ເອເຊກຽນ 38:1-23
38 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດ ໃຫ້ເຈົ້າປິ່ນໜ້າໄປທາງໂຄກຂອງແຜ່ນດິນມາໂຄກ.+ ລາວເປັນຫົວໜ້າຂອງພວກຫົວໜ້າເມເຊກກັບຕູບານ.+ ໃຫ້ເຈົ້າພະຍາກອນກ່ຽວກັບລາວ.+
3 ໃຫ້ເຈົ້າເວົ້າແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ໂຄກ ເຈົ້າທີ່ເປັນຫົວໜ້າຂອງຫົວໜ້າເມເຊກກັບຕູບານ ເຮົາຈະເປັນສັດຕູກັບເຈົ້າ.
4 ເຮົາຈະເອົາຂໍເກາະເກາະຄາງກະໄຕເຈົ້າແລະພາເຈົ້າໄປອີກທາງໜຶ່ງ+. ເຮົາຈະລາກເຈົ້າອອກໄປພ້ອມກັບກອງທັບທັງໝົດຂອງເຈົ້າ+ ພ້ອມກັບມ້າແລະທະຫານມ້າຂອງເຈົ້າ. ເຂົາເຈົ້າທຸກຄົນນຸ່ງເຄື່ອງທີ່ງາມໆ. ເຂົາເຈົ້າເປັນກອງທັບໃຫຍ່ທີ່ມີໂລ້ໃຫຍ່ກັບໂລ້ນ້ອຍ* ແລະທຸກຄົນຖືດາບ.
5 ກອງທັບຂອງເປີເຊຍ ເອທິໂອເປຍ ແລະພຸດ+ກໍຈະຢູ່ນຳກອງທັບຂອງເຈົ້າ. ທຸກຄົນຖືໂລ້ນ້ອຍແລະໃສ່ໝວກເກາະ.
6 ຄົນໂກເມກັບທະຫານທັງໝົດ ແລະຄົນໂຕກາມາ+ທີ່ມາແຕ່ທາງເໜືອສຸດກັບທະຫານທັງໝົດກໍຢູ່ຫັ້ນ ຈະມີຫຼາຍຊາດຢູ່ນຳເຈົ້າ.+
7 ໃຫ້ເຈົ້າກັບກອງທັບທັງໝົດທີ່ຢູ່ນຳເຈົ້າກຽມໂຕໃຫ້ພ້ອມທີ່ຈະຕໍ່ສູ້ ແລະເຈົ້າຈະເປັນຫົວໜ້າຂອງເຂົາເຈົ້າ.
8 ເມື່ອເວລາຜ່ານໄປດົນແລ້ວ ເຮົາຈະສົນໃຈເຈົ້າ. ຫຼັງຈາກຫຼາຍປີຜ່ານໄປ ເຈົ້າຈະບຸກໂຈມຕີແຜ່ນດິນຂອງຊາດໜຶ່ງທີ່ເຄີຍຖືກທຳລາຍດ້ວຍດາບແຕ່ຟື້ນໂຕໄດ້ແລ້ວ. ເຂົາເຈົ້າຖືກລວບລວມອອກມາຈາກຊາດຕ່າງໆ ແລະເຂົາເຈົ້າຂຶ້ນໄປເທິງພູໃນອິດສະຣາເອນທີ່ຖືກປະຖິ້ມໃຫ້ຮ້າງເປົ່າແຕ່ດົນແລ້ວ. ຄົນທີ່ອາໄສຢູ່ແຜ່ນດິນນັ້ນຖືກພາມາຈາກຊາດຕ່າງໆ ແລະເຂົາເຈົ້າກໍຢູ່ຫັ້ນຢ່າງປອດໄພ.+
9 ເຈົ້າຈະໄປໂຈມຕີເຂົາເຈົ້າຄືກັບພາຍຸ. ເຈົ້າກັບກອງທະຫານທັງໝົດຂອງເຈົ້າແລະຫຼາຍໆຊາດທີ່ຢູ່ນຳເຈົ້າຈະປົກຄຸມແຜ່ນດິນນີ້ຄືກັບຂີ້ເຝື້ອ.”’
10 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃນມື້ນັ້ນ ເຈົ້າຈະມີຄວາມຄິດບາງຢ່າງເກີດຂຶ້ນໃນໃຈ ແລະເຈົ້າຈະວາງແຜນຊົ່ວ.
11 ເຈົ້າຈະເວົ້າວ່າ “ຂ້ອຍຈະໂຈມຕີແຜ່ນດິນທີ່ບໍ່ມີຫຍັງປົກປ້ອງເລີຍ.+ ຂ້ອຍຈະໂຈມຕີຄົນຢູ່ຫັ້ນທີ່ຢູ່ຢ່າງປອດໄພແລະບໍ່ມີຫຍັງລົບກວນ. ຄົນທີ່ບ້ານບໍ່ມີກຳແພງອ້ອມ ບໍ່ມີປະຕູ ແລະບໍ່ມີລ໋ອກບໍ່ມີກອນ ຂ້ອຍຈະໂຈມຕີເຂົາເຈົ້າ.”
