ເອເຊກຽນ 8:1-18
8 ໃນວັນທີ 5 ເດືອນທີ 6 ຂອງປີທີ 6* ຕອນທີ່ຂ້ອຍນັ່ງຢູ່ໃນເຮືອນແລະພວກຜູ້ນຳຂອງຢູດານັ່ງຢູ່ຕໍ່ໜ້າຂ້ອຍ ພະລັງ*ຂອງພະເຢໂຫວາພະເຈົ້າຜູ້ຍິ່ງໃຫຍ່ສູງສຸດກໍມາຢູ່ນຳຂ້ອຍ.
2 ຂ້ອຍເຫັນຜູ້ໜຶ່ງຄ້າຍຄືກັບໄຟ. ຕັ້ງແຕ່ແອວຂອງເພິ່ນຂຶ້ນໄປເຫຼື້ອມຄືເງິນປະສົມກັບຄຳ+ ແລະຕັ້ງແຕ່ແອວຂອງເພິ່ນລົງມາເປັນຄືໄຟ.+
3 ເພິ່ນເດ່ສິ່ງທີ່ຄືກັບມືອອກມາກຳຜົມຂ້ອຍ. ໃນນິມິດນັ້ນ ພະລັງຂອງພະເຈົ້າ*ໄດ້ພາຂ້ອຍຂຶ້ນໄປເທິງຟ້າ* ແລະໄປລົງຢູ່ເມືອງເຢຣູຊາເລັມຢູ່ປະຕູຂອງເດີ່ນທາງໃນ+ທີ່ຢູ່ທາງທິດເໜືອ. ຢູ່ເດີ່ນນັ້ນ ມີຮູບບູຊາທີ່ເປັນຕາຂີ້ດຽດທີ່ເຮັດໃຫ້ພະເຈົ້າໃຈຮ້າຍຫຼາຍ.+
4 ຂ້ອຍເຫັນແສງລັດສະໝີຂອງພະເຈົ້າຂອງອິດສະຣາເອນ+ຄືກັບທີ່ຂ້ອຍເຄີຍເຫັນຢູ່ທົ່ງພຽງ.+
5 ຈາກນັ້ນ ເພິ່ນເວົ້າກັບຂ້ອຍວ່າ: “ລູກມະນຸດ ໃຫ້ເຈົ້າແນມໄປທາງທິດເໜືອ.” ຂ້ອຍຈຶ່ງແນມໄປທາງທິດເໜືອທີ່ມີປະຕູເຂົ້າໄປຫາແທ່ນບູຊາ. ຢູ່ຫັ້ນ ຂ້ອຍເຫັນຮູບບູຊາທີ່ເຮັດໃຫ້ພະເຈົ້າໃຈຮ້າຍຫຼາຍ.
6 ເພິ່ນເວົ້າກັບຂ້ອຍວ່າ: “ລູກມະນຸດ ເຈົ້າເຫັນສິ່ງທີ່ເປັນຕາຂີ້ດຽດທີ່ຊາດອິດສະຣາເອນເຮັດຢູ່ນີ້ບໍ?+ ຍ້ອນແນວນີ້ແຫຼະ ເຮົາຈຶ່ງໜີໄປໄກໆຈາກວິຫານຂອງເຮົາ.+ ແຕ່ເຈົ້າຈະເຫັນສິ່ງທີ່ເປັນຕາຂີ້ດຽດຫຼາຍກວ່ານີ້ອີກ.”
7 ຕໍ່ມາ ເພິ່ນກໍພາຂ້ອຍໄປທາງເຂົ້າເດີ່ນທາງໃນຂອງວິຫານແລະຂ້ອຍເຫັນປ່ອງຢູ່ກຳແພງ.
8 ເພິ່ນບອກຂ້ອຍວ່າ: “ລູກມະນຸດ ໃຫ້ເຈົ້າເຈາະປ່ອງຢູ່ກຳແພງໃຫ້ໃຫຍ່ຂຶ້ນ.” ຂ້ອຍກໍເຈາະໃຫ້ມັນໃຫຍ່ຂຶ້ນ ແລ້ວກໍເຫັນທາງເຂົ້າ.
9 ເພິ່ນເວົ້າກັບຂ້ອຍວ່າ: “ໃຫ້ເຈົ້າເຂົ້າໄປເບິ່ງສິ່ງທີ່ເປັນຕາຂີ້ດຽດທີ່ເຂົາເຈົ້າກຳລັງເຮັດ.”
10 ຂ້ອຍກໍເຂົ້າໄປແລະເຫັນຮູບແກະສະຫຼັກສັດເລືອຄານ ສັດທີ່ເປັນຕາຂີ້ດຽດ+ ແລະຮູບບູຊາອື່ນໆທີ່ເປັນຕາຂີ້ດຽດ*ຂອງຊາດອິດສະຣາເອນ+ຢູ່ທຸກໆຝາ.
