ເອເຊກຽນ 4:1-17
4 “ລູກມະນຸດ ໃຫ້ເອົາດິນຈີ່ກ້ອນໜຶ່ງມາວາງໄວ້ຢູ່ຕໍ່ໜ້າເຈົ້າ ແລ້ວໃຫ້ເຈົ້າແກະສະຫຼັກຮູບເມືອງເຢຣູຊາເລັມໃສ່ດິນຈີ່ກ້ອນນັ້ນ.
2 ໃຫ້ເຮັດກຳແພງລ້ອມເມືອງນັ້ນ+ແລະເຮັດໂນນຈຸກຳແພງ.+ ໃຫ້ຕັ້ງຄ້າຍອ້ອມແລະເອົາເຄື່ອງຈັກທີ່ທຳລາຍກຳແພງມາອ້ອມໄວ້.+
3 ໃຫ້ເອົາໝໍ້ຂາງມາວາງເປັນກຳແພງເຫຼັກເພື່ອຂັ້ນລະຫວ່າງເຈົ້າກັບເມືອງ ແລ້ວໃຫ້ເຈົ້າແນມເບິ່ງເມືອງນັ້ນເພື່ອໃຫ້ຮູ້ວ່າເມືອງນັ້ນຈະຖືກລ້ອມ. ນີ້ແມ່ນສັນຍານເຕືອນຊາດອິດສະຣາເອນກ່ຽວກັບສິ່ງທີ່ຈະເກີດຂຶ້ນກັບເຂົາເຈົ້າ.+
4 ຈາກນັ້ນ ໃຫ້ເຈົ້ານອນແຄງເບື້ອງຊ້າຍເພື່ອແບກຄວາມຜິດຂອງຊາດອິດສະຣາເອນໄວ້.+ ເຈົ້າຈະແບກຄວາມຜິດຂອງເຂົາເຈົ້າຕາມຈຳນວນມື້ທີ່ເຈົ້ານອນແຄງເບື້ອງນັ້ນ.
5 ເຮົາຈະໃຫ້ເຈົ້ານອນແຄງແບບນັ້ນ 390 ມື້ ເຊິ່ງເທົ່າກັບຈຳນວນປີທີ່ເຂົາເຈົ້າເຮັດຜິດ.+ ເຈົ້າຈະແບກຄວາມຜິດຂອງຊາດອິດສະຣາເອນໄວ້ແບບນີ້ແຫຼະ.
6 ເຈົ້າຕ້ອງນອນແບບນັ້ນໃຫ້ຄົບຈຳນວນມື້.
ຈາກນັ້ນ ໃຫ້ເຈົ້າເຮັດຄືກັນອີກ ແຕ່ເທື່ອນີ້ໃຫ້ເຈົ້ານອນແຄງເບື້ອງຂວາ 40 ມື້ເພື່ອແບກຄວາມຜິດຂອງພວກຢູດາ.+ ເຮົາຈະໃຫ້ເຈົ້ານອນແຄງແບບນັ້ນ 1 ມື້ສຳລັບ 1 ປີ.
7 ເຈົ້າຈະແນມເບິ່ງເມືອງເຢຣູຊາເລັມທີ່ຖືກລ້ອມ.+ ເຈົ້າຈະລັ້ນແຂນເສື້ອຂຶ້ນແລະພະຍາກອນກ່ຽວກັບເມືອງນັ້ນ.
8 ເຮົາຈະເອົາເຊືອກມັດເຈົ້າໄວ້ເພື່ອບໍ່ໃຫ້ເຈົ້າພິກໂຕໄປອີກເບື້ອງໜຶ່ງ ຈົນກວ່າເຈົ້າຈະນອນແຄງຄົບຈຳນວນມື້ທີ່ລ້ອມເມືອງ.
9 ໃຫ້ເຈົ້າເອົາເຂົ້າວີດ* ເຂົ້າບາເລ ໝາກຖົ່ວປາກອ້າ ໝາກຖົ່ວເລັນທິວ ເຂົ້າຝ້າງ* ແລະເຂົ້າສະເປວ*ໃສ່ລວມກັນໃນຖັງໜ່ວຍໜຶ່ງເພື່ອເຮັດເຂົ້າຈີ່. ໃນໄລຍະທີ່ນອນແຄງເບື້ອງຊ້າຍ 390 ມື້ ເຈົ້າຈະຕ້ອງເຮັດເຂົ້າຈີ່ກິນ.+
10 ໃນແຕ່ລະມື້ ໃຫ້ເຈົ້າຊັ່ງເອົາ 20 ເຊເກນ*ເພື່ອເຮັດເຂົ້າຈີ່ກິນ ແລະກິນຕາມເວລາທີ່ກຳນົດໄວ້.
