ໂຢຊວຍ 10:1-43
10 ກະສັດອາໂດນີເຊເດັກຂອງເມືອງເຢຣູຊາເລັມໄດ້ຍິນວ່າໂຢຊວຍໄດ້ຍຶດແລະທຳລາຍເມືອງອາອີແລ້ວ ແລະໂຢຊວຍໄດ້ເຮັດກັບກະສັດແລະເມືອງອາອີ+ຄືກັບທີ່ໄດ້ເຮັດກັບກະສັດແລະເມືອງເຢຣິໂກ.+ ລາວຍັງໄດ້ຍິນວ່າຄົນໃນເມືອງກິເບໂອນໄດ້ຂໍເຮັດສັນຍາສະຫງົບເສິກກັບພວກອິດສະຣາເອນ+ແລະຢູ່ຝ່າຍເຂົາເຈົ້າ.
2 ລາວຮູ້ສຶກຢ້ານຫຼາຍ+ຍ້ອນເມືອງກິເບໂອນເປັນເມືອງທີ່ໃຫຍ່ແລະມີກະສັດປົກຄອງ. ເມືອງນັ້ນໃຫຍ່ກວ່າເມືອງອາອີຫຼາຍ+ ແລະຜູ້ຊາຍທຸກຄົນໃນເມືອງກໍເປັນທະຫານທີ່ເກັ່ງຫຼາຍ.
3 ອາໂດນີເຊເດັກກະສັດຂອງເມືອງເຢຣູຊາເລັມຈຶ່ງຟ້າວສົ່ງຂ່າວໄປໃຫ້ໂຮຮາມກະສັດຂອງເມືອງເຮັບໂຣນ+ ປີຣາມກະສັດຂອງເມືອງຢາຣະມຸດ ຢາເຟຍກະສັດຂອງເມືອງລາກິດ ແລະເດບີກະສັດຂອງເມືອງເອັກໂລນ.+
4 ລາວບອກວ່າ: “ໃຫ້ມາຊ່ວຍຂ້ອຍຕໍ່ສູ້ກັບພວກກິເບໂອນແດ່ ເພາະວ່າພວກນີ້ໄດ້ເຮັດສັນຍາສະຫງົບເສິກກັບໂຢຊວຍແລະພວກອິດສະຣາເອນແລ້ວ.”+
5 ກະສັດຂອງເມືອງເຢຣູຊາເລັມ ກະສັດຂອງເມືອງເຮັບໂຣນ ກະສັດຂອງເມືອງຢາຣະມຸດ ກະສັດຂອງເມືອງລາກິດ ແລະກະສັດຂອງເມືອງເອັກໂລນຈຶ່ງພາທະຫານຂອງພວກເຂົາມາລວມກັນ. ກະສັດຂອງຄົນອາໂມ+ທັງຫ້າອົງນີ້ໄດ້ເຄື່ອນທັບໄປຕັ້ງຄ້າຍຢູ່ຕໍ່ໜ້າເມືອງກິເບໂອນເພື່ອຈະສູ້ຮົບກັບຄົນໃນເມືອງນັ້ນ.
6 ແລ້ວພວກກິເບໂອນກໍສົ່ງຂ່າວໄປຫາໂຢຊວຍຢູ່ຄ້າຍພັກທີ່ຢູ່ກິນການ+ວ່າ: “ຂໍຢ່າປະຢ່າຖິ້ມພວກເຮົາທີ່ເປັນຜູ້ຮັບໃຊ້ຂອງທ່ານ.+ ຂໍໃຫ້ຟ້າວມາຊ່ວຍພວກເຮົາແດ່! ກະສັດທຸກອົງຂອງຄົນອາໂມຈາກເຂດພູໄດ້ລວມໂຕກັນມາຕໍ່ສູ້ພວກເຮົາແລ້ວ.”
