ເອເຊກຽນ 35:1-15
-
ຄຳພະຍາກອນກ່ຽວກັບພູຢູ່ເສອີ (1-15)
35 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດເອີ້ຍ ໃຫ້ເຈົ້າປິ່ນໜ້າໄປທາງເຂດພູໃນເສອີ+ ແລ້ວພະຍາກອນກ່ຽວກັບເຂດນັ້ນ.+
3 ໃຫ້ເຈົ້າເວົ້າກັບເຂດນັ້ນແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ເຂດພູໃນເສອີເອີ້ຍ ເຮົາຈະເປັນສັດຕູກັບເຈົ້າ. ເຮົາຈະລົງໂທດເຈົ້າແລະຈະເຮັດໃຫ້ເຈົ້າຮ້າງເປົ່າ.+
4 ເຮົາຈະເຮັດໃຫ້ເມືອງຕ່າງໆຂອງເຈົ້າເປັນຊາກຫັກພັງ ແລະເຈົ້າຈະກາຍເປັນບ່ອນທີ່ຮ້າງເປົ່າ+ ແລ້ວເຈົ້າຈະຮູ້ວ່າເຮົາແມ່ນເຢໂຫວາ.
5 ພວກເຈົ້າເຮັດບໍ່ດີໃຫ້ພວກອິດສະຣາເອນບໍ່ຢຸດບໍ່ເຊົາ+ ແລະເຮັດໃຫ້ເຂົາເຈົ້າຖືກຂ້າດ້ວຍດາບໃນມື້ທີ່ເຂົາເຈົ້າເຈິຄວາມຈິບຫາຍ ເຊິ່ງເປັນມື້ທີ່ເຂົາເຈົ້າຖືກລົງໂທດຂັ້ນສຸດທ້າຍ.”’+
6 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ດັ່ງນັ້ນ ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ເຮົາຈະໃຫ້ເຈົ້າຖືກຂ້າ ແລະເຈົ້າຈະບໍ່ມີທາງໜີລອດໄດ້.+ ຍ້ອນເຈົ້າເຮັດໃຫ້ຄົນທີ່ເຈົ້າຊັງຕ້ອງຕາຍ ບັດນີ້ເຈົ້າເອງກໍຕ້ອງຕາຍຄືກັນ.+
7 ເຮົາຈະເຮັດໃຫ້ເຂດພູໃນເສອີຮ້າງເປົ່າ.+ ເຮົາຈະທຳລາຍຄົນທີ່ຍ່າງຜ່ານແລະຄົນທີ່ກັບຄືນມາເຂດນີ້.
8 ເຮົາຈະໃຫ້ພູໃນເຂດນີ້ມີແຕ່ສົບຄົນຕາຍ. ຄົນທີ່ຖືກຂ້າດ້ວຍດາບຈະນອນຕາຍຢູ່ໂນນພູ ຮ່ອມພູ ແລະແມ່ນ້ຳທຸກສາຍຂອງເຈົ້າ.
9 ເຮົາຈະເຮັດໃຫ້ເຈົ້າຮ້າງເປົ່າຕະຫຼອດໄປ ແລະເມືອງຕ່າງໆຂອງເຈົ້າກໍຈະບໍ່ມີຄົນອາໄສຢູ່+ ແລ້ວເຈົ້າຈະຮູ້ວ່າເຮົາແມ່ນເຢໂຫວາ.’
10 ທັງໆທີ່ເຮົາເຢໂຫວາຢູ່ກັບຊາດອິດສະຣາເອນແລະຢູດາ ແຕ່ເຈົ້າກໍຍັງເວົ້າວ່າ ‘ສອງຊາດແລະສອງແຜ່ນດິນນີ້ຈະເປັນຂອງຂ້ອຍ ແລະຂ້ອຍຈະຄອບຄອງມັນ.’+
11 ຍ້ອນແນວນີ້ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈຶ່ງເວົ້າວ່າ ‘ເຮົາສາບານວ່າຕາບໃດທີ່ເຮົາຍັງມີຊີວິດຢູ່ ເຈົ້າໃຈຮ້າຍ ອິດສາ ແລະຊັງປະຊາຊົນຂອງເຮົາແນວໃດ+ ເຮົາກໍຈະເຮັດກັບເຈົ້າແບບນັ້ນ.
12 ເຮົາຈະເຮັດໃຫ້ເຂົາເຈົ້າຮູ້ຈັກເຮົາເມື່ອເຮົາຕັດສິນເຈົ້າ. ແລ້ວເຈົ້າຈະຮູ້ວ່າເຮົາເຢໂຫວາໄດ້ຍິນຄຳເວົ້າດູຖູກທຸກຄຳທີ່ເຈົ້າເວົ້າໃຫ້ພູຂອງອິດສະຣາເອນ. ເຈົ້າເວົ້າວ່າ “ພູເຫຼົ່ານັ້ນຖືກປະຖິ້ມໃຫ້ຮ້າງເປົ່າ ແລະພວກເຮົາໄດ້ໂອກາດທີ່ຈະທຳລາຍມັນແລ້ວ.”
13 ເຈົ້າເວົ້າແບບຈອງຫອງໃສ່ເຮົາ. ເຈົ້າເວົ້າແບບນັ້ນຫຼາຍເທື່ອ+ ແລະເຮົາກໍໄດ້ຍິນທຸກເທື່ອ.’
14 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ທົ່ວໂລກຈະດີໃຈເມື່ອເຮົາເຮັດໃຫ້ເຈົ້າຮ້າງເປົ່າ.
15 ຍ້ອນເຈົ້າດີໃຈຕອນທີ່ແຜ່ນດິນອິດສະຣາເອນຮ້າງເປົ່າ ເຮົາຈະເຮັດໃຫ້ເຈົ້າຮ້າງເປົ່າຄືກັນ.+ ເຂດພູໃນເສອີແລະແຜ່ນດິນເອໂດມທັງໝົດເອີ້ຍ ພວກເຈົ້າຈະເປັນບ່ອນທີ່ຮ້າງເປົ່າ+ ແລ້ວທຸກຄົນຈະຮູ້ວ່າເຮົາແມ່ນເຢໂຫວາ.’”
