດາງກວາດຂອງເຮົາລາກເຈົ້າຂຶ້ນມາ.
4 ເຮົາຈະໂຍນເຈົ້າຖິ້ມຢູ່ເທິງດິນແລະຈະປະເຈົ້າໄວ້ຢູ່ທົ່ງຫຍ້າ.
ເຮົາຈະໃຫ້ນົກທຸກໂຕມາຈັບຢູ່ເທິງເຈົ້າແລະເຮົາຈະໃຫ້ສັດປ່າທຸກໂຕໃນໂລກກິນເຈົ້າຈົນອີ່ມ.+
5 ເຮົາຈະໂຍນຊີ້ນຂອງເຈົ້າຖິ້ມຢູ່ຕາມພູແລະຈະເຮັດໃຫ້ເສດຊາກສົບຂອງເຈົ້າຢາຍຢູ່ຕາມຮ່ອມພູ.+
6 ເຮົາຈະເຮັດໃຫ້ພູປຽກດ້ວຍເລືອດຂອງເຈົ້າແລະເລືອດຂອງເຈົ້າຈະເຕັມແມ່ນ້ຳ.’
7 ‘ເມື່ອເຈົ້າຖືກທຳລາຍ ເຮົາຈະປົກທ້ອງຟ້າໄວ້ແລະເຮັດໃຫ້ດາວມືດ.
ເຮົາຈະໃຫ້ຂີ້ເຝື້ອບັງຕາເວັນໄວ້ແລະເດືອນຈະບໍ່ສ່ອງແສງ.+
8 ເຮົາຈະເຮັດໃຫ້ໜ່ວຍທີ່ສ່ອງແສງຢູ່ເທິງຟ້າທຸກໜ່ວຍມືດຍ້ອນເຈົ້າແລະຈະເອົາຄວາມມືດປົກແຜ່ນດິນຂອງເຈົ້າ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
9 ‘ເຮົາຈະເຮັດໃຫ້ຄົນໃນຫຼາຍຊາດທຸກໃຈເມື່ອເຮົາພາຄົນຂອງເຈົ້າໄປເປັນຊະເລີຍຢູ່ຊາດອື່ນໄປຢູ່ແຜ່ນດິນທີ່ເຈົ້າບໍ່ຮູ້ຈັກ.+
10 ເຮົາຈະເຮັດໃຫ້ຫຼາຍຊາດຕົກໃຈແລະກະສັດຂອງເຂົາເຈົ້າຈະຢ້ານຈົນໂຕສັ່ນຕອນທີ່ເຮົາແກວ່ງດາບຈະຟັນເຈົ້າຕໍ່ໜ້າເຂົາເຈົ້າ.
ເຂົາເຈົ້າຈະໂຕສັ່ນບໍ່ເຊົາຍ້ອນຢ້ານຕາຍໃນມື້ທີ່ເຈົ້າຖືກທຳລາຍ.’
11 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ
‘ດາບຂອງກະສັດບາບີໂລນຈະມາໂຈມຕີເຈົ້າ.+
12 ເຮົາຈະໃຫ້ພວກທະຫານທີ່ເກັ່ງໆເອົາດາບຂ້າປະຊາຊົນຂອງເຈົ້າ.ເຂົາເຈົ້າເປັນຊາດທີ່ໂຫດຫ້ຽມທີ່ສຸດ.+
ເຂົາເຈົ້າຈະເຮັດໃຫ້ເອຢິບເຊົາຈອງຫອງ ແລະທຸກຄົນທີ່ຢູ່ຫັ້ນຈະຖືກກຳຈັດ.+
13 ເຮົາຈະທຳລາຍຝູງສັດທັງໝົດຂອງເຈົ້າທີ່ຢູ່ແຄມແມ່ນ້ຳ+ແລະຢູ່ຫັ້ນຈະບໍ່ມີຄົນຫຼືສັດຢຽບນ້ຳໃຫ້ຂຸ່ນອີກເລີຍ.’+
14 ‘ເຮົາຈະເຮັດໃຫ້ນ້ຳໃສແລະເຮົາຈະເຮັດໃຫ້ນ້ຳໃນແມ່ນ້ຳໄຫຼຄືກັບນ້ຳມັນໄຫຼ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
15 ‘ເມື່ອເຮົາເຮັດໃຫ້ເອຢິບຮ້າງເປົ່າ ແຜ່ນດິນນັ້ນກໍຈະບໍ່ເຫຼືອຫຍັງ+ແລະເມື່ອເຮົາລົງໂທດທຸກຄົນທີ່ຢູ່ຫັ້ນເຂົາເຈົ້າກໍຈະຮູ້ວ່າເຮົາແມ່ນເຢໂຫວາ.+
16 ນີ້ແມ່ນເພງໄວ້ອາໄລ ແລະຄົນຈະໄດ້ຮ້ອງເພງນີ້ແທ້ໆ.ພວກຜູ້ຍິງຂອງຊາດຕ່າງໆຈະຮ້ອງເພງນີ້.