11 ພວກຜູ້ນຳ 70 ຄົນຂອງອິດສະຣາເອນຢືນຢູ່ຕໍ່ໜ້າຮູບເຫຼົ່ານັ້ນ ແລະຢາອາຊານີຢາລູກຊາຍຂອງຊາຟານ+ກໍຢູ່ນຳເຂົາເຈົ້າ. ແຕ່ລະຄົນຖືແນວເຜົາເຄື່ອງຫອມແລະມີຄວັນລອຍຂຶ້ນໄປ.+
12 ເພິ່ນເວົ້າກັບຂ້ອຍວ່າ: “ລູກມະນຸດ ເຈົ້າເຫັນບໍວ່າພວກຜູ້ນຳຂອງອິດສະຣາເອນເຮັດຫຍັງຢູ່ບ່ອນມືດໆຢູ່ຫ້ອງທາງໃນທີ່ເຂົາເຈົ້າຕັ້ງຮູບບູຊາໄວ້? ເຂົາເຈົ້າເວົ້າວ່າ ‘ພະເຢໂຫວາບໍ່ເຫັນພວກເຮົາດອກ. ພະເຢໂຫວາປະຖິ້ມແຜ່ນດິນນີ້ແລ້ວ.’”+
13 ເພິ່ນເວົ້າກັບຂ້ອຍຕໍ່ອີກວ່າ: “ເຈົ້າຈະເຫັນສິ່ງທີ່ເປັນຕາຂີ້ດຽດຫຼາຍກວ່ານີ້ອີກ.”
14 ແລ້ວເພິ່ນກໍພາຂ້ອຍໄປປະຕູທາງເຂົ້າທີ່ຢູ່ທາງທິດເໜືອຂອງວິຫານຂອງພະເຢໂຫວາ. ຢູ່ຫັ້ນ ຂ້ອຍເຫັນພວກຜູ້ຍິງນັ່ງຮ້ອງໄຫ້ໃຫ້ພະຕຳມຸດ.
15 ເພິ່ນເວົ້າກັບຂ້ອຍວ່າ: “ລູກມະນຸດ ເຈົ້າເຫັນສິ່ງທີ່ເຂົາເຈົ້າເຮັດແມ່ນບໍ? ແຕ່ເຈົ້າຈະເຫັນສິ່ງທີ່ເປັນຕາຂີ້ດຽດຫຼາຍກວ່ານີ້ອີກ.”+
16 ແລ້ວເພິ່ນກໍພາຂ້ອຍໄປເດີ່ນທາງໃນວິຫານຂອງພະເຢໂຫວາ.+ ຢູ່ທາງເຂົ້າວິຫານຂອງພະເຢໂຫວາລະຫວ່າງຫ້ອງທາງເຂົ້າກັບແທ່ນບູຊາ ມີຜູ້ຊາຍ 25 ຄົນປິ່ນຫຼັງໃສ່ວິຫານຂອງພະເຢໂຫວາແລະປິ່ນໜ້າໄປທາງທິດຕາເວັນອອກ. ເຂົາເຈົ້າກົ້ມກາບດວງຕາເວັນຢູ່ທາງທິດຕາເວັນອອກ.+
17 ເພິ່ນເວົ້າກັບຂ້ອຍວ່າ: “ລູກມະນຸດ ເຈົ້າເຫັນສິ່ງທີ່ເຂົາເຈົ້າເຮັດແມ່ນບໍ? ພວກຢູດາເຮັດສິ່ງທີ່ເປັນຕາຂີ້ດຽດຢູ່ນີ້ຍັງບໍ່ພໍບໍ? ເຂົາເຈົ້າເຮັດໃຫ້ແຜ່ນດິນມີແຕ່ຄວາມຮຸນແຮງ+ແລະເຮັດໃຫ້ເຮົາໃຈຮ້າຍຕະຫຼອດ. ຕອນນີ້ ເຂົາເຈົ້າຍັງເອົາກິ່ງໄມ້*ມາແທງດັງເຮົານຳອີກ.
18 ຍ້ອນແນວນີ້ ເຮົາຈຶ່ງໃຈຮ້າຍຫຼາຍ. ເຮົາຈະບໍ່ອີ່ຕົນແລະບໍ່ສົນໃຈເຂົາເຈົ້າ.+ ເຖິງວ່າເຂົາເຈົ້າຈະຮ້ອງຫາເຮົາດັງໆ ແຕ່ເຮົາກໍຈະບໍ່ຟັງ.”+
ຂໍ ຄວາມ ໄຂ ເງື່ອນ
^ ໝາຍເຖິງປີທີ 6 ທີ່ກະສັດເຢໂຮຢາກິນ ເອເຊກຽນ ແລະຄົນຢິວຄົນອື່ນໆຖືກຈັບໄປເປັນຊະເລີຍ. ເບິ່ງ ອຊກ 1:2.
^ ແປຕາມໂຕວ່າ “ມື”
^ ໃນພາສາເຮັບເຣີຄຳນີ້ອາດໝາຍເຖິງພະລັງຂອງພະເຈົ້າຫຼືທູດສະຫວັນ
^ ແປຕາມໂຕວ່າ “ລະຫວ່າງແຜ່ນດິນກັບສະຫວັນ”
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ
^ ເບິ່ງຄືວ່າເປັນກິ່ງໄມ້ທີ່ໃຊ້ໃນການນະມັດສະການຮູບບູຊາ