ເອເຊກຽນ 43:1-27
43 ຈາກນັ້ນ ລາວກໍພາຂ້ອຍໄປປະຕູທີ່ຢູ່ທາງທິດຕາເວັນອອກ.+
2 ຢູ່ຫັ້ນ ຂ້ອຍເຫັນແສງລັດສະໝີຂອງພະເຈົ້າຂອງອິດສະຣາເອນມາຈາກທິດຕາເວັນອອກ.+ ແສງລັດສະໝີນັ້ນເຮັດໃຫ້ໂລກແຈ້ງສະຫວ່າງ+ ແລະສຽງຂອງເພິ່ນກໍຄືກັບສຽງນ້ຳທີ່ໄຫຼແຮງໆ.+
3 ສິ່ງທີ່ຂ້ອຍເຫັນຄືກັບນິມິດທີ່ຂ້ອຍເຄີຍເຫັນຕອນມາເຕືອນເລື່ອງການທຳລາຍເມືອງເຢຣູຊາເລັມ* ແລະຄືກັບນິມິດທີ່ຂ້ອຍເຄີຍເຫັນໃກ້ກັບແມ່ນ້ຳເກບາ.+ ແລ້ວຂ້ອຍກໍໝູບໜ້າລົງພື້ນ.
4 ຂ້ອຍເຫັນແສງລັດສະໝີຂອງພະເຢໂຫວາເຂົ້າໄປໃນວິຫານທາງທາງເຂົ້າທີ່ຢູ່ທິດຕາເວັນອອກ.+
5 ພະລັງຂອງພະເຈົ້າ*ໄດ້ພາຂ້ອຍເຂົ້າໄປເດີ່ນທາງໃນຂອງວິຫານ ແລະຂ້ອຍເຫັນແສງລັດສະໝີຂອງພະເຢໂຫວາເຕັມວິຫານ.+
6 ຂ້ອຍໄດ້ຍິນສຽງຄົນເວົ້າກັບຂ້ອຍອອກມາຈາກວິຫານ ແລ້ວລາວກໍມາຢືນຢູ່ທາງຂ້າງຂ້ອຍ.+
7 ລາວເວົ້າກັບຂ້ອຍວ່າ:*
“ລູກມະນຸດ ນີ້ແມ່ນບ່ອນຕັ້ງບັນລັງຂອງເຮົາ+ແລະບ່ອນວາງຕີນຂອງເຮົາ.+ ຢູ່ນີ້ ເຮົາຈະຢູ່ກັບພວກອິດສະຣາເອນຕະຫຼອດໄປ.+ ພວກອິດສະຣາເອນແລະກະສັດຂອງເຂົາເຈົ້າໄດ້ດູຖູກຊື່ທີ່ບໍລິສຸດຂອງເຮົາໂດຍການຂາຍໂຕໃຫ້ພະເຈົ້າອື່ນ* ແລະໂດຍການຖືວ່າຮູບບູຊາເປັນຄືກັບກະສັດທີ່ເຂົາເຈົ້າຕ້ອງຮັບໃຊ້ ແຕ່ເຂົາເຈົ້າຈະບໍ່ໄດ້ເຮັດແບບນັ້ນອີກຕໍ່ໄປ.+
8 ເຂົາເຈົ້າໄດ້ເອົາຕີນປະຕູຂອງເຂົາເຈົ້າວາງໄວ້ຂ້າງຕີນປະຕູຂອງເຮົາ ແລະເອົາເສົາປະຕູຂອງເຂົາເຈົ້າວາງໄວ້ຂ້າງເສົາປະຕູຂອງເຮົາ. ມີແຕ່ກຳແພງເທົ່ານັ້ນທີ່ຂັ້ນລະຫວ່າງເຮົາກັບເຂົາເຈົ້າ.+ ເຂົາເຈົ້າດູຖູກຊື່ທີ່ບໍລິສຸດຂອງເຮົາໂດຍເຮັດສິ່ງທີ່ເປັນຕາຂີ້ດຽດ. ຍ້ອນແນວນີ້ ເຮົາຈຶ່ງໃຈຮ້າຍຫຼາຍແລະທຳລາຍເຂົາເຈົ້າ.+
9 ຕອນນີ້ ໃຫ້ເຂົາເຈົ້າເຊົາຂາຍໂຕໃຫ້ພະເຈົ້າອື່ນ ແລະໃຫ້ເອົາຮູບບູຊາທີ່ເຂົາເຈົ້າຖືວ່າເປັນຄືກັບກະສັດໜີໄປໄກໆຈາກເຮົາ ແລ້ວເຮົາຈະຢູ່ກັບເຂົາເຈົ້າຕະຫຼອດໄປ.+
10 ລູກມະນຸດ ໃຫ້ເຈົ້າບອກລາຍລະອຽດຂອງວິຫານໃຫ້ພວກອິດສະຣາເອນຟັງ+ ເພື່ອເຂົາເຈົ້າຈະຮູ້ສຶກອາຍຍ້ອນຄວາມຜິດທີ່ເຂົາເຈົ້າໄດ້ເຮັດ.+ ເຂົາເຈົ້າຄວນສຶກສາແບບຂອງວິຫານນີ້.
