ໂຢຊວຍ 1:1-18
1 ຫຼັງຈາກໂມເຊຜູ້ຮັບໃຊ້ຂອງພະເຢໂຫວາຕາຍແລ້ວ ພະເຢໂຫວາໄດ້ເວົ້າກັບໂຢຊວຍ*+ທີ່ເປັນລູກຊາຍຂອງນູນ ແລະເປັນຜູ້ຮັບໃຊ້+ຂອງໂມເຊວ່າ:
2 “ໂມເຊຜູ້ຮັບໃຊ້ຂອງເຮົາຕາຍແລ້ວ.+ ຕອນນີ້ ໃຫ້ເຈົ້າຂ້າມແມ່ນ້ຳຈໍແດນໄປກັບພວກອິດສະຣາເອນ ໄປແຜ່ນດິນທີ່ເຮົາສັນຍາວ່າຈະເອົາໃຫ້ເຂົາເຈົ້າ.+
3 ຄືກັບທີ່ເຮົາໄດ້ສັນຍາກັບໂມເຊ ເມື່ອພວກເຈົ້າຢຽບດິນຢູ່ບ່ອນໃດ ບ່ອນນັ້ນກໍຈະເປັນຂອງພວກເຈົ້າ.+
4 ເຂດຂອງພວກເຈົ້າຈະນັບຕັ້ງແຕ່ບ່ອນກັນດານໄປຈົນຮອດເຂດພູເລບານອນ ໄປຈົນຮອດແມ່ນ້ຳໃຫຍ່ເອິຟາຣາດ ເຊິ່ງເປັນແຜ່ນດິນຂອງພວກເຮດ+ ແລະໄປຈົນຮອດທະເລທາງທິດຕາເວັນຕົກ.*+
5 ຕະຫຼອດຊີວິດຂອງເຈົ້າ ຈະບໍ່ມີໃຜຕໍ່ສູ້ເຈົ້າໄດ້.+ ເຮົາຈະຢູ່ກັບເຈົ້າຄືກັບທີ່ເຮົາເຄີຍຢູ່ກັບໂມເຊ.+ ເຮົາຈະບໍ່ປະບໍ່ຖິ້ມເຈົ້າ.+
6 ໃຫ້ກ້າຫານແລະເຂັ້ມແຂງ+ ເພາະເຈົ້າຈະເປັນຜູ້ພາຄົນພວກນີ້ເຂົ້າໄປໃນແຜ່ນດິນທີ່ເຮົາສັນຍາກັບປູ່ຍ່າຕານາຍຂອງເຂົາເຈົ້າວ່າຈະເອົາໃຫ້ເຂົາເຈົ້າ.+
7 ໃຫ້ເຈົ້າກ້າຫານແລະເຂັ້ມແຂງ ແລະເຮັດຕາມກົດໝາຍທີ່ເຮົາໃຫ້ໄວ້ກັບໂມເຊຜູ້ຮັບໃຊ້ຂອງເຮົາຢ່າງເຄັ່ງຄັດ. ຫ້າມເຈີດຊ້າຍເຈີດຂວາຈາກກົດໝາຍເຫຼົ່ານີ້.+ ແລ້ວເຈົ້າກໍຈະຕັດສິນໃຈໄດ້ຢ່າງສະຫຼາດ ບໍ່ວ່າເຈົ້າຈະເຮັດຫຍັງກໍຕາມ.+
8 ເຈົ້າຕ້ອງເວົ້າເຖິງກົດໝາຍນີ້ຕະຫຼອດ+ ແລະເຈົ້າຕ້ອງອ່ານກົດໝາຍນີ້ແລະຄິດຕຶກຕອງ*ທັງກາງເວັນແລະກາງຄືນເພື່ອຈະໄດ້ເຮັດຕາມກົດໝາຍທີ່ຂຽນໄວ້ໃນປຶ້ມນີ້ຢ່າງເຄັ່ງຄັດ.+ ເມື່ອເຈົ້າເຮັດແນວນີ້ ເຈົ້າກໍຈະປະສົບຜົນສຳເລັດແລະເຮັດທຸກສິ່ງໄດ້ຢ່າງສະຫຼາດ.+
9 ເຮົາສັ່ງເຈົ້າແລ້ວແມ່ນບໍວ່າ ເຈົ້າຕ້ອງກ້າຫານແລະເຂັ້ມແຂງ. ຢ່າຊູ່ຢ້ານ ບໍ່ວ່າເຈົ້າຈະໄປໃສ. ພະເຢໂຫວາພະເຈົ້າຂອງເຈົ້າຈະຢູ່ກັບເຈົ້າ.”+
10 ແລ້ວໂຢຊວຍກໍສັ່ງພວກຫົວໜ້າຂອງອິດສະຣາເອນວ່າ:
11 “ໄປບອກປະຊາຊົນຢູ່ທົ່ວຄ້າຍພັກວ່າໃຫ້ກຽມໂຕໃຫ້ພ້ອມ ເພາະອີກ 3 ມື້ພວກເຮົາຈະຂ້າມແມ່ນ້ຳຈໍແດນ ແລະເຂົ້າໄປຍຶດເອົາແຜ່ນດິນທີ່ພະເຢໂຫວາພະເຈົ້າຂອງພວກເຮົາຈະເອົາໃຫ້ພວກເຮົາ.”+
12 ໂຢຊວຍເວົ້າກັບຕະກູນຣູເບັນ ຕະກູນຄາດ ແລະເຄິ່ງໜຶ່ງຂອງຕະກູນມານາເຊວ່າ:
13 “ຢ່າລືມສິ່ງທີ່ໂມເຊຜູ້ຮັບໃຊ້ຂອງພະເຢໂຫວາສັ່ງພວກເຈົ້າໄວ້.+ ລາວສັ່ງວ່າ ‘ພະເຢໂຫວາພະເຈົ້າຂອງພວກເຈົ້າຈະເອົາແຜ່ນດິນນີ້ໃຫ້ພວກເຈົ້າເພື່ອພວກເຈົ້າຈະໄດ້ຢູ່ຢ່າງສະຫງົບ.
