ຈົດໝາຍເຖິງຄລິດສະຕຽນຄົນເຮັບເຣີ 4:1-16
4 ດັ່ງນັ້ນ ໃນເມື່ອຍັງມີຄຳສັນຍາທີ່ຈະໃຫ້ພວກເຮົາເຂົ້າໄປໃນບ່ອນຢຸດພັກຂອງພະເຈົ້າ ກໍໃຫ້ພວກເຮົາລະວັງເພື່ອຈະບໍ່ມີຜູ້ໃດພາດໂອກາດນັ້ນ.+
2 ພວກເຮົາກໍໄດ້ຍິນຂ່າວດີຄືກັບປູ່ຍ່າຕານາຍຂອງພວກເຮົາ+ ແຕ່ເຂົາເຈົ້າບໍ່ໄດ້ປະໂຫຍດຈາກຖ້ອຍຄຳທີ່ໄດ້ຍິນຍ້ອນບໍ່ມີຄວາມເຊື່ອແບບດຽວກັບຄົນທີ່ເຊື່ອຟັງ.
3 ສ່ວນພວກເຮົາທີ່ສະແດງຄວາມເຊື່ອໄດ້ເຂົ້າໄປໃນບ່ອນຢຸດພັກ ບໍ່ຄືກັບເຂົາເຈົ້າ*ທີ່ພະເຈົ້າເວົ້າວ່າ: “ເຮົາສາບານດ້ວຍຄວາມໃຈຮ້າຍວ່າ ‘ເຂົາເຈົ້າຈະບໍ່ໄດ້ເຂົ້າໄປໃນບ່ອນຢຸດພັກຂອງເຮົາ’”+ ທັງໆທີ່ວຽກຂອງເພິ່ນແລ້ວໆຕັ້ງແຕ່ເລີ່ມມີໂລກນີ້.*+
4 ມີບ່ອນໜຶ່ງໃນພະຄຳພີທີ່ເພິ່ນເວົ້າເຖິງວັນທີ 7 ວ່າ: “ໃນວັນທີ 7 ພະເຈົ້າໄດ້ຢຸດພັກຈາກວຽກທັງໝົດຂອງເພິ່ນ.”+
5 ເພິ່ນຍັງເວົ້າຢູ່ອີກບ່ອນໜຶ່ງວ່າ: “ເຂົາເຈົ້າຈະບໍ່ໄດ້ເຂົ້າໄປໃນບ່ອນຢຸດພັກຂອງເຮົາ.”+
6 ພວກນັ້ນທີ່ໄດ້ຍິນຂ່າວດີກ່ອນບໍ່ໄດ້ເຂົ້າໄປໃນບ່ອນຢຸດພັກຍ້ອນບໍ່ເຊື່ອຟັງ ແຕ່ຄົນອື່ນຍັງມີໂອກາດທີ່ຈະເຂົ້າໄປໃນບ່ອນຢຸດພັກນັ້ນ.+
7 ເປັນເວລາດົນຫຼັງຈາກນັ້ນ ພະເຈົ້າໄດ້ກຳນົດມື້ໜຶ່ງໄວ້ອີກເທື່ອໜຶ່ງໃນເພງສັນລະເສີນຂອງດາວິດໂດຍໃຊ້ຄຳວ່າ “ມື້ນີ້” ຄືກັບທີ່ໄດ້ເວົ້າມາແລ້ວໃນຈົດໝາຍນີ້ວ່າ “ມື້ນີ້ຖ້າພວກເຈົ້າຟັງສຽງຂອງເພິ່ນ ກໍຂໍໃຫ້ພວກເຈົ້າຢ່າເປັນຄົນຫົວແຂງ.’”+
8 ທີ່ຈິງ ຖ້າໂຢຊວຍ+ໄດ້ພາເຂົາເຈົ້າເຂົ້າໄປໃນບ່ອນຢຸດພັກແລ້ວ ພະເຈົ້າກໍຄືຊິບໍ່ເວົ້າເຖິງອີກມື້ໜຶ່ງ.