ເຂົາເຈົ້າຈະຮ້ອງເພງນີ້ໃຫ້ເອຢິບແລະທຸກຄົນທີ່ຢູ່ຫັ້ນ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
17 ຫຼັງຈາກນັ້ນ ໃນວັນທີ 15 ຂອງເດືອນດຽວກັນໃນປີທີ 12 ພະເຢໂຫວາເວົ້າກັບຂ້ອຍອີກວ່າ:
18 “ລູກມະນຸດ ໃຫ້ເຈົ້າຮ້ອງໄຫ້ເພື່ອປະຊາຊົນໃນເອຢິບ ແລະເວົ້າວ່າເຂົາເຈົ້າກັບຄົນໃນຊາດທີ່ເຂັ້ມແຂງຈະຖືກທຳລາຍຄືກັບທຸກຄົນທີ່ຕາຍ*ແລ້ວ.
19 ‘ເຈົ້າຄິດວ່າເຈົ້າງາມກວ່າຄົນອື່ນບໍ? ເຈົ້າຈະຕາຍແລະນອນຢູ່ກັບພວກທີ່ບໍ່ໄດ້ຮັບສິນຕັດ.’*
20 ‘ພວກເອຢິບຈະນອນຕາຍຢູ່ກັບຄົນທີ່ຖືກຂ້າດ້ວຍດາບ.+ ປະເທດຂອງເຂົາເຈົ້າຖືກທຳລາຍດ້ວຍດາບແລ້ວ. ໃຫ້ລາກເອຢິບກັບປະຊາຊົນທຸກຄົນໃນແຜ່ນດິນນັ້ນໄປຖິ້ມ.
21 ພວກທະຫານທີ່ເກັ່ງໆທີ່ຢູ່ໃນບ່ອນຝັງສົບ*ຈະເວົ້າກັບລາວ*ແລະຜູ້ຊ່ວຍຂອງລາວ. ພວກເອຢິບຈະຖືກຂ້າດ້ວຍດາບແທ້ໆ ແລະເຂົາເຈົ້າຈະນອນຕາຍຄືກັບຄົນທີ່ບໍ່ໄດ້ຮັບສິນຕັດ.
22 ອັດຊີເຣຍກັບປະຊາຊົນທັງໝົດຂອງຊາດນັ້ນຢູ່ຫັ້ນ. ບ່ອນຝັງສົບຂອງເຂົາເຈົ້າຢູ່ອ້ອມກະສັດຂອງເຂົາເຈົ້າ. ທຸກຄົນຖືກຂ້າດ້ວຍດາບ.+
23 ບ່ອນຝັງສົບຂອງອັດຊີເຣຍຢູ່ບ່ອນທີ່ເລິກໆຂອງຂຸມ ແລະປະຊາຊົນທຸກຄົນກໍຢູ່ອ້ອມບ່ອນຝັງສົບນັ້ນ. ທຸກຄົນຖືກຂ້າດ້ວຍດາບ ຍ້ອນຕອນທີ່ເຂົາເຈົ້າມີຊີວິດຢູ່ ເຂົາເຈົ້າເຮັດໃຫ້ຄົນຢ້ານຫຼາຍ.
