ເອເຊກຽນ 45:1-25
45 “‘ເມື່ອພວກເຈົ້າແບ່ງດິນເປັນມໍລະດົກ+ ພວກເຈົ້າຕ້ອງເອົາສ່ວນໜຶ່ງໃຫ້ພະເຢໂຫວາເພື່ອຈະຖືວ່າເປັນບ່ອນບໍລິສຸດ.+ ດິນນັ້ນຕ້ອງຍາວ 25.000 ສອກ* ແລະກວ້າງ 10.000 ສອກ.*+ ດິນຕອນນັ້ນທັງໝົດຈະເປັນດິນທີ່ບໍລິສຸດ.
2 ໃນດິນຕອນນັ້ນຈະມີດິນສ່ວນໜຶ່ງເປັນຮູບສີ່ລ່ຽມ ຍາວ 500 ສອກ* ແລະກວ້າງ 500 ສອກ.+ ແຕ່ລະດ້ານຂອງດິນນັ້ນຈະມີທົ່ງຫຍ້າອ້ອມ 50 ສອກ.*+
3 ພວກເຈົ້າຕ້ອງແທກດິນຍາວ 25.000 ສອກ* ແລະກວ້າງ 10.000 ສອກ.* ໃນດິນນັ້ນຈະມີວິຫານຕັ້ງຢູ່ເຊິ່ງເປັນສິ່ງທີ່ບໍລິສຸດທີ່ສຸດ.
4 ດິນຕອນນັ້ນຈະເປັນສ່ວນແບ່ງທີ່ບໍລິສຸດທີ່ສຸດສຳລັບພວກປະໂລຫິດ+ທີ່ເຮັດວຽກຮັບໃຊ້ພະເຢໂຫວາຢູ່ວິຫານ.+ ດິນນັ້ນຈະເປັນບ່ອນທີ່ບໍລິສຸດສຳລັບວິຫານ ແລະຈະມີເຮືອນຂອງພວກປະໂລຫິດຕັ້ງຢູ່.
5 ສຳລັບພວກເລວີທີ່ຮັບໃຊ້ຢູ່ວິຫານ ເຂົາເຈົ້າຈະໄດ້ດິນທີ່ຍາວ 25.000 ສອກ* ແລະກວ້າງ 10.000 ສອກ*+ ແລະໄດ້ຫ້ອງກິນເຂົ້າ 20 ຫ້ອງ.*+
6 ພວກເຈົ້າຕ້ອງເອົາດິນທີ່ຍາວ 25.000 ສອກ* (ເຊິ່ງຍາວສ່ຳກັບດິນທີ່ເປັນສ່ວນແບ່ງບໍລິສຸດ) ແລະກວ້າງ 5.000 ສອກ*+ໃຫ້ເປັນສ່ວນຂອງເມືອງ. ດິນຕອນນັ້ນຈະເປັນຂອງພວກອິດສະຣາເອນທຸກຄົນ.
7 ສຳລັບຫົວໜ້າ ລາວຈະໄດ້ດິນທີ່ຢູ່ທັງສອງເບື້ອງຂອງດິນຕອນທີ່ຖືວ່າບໍລິສຸດກັບຕອນທີ່ເປັນຂອງເມືອງ. ມັນຈະຢູ່ທາງທິດຕາເວັນອອກແລະທາງທິດຕາເວັນຕົກຂອງດິນຕອນທີ່ຖືວ່າບໍລິສຸດກັບຕອນທີ່ເປັນຂອງເມືອງ. ຄວາມຍາວຂອງເຂດແດນຕັ້ງແຕ່ທິດຕາເວັນອອກຈົນຮອດທິດຕາເວັນຕົກແມ່ນຍາວສ່ຳກັບເຂດແດນຂອງຕະກູນທີ່ຢູ່ຕິດກັນກັບດິນຂອງລາວ.+
8 ດິນຕອນນັ້ນຈະເປັນຂອງລາວໃນອິດສະຣາເອນ. ພວກຫົວໜ້າຈະບໍ່ຂົ່ມເຫງປະຊາຊົນຂອງເຮົາອີກຕໍ່ໄປ+ ແລະເຂົາເຈົ້າຈະແບ່ງດິນທີ່ເຫຼືອໃຫ້ພວກອິດສະຣາເອນຕາມຕະກູນຕ່າງໆ.’+
9 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ພວກຫົວໜ້າຂອງອິດສະຣາເອນເອີ້ຍ ພວກເຈົ້າເຮັດຊົ່ວຫຼາຍແລ້ວ.’
ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃຫ້ພວກເຈົ້າເຊົາເຮັດແນວຮຸນແຮງແລະເຊົາຂົ່ມເຫງປະຊາຊົນ. ໃຫ້ເຮັດສິ່ງທີ່ຖືກຕ້ອງແລະຍຸຕິທຳ.+ ໃຫ້ພວກເຈົ້າເຊົາຍຶດເອົາດິນຂອງປະຊາຊົນຂອງເຮົາ.+
10 ພວກເຈົ້າຕ້ອງໃຊ້ຊິງ ແນວຜອງທີ່ເປັນເອຟາ ແລະແນວຜອງທີ່ເປັນບັດທີ່ຖືກຕ້ອງຕາມມາດຕະຖານ.+
11 ແນວຜອງທີ່ເປັນເອຟາກັບແນວຜອງທີ່ເປັນບັດຕ້ອງຖືກຕ້ອງ. ແນວຜອງທີ່ເປັນບັດ ຖ້າຜອງ 10 ເທື່ອຕ້ອງເທົ່າກັບ 1 ໂຮເມີ* ແລະແນວຜອງທີ່ເປັນເອຟາ ຖ້າຜອງ 10 ເທື່ອກໍຕ້ອງເທົ່າກັບ 1 ໂຮເມີຄືກັນ. ໃຫ້ເອົາໂຮເມີເປັນມາດຕະຖານການຜອງ.
12 1 ເຊເກນ*+ຕ້ອງເທົ່າກັບ 20 ເກຣາ.* 20 ເຊເກນ*ບວກກັບ 25 ເຊເກນ*ແລະບວກກັບ 15 ເຊເກນ* ຈະຕ້ອງເທົ່າກັບ 1 ມິນາ.’*
13 ‘ຕໍ່ໄປນີ້ແມ່ນສິ່ງທີ່ພວກເຈົ້າຕ້ອງເອົາມາໃຫ້ພະເຈົ້າ. ເຂົ້າວີດ*ທຸກໆ 1 ໂຮເມີ*ທີ່ພວກເຈົ້າກ່ຽວໄດ້ ພວກເຈົ້າຕ້ອງເອົາ 1 ສ່ວນ 6 ເອຟາມາໃຫ້ ແລະເຂົ້າບາເລທຸກໆ 1 ໂຮເມີ ພວກເຈົ້າຕ້ອງເອົາ 1 ສ່ວນ 6 ເອຟາມາໃຫ້.
14 ສຳລັບນ້ຳມັນໝາກກອກຕ້ອງໃຊ້ແນວຜອງທີ່ເປັນບັດ. 10 ບັດ*ເທົ່າກັບ 1 ໂຄເຣ* ແລະ 10 ບັດເທົ່າກັບ 1 ໂຮເມີ.*
15 ໃນຝູງແກະຂອງອິດສະຣາເອນ ທຸກໆ 200 ໂຕຕ້ອງເອົາໂຕໜຶ່ງມາໃຫ້. ທັງໝົດນີ້ຈະໃຊ້ເປັນເຄື່ອງບູຊາທີ່ເຮັດຈາກເມັດເຂົ້າ+ ເຄື່ອງບູຊາເຜົາ+ ແລະເຄື່ອງບູຊາສ້າງຄວາມສະຫງົບສຸກ+ເພື່ອຈະໄຖ່ຄວາມຜິດຂອງປະຊາຊົນ.’+ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.
16 ‘ປະຊາຊົນທຸກຄົນຈະເອົາເຄື່ອງທັງໝົດນີ້+ມາໃຫ້ຫົວໜ້າໃນອິດສະຣາເອນ.
17 ແຕ່ຫົວໜ້າຈະກຽມເຄື່ອງບູຊາເຜົາ+ ເຄື່ອງບູຊາທີ່ເຮັດຈາກເມັດເຂົ້າ+ ເຄື່ອງບູຊາດື່ມໃນຍາມເທດສະການຕ່າງໆ+ ໃນມື້ເດືອນອອກໃໝ່ ໃນວັນຊະບາໂຕ+ ແລະເທດສະການອື່ນໆຂອງພວກອິດສະຣາເອນ.+ ຫົວໜ້າຈະກຽມເຄື່ອງບູຊາທີ່ເຮັດຈາກເມັດເຂົ້າ ເຄື່ອງບູຊາເຜົາ ແລະເຄື່ອງບູຊາສ້າງຄວາມສະຫງົບສຸກເພື່ອໄຖ່ຄວາມຜິດໃຫ້ພວກອິດສະຣາເອນ.’
18 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃນວັນທີ 1 ຂອງເດືອນທີ 1 ເຈົ້າຕ້ອງເອົາງົວໂຕໜຶ່ງທີ່ຕຸ້ຍພີດີງາມມາຈາກຝູງ ແລະເຈົ້າຕ້ອງໄຖ່ຄວາມຜິດໃຫ້ວິຫານ.+
19 ປະໂລຫິດຈະເອົາເລືອດຈາກເຄື່ອງບູຊາໄຖ່ບາບໄປຕ້ວຍໃສ່ຂອບປະຕູຂອງວິຫານ+ ໄປຕ້ວຍໃສ່ 4 ແຈຂອງແທ່ນບູຊາຊັ້ນທີ 3 ແລະໄປຕ້ວຍໃສ່ຂອບປະຕູທາງເຂົ້າຂອງເດີ່ນທາງໃນ.