9 ນີ້ສະແດງວ່າຍັງມີການຢຸດພັກແບບດຽວກັບວັນຊະບາໂຕສຳລັບປະຊາຊົນຂອງພະເຈົ້າ.+
10 ຄົນທີ່ໄດ້ເຂົ້າໄປໃນບ່ອນຢຸດພັກຂອງພະເຈົ້າກໍຢຸດຈາກວຽກຂອງໂຕເອງ ຄືກັບທີ່ພະເຈົ້າຢຸດຈາກວຽກຂອງເພິ່ນ.+
11 ດັ່ງນັ້ນ ໃຫ້ພວກເຮົາພະຍາຍາມສຸດຄວາມສາມາດທີ່ຈະເຂົ້າໄປໃນບ່ອນຢຸດພັກນັ້ນ ເພື່ອຈະບໍ່ມີຜູ້ໃດມີນິດໄສບໍ່ເຊື່ອຟັງຄືກັບພວກນັ້ນ.+
12 ຖ້ອຍຄຳຂອງພະເຈົ້າມີຊີວິດ ມີພະລັງຫຼາຍ+ ແລະຄົມກວ່າດາບ 2 ຄົມ+ ແທງຊອດເຖິງຂັ້ນແຍກອອກລະຫວ່າງຕົວຕົນທີ່ເຫັນພາຍນອກກັບສິ່ງທີ່ຄົນເຮົາເປັນແທ້ໆ ແລະລະຫວ່າງກະດູກ*ກັບນ້ຳມັນໃນກະດູກ ແລະສາມາດຮູ້ເຖິງຄວາມຄິດກັບເຈຕະນາໃນໃຈ.
13 ທຸກສິ່ງທີ່ພະເຈົ້າສ້າງຂຶ້ນມາ ບໍ່ມີຫຍັງຖືກປົກປິດໄວ້ຈາກສາຍຕາຂອງເພິ່ນ+ ແຕ່ທຸກສິ່ງຖືກເປີດເຜີຍແລະປາກົດແຈ້ງຕໍ່ສາຍຕາຂອງເພິ່ນຜູ້ທີ່ພວກເຮົາຕ້ອງໃຫ້ການ.+
14 ດັ່ງນັ້ນ ໃນເມື່ອພວກເຮົາມີປະໂລຫິດໃຫຍ່ທີ່ຍິ່ງໃຫຍ່ເຊິ່ງເຂົ້າໄປຮອດສະຫວັນແລ້ວ ກໍໃຫ້ພວກເຮົາປະກາດເລື່ອງຂອງເພິ່ນຢ່າງເປີດເຜີຍຕໍ່ໄປ.+ ປະໂລຫິດໃຫຍ່ຜູ້ນັ້ນແມ່ນພະເຢຊູລູກຂອງພະເຈົ້າ.+
15 ປະໂລຫິດໃຫຍ່ຂອງພວກເຮົາເຫັນອົກເຫັນໃຈໃນຄວາມອ່ອນແອຂອງພວກເຮົາ+ ຍ້ອນເພິ່ນເຄີຍຜ່ານການທົດສອບທຸກຢ່າງມາແລ້ວຄືກັບພວກເຮົາ ແຕ່ເພິ່ນກໍບໍ່ໄດ້ເຮັດຜິດ.+
16 ດັ່ງນັ້ນ ໃຫ້ພວກເຮົາເຂົ້າໄປໃກ້ໆແລະອະທິດຖານ+ດ້ວຍຄວາມໝັ້ນໃຈຕໍ່ໜ້າບັນລັງຂອງພະເຈົ້າຜູ້ມີຄວາມກະລຸນາທີ່ຍິ່ງໃຫຍ່ ເພື່ອພວກເຮົາຈະໄດ້ຮັບຄວາມເມດຕາແລະຄວາມກະລຸນານັ້ນຈາກເພິ່ນເມື່ອພວກເຮົາຕ້ອງການຄວາມຊ່ວຍເຫຼືອ.
ຂໍ
^ ໝາຍເຖິງຄົນຢິວທີ່ບໍ່ເຊື່ອຟັງ
^ ໝາຍເຖິງຕັ້ງແຕ່ກ່ອນອາດາມກັບເອວາມີລູກ
^ ແປຕາມໂຕວ່າ “ຂໍ້ຕໍ່”
