ເອເຊກຽນ 46:1-24
46 “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ປະຕູທາງເຂົ້າເດີ່ນທາງໃນທີ່ຢູ່ທາງທິດຕາເວັນອອກ+ຕ້ອງອັດໄວ້+ໃນ 6 ມື້ທີ່ເຮັດວຽກ+ ແຕ່ຕ້ອງເປີດໃນວັນຊະບາໂຕແລະໃນມື້ເດືອນອອກໃໝ່.
2 ຫົວໜ້າຈະເຂົ້າມາຈາກເດີ່ນທາງນອກ ຜ່ານຫ້ອງໃຫຍ່ທີ່ຢູ່ທາງເຂົ້າ+ ແລະລາວຈະຢືນຢູ່ທາງຂ້າງຂອບປະຕູຂອງທາງເຂົ້າ. ພວກປະໂລຫິດຈະເອົາເຄື່ອງບູຊາເຜົາກັບເຄື່ອງບູຊາສ້າງຄວາມສະຫງົບສຸກຂອງຫົວໜ້າໄປເຜົາ ແລະລາວຈະໝູບລົງຢູ່ຕີນປະຕູຂອງທາງເຂົ້າແລ້ວກໍອອກໄປ. ປະຕູທາງເຂົ້ານີ້ຕ້ອງເປີດໄວ້ຈົນຮອດຕອນແລງ.
3 ໃນວັນຊະບາໂຕແລະໃນມື້ເດືອນອອກໃໝ່ ປະຊາຊົນກໍຈະມາໝູບລົງຕໍ່ໜ້າພະເຢໂຫວາຢູ່ທາງເຂົ້ານີ້.+
4 ເຄື່ອງບູຊາເຜົາທີ່ຫົວໜ້າຈະເອົາມາໃຫ້ພະເຢໂຫວາໃນວັນຊະບາໂຕຕ້ອງເປັນແກະນ້ອຍໂຕຜູ້ທີ່ຕຸ້ຍພີດີງາມ 6 ໂຕ ກັບແກະໂຕຜູ້ທີ່ຕຸ້ຍພີດີງາມໂຕໜຶ່ງ.+
5 ສຳລັບແກະໂຕຜູ້ ລາວຕ້ອງເອົາເຄື່ອງບູຊາທີ່ເຮັດຈາກເມັດເຂົ້າ 1 ເອຟາ*ມາໃຫ້. ແຕ່ສຳລັບແກະນ້ອຍໂຕຜູ້ ລາວຈະໃຫ້ຕາມທີ່ລາວໃຫ້ໄດ້. ສຳລັບເຄື່ອງບູຊາທີ່ເຮັດຈາກເມັດເຂົ້າທຸກໆ 1 ເອຟາ ລາວຕ້ອງເອົານ້ຳມັນໝາກກອກ 1 ຮິນ*ມາໃຫ້.+
6 ໃນມື້ເດືອນອອກໃໝ່ ເຄື່ອງບູຊາຕ້ອງເປັນງົວໂຕຜູ້ໂຕໜຶ່ງ ແກະນ້ອຍໂຕຜູ້ 6 ໂຕ ແລະແກະໂຕຜູ້ໂຕໜຶ່ງ. ທັງໝົດຕ້ອງເປັນໂຕທີ່ຕຸ້ຍພີດີງາມ.+
7 ສຳລັບງົວໂຕຜູ້ ລາວຕ້ອງເອົາເຄື່ອງບູຊາທີ່ເຮັດຈາກເມັດເຂົ້າ 1 ເອຟາ*ມາໃຫ້ ແລະສຳລັບແກະໂຕຜູ້ ລາວກໍຕ້ອງເອົາ 1 ເອຟາມາໃຫ້ ແຕ່ສຳລັບແກະນ້ອຍໂຕຜູ້ ລາວຈະໃຫ້ຕາມທີ່ລາວໃຫ້ໄດ້. ສຳລັບເຄື່ອງບູຊາທີ່ເຮັດຈາກເມັດເຂົ້າທຸກໆ 1 ເອຟາ ລາວຕ້ອງເອົານ້ຳມັນໝາກກອກ 1 ຮິນ*ມາໃຫ້.