24 ເອລາມ+ກໍຢູ່ຫັ້ນຄືກັນ ແລະປະຊາຊົນຂອງເອລາມກໍຢືນຢູ່ອ້ອມບ່ອນຝັງສົບຂອງແຜ່ນດິນນັ້ນ. ເຂົາເຈົ້າຖືກຂ້າດ້ວຍດາບ. ເຂົາເຈົ້າລົງໄປລຸ່ມພື້ນດິນໂດຍບໍ່ໄດ້ຮັບສິນຕັດ. ຕອນທີ່ເຂົາເຈົ້າມີຊີວິດຢູ່ ເຂົາເຈົ້າເຮັດໃຫ້ຄົນຢ້ານຫຼາຍ. ຕອນນີ້ ເຂົາເຈົ້າຈະອັບອາຍຂາຍໜ້າພ້ອມກັບຄົນທີ່ກຳລັງຈະລົງໄປໃນຂຸມ.
25 ບ່ອນຝັງສົບຖືກກຽມໄວ້ໃຫ້ເອລາມກັບຄົນທີ່ຖືກຂ້າແລ້ວ ແລະປະຊາຊົນທຸກຄົນຢູ່ອ້ອມບ່ອນຝັງສົບນັ້ນ. ເຂົາເຈົ້າບໍ່ໄດ້ຮັບສິນຕັດແລະຖືກຂ້າດ້ວຍດາບ ຍ້ອນຕອນທີ່ເຂົາເຈົ້າມີຊີວິດຢູ່ ເຂົາເຈົ້າເຮັດໃຫ້ຄົນຢ້ານຫຼາຍ. ເຂົາເຈົ້າຈະອັບອາຍຂາຍໜ້າພ້ອມກັບຄົນທີ່ກຳລັງຈະລົງໄປໃນຂຸມ. ເອລາມຖືກຝັງໄວ້ກັບຄົນທີ່ຖືກຂ້າ.
26 ເມເຊກກັບຕູບານ+ ແລະກອງທັບທັງໝົດຂອງເຂົາເຈົ້າກໍຢູ່ຫັ້ນ. ບ່ອນຝັງສົບຂອງທຸກຄົນຢູ່ອ້ອມກະສັດຂອງເຂົາເຈົ້າ. ທຸກຄົນບໍ່ໄດ້ຮັບສິນຕັດແລະຖືກດາບແທງຈົນຊອດ ຍ້ອນວ່າຕອນທີ່ເຂົາເຈົ້າມີຊີວິດຢູ່ ເຂົາເຈົ້າເຮັດໃຫ້ຄົນຢ້ານຫຼາຍ.
27 ເຂົາເຈົ້າຈະໄປຢູ່ກັບພວກທະຫານທີ່ເກັ່ງໆທີ່ບໍ່ໄດ້ຮັບສິນຕັດ ແລະນອນຢູ່ບ່ອນຝັງສົບ*ພ້ອມກັບອາວຸດຂອງໂຕເອງ. ເຂົາເຈົ້າຈະເອົາດາບໄວ້ຢູ່ກ້ອງຫົວ* ແລະກະດູກຂອງເຂົາເຈົ້າຈະຕ້ອງຮັບໂທດສຳລັບຄວາມຜິດທີ່ເຂົາເຈົ້າເຮັດ ຍ້ອນວ່າຕອນທີ່ທະຫານທີ່ເກັ່ງໆເຫຼົ່ານີ້ມີຊີວິດຢູ່ ເຂົາເຈົ້າເຮັດໃຫ້ຄົນຢ້ານຫຼາຍ.
28 ສ່ວນເຈົ້າ* ເຈົ້າຈະຖືກທຳລາຍນຳພວກທີ່ບໍ່ໄດ້ຮັບສິນຕັດ ແລະເຈົ້າຈະນອນຕາຍຢູ່ກັບຄົນທີ່ຖືກຂ້າດ້ວຍດາບ.