20 ແລ້ວໃຫ້ເຈົ້າເຮັດແບບນີ້ຄືກັນໃນວັນທີ 7 ຂອງເດືອນນັ້ນສຳລັບຄົນທີ່ເຮັດຜິດໂດຍບໍ່ຕັ້ງໃຈ.+ ເຈົ້າຈະເຮັດແບບນີ້ເພື່ອໄຖ່ຄວາມຜິດໃຫ້ວິຫານ.+
21 ໃນວັນທີ 14 ຂອງເດືອນທີ 1 ພວກເຈົ້າຕ້ອງສະຫຼອງເທດສະການປັດສະຄາ.+ ພວກເຈົ້າຕ້ອງກິນເຂົ້າຈີ່ບໍ່ມີເຊື້ອເປັນເວລາ 7 ມື້.+
22 ໃນມື້ນັ້ນ ຫົວໜ້າຈະກຽມງົວໂຕຜູ້ໂຕໜຶ່ງເພື່ອເປັນເຄື່ອງບູຊາໄຖ່ບາບໃຫ້ໂຕເອງແລະໃຫ້ປະຊາຊົນທຸກຄົນ.+
23 ໃນໄລຍະ 7 ມື້+ຂອງເທດສະການນັ້ນ ແຕ່ລະມື້ຫົວໜ້າຈະກຽມງົວໂຕຜູ້ທີ່ຕຸ້ຍພີດີງາມ 7 ໂຕກັບແກະໂຕຜູ້ທີ່ຕຸ້ຍພີດີງາມ 7 ໂຕເພື່ອເປັນເຄື່ອງບູຊາເຜົາໃຫ້ພະເຢໂຫວາ ແລະໃນແຕ່ລະມື້ເຂົາເຈົ້າຈະກຽມແບ້ໂຕຜູ້ໂຕໜຶ່ງເພື່ອເປັນເຄື່ອງບູຊາໄຖ່ບາບຄືກັນ.
24 ສຳລັບງົວໂຕຜູ້ແຕ່ລະໂຕ ແລະແກະໂຕຜູ້ແຕ່ລະໂຕ ລາວຕ້ອງກຽມເຄື່ອງບູຊາທີ່ເຮັດຈາກເມັດເຂົ້າ 1 ເອຟາ* ແລະສຳລັບເຄື່ອງບູຊາທີ່ເຮັດຈາກເມັດເຂົ້າທຸກໆ 1 ເອຟາ ລາວຕ້ອງກຽມນ້ຳມັນໝາກກອກ 1 ຮິນ.*
25 ຕັ້ງແຕ່ວັນທີ 15 ຂອງເດືອນທີ 7 ທີ່ພວກເຈົ້າຈະເລີ່ມສະຫຼອງເທດສະການ+ ຫົວໜ້າຈະກຽມເຄື່ອງບູຊາໄຖ່ບາບ ເຄື່ອງບູຊາເຜົາ ເຄື່ອງບູຊາທີ່ເຮັດຈາກເມັດເຂົ້າ ແລະນ້ຳມັນໝາກກອກ ແລະລາວຈະຕ້ອງເຮັດແບບດຽວກັນນີ້ຕະຫຼອດ 7 ມື້.’”
ຂໍ
^ 12.950 ແມັດ. ໝາຍເຖິງສອກຍາວ. ເບິ່ງພາກຜະໜວກ ຂ14.
^ 5.180 ແມັດ
^ 259 ແມັດ
^ 25,9 ແມັດ
^ 12.950 ແມັດ
^ 5.180 ແມັດ
^ 12.950 ແມັດ
^ ຫຼື “ຫ້ອງ 20 ຫ້ອງ”
^ 5.180 ແມັດ
^ 12.950 ແມັດ
^ 2.590 ແມັດ
^ 220 ລິດ. ເບິ່ງພາກຜະໜວກ ຂ14.
^ 5,7 ກຣາມ. ເບິ່ງພາກຜະໜວກ ຂ14.
^ ແປຕາມໂຕວ່າ “ມາເນ.” ເບິ່ງພາກຜະໜວກ ຂ14.
^ 171 ກຣາມ
^ 285 ກຣາມ
^ 11,4 ກຣາມ. ເບິ່ງພາກຜະໜວກ ຂ14.
^ 228 ກຣາມ
^ ເຂົ້າຊະນິດໜຶ່ງທີ່ໃຊ້ເຮັດເຂົ້າຈີ່ໄດ້
^ 220 ລິດ
^ 220 ລິດ. ເບິ່ງພາກຜະໜວກ ຂ14.
^ 220 ລິດ. ເບິ່ງພາກຜະໜວກ ຂ14.
^ 220 ລິດ
^ 22 ລິດ. ເບິ່ງພາກຜະໜວກ ຂ14.
^ 3,7 ລິດ. ເບິ່ງພາກຜະໜວກ ຂ14.
