ເອເຊກຽນ 7:1-27
7 ພະເຢໂຫວາເວົ້າກັບຂ້ອຍອີກວ່າ:
2 “ລູກມະນຸດ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າກັບຊາດອິດສະຣາເອນວ່າ ‘ຈຸດຈົບມາຮອດແລ້ວ! ຈຸດຈົບຈະເກີດຂຶ້ນຢູ່ທົ່ວແຜ່ນດິນຂອງພວກເຈົ້າ.
3 ຈຸດຈົບຂອງພວກເຈົ້າມາຮອດແລ້ວ ເຮົາຈະປ່ອຍຄວາມໃຈຮ້າຍຂອງເຮົາໃສ່ພວກເຈົ້າສຸດຂີດ. ເຮົາຈະຕັດສິນພວກເຈົ້າຕາມການກະທຳຂອງພວກເຈົ້າ ແລະພວກເຈົ້າຕ້ອງຮັບຜິດຊອບທີ່ພວກເຈົ້າເຮັດສິ່ງທີ່ເປັນຕາຂີ້ດຽດຫຼາຍຢ່າງ.
4 ເຮົາຈະບໍ່ອີ່ຕົນແລະບໍ່ສົນໃຈພວກເຈົ້າ.+ ເຮົາຈະໃຫ້ພວກເຈົ້າໄດ້ຮັບຜົນຈາກການກະທຳຂອງພວກເຈົ້າແລະຈາກສິ່ງທີ່ເປັນຕາຂີ້ດຽດທີ່ພວກເຈົ້າເຮັດ+ ແລ້ວພວກເຈົ້າຈະຮູ້ວ່າເຮົາແມ່ນເຢໂຫວາ.’+
5 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຄວາມຈິບຫາຍຈະເກີດຂຶ້ນແລະມັນຈະເປັນແບບທີ່ບໍ່ເຄີຍເກີດຂຶ້ນມາກ່ອນ.+
6 ຈຸດຈົບໃກ້ຈະມາຮອດແລ້ວ. ມັນຈະເກີດຂຶ້ນແທ້ໆແລະຈະເກີດຂຶ້ນແບບກະທັນຫັນ.
7 ພວກເຈົ້າທີ່ຢູ່ແຜ່ນດິນນີ້ ຜຽນຂອງພວກເຈົ້າມາຮອດແລ້ວ. ເວລານັ້ນມາຮອດແລ້ວ. ມື້ນັ້ນໃກ້ຈະຮອດແລ້ວ.+ ຢູ່ເທິງພູຈະບໍ່ມີສຽງໂຫ່ຮ້ອງຍິນດີ ແຕ່ຈະມີສຽງຂອງຄວາມສັບສົນວຸ່ນວາຍ.
8 ເຮົາຈະປ່ອຍຄວາມໃຈຮ້າຍຂອງເຮົາໃສ່ພວກເຈົ້າສຸດຂີດ.+ ເຮົາຈະຕັດສິນພວກເຈົ້າຕາມການກະທຳຂອງພວກເຈົ້າ ແລະພວກເຈົ້າຕ້ອງຮັບຜິດຊອບທີ່ພວກເຈົ້າເຮັດສິ່ງທີ່ເປັນຕາຂີ້ດຽດຫຼາຍຢ່າງ.
9 ເຮົາຈະບໍ່ອີ່ຕົນແລະບໍ່ສົນໃຈພວກເຈົ້າ.+ ເຮົາຈະໃຫ້ພວກເຈົ້າໄດ້ຮັບຜົນຈາກການກະທຳຂອງພວກເຈົ້າແລະຈາກສິ່ງທີ່ເປັນຕາຂີ້ດຽດທີ່ພວກເຈົ້າເຮັດ. ແລ້ວພວກເຈົ້າຈະຮູ້ວ່າເຮົາເຢໂຫວາເປັນຜູ້ລົງໂທດພວກເຈົ້າ.+
10 ມື້ນັ້ນມາຮອດແລ້ວ! + ຜຽນຂອງພວກເຈົ້າ*ມາຮອດແລ້ວ. ເຮົາພ້ອມທີ່ຈະໃຊ້ໄມ້ແສ້ລົງໂທດພວກເຈົ້າ ແລະພວກສັດຕູກໍຍິ່ງຈອງຫອງຫຼາຍຂຶ້ນ.