7 ໂຢຊວຍກໍເອົາທະຫານທຸກຄົນຂອງລາວທີ່ເກັ່ງໆອອກຈາກກິນການເພື່ອໄປຊ່ວຍເຂົາເຈົ້າ.+
8 ແລ້ວພະເຢໂຫວາກໍບອກໂຢຊວຍວ່າ: “ຢ່າຊູ່ຢ້ານພວກເຂົາ.+ ເຮົາຈະຊ່ວຍພວກເຈົ້າໃຫ້ຊະນະພວກເຂົາ+ ແລະບໍ່ມີຈັກຄົນທີ່ຈະສູ້ພວກເຈົ້າໄດ້.”+
9 ໂຢຊວຍໄດ້ອອກຈາກກິນການແລະເດີນທາງໝົດຄືນ. ພວກທະຫານອິດສະຣາເອນໄດ້ໂຈມຕີພວກສັດຕູໂດຍທີ່ພວກເຂົາບໍ່ທັນຕັ້ງໂຕ.
10 ພະເຢໂຫວາເຮັດໃຫ້ສັດຕູຂອງພວກອິດສະຣາເອນສັບສົນ.+ ພວກອິດສະຣາເອນຂ້າພວກເຂົາຫຼາຍຄົນຢູ່ກິເບໂອນ ແລະໄລ່ຂ້າພວກເຂົາຂຶ້ນໄປເຖິງເບັດໂຮໂຣນ ຈົນຮອດອາເຊກາກັບມັກເກດາ.
11 ຕອນທີ່ພວກສັດຕູກຳລັງປົບໜີພວກອິດສະຣາເອນຕັ້ງແຕ່ເບັດໂຮໂຣນລົງໄປທາງອາເຊກາ ພະເຢໂຫວາໄດ້ເຮັດໃຫ້ໝາກເຫັບໃຫຍ່ຕົກໃສ່ພວກເຂົາ. ຄົນທີ່ຕາຍຍ້ອນໝາກເຫັບຕົກໃສ່ກໍມີຫຼາຍກວ່າຄົນທີ່ຖືກພວກອິດສະຣາເອນຂ້າ.
12 ໃນມື້ທີ່ພະເຢໂຫວາໄດ້ຊ່ວຍພວກອິດສະຣາເອນໃຫ້ຊະນະພວກອາໂມ ໂຢຊວຍໄດ້ເວົ້າກັບພະເຢໂຫວາຕໍ່ໜ້າພວກອິດສະຣາເອນວ່າ:
“ຂໍໃຫ້ຕາເວັນຢຸດ+ຢູ່ເທິງກິເບໂອນ+ແລະຂໍໃຫ້ເດືອນຢຸດຢູ່ເທິງຮ່ອມພູອາຢາໂລນ!”
13 ຕາເວັນກັບເດືອນຈຶ່ງຢຸດຢູ່ບ່ອນເກົ່າຈົນພວກອິດສະຣາເອນເອົາຊະນະພວກສັດຕູໄດ້. ເລື່ອງທັງໝົດນີ້ຖືກຂຽນໄວ້ໃນປຶ້ມຂອງຢາຊາ.+ ຕາເວັນໄດ້ຢຸດຢູ່ກາງທ້ອງຟ້າແລະບໍ່ຍອມຕົກດິນໜຶ່ງມື້ເຕັມໆ.
14 ກ່ອນໜ້ານີ້ບໍ່ເຄີຍມີມື້ທີ່ຕາເວັນບໍ່ຕົກດິນ ແລະຫຼັງຈາກນີ້ກໍບໍ່ມີອີກເລີຍ. ມີແຕ່ເທື່ອດຽວເທົ່ານັ້ນທີ່ພະເຢໂຫວາຟັງຄຳຂໍແບບນີ້ຈາກຄົນຜູ້ໜຶ່ງ+ ຍ້ອນພະເຢໂຫວາກຳລັງຕໍ່ສູ້ເພື່ອພວກອິດສະຣາເອນ.+
15 ຫຼັງຈາກນັ້ນ ໂຢຊວຍກັບພວກທະຫານອິດສະຣາເອນກໍກັບຄືນໄປຄ້າຍພັກຢູ່ກິນການ.+
16 ໃນຕອນນັ້ນ ກະສັດທັງຫ້າອົງໄດ້ປົບໜີໄປລີ້ຢູ່ຖ້ຳທີ່ຢູ່ມັກເກດາ.+
17 ມີຄົນມາບອກໂຢຊວຍວ່າ: “ກະສັດທັງຫ້າອົງໄດ້ໄປລີ້ຢູ່ຖ້ຳທີ່ຢູ່ມັກເກດາ.”+
18 ໂຢຊວຍຈຶ່ງບອກວ່າ: “ໃຫ້ກິ້ງຫີນກ້ອນໃຫຍ່ໆໄປອັດປາກຖ້ຳໄວ້ແລະໃຫ້ຄົນເຝົ້າຖ້ຳນັ້ນ.
