ຈົດໝາຍເຖິງຄລິດສະຕຽນໃນເມືອງເອເຟໂຊ 3:1-21
3 ຂ້ອຍໂປໂລຈຶ່ງເປັນນັກໂທດ+ຍ້ອນເຫັນແກ່ພະຄລິດເຢຊູແລະເພື່ອພວກເຈົ້າທີ່ເປັນຄົນຕ່າງຊາດ.
2 ທີ່ຈິງ ພວກເຈົ້າເຄີຍໄດ້ຍິນແລ້ວວ່າ ພະເຈົ້າໃຫ້ຂ້ອຍມີໜ້າທີ່+ຊ່ວຍເຫຼືອພວກເຈົ້າໃຫ້ໄດ້ຮັບປະໂຫຍດຈາກຄວາມກະລຸນາທີ່ຍິ່ງໃຫຍ່ຂອງເພິ່ນ
3 ແລະເພິ່ນເປີດເຜີຍໃຫ້ຂ້ອຍຮູ້ຄວາມລັບສັກສິດຄືກັບທີ່ຂ້ອຍໄດ້ຂຽນໄປແດ່ແລ້ວ.
4 ຖ້າພວກເຈົ້າອ່ານ ພວກເຈົ້າກໍຈະຮູ້ວ່າຂ້ອຍເຂົ້າໃຈຄວາມລັບສັກສິດ+ເລື່ອງພະຄລິດດີສ່ຳໃດ.
5 ພະເຈົ້າບໍ່ໄດ້ເປີດເຜີຍຄວາມລັບນີ້ໃຫ້ຄົນສະໄໝແຕ່ກີ້ຮູ້ ແຕ່ຕອນນີ້ ເພິ່ນໃຊ້ພະລັງຂອງເພິ່ນເປີດເຜີຍຄວາມລັບນີ້ໃຫ້ພວກອັກຄະສາວົກ*ແລະພວກຜູ້ພະຍາກອນທີ່ສັດຊື່ຮູ້.+
6 ຄວາມລັບນີ້ແມ່ນ ຄົນຕ່າງຊາດທີ່ເປັນລູກສິດຂອງພະຄລິດເຢຊູຈະໄດ້ຮັບມໍລະດົກຮ່ວມກັບເພິ່ນ ແລະຈະເປັນອະໄວຍະວະໃນຮ່າງກາຍດຽວກັນ.+ ເຂົາເຈົ້າຈະໄດ້ຮັບສິ່ງທີ່ພະເຈົ້າສັນຍາກັບພວກເຮົາ. ທັງໝົດນີ້ເປັນໄປໄດ້ກໍຍ້ອນມີການປະກາດຂ່າວດີ.
7 ຂ້ອຍເປັນຜູ້ຮັບໃຊ້ທີ່ຊ່ວຍພວກເຈົ້າໃຫ້ເຂົ້າໃຈຄວາມລັບສັກສິດນີ້ຍ້ອນຂ້ອຍໄດ້ຮັບຄວາມກະລຸນາທີ່ຍິ່ງໃຫຍ່ເປັນຂອງຂວັນຈາກພະເຈົ້າ. ເພິ່ນໃຊ້ລິດເດດເພື່ອໃຫ້ຂ້ອຍໄດ້ຮັບຄວາມກະລຸນານັ້ນ.+
8 ຂ້ອຍທຽບບໍ່ໄດ້ເລີຍກັບຄົນທີ່ເບິ່ງຄືຕ່ຳຕ້ອຍທີ່ສຸດໃນພວກຜູ້ບໍລິສຸດ+ ແຕ່ພະເຈົ້າຍັງໃຫ້ຄວາມກະລຸນາທີ່ຍິ່ງໃຫຍ່ກັບຂ້ອຍ+ເພື່ອໃຫ້ຂ້ອຍປະກາດຂ່າວດີກັບຄົນຕ່າງຊາດ. ຂ່າວດີນັ້ນແມ່ນສິ່ງດີໆທີ່ໄດ້ຈາກພະຄລິດເຊິ່ງນັບບໍ່ຖ້ວນ.
9 ຂ້ອຍຍັງຕ້ອງຊ່ວຍໃຫ້ທຸກຄົນຮູ້ວ່າ ພະເຈົ້າຜູ້ສ້າງທຸກສິ່ງເຮັດຫຍັງແດ່ເພື່ອເປີດເຜີຍຄວາມລັບສັກສິດ+ທີ່ເພິ່ນໄດ້ປິດບັງໄວ້ດົນນານມາແລ້ວ.