11 ໃນແຕ່ລະມື້ ເຈົ້າຕ້ອງກິນນ້ຳ 1 ສ່ວນ 6 ຮິນ*ຕາມເວລາທີ່ກຳນົດໄວ້.
12 ເຈົ້າຈະກິນເຂົ້າຈີ່ນີ້ຄືກັບກິນເຂົ້າຈີ່ກ້ອນມົນໆທີ່ເຮັດຈາກເຂົ້າບາເລ. ໃຫ້ເຈົ້າໃຊ້ຂີ້ຄົນທີ່ແຫ້ງແລ້ວເປັນຖ່ານເພື່ອປີ້ງເຂົ້າຈີ່ນີ້ຢູ່ຕໍ່ໜ້າພວກອິດສະຣາເອນ.”
13 ພະເຢໂຫວາເວົ້າຕື່ມອີກວ່າ: “ຕອນທີ່ເຮົາເຮັດໃຫ້ພວກອິດສະຣາເອນກະຈັດກະຈາຍກັນໄປຢູ່ນຳຊາດຕ່າງໆ ເຂົາເຈົ້າຈະກິນເຂົ້າຈີ່ທີ່ບໍ່ສະອາດແບບນີ້ແຫຼະ.”+
14 ຂ້ອຍຈຶ່ງເວົ້າວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດ! ລູກເຮັດບໍ່ໄດ້ດອກ ຕັ້ງແຕ່ນ້ອຍຈົນຮອດຕອນນີ້ ລູກບໍ່ເຄີຍເຮັດໃຫ້ໂຕເອງບໍ່ສະອາດໂດຍກິນຊີ້ນສັດທີ່ຕາຍເອງ ຊີ້ນສັດທີ່ຖືກສັດໂຕອື່ນຂ້າ+ ຫຼືຊີ້ນສັດທີ່ບໍ່ສະອາດ.”*+
15 ເພິ່ນຈຶ່ງເວົ້າກັບຂ້ອຍວ່າ: “ຄັນຊັ້ນ ເຮົາຈະໃຫ້ເຈົ້າປີ້ງເຂົ້າຈີ່ໂດຍໃຊ້ຂີ້ງົວແຫ້ງເປັນຖ່ານແທນຂີ້ຄົນກະໄດ້.”
16 ເພິ່ນເວົ້າກັບຂ້ອຍອີກວ່າ: “ລູກມະນຸດເອີ້ຍ ເຮົາຈະເຮັດໃຫ້ເມືອງເຢຣູຊາເລັມບໍ່ມີຂອງກິນ.*+ ເຂົາເຈົ້າຈະອຸກໃຈຫຼາຍຈົນຕ້ອງແບ່ງເຂົ້າແບ່ງນ້ຳໄວ້ກິນໃນແຕ່ລະມື້.+
17 ຍ້ອນບໍ່ມີເຂົ້າບໍ່ມີນ້ຳກິນ ເຂົາເຈົ້າຈະແນມເບິ່ງໜ້າກັນດ້ວຍຄວາມຕົກໃຈ. ເຂົາເຈົ້າຈະອຶດຕາຍຍ້ອນຄວາມຜິດຂອງໂຕເອງ.”
ຂໍ
^ ຕົ້ນພືດຊະນິດໜຶ່ງທີ່ມີເມັດນ້ອຍໆເຊິ່ງໃຊ້ເຮັດເຂົ້າຈີ່ໄດ້
^ ເຂົ້າຊະນິດໜຶ່ງທີ່ປູກໃນເອຢິບສະໄໝບູຮານ
^ ເຂົ້າຊະນິດໜຶ່ງທີ່ໃຊ້ເຮັດເຂົ້າຈີ່ໄດ້
^ 230 ກຣາມ. ເບິ່ງພາກຜະໜວກ ຂ14.
^ 0,6 ລິດ. ເບິ່ງພາກຜະໜວກ ຂ14.
^ ຫຼື “ຊີ້ນເນົ່າ”
^ ແປຕາມໂຕວ່າ “ຫັກທ່ອນໄມ້.” ອາດໝາຍເຖິງທ່ອນໄມ້ທີ່ເອົາໄວ້ສອດເຂົ້າຈີ່ເພື່ອຫ້ອຍມ້ຽນໄວ້.
