ເອເຊກຽນ 6:1-14
6 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດ ໃຫ້ເຈົ້າແນມເບິ່ງພູຢູ່ອິດສະຣາເອນແລະພະຍາກອນກ່ຽວກັບພູເຫຼົ່ານັ້ນ.
3 ເຈົ້າຕ້ອງເວົ້າວ່າ ‘ພູໃນອິດສະຣາເອນເອີ້ຍ ໃຫ້ຟັງສິ່ງທີ່ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າ. ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າກັບພູ ໂນນພູ ແມ່ນ້ຳ ແລະຮ່ອມພູວ່າ “ເຮົາຈະສົ່ງທະຫານຖືດາບໄປຕໍ່ສູ້ພວກເຈົ້າ ແລະເຮົາຈະທຳລາຍບ່ອນນະມັດສະການຂອງພວກເຈົ້າ.
4 ເຮົາຈະທຸບແທ່ນບູຊາຂອງພວກເຈົ້າໃຫ້ມຸ່ນ ຈະເຮັດໃຫ້ແທ່ນເຜົາເຄື່ອງຫອມຂອງພວກເຈົ້າແຕກ+ ແລະຈະໂຍນສົບຂອງພວກເຈົ້າໃສ່ຮູບບູຊາທີ່ເປັນຕາຂີ້ດຽດ*ຂອງພວກເຈົ້າ.+
5 ພວກອິດສະຣາເອນເອີ້ຍ ເຮົາຈະໂຍນສົບຂອງພວກເຈົ້າໃສ່ຮູບບູຊາທີ່ເປັນຕາຂີ້ດຽດຂອງພວກເຈົ້າ ແລະເຮົາຈະເອົາກະດູກຂອງພວກເຈົ້າຖິ້ມອ້ອມແທ່ນບູຊາຂອງພວກເຈົ້າ.+
6 ທຸກໆເມືອງທີ່ພວກເຈົ້າຢູ່ຈະຖືກເຮັດໃຫ້ຮ້າງເປົ່າ+ ແລະບ່ອນນະມັດສະການຕ່າງໆໃນເມືອງເຫຼົ່ານັ້ນກໍຈະຖືກທຳລາຍແລະເຮັດໃຫ້ຮ້າງເປົ່າຄືກັນ.+ ແທ່ນບູຊາຂອງພວກເຈົ້າຈະຖືກທຸບຈົນມຸ່ນ ຮູບບູຊາທີ່ເປັນຕາຂີ້ດຽດຂອງພວກເຈົ້າຈະຖືກທຳລາຍຈົນບໍ່ເຫຼືອຫຍັງ ແທ່ນເຜົາເຄື່ອງຫອມຂອງພວກເຈົ້າຈະແຕກ ແລະທຸກສິ່ງທີ່ພວກເຈົ້າເຮັດຂຶ້ນມາກໍຈະບໍ່ເຫຼືອຫຍັງເລີຍ.
7 ພວກເຈົ້າຫຼາຍຄົນຈະຖືກຂ້າ+ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.+
8 ແຕ່ເຮົາຈະຈົ່ງບາງຄົນໃນພວກເຈົ້າໄວ້ຕອນທີ່ພວກເຈົ້າກະຈັດກະຈາຍກັນໄປຢູ່ນຳຊາດຕ່າງໆ. ເຂົາເຈົ້າຈະບໍ່ຖືກຂ້າດ້ວຍດາບ.+
9 ຕອນທີ່ເຂົາເຈົ້າຖືກຈັບໄປເປັນຊະເລີຍຢູ່ໃນຊາດຕ່າງໆ ເຂົາເຈົ້າຈະຄິດເຖິງເຮົາ.+ ເຂົາເຈົ້າຈະເຂົ້າໃຈວ່າເຮົາເສຍໃຈຫຼາຍສ່ຳໃດທີ່ເຂົາເຈົ້າບໍ່ສັດຊື່*ແລະປະຖິ້ມເຮົາ+ໄປຫາຮູບບູຊາທີ່ເປັນຕາຂີ້ດຽດ.+ ເຂົາເຈົ້າຈະຮູ້ສຶກຜິດແລະເສຍໃຈຫຼາຍແທ້ໆທີ່ໄດ້ເຮັດສິ່ງທີ່ບໍ່ດີແລະສິ່ງທີ່ເປັນຕາຂີ້ດຽດຫຼາຍຢ່າງ.+
10 ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ ແລະເຮົາເວົ້າໄວ້ວ່າຈະລົງໂທດແນວໃດ ມັນກໍຈະເກີດຂຶ້ນແທ້. ເຮົາບໍ່ໄດ້ຂູ່ຊື່ໆ.”’+
11 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ໃຫ້ເຈົ້າຕົບມື* ທືບຕີນ ແລະຮ້ອງໄຫ້ເສຍໃຈທີ່ຊາດອິດສະຣາເອນເຮັດສິ່ງທີ່ຊົ່ວແລະສິ່ງທີ່ເປັນຕາຂີ້ດຽດ. ເຂົາເຈົ້າຈະຕາຍຍ້ອນຄວາມອຶດຢາກ ໂລກລະບາດ ແລະຖືກຂ້າດ້ວຍດາບ.+
12 ຄົນທີ່ຢູ່ໄກໆຈະຕາຍຍ້ອນໂລກລະບາດ ຄົນທີ່ຢູ່ໃກ້ໆຈະຖືກຂ້າດ້ວຍດາບ ແລະຄົນທີ່ລອດມາໄດ້ກໍຈະຕາຍຍ້ອນຄວາມອຶດຢາກ. ເຮົາຈະປ່ອຍຄວາມໃຈຮ້າຍຂອງເຮົາໃສ່ເຂົາເຈົ້າສຸດຂີດ.+
13 ເມື່ອສົບຂອງເຂົາເຈົ້າຖືກຖິ້ມຢູ່ກັບຮູບບູຊາທີ່ເປັນຕາຂີ້ດຽດ ຢູ່ອ້ອມແທ່ນບູຊາ+ ຢູ່ຕາມໂນນພູ ຢູ່ຕາມຈອມພູທຸກໜ່ວຍ ຢູ່ກ້ອງຕົ້ນໄມ້ໃຫຍ່ ແລະຢູ່ກ້ອງງ່າຂອງຕົ້ນໄມ້ໃຫຍ່ທີ່ເຂົາເຈົ້າເຄີຍເຜົາເຄື່ອງຫອມໃຫ້ຮູບບູຊາທີ່ເປັນຕາຂີ້ດຽດຂອງເຂົາເຈົ້າ+ ຕອນນັ້ນແຫຼະ ເຂົາເຈົ້າຈະຮູ້ວ່າເຮົາແມ່ນເຢໂຫວາ.+
14 ເຮົາຈະລົງໂທດເຂົາເຈົ້າແລະເຮັດໃຫ້ແຜ່ນດິນຂອງເຂົາເຈົ້າຮ້າງເປົ່າ. ທຸກໆບ່ອນທີ່ເຂົາເຈົ້າຢູ່ຈະຮ້າງເປົ່າຫຼາຍກວ່າບ່ອນກັນດານທີ່ໃກ້ດິບລາ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ.’”
ຂໍ
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ
^ ຫຼື “ເຮັດຜິດສິນລະທຳທາງເພດ; ສຳສ່ອນ”
^ ໃນສະໄໝແຕ່ກີ້ ບາງເທື່ອຄົນກໍອາດເຮັດທ່າທາງແບບນີ້ເພື່ອສະແດງເຖິງຄວາມເສຍໃຈ