19 ສ່ວນຄົນທີ່ເຫຼືອກໍໃຫ້ເຂົາເຈົ້າໄປສູ້ຮົບຕໍ່. ໃຫ້ໄລ່ລ່າພວກສັດຕູແລະຂ້າໃຫ້ໝົດ.+ ຢ່າໃຫ້ພວກເຂົາກັບເຂົ້າໄປໃນເມືອງໄດ້ ເພາະພະເຢໂຫວາພະເຈົ້າຂອງພວກເຈົ້າໄດ້ຊ່ວຍໃຫ້ພວກເຈົ້າຊະນະສັດຕູແລ້ວ.”
20 ໂຢຊວຍກັບພວກທະຫານອິດສະຣາເອນໄດ້ຂ້າສັດຕູເກືອບໝົດ ມີບໍ່ເທົ່າໃດຄົນທີ່ໜີເຂົ້າໄປໃນເມືອງທີ່ມີກຳແພງໄດ້.
21 ຈາກນັ້ນ ພວກທະຫານອິດສະຣາເອນກໍກັບໄປຫາໂຢຊວຍຢູ່ຄ້າຍທີ່ຢູ່ມັກເກດາຢ່າງປອດໄພ. ສ່ວນພວກການາອານກໍບໍ່ມີໃຜກ້າເວົ້າໃສ່ພວກອິດສະຣາເອນອີກ.
22 ແລ້ວໂຢຊວຍກໍບອກວ່າ: “ໃຫ້ເປີດປາກຖ້ຳແລະເອົາກະສັດທັງຫ້າອົງມາໃຫ້ຂ້ອຍ.”
23 ເຂົາເຈົ້າຈຶ່ງເອົາພວກກະສັດອອກມາ. ກະສັດ 5 ອົງນັ້ນມີຄື: ກະສັດເມືອງເຢຣູຊາເລັມ ກະສັດເມືອງເຮັບໂຣນ ກະສັດເມືອງຢາຣະມຸດ ກະສັດເມືອງລາກິດ ແລະກະສັດເມືອງເອັກໂລນ.+
24 ຫຼັງຈາກທີ່ເຂົາເຈົ້າເອົາພວກກະສັດມາໃຫ້ໂຢຊວຍແລ້ວ ລາວຈຶ່ງເອີ້ນທະຫານທຸກຄົນມາ ແລະບອກພວກຫົວໜ້າທະຫານວ່າ: “ມານີ້ ໃຫ້ເອົາຕີນຢຽບກ້ານຄໍຂອງກະສັດພວກນີ້.” ພວກຫົວໜ້າຈຶ່ງເອົາຕີນຢຽບຄໍຂອງພວກກະສັດ.+
25 ແລ້ວໂຢຊວຍກໍບອກເຂົາເຈົ້າວ່າ: “ຢ່າຊູ່ຢ້ານ.+ ໃຫ້ກ້າຫານແລະເຂັ້ມແຂງ ເພາະພະເຢໂຫວາຊິເຮັດແນວນີ້ກັບພວກສັດຕູທຸກຄົນທີ່ພວກເຈົ້າໄປຕໍ່ສູ້.”+
26 ແລ້ວໂຢຊວຍກໍຂ້າກະສັດທັງຫ້າອົງນັ້ນ ແລະເອົາສົບຂອງພວກເຂົາໄປແຂວນໄວ້ຈົນຮອດແລງ.