11 ຍ້ອນພວກເຈົ້າຊົ່ວຫຼາຍ ເຮົາຈະໃຊ້ໄມ້ແສ້ຟາດພວກເຈົ້າແຮງໆ+ ແລະຈະບໍ່ມີຫຍັງເຫຼືອເລີຍ ບໍ່ວ່າຈະເປັນຄົນ ຊັບສົມບັດ ຫຼືຊື່ສຽງຂອງພວກເຈົ້າ.
12 ເວລານັ້ນມາຮອດແລ້ວ. ມື້ນັ້ນຈະມາຮອດແນ່ນອນ. ຄົນຊື້ຢ່າດີໃຈແລະຄົນຂາຍກໍຢ່າເສຍໃຈ ຍ້ອນເຮົາຈະໃຈຮ້າຍໃຫ້ທຸກຄົນ.*+
13 ເຖິງຈະລອດຊີວິດ ແຕ່ຜູ້ທີ່ຂາຍດິນຂອງໂຕເອງກໍຈະບໍ່ໄດ້ກັບໄປຢູ່ຫັ້ນ ຍ້ອນວ່າເລື່ອງໃນນິມິດນີ້ຈະເກີດຂຶ້ນກັບທຸກຄົນ. ຈະບໍ່ມີໃຜໄດ້ກັບໄປຢູ່ດິນຂອງໂຕເອງ ແລະຈະບໍ່ມີໃຜປົກປ້ອງຊີວິດຂອງໂຕເອງໄດ້ຍ້ອນເຂົາເຈົ້າເຮັດຜິດຫຼາຍ.
14 ໃນມື້ນັ້ນ ເຂົາເຈົ້າຈະເປົ່າແກ+ແລະທຸກຄົນຈະພ້ອມ ແຕ່ຈະບໍ່ມີໃຜອອກໄປສູ້ຮົບ ຍ້ອນເຮົາຈະໃຈຮ້າຍໃຫ້ທຸກຄົນ.+
15 ຢູ່ນອກເມືອງມີດາບ+ແລະຢູ່ໃນເມືອງມີຄວາມອຶດຢາກກັບໂລກລະບາດ. ຄົນທີ່ຢູ່ນອກເມືອງຈະຖືກຂ້າດ້ວຍດາບ ແລະຄົນທີ່ຢູ່ໃນເມືອງຈະຕາຍຍ້ອນຄວາມອຶດຢາກແລະໂລກລະບາດ.+
16 ຜູ້ທີ່ລອດຕາຍກໍຈະໜີໄປຢູ່ຕາມພູ. ເຂົາເຈົ້າຈະເປັນຄືກັບນົກເຂົາທີ່ຢູ່ຮ່ອມພູ. ແຕ່ລະຄົນຈະເສຍໃຈທີ່ເຮັດຜິດຫຼາຍ.+
17 ແຂນຂອງເຂົາເຈົ້າຈະລ່ອຍແລະຫົວເຂົ່າຂອງເຂົາເຈົ້າຈະປຽກ.*+
18 ເຂົາເຈົ້າຈະຕ້ອງນຸ່ງຜ້າເນື້ອຫຍາບ+ແລະຢ້ານຈົນໂຕສັ່ນ. ທຸກຄົນຈະຕ້ອງຖືກເຮັດໃຫ້ອັບອາຍແລະຈະຕ້ອງແຖຫົວ.*+
19 ເຂົາເຈົ້າຈະໂຍນເງິນຖິ້ມຢູ່ຕາມຫົນທາງແລະຄຳຈະເປັນສິ່ງທີ່ເຂົາເຈົ້າຂີ້ດຽດ. ໃນມື້ທີ່ພະເຢໂຫວາໃຈຮ້າຍຫຼາຍ ເງິນຄຳຂອງເຂົາເຈົ້າກໍຈະຊ່ວຍຊີວິດເຂົາເຈົ້າບໍ່ໄດ້.+ ເຂົາເຈົ້າຈະກິນບໍ່ອີ່ມແລະຈະຫິວແຮງ ຍ້ອນເງິນຄຳເປັນຕົ້ນເຫດພາໃຫ້ເຂົາເຈົ້າເຮັດຜິດ.
20 ເຂົາເຈົ້າພູມໃຈໃນເຄື່ອງປະດັບທີ່ງາມໆຂອງໂຕເອງ ແລະເອົາເງິນເອົາຄຳມາເຮັດເປັນຮູບບູຊາທີ່ເປັນຕາຂີ້ດຽດ.+ ຍ້ອນແນວນີ້ ເຮົາຈຶ່ງເຮັດໃຫ້ເງິນຄຳກາຍເປັນສິ່ງທີ່ເປັນຕາຂີ້ດຽດສຳລັບເຂົາເຈົ້າ.