14 ລູກກັບເມຍແລະຝູງສັດຂອງພວກເຈົ້າຕ້ອງຖ້າຢູ່ແຜ່ນດິນຟາກນີ້ຂອງແມ່ນ້ຳຈໍແດນທີ່ໂມເຊໄດ້ເອົາໃຫ້ພວກເຈົ້າ.+ ສ່ວນພວກເຈົ້າທີ່ເປັນທະຫານ+ຕ້ອງນຳໜ້າພີ່ນ້ອງຂອງພວກເຈົ້າແລະຂ້າມແມ່ນ້ຳໄປ.+ ພວກເຈົ້າຕ້ອງຊ່ວຍເຂົາເຈົ້າຕໍ່ສູ້ກັບພວກສັດຕູ
15 ຈົນກວ່າເຂົາເຈົ້າຈະຍຶດເອົາແຜ່ນດິນທີ່ພະເຢໂຫວາພະເຈົ້າຂອງພວກເຈົ້າຈະເອົາໃຫ້ເຂົາເຈົ້າ ແລະຈົນກວ່າພະເຢໂຫວາຈະໃຫ້ເຂົາເຈົ້າຢູ່ຢ່າງສະຫງົບຄືກັບທີ່ເພິ່ນໄດ້ໃຫ້ພວກເຈົ້າແລ້ວ. ຈາກນັ້ນ ພວກເຈົ້າຈຶ່ງຈະກັບມາຢູ່ແຜ່ນດິນຟາກນີ້ຂອງແມ່ນ້ຳຈໍແດນໄດ້ ເຊິ່ງໂມເຊຜູ້ຮັບໃຊ້ຂອງພະເຢໂຫວາໄດ້ເອົາໃຫ້ພວກເຈົ້າ.’”+
16 ເຂົາເຈົ້າຕອບໂຢຊວຍວ່າ: “ພວກເຮົາຈະເຮັດທຸກຢ່າງຕາມທີ່ເຈົ້າສັ່ງ. ເຈົ້າຈະໃຫ້ພວກເຮົາໄປໃສ ພວກເຮົາກໍຈະໄປ.+
17 ພວກເຮົາຈະເຊື່ອຟັງເຈົ້າທຸກຢ່າງຄືກັບທີ່ເຄີຍເຊື່ອຟັງໂມເຊ. ຂໍພຽງແຕ່ໃຫ້ພະເຢໂຫວາພະເຈົ້າຂອງເຈົ້າຢູ່ນຳເຈົ້າຄືກັບທີ່ເພິ່ນເຄີຍຢູ່ກັບໂມເຊ.+
18 ຖ້າຜູ້ໃດຂັດຄຳສັ່ງຂອງເຈົ້າ ຜູ້ນັ້ນຈະມີໂທດເຖິງຕາຍ.+ ຂໍໃຫ້ເຈົ້າກ້າຫານແລະເຂັ້ມແຂງ.”+
ຂໍ
^ ຫຼື “ເຢໂຮຊູອາ.” ແປວ່າ “ພະເຢໂຫວາເປັນຄວາມລອດ.”
^ ໝາຍເຖິງທະເລໃຫຍ່ ຫຼືທະເລເມດີແຕຣາເນ
^ ແປຕາມໂຕວ່າ “ອ່ານອອກສຽງຄ່ອຍໆ”