8 ເມື່ອຫົວໜ້າເຂົ້າມາ ລາວຕ້ອງເຂົ້າມາທາງຫ້ອງໃຫຍ່ຂອງທາງເຂົ້າແລະຕ້ອງອອກໄປທາງເກົ່າ.+
9 ເມື່ອປະຊາຊົນເຂົ້າມານະມັດສະການພະເຢໂຫວາໃນຍາມເທດສະການຕ່າງໆ+ ຖ້າຜູ້ໃດເຂົ້າມາທາງເຂົ້າທີ່ຢູ່ທິດເໜືອ+ ລາວຕ້ອງອອກໄປທາງເຂົ້າທີ່ຢູ່ທິດໃຕ້+ ແລະຜູ້ທີ່ເຂົ້າມາທາງເຂົ້າທີ່ຢູ່ທິດໃຕ້ ລາວຕ້ອງອອກໄປທາງເຂົ້າທີ່ຢູ່ທິດເໜືອ. ບໍ່ໃຫ້ຜູ້ໃດອອກໄປທາງທີ່ລາວເຂົ້າມາ. ລາວຕ້ອງອອກໄປທາງເຂົ້າທີ່ຢູ່ກົງກັນຂ້າມກັນ.
10 ສຳລັບຫົວໜ້າທີ່ຢູ່ນຳປະຊາຊົນ ລາວຕ້ອງເຂົ້າມາພ້ອມກັບປະຊາຊົນ ແລະຕ້ອງອອກໄປພ້ອມກັບເຂົາເຈົ້າ.
11 ໃນຍາມເທດສະການຕ່າງໆ ສຳລັບງົວໂຕຜູ້ ລາວຕ້ອງເອົາເຄື່ອງບູຊາທີ່ເຮັດຈາກເມັດເຂົ້າ 1 ເອຟາ*ມາໃຫ້ ແລະສຳລັບແກະໂຕຜູ້ ລາວກໍຕ້ອງເອົາ 1 ເອຟາມາໃຫ້. ແຕ່ສຳລັບແກະນ້ອຍໂຕຜູ້ ລາວຈະໃຫ້ຕາມທີ່ລາວໃຫ້ໄດ້. ສຳລັບເຄື່ອງບູຊາທີ່ເຮັດຈາກເມັດເຂົ້າແຕ່ລະ 1 ເອຟາ ລາວຕ້ອງເອົານ້ຳມັນໝາກກອກ 1 ຮິນ*ມາໃຫ້.+
12 ເມື່ອຫົວໜ້າກຽມເຄື່ອງບູຊາເຜົາ+ຫຼືເຄື່ອງບູຊາສ້າງຄວາມສະຫງົບສຸກ ເຊິ່ງເປັນເຄື່ອງບູຊາທີ່ໃຫ້ພະເຢໂຫວາດ້ວຍຄວາມສະໝັກໃຈ ປະຕູທາງເຂົ້າທີ່ຢູ່ທາງທິດຕາເວັນອອກຈະເປີດໄວ້ໃຫ້ລາວ ແລະລາວຈະກຽມເຄື່ອງບູຊາເຜົາແລະເຄື່ອງບູຊາສ້າງຄວາມສະຫງົບສຸກຄືກັບທີ່ລາວກຽມໃນວັນຊະບາໂຕ.+ ເມື່ອລາວອອກໄປແລ້ວຕ້ອງອັດປະຕູໄວ້.+
13 ທຸກໆມື້ ເຈົ້າຕ້ອງກຽມແກະນ້ອຍໂຕຜູ້ທີ່ຕຸ້ຍພີດີງາມອາຍຸ 1 ປີໂຕໜຶ່ງມາເປັນເຄື່ອງບູຊາເຜົາໃຫ້ພະເຢໂຫວາ.+ ເຈົ້າຕ້ອງເຮັດແບບນີ້ທຸກໆຕອນເຊົ້າ.
14 ນອກຈາກແກະນ້ອຍແລ້ວ ທຸກໆຕອນເຊົ້າເຈົ້າຕ້ອງກຽມເຄື່ອງບູຊາທີ່ເຮັດຈາກເມັດເຂົ້າ 1 ສ່ວນ 6 ເອຟາ*ກັບນ້ຳມັນໝາກກອກ 1 ສ່ວນ 3 ຮິນ*ເພື່ອຊິດໃສ່ແປ້ງລະອຽດເຊິ່ງເປັນເຄື່ອງບູຊາທີ່ເຮັດຈາກເມັດເຂົ້າ ເພື່ອໃຫ້ພະເຢໂຫວາເປັນປະຈຳ. ນີ້ເປັນຄຳສັ່ງທີ່ຕ້ອງເຮັດຕາມຕະຫຼອດໄປ.
15 ທຸກໆຕອນເຊົ້າ ເຂົາເຈົ້າຕ້ອງກຽມແກະນ້ອຍໂຕຜູ້ ເຄື່ອງບູຊາທີ່ເຮັດຈາກເມັດເຂົ້າ ແລະນ້ຳມັນໝາກກອກເພື່ອເປັນເຄື່ອງບູຊາເຜົາໃຫ້ພະເຈົ້າເປັນປະຈຳ.’
