ໂຢຊວຍ 11:1-23
11 ເມື່ອຢາບິນກະສັດເມືອງຮາໂສໄດ້ຍິນເລື່ອງທີ່ໂຢຊວຍກັບພວກອິດສະຣາເອນເຮັດ ລາວກໍຟ້າວສົ່ງຄົນໄປເອີ້ນໂຢບັບກະສັດຂອງເມືອງມາໂດນ+ ກະສັດຂອງເມືອງຊິມໂຣນ ກະສັດຂອງເມືອງອັກຊາບ+
2 ກັບກະສັດຕ່າງໆທີ່ຢູ່ເຂດພູທາງທິດເໜືອ ທີ່ຢູ່ເຂດທົ່ງພຽງເຊິ່ງຢູ່ທາງທິດໃຕ້ຂອງທະເລກິນເນເຣດ* ທີ່ຢູ່ເຂດເຊເຟລາ ແລະທີ່ຢູ່ເຂດເນີນພູຂອງໂດເຣ+ເຊິ່ງຢູ່ທາງທິດຕາເວັນຕົກ.
3 ລາວໄດ້ເອີ້ນພວກການາອານ+ທີ່ຢູ່ທາງທິດຕາເວັນອອກແລະທິດຕາເວັນຕົກ ພວກອາໂມ+ ພວກເຮດ ພວກເປຣິຊີກັບພວກເຢບຸດທີ່ຢູ່ເຂດພູ ແລະພວກຮີວີ+ທີ່ຢູ່ແຖວຕີນພູເຮີໂມນ+ໃນເຂດມິດຊະປາໃຫ້ມາຊ່ວຍ.
4 ພວກກະສັດທັງໝົດກໍພາກອງທັບຂອງພວກເຂົາອອກມາ ພ້ອມກັບມ້າແລະລົດຮົບບັກຫຼາຍໆ. ທະຫານຂອງພວກເຂົາມີຫຼາຍຄືກັບດິນຊາຍຢູ່ຫາດຊາຍ.
5 ພວກເຂົາມາລວມໂຕກັນແລະຕັ້ງຄ້າຍຢູ່ແຖວນ້ຳອອກບໍ່ຂອງເມືອງເມໂຣມເພື່ອຈະເຮັດສົງຄາມກັບພວກອິດສະຣາເອນ.
6 ແລ້ວພະເຢໂຫວາເວົ້າກັບໂຢຊວຍວ່າ: “ຢ່າຊູ່ຢ້ານພວກສັດຕູ.+ ມື້ອື່ນເວລາປະມານນີ້ ເຮົາຊິໃຫ້ພວກອິດສະຣາເອນຂ້າພວກເຂົາທຸກຄົນ. ພວກເຈົ້າຕ້ອງຕັດເອັນຂາມ້າ+ແລະຈູດລົດຮົບຂອງພວກເຂົາ.”
7 ໂຢຊວຍກັບພວກທະຫານອອກໄປໂຈມຕີສັດຕູໂດຍທີ່ພວກເຂົາບໍ່ທັນຕັ້ງໂຕຢູ່ທີ່ນ້ຳອອກບໍ່ຂອງເມືອງເມໂຣມ.
8 ພະເຢໂຫວາຊ່ວຍພວກອິດສະຣາເອນໃຫ້ຊະນະສັດຕູ.+ ເຂົາເຈົ້າໄດ້ໄລ່ຂ້າສັດຕູໄປຈົນຮອດເມືອງຊີໂດນໃຫຍ່+ ຈົນຮອດມິສະເຣໂຟດມາຢິມ+ ແລະຈົນຮອດຮ່ອມພູໃນເຂດມິດຊະປາທີ່ຢູ່ທາງທິດຕາເວັນອອກ. ເຂົາເຈົ້າໄດ້ໄລ່ຂ້າພວກສັດຕູຈົນບໍ່ມີໃຜລອດຈັກຄົນ.+
9 ແລ້ວໂຢຊວຍກໍຕັດເອັນຂາມ້າແລະຈູດລົດຮົບຂອງພວກເຂົາຕາມທີ່ພະເຢໂຫວາໄດ້ສັ່ງໄວ້.+
10 ຈາກນັ້ນ ໂຢຊວຍກໍໄປຍຶດເມືອງຮາໂສ ແລະເອົາດາບຂ້າກະສັດຂອງເມືອງນັ້ນ.+ ໂຢຊວຍເຮັດແບບນັ້ນຍ້ອນເມືອງຮາໂສເປັນເມືອງທີ່ສຳຄັນຂອງພວກສັດຕູ.
11 ເຂົາເຈົ້າໄດ້ຂ້າ+ຄົນໃນເມືອງນັ້ນຈົນບໍ່ເຫຼືອຈັກຄົນ+ ແລະກໍເຜົາເມືອງຖິ້ມ.
12 ເຂົາເຈົ້າໄດ້ຍຶດເອົາເມືອງຕ່າງໆແລະໄດ້ຂ້າກະສັດທຸກອົງຂອງເມືອງເຫຼົ່ານັ້ນ.+ ໂຢຊວຍໄດ້ຂ້າທຸກຄົນ+ຕາມທີ່ໂມເຊຜູ້ຮັບໃຊ້ຂອງພະເຢໂຫວາໄດ້ສັ່ງໄວ້.