21 ເຮົາຈະໃຫ້ຄົນຕ່າງຊາດກັບພວກຄົນຊົ່ວມາປຸ້ນເອົາເງິນເອົາຄຳ*ຂອງເຂົາເຈົ້າ ແລ້ວເຂົາເຈົ້າຈະເຮັດໃຫ້ມັນບໍ່ສະອາດ.
22 ເຮົາຈະປິ່ນໜ້າໜີຈາກເຂົາເຈົ້າ+ ແລະເຂົາເຈົ້າຈະເຮັດໃຫ້ບ່ອນສັກສິດ*ຂອງເຮົາບໍ່ສະອາດ. ພວກຂີ້ລັກຈະເຂົ້າໄປຫັ້ນແລະເຮັດໃຫ້ບ່ອນນັ້ນບໍ່ສະອາດ.+
23 ໃຫ້ເຮັດໂສ້*+ ຍ້ອນແຜ່ນດິນມີແຕ່ເລືອດຂອງຄົນທີ່ຖືກຕັດສິນແບບບໍ່ຍຸຕິທຳ+ແລະໃນເມືອງກໍມີແຕ່ຄວາມຮຸນແຮງ.+
24 ເຮົາຈະເອີ້ນຊາດທີ່ຊົ່ວທີ່ສຸດ+ໃຫ້ມາຍຶດເຮືອນຂອງເຂົາເຈົ້າ.+ ເຮົາຈະເຮັດໃຫ້ຄົນທີ່ແຂງແຮງບໍ່ມີແນວຈະອວດ ແລະເຮົາຈະເຮັດໃຫ້ບ່ອນນະມັດສະການຂອງເຂົາເຈົ້າບໍ່ສະອາດ.+
25 ຕອນທີ່ເຂົາເຈົ້າເດືອດຮ້ອນ ເຂົາເຈົ້າຈະຂໍໃຫ້ມີຄວາມສະຫງົບສຸກ ແຕ່ຈະບໍ່ມີເລີຍ.+
26 ໄພພິບັດຈະເກີດຂຶ້ນຊ້ຳແລ້ວຊ້ຳອີກ ແລະເຂົາເຈົ້າຈະໄດ້ຍິນຂ່າວຮ້າຍຕິດຕໍ່ກັນຕະຫຼອດ. ເຂົາເຈົ້າຈະຊອກຫານິມິດຈາກຜູ້ພະຍາກອນ+ ແຕ່ຈະບໍ່ໄດ້ຫຍັງ. ຄຳສອນຂອງພວກປະໂລຫິດແລະຄຳແນະນຳຈາກພວກຜູ້ນຳຈະບໍ່ມີປະໂຫຍດຫຍັງເລີຍ.+
27 ກະສັດຈະໄວ້ທຸກ+ ຫົວໜ້າຈະໂສກເສົ້າເສຍໃຈ ແລະປະຊາຊົນຈະຢ້ານຈົນໂຕສັ່ນ. ເຮົາຈະເຮັດກັບເຂົາເຈົ້າຕາມການກະທຳຂອງເຂົາເຈົ້າ ແລະເຮົາຈະຕັດສິນເຂົາເຈົ້າຄືກັບທີ່ເຂົາເຈົ້າຕັດສິນຄົນອື່ນ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາ.’”+
ຂໍ
^ ຫຼືອາດແປວ່າ “ພວງມາໄລ”
^ ໝາຍເຖິງທັງຜູ້ຊື້ແລະຜູ້ຂາຍດິນຈະບໍ່ໄດ້ຮັບປະໂຫຍດຫຍັງ ຍ້ອນທຸກສິ່ງຈະຖືກທຳລາຍໝົດ
^ ໝາຍເຖິງຢ້ານຈົນຍ່ຽວເຮ່ຍ
^ ໝາຍເຖິງແຖຫົວເພື່ອໄວ້ທຸກ
^ ໝາຍເຖິງເງິນຄຳທີ່ເຂົາເຈົ້າໃຊ້ເຮັດຮູບບູຊາ
^ ແປຕາມໂຕວ່າ “ບ່ອນທີ່ຖືກປິດໄວ້.” ເບິ່ງຄືວ່າໝາຍເຖິງຫ້ອງບໍລິສຸດທີ່ສຸດໃນວິຫານຂອງພະເຢໂຫວາ.
^ ໝາຍເຖິງໂສ້ຂອງການເປັນຊະເລີຍ
