ໂຢຊວຍ 16:1-10
16 ດິນມູນທີ່ລູກຫຼານຂອງໂຢເຊັບ+ໄດ້ໂດຍການຈົກສະຫຼາກ+ ເລີ່ມຈາກແມ່ນ້ຳຈໍແດນທີ່ຢູ່ໃກ້ເມືອງເຢຣິໂກໄປທາງຫ້ວຍທີ່ຢູ່ທາງທິດຕາເວັນອອກຂອງເມືອງເຢຣິໂກ ຜ່ານບ່ອນກັນດານເຢຣິໂກໄປຈົນຮອດເຂດພູຂອງເບເທນ.+
2 ຈາກເບເທນທີ່ຢູ່ໃກ້ເມືອງລູເຊ ເຂດແດນຂອງເຂົາເຈົ້າກໍໄປຮອດເຂດແດນຂອງພວກອາຄີທີ່ຢູ່ເມືອງອາຕາໂຣດ.
3 ຈາກນັ້ນ ເຂດແດນກໍໄປທາງທິດຕາເວັນຕົກຈົນຮອດເຂດແດນຂອງພວກຢາຟະເລດ ແລະຈົນຮອດເຂດແດນເບັດໂຮໂຣນທ່າ+ແລະເມືອງເກເຊ+ ແລ້ວໄປສຸດຢູ່ທະເລໃຫຍ່.*
4 ຕະກູນມານາເຊກັບຕະກູນເອຟຣາຢິມທີ່ເປັນລູກຫຼານຂອງໂຢເຊັບ+ກໍໄດ້ເຂົ້າໄປຢູ່ໃນແຜ່ນດິນຂອງເຂົາເຈົ້າ.+
5 ເຂດແດນຂອງລູກຫຼານເອຟຣາຢິມຕາມຈຸ້ມເຈື້ອຂອງເຂົາເຈົ້າຢູ່ທາງທິດຕາເວັນອອກ ເລີ່ມຈາກເມືອງອາຕາໂຣດອັດດາ+ໄປຈົນຮອດເມືອງເບັດໂຮໂຣນທົ່ງ+
6 ແລ້ວໄປສຸດຢູ່ທະເລໃຫຍ່. ສ່ວນເຂດແດນທາງທິດຕາເວັນອອກ ເລີ່ມຈາກມິກເມທາດ+ທີ່ຢູ່ທາງເໜືອສຸດ ລົງໄປເລື້ອຍໆແລະໂຄ້ງໄປທາງທິດຕາເວັນອອກຈົນຮອດຕະອານັດຊີໂລ ແລະຈົນຮອດຢາໂນອາ.
7 ຈາກຢາໂນອາ ເຂດແດນກໍລົງໄປທາງເມືອງອາຕາໂຣດແລະເມືອງນະອາຣາໄປຈົນຮອດເມືອງເຢຣິໂກ+ ແລ້ວໄປສຸດຢູ່ແມ່ນ້ຳຈໍແດນ.
8 ຈາກເມືອງຕັບປົວ+ ເຂດແດນໄປທາງທິດຕາເວັນຕົກຈົນຮອດຮ່ອມພູ* ແລ້ວໄປສຸດຢູ່ທະເລໃຫຍ່.+ ທັງໝົດນີ້ແມ່ນດິນມູນຂອງຕະກູນເອຟຣາຢິມທີ່ເຂົາເຈົ້າໄດ້ຕາມຈຸ້ມເຈື້ອຂອງເຂົາເຈົ້າ.
9 ລູກຫຼານຂອງເອຟຣາຢິມຍັງໄດ້ເມືອງບາງເມືອງກັບບ້ານທີ່ຢູ່ອ້ອມແອ້ມເມືອງເຫຼົ່ານັ້ນໃນເຂດດິນມູນຂອງຕະກູນມານາເຊ.+
10 ແຕ່ເຂົາເຈົ້າບໍ່ໄດ້ຂັບໄລ່ພວກການາອານທີ່ຢູ່ໃນເມືອງເກເຊອອກໄປ.+ ພວກການາອານຈຶ່ງຢູ່ໃນເຂດແດນຂອງຕະກູນເອຟຣາຢິມຈົນຮອດທຸກມື້ນີ້.+ ພວກເຂົາຖືກໃຊ້ໃຫ້ເຮັດວຽກໜັກຄືກັບທາດ.+