12 ເຈົ້າຈະເຮັດແນວນີ້ກໍເພື່ອຍຶດແລະປຸ້ນເອົາເຄື່ອງຂອງຫຼາຍໆ. ເຈົ້າຈະໂຈມຕີບ່ອນທີ່ເຄີຍຮ້າງເປົ່າທີ່ຕອນນີ້ມີຄົນອາໄສຢູ່.+ ຄົນເຫຼົ່ານັ້ນຖືກລວບລວມມາຈາກຊາດຕ່າງໆ.+ ເຂົາເຈົ້າລວຍແລະມີຊັບສົມບັດຫຼາຍຂຶ້ນ+ ແລະອາໄສຢູ່ໃຈກາງຂອງໂລກ.
13 ເຊບາ+ກັບເດດານ+ທີ່ເປັນພໍ່ຄ້າຈາກຕາຊິດ+ ແລະພວກທະຫານທີ່ເກັ່ງໆຈະເວົ້າກັບເຈົ້າວ່າ “ເຈົ້າໄປໂຈມຕີແຜ່ນດິນນັ້ນເພື່ອຍຶດເອົາເຄື່ອງຂອງໃຫ້ໄດ້ຫຼາຍໆຫັ້ນບໍ? ເຈົ້າໄດ້ລວບລວມພວກທະຫານເພື່ອປຸ້ນແລະຂົນເອົາເງິນເອົາຄຳກັບຊັບສົມບັດທີ່ຫຼາຍໆຂອງເຂົາເຈົ້າຫັ້ນບໍ?”’
14 ລູກມະນຸດ ເຈົ້າຕ້ອງພະຍາກອນແລະບອກໂຄກແບບນີ້ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ “ໃນມື້ນັ້ນ ເຈົ້າຈະຮູ້ແນ່ນອນວ່າພວກອິດສະຣາເອນປະຊາຊົນຂອງເຮົາໄດ້ຢູ່ຢ່າງປອດໄພ.+
15 ເຈົ້າຈະມາຈາກບ່ອນຂອງເຈົ້າທີ່ຢູ່ທາງເໜືອສຸດ+ ແລະຈະມີຫຼາຍຊາດມານຳເຈົ້າ. ເຂົາເຈົ້າຈະເປັນກອງທັບໃຫຍ່ແລະຂີ່ມ້າມາ.+
16 ໂຄກເອີ້ຍ ເຈົ້າຈະໄປໂຈມຕີພວກອິດສະຣາເອນປະຊາຊົນຂອງເຮົາຄືກັບຂີ້ເຝື້ອປົກຄຸມແຜ່ນດິນ. ໃນສະໄໝສຸດທ້າຍ ເຮົາຈະພາເຈົ້າໄປໂຈມຕີແຜ່ນດິນຂອງເຮົາ.+ ແລ້ວຊາດຕ່າງໆຈະຮູ້ວ່າເຮົາເປັນພະເຈົ້າອົງບໍລິສຸດ ເມື່ອເຂົາເຈົ້າເຫັນສິ່ງທີ່ເຮົາເຮັດກັບເຈົ້າ.”’+
17 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຕັ້ງແຕ່ດົນແລ້ວ ເຮົາໄດ້ໃຊ້ພວກຜູ້ພະຍາກອນຂອງອິດສະຣາເອນທີ່ເປັນຜູ້ຮັບໃຊ້ຂອງເຮົາໃຫ້ພະຍາກອນວ່າຈະມີຜູ້ໜຶ່ງທີ່ຖືກພາມາໂຈມຕີພວກອິດສະຣາເອນ. ຜູ້ນັ້ນກໍແມ່ນເຈົ້ານິແຫຼະ.’
18 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃນມື້ທີ່ໂຄກມາໂຈມຕີແຜ່ນດິນອິດສະຣາເອນ ເຮົາຈະໃຈຮ້າຍຫຼາຍ.+
19 ເມື່ອເຮົາເວົ້າ ຄວາມໃຈຮ້າຍຂອງເຮົາຈະເປັນຄືກັບໄຟທີ່ລຸກໄໝ້. ໃນມື້ນັ້ນຈະມີແຜ່ນດິນໄຫວໃຫຍ່ຢູ່ອິດສະຣາເອນ.
20 ເຮົາຈະເຮັດໃຫ້ປາໃນທະເລ ນົກໃນທ້ອງຟ້າ ສັດປ່າທີ່ຢູ່ທົ່ງຫຍ້າ ສັດເລືອຄານທຸກໂຕ ແລະມະນຸດທຸກຄົນທີ່ຢູ່ໃນໂລກຢ້ານຈົນໂຕສັ່ນ. ພູກັບໜ້າຜາຈະພັງລົງມາ+ ແລະກຳແພງທຸກບ່ອນກໍຈະພັງລົງມາຄືກັນ.’
21 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະສັ່ງໃຫ້ເຮັດສົງຄາມ*ກັບໂຄກຢູ່ພູທຸກໜ່ວຍຂອງເຮົາ. ເຂົາເຈົ້າຈະຂ້າກັນເອງ.+
22 ເຮົາຈະລົງໂທດລາວ. ເຮົາຈະເຮັດໃຫ້ມີໂລກລະບາດ+ແລະມີຄົນຕາຍຫຼາຍ. ເຮົາຈະເຮັດໃຫ້ຝົນ ໝາກເຫັບ+ ໄຟ+ ແລະມາດ+ຕົກໃສ່ກອງທັບຂອງລາວແລະຊາດຕ່າງໆທີ່ຢູ່ນຳລາວ.+
23 ເຮົາຈະເຮັດໃຫ້ທຸກຊາດຮູ້ວ່າ ເຮົາເປັນພະເຈົ້າທີ່ຍິ່ງໃຫຍ່ແລະເປັນອົງບໍລິສຸດ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ.’”