ໂຢຊວຍ 17:1-18
17 ຈາກນັ້ນ ຕະກູນຂອງມານາເຊ+ທີ່ເປັນລູກກົກ+ຂອງໂຢເຊັບກໍໄດ້ຈົກສະຫຼາກ+ເອົາດິນມູນ. ມາກີ+ທີ່ເປັນລູກກົກຂອງມານາເຊແລະເປັນພໍ່ຂອງກິລຽດເປັນນັກຮົບທີ່ກ້າຫານ. ລາວໄດ້ດິນມູນຢູ່ກິລຽດກັບບາຊານ.+
2 ແລ້ວເຄິ່ງໜຶ່ງຂອງຕະກູນມານາເຊທີ່ຍັງບໍ່ໄດ້ດິນມູນກໍໄດ້ຈົກສະຫຼາກຕາມຈຸ້ມເຈື້ອຂອງເຂົາເຈົ້າ. ຜູ້ທີ່ໄດ້ຈົກສະຫຼາກແມ່ນລູກຫຼານຂອງອາບີເອເຊ+ ລູກຫຼານຂອງເຮເລັກ ລູກຫຼານຂອງອາຊະຣີເອນ ລູກຫຼານຂອງເຊເຄັມ ລູກຫຼານຂອງເຮເຟ ແລະລູກຫຼານຂອງເຊມີດາ. ເຂົາເຈົ້າເປັນຜູ້ຊາຍໃນຈຸ້ມເຈື້ອຕ່າງໆຂອງຕະກູນມານາເຊທີ່ເປັນລູກຊາຍຂອງໂຢເຊັບ.+
3 ແຕ່ເຊໂລເຟຂາດ+ບໍ່ມີລູກຊາຍມີແຕ່ລູກສາວ. ເຊໂລເຟຂາດຜູ້ນີ້ເປັນລູກຊາຍຂອງເຮເຟ ເຮເຟເປັນລູກຊາຍຂອງກິລຽດ ກິລຽດເປັນລູກຊາຍຂອງມາກີ ມາກີເປັນລູກຊາຍຂອງມານາເຊ. ລູກສາວຂອງເຊໂລເຟຂາດຊື່ມາລາ ໂນອາ ໂຮກລາ ມີລະກາ ແລະຕີຣະຊາ.
4 ພວກລູກສາວເຫຼົ່ານີ້ໄດ້ໄປຫາປະໂລຫິດເອເລອາຊາ+ ໂຢຊວຍລູກຊາຍຂອງນູນ ແລະພວກຫົວໜ້າ ແລ້ວເວົ້າວ່າ: “ພະເຢໂຫວາສັ່ງໄວ້ກັບໂມເຊວ່າໃຫ້ພວກເຮົາໄດ້ຮັບດິນມູນຄືກັບພີ່ນ້ອງຂອງພວກເຮົາ.”+ ໂຢຊວຍຈຶ່ງແບ່ງດິນມູນຈາກພີ່ນ້ອງຂອງເຂົາເຈົ້າແລ້ວເອົາໃຫ້ເຂົາເຈົ້າຕາມຄຳສັ່ງຂອງພະເຢໂຫວາ.+
5 ນອກຈາກດິນມູນຢູ່ກິລຽດກັບບາຊານແລ້ວ ລູກຫຼານຂອງມານາເຊກໍໄດ້ດິນມູນອີກ 10 ບ່ອນຢູ່ອີກຟາກໜຶ່ງ*ຂອງແມ່ນ້ຳຈໍແດນ.+
6 ເຂົາເຈົ້າໄດ້ດິນມູນເຫຼົ່ານັ້ນ ຍ້ອນລູກສາວຂອງເຊໂລເຟຂາດໄດ້ດິນມູນຄືກັບລູກຊາຍໃນຕະກູນມານາເຊ ແລະຍ້ອນລູກຫຼານຄົນອື່ນໆໃນຕະກູນມານາເຊໄດ້ແຜ່ນດິນກິລຽດເປັນມູນແລ້ວ.
7 ເຂດແດນຂອງດິນມູນທີ່ຕະກູນມານາເຊໄດ້ຮັບ ເລີ່ມຈາກເຂດແດນຂອງຕະກູນອາເຊໄປຈົນຮອດມິກເມທາດ+ທີ່ຢູ່ໃກ້ເມືອງເຊເຄັມ+ ແລະລົງໄປທາງທິດໃຕ້ຮອດແຜ່ນດິນຂອງຄົນທີ່ຢູ່ເອັນຕັບປົວ.
8 ເຂດຕັບປົວ+ທັງໝົດເປັນຂອງມານາເຊ ແຕ່ເມືອງທີ່ຊື່ຕັບປົວເປັນຂອງເອຟຣາຢິມ.