27 ຕອນທີ່ຕາເວັນຕົກດິນ ໂຢຊວຍສັ່ງໃຫ້ຄົນເອົາສົບຂອງພວກເຂົາລົງມາຈາກເສົາ+ ແລ້ວເອົາໄປຖິ້ມໄວ້ໃນຖ້ຳທີ່ພວກເຂົາເຄີຍໄປລີ້ຢູ່. ຈາກນັ້ນ ເຂົາເຈົ້າກໍເອົາຫີນມາອັດປາກຖ້ຳໄວ້ ເຊິ່ງຍັງຢູ່ຈົນຮອດທຸກມື້ນີ້.
28 ໃນມື້ນັ້ນ ໂຢຊວຍຍັງຍຶດເມືອງມັກເກດາ+ໄດ້ນຳ. ລາວໄດ້ຂ້າກະສັດແລະທຸກຄົນໃນເມືອງນັ້ນ. ບໍ່ມີໃຜລອດຈັກຄົນ.+ ລາວເຮັດກັບກະສັດຂອງເມືອງນັ້ນ+ຄືກັບທີ່ໄດ້ເຮັດກັບກະສັດຂອງເມືອງເຢຣິໂກ.
29 ແລ້ວໂຢຊວຍກັບທະຫານທຸກຄົນກໍເດີນທາງອອກຈາກມັກເກດາແລະໄປໂຈມຕີເມືອງລິບນາ.+
30 ພະເຢໂຫວາໄດ້ຊ່ວຍພວກອິດສະຣາເອນໃຫ້ຊະນະກະສັດກັບເມືອງນັ້ນ.+ ເຂົາເຈົ້າໄດ້ຂ້າທຸກຄົນໃນເມືອງນັ້ນ. ບໍ່ມີໃຜລອດຈັກຄົນ. ເຂົາເຈົ້າເຮັດກັບກະສັດຂອງເມືອງນັ້ນຄືກັບທີ່ໄດ້ເຮັດກັບກະສັດຂອງເມືອງເຢຣິໂກ.+
31 ຈາກນັ້ນ ໂຢຊວຍກັບທະຫານອິດສະຣາເອນທຸກຄົນກໍເດີນທາງອອກຈາກເມືອງລິບນາ ແລະໄປຕັ້ງຄ້າຍເພື່ອຈະຕໍ່ສູ້ກັບເມືອງລາກິດ.+
32 ພະເຢໂຫວາໄດ້ຊ່ວຍພວກອິດສະຣາເອນໃຫ້ຍຶດເມືອງນັ້ນໄດ້ໃນມື້ທີ 2. ເຂົາເຈົ້າຂ້າທຸກຄົນໃນເມືອງນັ້ນ+ຄືກັບທີ່ໄດ້ຂ້າທຸກຄົນຢູ່ເມືອງລິບນາ.
33 ໂຮຣາມກະສັດຂອງເມືອງເກເຊ+ໄດ້ພາທະຫານຂອງໂຕເອງຂຶ້ນໄປຊ່ວຍເມືອງລາກິດ ແຕ່ໂຢຊວຍກໍໄດ້ຂ້າລາວກັບທະຫານຂອງລາວຈົນໝົດ. ບໍ່ມີໃຜລອດຈັກຄົນ.