10 ພະເຈົ້າເຮັດແນວນີ້ຍ້ອນວ່າຕອນນີ້ເພິ່ນຈະໄດ້ໃຊ້ປະຊາຄົມ+ເພື່ອເປີດເຜີຍໃຫ້ພວກຜູ້ປົກຄອງແລະພວກຜູ້ມີອຳນາດໃນສະຫວັນ*ໄດ້ຮູ້ຈັກສະຕິປັນຍາທີ່ເພິ່ນສະແດງໃຫ້ເຫັນໃນຫຼາຍໆທາງ.+
11 ເລື່ອງນີ້ເປັນໄປຕາມຄວາມຕ້ອງການຂອງພະເຈົ້າທີ່ມີຢູ່ຕະຫຼອດໄປ ເຊິ່ງເພິ່ນຈະເຮັດໃຫ້ເກີດຂຶ້ນແທ້ໂດຍທາງພະຄລິດ+ເຢຊູຜູ້ເປັນນາຍຂອງພວກເຮົາ
12 ແລະຄວາມເຊື່ອໃນພະຄລິດນີ້ແຫຼະທີ່ເຮັດໃຫ້ພວກເຮົາກ້າເວົ້າແລະອະທິດຖານເຖິງພະເຈົ້າ+ໄດ້ຢ່າງໝັ້ນໃຈ.
13 ດັ່ງນັ້ນ ຂໍຢ່າທໍ້ໃຈທີ່ຂ້ອຍຕ້ອງເຈິຄວາມທຸກລຳບາກເພື່ອພວກເຈົ້າ ຍ້ອນສິ່ງນີ້ເຮັດໃຫ້ພວກເຈົ້າໄດ້ຮັບກຽດ.+
14 ຍ້ອນເຫດຜົນນີ້ ຂ້ອຍຈຶ່ງຄູ້ເຂົ່າອະທິດຖານເຖິງພະເຈົ້າຜູ້ເປັນພໍ່.
15 ເພິ່ນເປັນຜູ້ທີ່ເຮັດໃຫ້ທຸກຄອບຄົວທີ່ຢູ່ສະຫວັນແລະຢູ່ໂລກມີຢູ່ໄດ້.*
16 ຂ້ອຍອະທິດຖານຂໍພະເຈົ້າຜູ້ມີລິດເດດຍິ່ງໃຫຍ່ໃຫ້ໃຊ້ພະລັງຂອງເພິ່ນເພື່ອເຮັດໃຫ້ໃຈຂອງພວກເຈົ້າເຂັ້ມແຂງ+
17 ແລະຊ່ວຍພວກເຈົ້າທີ່ມີຄວາມເຊື່ອໃຫ້ມີພະຄລິດຢູ່ໃນໃຈແລະມີຄວາມຮັກຕໍ່ກັນ.+ ຂໍໃຫ້ພວກເຈົ້າຕັ້ງໝັ້ນຄົງ+ແລະຍຶດຢູ່ກັບຮາກຖານນັ້ນ+
18 ເພື່ອພວກເຈົ້າກັບພວກຜູ້ບໍລິສຸດທຸກຄົນຈະເຂົ້າໃຈຄວາມຈິງຄົບທຸກດ້ານ ທັງຄວາມກວ້າງ ຄວາມຍາວ ຄວາມສູງ ແລະຄວາມເລິກ
19 ແລະຈະຮູ້ຈັກຄວາມຮັກຂອງພະຄລິດ+ທີ່ເໜືອກວ່າຄວາມຮູ້ ແລ້ວພະເຈົ້າຈະໃຫ້ພວກເຈົ້າມີຄຸນລັກສະນະແບບເພິ່ນຢ່າງຄົບຖ້ວນ.
20 ພະເຈົ້າເຮັດທຸກສິ່ງໄດ້ຫຼາຍກວ່າທີ່ພວກເຮົາຈະຂໍແລະໃນແບບທີ່ພວກເຮົາຄິດບໍ່ເຖິງ+ ຍ້ອນພະລັງຂອງພະເຈົ້າຢູ່ນຳພວກເຮົາ.+
21 ຂໍໃຫ້ເພິ່ນໄດ້ຮັບການຍ້ອງຍໍສັນລະເສີນໂດຍທາງປະຊາຄົມແລະທາງພະຄລິດເຢຊູຕະຫຼອດໄປ. ອາແມນ.*
ຂໍ
^ ໃນພາສາກຣີກຄຳນີ້ແປວ່າ “ຜູ້ທີ່ຖືກສົ່ງອອກໄປ”
^ ໝາຍເຖິງພວກທູດສະຫວັນ
^ ຫຼື “ໄດ້ຮັບຊື່”
^ ຫຼື “ຂໍໃຫ້ເປັນແນວນັ້ນ”