11 ຖ້າເຂົາເຈົ້າຮູ້ສຶກອາຍໃນທຸກສິ່ງທີ່ເຂົາເຈົ້າໄດ້ເຮັດ ເຈົ້າຄວນບອກເຂົາເຈົ້າໃຫ້ຮູ້ຈັກແບບຂອງວິຫານ ການຈັດກຽມຕ່າງໆ ແລະທາງເຂົ້າກັບທາງອອກຂອງວິຫານ.+ ໃຫ້ເຂົາເຈົ້າເບິ່ງແບບທັງໝົດຂອງວິຫານ ແລະອະທິບາຍກົດແລະຄຳສັ່ງໃຫ້ເຂົາເຈົ້າຮູ້ ແລ້ວຂຽນສິ່ງເຫຼົ່ານີ້ຕໍ່ໜ້າເຂົາເຈົ້າ ເພື່ອເຂົາເຈົ້າຈະສຶກສາແບບຂອງວິຫານແລະເຮັດຕາມກົດຂອງວິຫານ.+
12 ກົດຂອງວິຫານແມ່ນເຂດທີ່ຢູ່ອ້ອມແອ້ມຈອມພູເປັນບ່ອນທີ່ບໍລິສຸດທີ່ສຸດ.+ ນີ້ແມ່ນກົດຂອງວິຫານ.
13 ຕໍ່ໄປນີ້ແມ່ນຂະໜາດຂອງແທ່ນບູຊາທີ່ແທກເປັນສອກ.+ (ແຕ່ລະສອກຍາວເທົ່າກັບ 1 ຄືບບວກ 1 ຝາມື.*) ຊັ້ນທີໜຶ່ງທີ່ເປັນຕີນຂອງແທ່ນບູຊາສູງ 1 ສອກ* ແລະກວ້າງກວ່າຊັ້ນທີສອງ 1 ສອກ. ຕີນນີ້ມີຂອບອ້ອມສູງຂຶ້ນອີກ 1 ຄືບ.* ນີ້ແມ່ນຕີນຂອງແທ່ນບູຊາ.
14 ຊັ້ນທີສອງທີ່ຢູ່ເທິງຕີນແທ່ນບູຊາສູງ 2 ສອກ* ກວ້າງກວ່າຊັ້ນທີສາມ 1 ສອກ.* ຊັ້ນທີສາມສູງ 4 ສອກ* ແລະກວ້າງກວ່າໂຕແທ່ນບູຊາ 1 ສອກ.
15 ໂຕແທ່ນບູຊາສູງ 4 ສອກ* ແລະມີເຂົາຢູ່ 4 ແຈ.+
16 ແທ່ນບູຊາເປັນສີ່ລ່ຽມ ຍາວ 12 ສອກ* ແລະກວ້າງ 12 ສອກ.+
17 ຊັ້ນທີສາມກວ້າງ 14 ສອກ* ແລະຍາວ 14 ສອກ ແລະມີຂອບສູງຂຶ້ນໄປເຄິ່ງສອກ.* ຊັ້ນທີ່ເປັນຕີນຂອງແທ່ນບູຊາກວ້າງອອກມາ 1 ສອກ*ທຸກດ້ານ.
ຂັ້ນໄດຂຶ້ນໄປແທ່ນບູຊາຢູ່ທາງທິດຕາເວັນອອກ.”
18 ແລ້ວລາວກໍເວົ້າກັບຂ້ອຍວ່າ: “ລູກມະນຸດ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຕໍ່ໄປນີ້ເປັນຄຳສັ່ງທີ່ຕ້ອງເຮັດເມື່ອສ້າງແທ່ນບູຊາແລ້ວໆ ເພື່ອຈະເອົາເຄື່ອງບູຊາເຜົາມາເຜົາແລະເອົາເລືອດມາຊິດໃສ່ແທ່ນບູຊານີ້.’+
19 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃຫ້ເຈົ້າເອົາງົວໂຕໜຶ່ງໄປໃຫ້ປະໂລຫິດເພື່ອເປັນເຄື່ອງບູຊາໄຖ່ບາບ.+ ໃຫ້ເອົາງົວໂຕນັ້ນໄປໃຫ້ພວກປະໂລຫິດຄົນເລວີທີ່ເປັນລູກຫຼານຂອງຊາໂດກ+ທີ່ຮັບໃຊ້ຢູ່ຕໍ່ໜ້າເຮົາ.