13 ພວກອິດສະຣາເອນບໍ່ໄດ້ເຜົາເມືອງຕ່າງໆທີ່ຢູ່ເນີນພູ ມີແຕ່ເມືອງຮາໂສເທົ່ານັ້ນທີ່ໂຢຊວຍໄດ້ຈູດຖິ້ມ.
14 ພວກອິດສະຣາເອນໄດ້ປຸ້ນເອົາເຄື່ອງຂອງແລະຍຶດເອົາຝູງສັດຢູ່ໃນເມືອງຕ່າງໆນັ້ນມາເປັນຂອງໂຕເອງ.+ ແຕ່ເຂົາເຈົ້າໄດ້ຂ້າທຸກຄົນໃນເມືອງເຫຼົ່ານັ້ນ.+ ບໍ່ມີໃຜລອດຈັກຄົນ.+
15 ທຸກສິ່ງທີ່ພະເຢໂຫວາໄດ້ສັ່ງໂມເຊຜູ້ຮັບໃຊ້ຂອງເພິ່ນ ໂມເຊກໍສັ່ງໂຢຊວຍ+ຕໍ່ ແລະໂຢຊວຍໄດ້ເຮັດຕາມທຸກສິ່ງທີ່ພະເຢໂຫວາໄດ້ສັ່ງໂມເຊ.+
16 ແຜ່ນດິນທັງໝົດທີ່ໂຢຊວຍຍຶດໄດ້ມີເຂດພູ ເຂດເນເກັບ+ທັງໝົດ ແຜ່ນດິນໂກເຊັນທັງໝົດ ເຂດເຊເຟລາ+ ເຂດອາຣາບາ+ ແລະເຂດພູຂອງອິດສະຣາເອນກັບທົ່ງພຽງທີ່ຢູ່ຫັ້ນ
17 ເຊິ່ງເລີ່ມຕັ້ງແຕ່ພູຮາລັກທີ່ຢູ່ໃກ້ພູເສອີ ຈົນຮອດບາອານກາດ+ໃນຮ່ອມພູເລບານອນທີ່ຢູ່ຕີນພູເຮີໂມນ.+ ໂຢຊວຍໄດ້ຈັບກະສັດທັງໝົດທີ່ຢູ່ເຂດເຫຼົ່ານັ້ນມາ ແລະກໍຂ້າພວກເຂົາ.
18 ໂຢຊວຍໄດ້ເຮັດສົງຄາມກັບກະສັດເຫຼົ່ານີ້ດົນເຕີບ.
19 ບໍ່ມີເມືອງໃດມາຂໍເຮັດສັນຍາສະຫງົບເສິກກັບພວກອິດສະຣາເອນ ນອກຈາກຄົນຮີວີທີ່ຢູ່ເມືອງກິເບໂອນ.+ ພວກອິດສະຣາເອນເຮັດສົງຄາມແລະຍຶດທຸກໆເມືອງໄດ້.+
20 ພະເຢໂຫວາປ່ອຍໃຫ້ພວກສັດຕູເປັນຄົນຫົວແຂງ+ເພື່ອພວກເຂົາຈະໄດ້ມາຕໍ່ສູ້ກັບພວກອິດສະຣາເອນ ແລ້ວເພິ່ນກໍຈະໄດ້ທຳລາຍພວກເຂົາແບບບໍ່ຕ້ອງອີ່ຕົນ.+ ພວກເຂົາຈະຕ້ອງຖືກທຳລາຍຈົນໝົດຕາມທີ່ພະເຢໂຫວາໄດ້ສັ່ງໂມເຊ.+
21 ໂຢຊວຍໄດ້ເອົາຊະນະລູກຫຼານຂອງອານາກ+ທີ່ຢູ່ເຂດພູຂອງເຮັບໂຣນ ເດບີ ແລະອານາບ ເຂດພູທັງໝົດຂອງຢູດາ ແລະເຂດພູທັງໝົດຂອງອິດສະຣາເອນ. ໂຢຊວຍໄດ້ຂ້າພວກເຂົາທຸກຄົນແລະທຳລາຍເມືອງຂອງພວກເຂົາ.+
22 ບໍ່ມີລູກຫຼານຂອງອານາກເຫຼືອຢູ່ໃນແຜ່ນດິນຂອງພວກອິດສະຣາເອນເລີຍ. ມີແຕ່+ເມືອງຄາຊາ+ ເມືອງກັດ+ ແລະເມືອງອາຊະໂດດ+ເທົ່ານັ້ນທີ່ຍັງມີພວກນັ້ນຢູ່.
23 ໂຢຊວຍຍຶດເອົາແຜ່ນດິນທັງໝົດໄດ້ຕາມທີ່ພະເຢໂຫວາສັນຍາໄວ້ກັບໂມເຊ.+ ໂຢຊວຍໄດ້ແບ່ງດິນທັງໝົດນີ້ໃຫ້ເປັນມໍລະດົກຂອງແຕ່ລະຕະກູນໃນພວກອິດສະຣາເອນ.+ ແລ້ວແຜ່ນດິນຂອງເຂົາເຈົ້າກໍບໍ່ມີສົງຄາມ.+
ຂໍ ຄວາມ ໄຂ ເງື່ອນ
^ ໝາຍເຖິງທະເລສາບກິນເນເຣດ ຫຼືທະເລຄາລີເລ