29 ເອໂດມ+ກໍຢູ່ຫັ້ນ ພວກກະສັດກັບຫົວໜ້າທຸກຄົນຂອງເອໂດມກໍນອນຢູ່ກັບຄົນທີ່ຖືກຂ້າດ້ວຍດາບ ເຖິງວ່າເຂົາເຈົ້າມີອຳນາດຫຼາຍ. ພວກນີ້ກໍຄືກັນຈະນອນຢູ່ກັບຄົນທີ່ບໍ່ໄດ້ຮັບສິນຕັດ+ແລະຄົນທີ່ກຳລັງຈະລົງໄປໃນຂຸມ.
30 ຢູ່ຫັ້ນ ພວກຜູ້ປົກຄອງ*ທຸກຄົນຈາກທິດເໜືອກັບຄົນຊີໂດນທັງໝົດ+ຈະລົງໄປໃນບ່ອນຝັງສົບດ້ວຍຄວາມອັບອາຍພ້ອມກັບຄົນທີ່ຖືກຂ້າ ທັງໆທີ່ເຂົາເຈົ້າເຄີຍເຮັດໃຫ້ຄົນອື່ນຢ້ານຍ້ອນມີອຳນາດຫຼາຍ. ເຂົາເຈົ້າບໍ່ໄດ້ຮັບສິນຕັດແລະຈະນອນຕາຍຢູ່ກັບຄົນທີ່ຖືກຂ້າດ້ວຍດາບ. ເຂົາເຈົ້າຈະອັບອາຍຂາຍໜ້າພ້ອມກັບຄົນທີ່ກຳລັງຈະລົງໄປໃນຂຸມ.
31 ຟາໂຣ*ຈະເຫັນເລື່ອງທັງໝົດນີ້ ແລະລາວຈະສະບາຍໃຈຂຶ້ນໃນສິ່ງທີ່ເກີດຂຶ້ນກັບກອງທັບຂອງລາວ.+ ຟາໂຣແລະກອງທັບຂອງລາວຈະຖືກຂ້າດ້ວຍດາບ. ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
32 ຕອນທີ່ຟາໂຣມີຊີວິດຢູ່ ລາວເຮັດໃຫ້ຄົນຢ້ານຫຼາຍ. ຍ້ອນແນວນີ້ ຟາໂຣກັບກອງທັບທັງໝົດຂອງລາວຈະຕາຍກັບຄົນທີ່ບໍ່ໄດ້ຮັບສິນຕັດແລະກັບຄົນທີ່ຖືກຂ້າດ້ວຍດາບ.’ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
ຂໍ
^ ໝາຍເຖິງປີທີ 12 ທີ່ກະສັດເຢໂຮຢາກິນ ເອເຊກຽນ ແລະຄົນຢິວຄົນອື່ນໆຖືກຈັບໄປເປັນຊະເລີຍ. ເບິ່ງ ອຊກ 1:2.
^ ແປຕາມໂຕວ່າ “ລົງໄປໃນຂຸມ”
^ ຕັດໜັງຫຸ້ມປາຍອະໄວຍະວະເພດຊາຍ
^ ເບິ່ງສ່ວນອະທິບາຍຄຳສັບ
^ ອາດໝາຍເຖິງກະສັດຂອງເອຢິບ
^ ເບິ່ງສ່ວນອະທິບາຍຄຳສັບ
^ ອາດໝາຍຄວາມວ່າພວກທະຫານຖືກຝັງໄວ້ກັບດາບຂອງເຂົາເຈົ້າເພື່ອເປັນການໃຫ້ກຽດ
^ ອາດໝາຍເຖິງເອຢິບຫຼືກະສັດຂອງເອຢິບ
^ ຫຼື “ຜູ້ນຳ”
^ ນີ້ແມ່ນຕຳແໜ່ງກະສັດຂອງເອຢິບ