34 ຈາກນັ້ນ ໂຢຊວຍກັບທະຫານອິດສະຣາເອນທຸກຄົນກໍເດີນທາງອອກຈາກເມືອງລາກິດ ແລະໄປຕັ້ງຄ້າຍເພື່ອຈະຕໍ່ສູ້ກັບເມືອງເອັກໂລນ.+
35 ເຂົາເຈົ້າຍຶດເມືອງນັ້ນໄດ້ພາຍໃນມື້ນັ້ນ. ເຂົາເຈົ້າໄດ້ຂ້າທຸກຄົນໃນເມືອງນັ້ນຄືກັບທີ່ໄດ້ຂ້າທຸກຄົນຢູ່ເມືອງລາກິດ.+
36 ຈາກນັ້ນ ໂຢຊວຍກັບທະຫານອິດສະຣາເອນທຸກຄົນກໍເດີນທາງອອກຈາກເມືອງເອັກໂລນ ແລະໄປຕໍ່ສູ້ກັບເມືອງເຮັບໂຣນ.+
37 ເຂົາເຈົ້າໄດ້ຍຶດເມືອງເຮັບໂຣນພ້ອມກັບເມືອງນ້ອຍໆທີ່ຢູ່ອ້ອມແອ້ມເມືອງນັ້ນ. ເຂົາເຈົ້າໄດ້ຂ້າກະສັດກັບທຸກຄົນໃນເມືອງນັ້ນ. ບໍ່ມີໃຜລອດຈັກຄົນ. ລາວໄດ້ທຳລາຍເມືອງນັ້ນ ແລະຂ້າທຸກຄົນຄືກັບທີ່ໄດ້ເຮັດຕອນຢູ່ເມືອງເອັກໂລນ.
38 ສຸດທ້າຍ ໂຢຊວຍກັບທະຫານອິດສະຣາເອນທຸກຄົນກໍເດີນທາງໄປໂຈມຕີເມືອງເດບີ.+
39 ລາວຍຶດເມືອງເດບີແລະເມືອງນ້ອຍໆທີ່ຢູ່ອ້ອມແອ້ມເມືອງນັ້ນໄດ້. ລາວໄດ້ຂ້າກະສັດແລະທຸກຄົນທີ່ຢູ່ຫັ້ນ.+ ບໍ່ມີໃຜລອດຈັກຄົນ.+ ລາວໄດ້ເຮັດກັບກະສັດແລະເມືອງເດບີ ຄືກັບທີ່ໄດ້ເຮັດກັບເມືອງເຮັບໂຣນແລະເມືອງລິບນາກັບກະສັດຂອງເມືອງເຫຼົ່ານັ້ນ.
40 ໂຢຊວຍໄດ້ຍຶດເອົາແຜ່ນດິນທັງໝົດທີ່ຢູ່ເຂດພູ ເຂດເນເກັບ ເຂດເຊເຟລາ+ ແລະເຂດເນີນພູອື່ນໆ. ລາວໄດ້ຊະນະກະສັດທຸກອົງ ແລະໄດ້ຂ້າທຸກຄົນທີ່ຢູ່ໃນເຂດເຫຼົ່ານັ້ນ. ລາວບໍ່ປ່ອຍໃຫ້ໃຜລອດຈັກຄົນ+ ຕາມທີ່ພະເຢໂຫວາພະເຈົ້າຂອງພວກອິດສະຣາເອນໄດ້ສັ່ງໄວ້.+
41 ໂຢຊວຍໄດ້ຍຶດເອົາແຜ່ນດິນຂອງພວກເຂົາຕັ້ງແຕ່ເຂດກາເດັດບາເນອາ+ໄປຈົນຮອດເມືອງຄາຊາ+ ແລະຕັ້ງແຕ່ເຂດໂກເຊັນ+ໄປຈົນຮອດເມືອງກິເບໂອນ.+
42 ໂຢຊວຍຊະນະກະສັດທຸກອົງ ແລະຍຶດເອົາແຜ່ນດິນຂອງພວກເຂົາໄດ້ໃນບາດດຽວ ຍ້ອນພະເຢໂຫວາພະເຈົ້າຂອງພວກອິດສະຣາເອນໄດ້ຕໍ່ສູ້ເພື່ອພວກອິດສະຣາເອນ.+
43 ຫຼັງຈາກນັ້ນ ໂຢຊວຍກັບທະຫານທຸກຄົນກໍໄດ້ກັບໄປຄ້າຍພັກທີ່ຢູ່ກິນການ.+