20 ເຈົ້າຕ້ອງເອົາເລືອດສ່ວນໜຶ່ງຂອງງົວໂຕນັ້ນໄປຕ້ວຍໃສ່ເຂົາ 4 ອັນທີ່ຢູ່ 4 ແຈຂອງແທ່ນບູຊາ ແລະຕ້ວຍໃສ່ຂອບທີ່ຢູ່ອ້ອມແທ່ນບູຊາ ເພື່ອເຮັດໃຫ້ແທ່ນບູຊານັ້ນເປັນສິ່ງທີ່ຖືວ່າບໍລິສຸດ.*+
21 ໃຫ້ເຈົ້າເອົາງົວທີ່ເປັນເຄື່ອງບູຊາໄຖ່ບາບໄປເຜົາຢູ່ທາງນອກວິຫານໃນບ່ອນທີ່ກຳນົດໄວ້.+
22 ໃນມື້ທີ 2 ໃຫ້ເຈົ້າເອົາແບ້ໂຕຜູ້ໂຕໜຶ່ງທີ່ຕຸ້ຍພີດີງາມມາເປັນເຄື່ອງບູຊາໄຖ່ບາບ. ພວກປະໂລຫິດຈະເຮັດໃຫ້ແທ່ນບູຊາເປັນສິ່ງທີ່ຖືວ່າບໍລິສຸດຄືກັບທີ່ເຂົາເຈົ້າເຮັດໃຫ້ມັນບໍລິສຸດໂດຍໃຊ້ງົວ.’
23 ເມື່ອເຈົ້າເຮັດໃຫ້ແທ່ນບູຊາເປັນສິ່ງທີ່ຖືວ່າບໍລິສຸດແລ້ວ ໃຫ້ເຈົ້າເອົາງົວໂຕໜຶ່ງກັບແກະໂຕໜຶ່ງທີ່ຕຸ້ຍພີດີງາມມາເປັນເຄື່ອງບູຊາ.
24 ໃຫ້ເຈົ້າເອົາສັດ 2 ໂຕນີ້ມອບໃຫ້ພະເຢໂຫວາ ແລະພວກປະໂລຫິດຈະເອົາເກືອໂຮຍໃສ່+ແລະເຜົາເປັນເຄື່ອງບູຊາເຜົາໃຫ້ພະເຢໂຫວາ.
25 ໃຫ້ເຈົ້າເອົາແບ້ໂຕຜູ້ ງົວ ແລະແກະໂຕຜູ້ແນວລະໂຕມາເປັນເຄື່ອງບູຊາໃຫ້ພະເຈົ້າທຸກໆມື້ ເປັນເວລາ 7 ມື້.+ ສັດທີ່ເຈົ້າເອົາມາຕ້ອງເປັນໂຕທີ່ສົມບູນດີ.
26 ພວກປະໂລຫິດຕ້ອງເຮັດໃຫ້ແທ່ນບູຊາເປັນສິ່ງທີ່ຖືວ່າບໍລິສຸດ 7 ມື້ ແລະຕ້ອງກຽມແທ່ນນັ້ນໃຫ້ພ້ອມທີ່ຈະໃຊ້ໄດ້.
27 ຫຼັງຈາກຄົບ 7 ມື້ແລ້ວ ຕັ້ງແຕ່ມື້ທີ 8+ ເປັນຕົ້ນໄປ ພວກປະໂລຫິດຈະເຜົາເຄື່ອງບູຊາເຜົາແລະເຄື່ອງບູຊາສ້າງຄວາມສະຫງົບສຸກຂອງເຈົ້າ*ຢູ່ແທ່ນບູຊາ ແລ້ວເຮົາຈະພໍໃຈເຈົ້າ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.”
ຂໍ
^ ແປຕາມໂຕວ່າ “ຕອນທີ່ຂ້ອຍມາທຳລາຍເມືອງ”
^ ຄຳນີ້ໃນພາສາເຮັບເຣີອາດໝາຍເຖິງພະລັງຂອງພະເຈົ້າຫຼືທູດສະຫວັນ
^ ແປຕາມໂຕວ່າ “ໂດຍຊາກສົບຂອງພວກກະສັດ”
^ ເບິ່ງຄືວ່າຄຳເວົ້າຂອງລາວມາຈາກພະເຈົ້າ
^ 22,2 ຊັງຕີແມັດ. ເບິ່ງພາກຜະໜວກ ຂ14.
^ ໝາຍເຖິງສອກຍາວ. ເບິ່ງພາກຜະໜວກ ຂ14.
^ 51,8 ຊັງຕີແມັດ
^ 1 ແມັດ
^ 51,8 ຊັງຕີແມັດ
^ 2 ແມັດ
^ 2 ແມັດ
^ 6,2 ແມັດ
^ 51,8 ຊັງຕີແມັດ
^ 25,9 ຊັງຕີແມັດ
^ 7,2 ແມັດ
^ ແປຕາມໂຕວ່າ “ບໍລິສຸດແລະບໍ່ມີບາບ”
^ ໝາຍເຖິງປະຊາຊົນ