16 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຖ້າຫົວໜ້າເອົາດິນມູນໃຫ້ລູກຊາຍແຕ່ລະຄົນເປັນຂອງຂວັນ ມັນຈະເປັນຊັບສົມບັດຂອງພວກລູກຊາຍຂອງລາວ. ມັນຈະເປັນດິນມູນຂອງເຂົາເຈົ້າ.
17 ແຕ່ຖ້າລາວເອົາດິນມູນຂອງລາວໃຫ້ຄົນຮັບໃຊ້ເປັນຂອງຂວັນ ດິນນັ້ນຈະເປັນຂອງຄົນຮັບໃຊ້ຈົນຮອດປີທີ່ປົດປ່ອຍໃຫ້ເປັນອິດສະຫຼະ.+ ແລ້ວມັນຈະກັບມາເປັນຂອງຫົວໜ້າຄືເກົ່າ. ດິນທີ່ເອົາໃຫ້ພວກລູກຊາຍເທົ່ານັ້ນຈະເປັນຂອງເຂົາເຈົ້າຕະຫຼອດໄປ.
18 ຫົວໜ້າຕ້ອງບໍ່ເອົາດິນມູນຂອງປະຊາຊົນໂດຍບັງຄັບເຂົາເຈົ້າໃຫ້ອອກໄປຈາກດິນຂອງເຂົາເຈົ້າ. ລາວຕ້ອງເອົາດິນມູນຂອງໂຕເອງໃຫ້ພວກລູກຊາຍຂອງລາວ. ເມື່ອເຮັດແບບນີ້ກໍຈະບໍ່ມີປະຊາຊົນຂອງເຮົາຈັກຄົນຖືກໄລ່ອອກຈາກດິນຂອງໂຕເອງ.’”
19 ຢູ່ທາງຂ້າງທາງເຂົ້າ ມີທາງເຂົ້າ+ອີກທາງໜຶ່ງທີ່ໄປຫ້ອງກິນເຂົ້າທີ່ບໍລິສຸດ*ຂອງພວກປະໂລຫິດເຊິ່ງມີປະຕູຢູ່ທາງທິດເໜືອ.+ ລາວພາຂ້ອຍເຂົ້າໄປທາງນັ້ນ ແລະຂ້ອຍເຫັນບ່ອນໜຶ່ງຢູ່ທາງຫຼັງສຸດເບື້ອງທິດຕາເວັນຕົກ.
20 ລາວບອກຂ້ອຍວ່າ: “ນີ້ເປັນບ່ອນທີ່ພວກປະໂລຫິດຈະຕົ້ມເຄື່ອງບູຊາໄຖ່ຄວາມຜິດກັບເຄື່ອງບູຊາໄຖ່ບາບ ແລະອົບເຄື່ອງບູຊາທີ່ເຮັດຈາກເມັດເຂົ້າ+ ເພື່ອເຂົາເຈົ້າຈະບໍ່ຕ້ອງເອົາຫຍັງອອກໄປເດີ່ນທາງນອກແລະສົ່ງຕໍ່ຄວາມບໍລິສຸດໃຫ້ປະຊາຊົນ.”+
21 ລາວພາຂ້ອຍໄປເບິ່ງ 4 ແຈຂອງເດີ່ນທາງນອກ ແລະຂ້ອຍເຫັນຢູ່ແຕ່ລະແຈມີເດີ່ນນ້ອຍໆ.
22 ເດີ່ນນ້ອຍໆຢູ່ 4 ແຈນັ້ນຍາວ 40 ສອກ* ແລະກວ້າງ 30 ສອກ* ທັງສີ່ເດີ່ນມີຂະໜາດສ່ຳກັນ.
23 ຢູ່ອ້ອມເດີ່ນເຫຼົ່ານັ້ນມີກຳແພງຕ່ຳໆ ແລະຢູ່ທາງລຸ່ມກຳແພງມີບ່ອນຕົ້ມເຄື່ອງບູຊາ.
24 ແລ້ວລາວກໍເວົ້າກັບຂ້ອຍວ່າ: “ນີ້ແມ່ນບ່ອນທີ່ພວກຄົນຮັບໃຊ້ໃນວິຫານຕົ້ມເຄື່ອງບູຊາສຳລັບປະຊາຊົນ.”+
ຂໍ
^ 3,7 ລິດ. ເບິ່ງພາກຜະໜວກ ຂ14.
^ 22 ລິດ. ເບິ່ງພາກຜະໜວກ ຂ14.
^ 22 ລິດ
^ 3,7 ລິດ
^ 3,7 ລິດ
^ 22 ລິດ
^ 3,7 ລິດ
^ 1,22 ລິດ
^ ຫຼື “ຫ້ອງບໍລິສຸດ”
^ 20,7 ແມັດ. ໝາຍເຖິງສອກຍາວ. ເບິ່ງພາກຜະໜວກ ຂ14.
^ 15,5 ແມັດ