9 ເມືອງບາງເມືອງທີ່ຢູ່ໃນເຂດຂອງມານາເຊ+ເປັນເມືອງຂອງຕະກູນເອຟຣາຢິມ. ຈາກຕັບປົວ ເຂດແດນກໍລົງໄປທາງໃຕ້ຂອງແມ່ນ້ຳການາ. ຈາກນັ້ນ ເຂດແດນກໍຂ້າມໄປທາງເໜືອຂອງແມ່ນ້ຳ*ການາແລ້ວໄປສຸດຢູ່ທະເລ.+
10 ທາງໃຕ້ຂອງເຂດແດນນັ້ນເປັນຂອງເອຟຣາຢິມ ສ່ວນທາງເໜືອຂອງເຂດແດນນັ້ນເປັນຂອງມານາເຊ. ເຂດແດນທາງທິດຕາເວັນຕົກແມ່ນທະເລໃຫຍ່.*+ ດິນມູນຂອງມານາເຊທາງເໜືອຕິດກັບດິນມູນຂອງຕະກູນອາເຊ ແລະທາງທິດຕາເວັນອອກຕິດກັບດິນມູນຂອງຕະກູນອິດຊາຄາ.
11 ຕະກູນມານາເຊຍັງໄດ້ເມືອງບາງເມືອງໃນດິນມູນຂອງຕະກູນອິດຊາຄາແລະຕະກູນອາເຊ. ເຂົາເຈົ້າໄດ້ເມືອງເບັດເຊອານກັບເມືອງນ້ອຍໆທີ່ຢູ່ອ້ອມແອ້ມເມືອງນັ້ນ ເມືອງອິບເລອາມ+ກັບເມືອງນ້ອຍໆທີ່ຢູ່ອ້ອມແອ້ມເມືອງນັ້ນ ເມືອງຕ່າງໆຂອງພວກໂດເຣ+ກັບເມືອງນ້ອຍໆທີ່ຢູ່ອ້ອມແອ້ມເມືອງເຫຼົ່ານັ້ນ ເມືອງຕ່າງໆຂອງພວກເອັນໂດເຣ+ກັບເມືອງນ້ອຍໆທີ່ຢູ່ອ້ອມແອ້ມເມືອງເຫຼົ່ານັ້ນ ເມືອງຕ່າງໆຂອງພວກຕາອານັກ+ກັບເມືອງນ້ອຍໆທີ່ຢູ່ອ້ອມແອ້ມເມືອງເຫຼົ່ານັ້ນ ແລະເມືອງຕ່າງໆຂອງພວກເມກິດໂດກັບເມືອງນ້ອຍໆທີ່ຢູ່ອ້ອມແອ້ມເມືອງເຫຼົ່ານັ້ນ. ເຂົາເຈົ້າໄດ້ເຂດເນີນພູ 3 ບ່ອນ.
12 ແຕ່ລູກຫຼານຂອງມານາເຊຂັບໄລ່ພວກການາອານອອກໄປຈາກເມືອງເຫຼົ່ານັ້ນບໍ່ໄດ້. ພວກການາອານຈຶ່ງອາໄສຢູ່ຫັ້ນຕໍ່ໄປ.+
13 ເມື່ອພວກອິດສະຣາເອນມີອຳນາດຫຼາຍຂຶ້ນ ເຂົາເຈົ້າກໍໃຫ້ພວກການາອານເຮັດວຽກໜັກຄືກັບທາດ+ແທນທີ່ຈະໄລ່ພວກເຂົາອອກໄປໃຫ້ໝົດ.+
14 ລູກຫຼານຂອງໂຢເຊັບເວົ້າກັບໂຢຊວຍວ່າ: “ເປັນຫຍັງເຈົ້າຄືແບ່ງດິນມູນໃຫ້ພວກເຮົາແຕ່ສ່ວນດຽວ?+ ພະເຢໂຫວາໄດ້ອວຍພອນພວກເຮົາແລະຊ່ວຍໃຫ້ຕະກູນພວກເຮົາມີຄົນຫຼາຍ.”+
15 ໂຢຊວຍຕອບເຂົາເຈົ້າວ່າ: “ຖ້າພວກເຈົ້າມີຄົນຫຼາຍປານນີ້ ແລະເຂດພູຂອງເອຟຣາຢິມ+ແຄບໂພດສຳລັບພວກເຈົ້າກໍໃຫ້ພວກເຈົ້າຂຶ້ນໄປແຜ່ນດິນຂອງພວກເປຣິຊີ+ກັບພວກເຣຟາຢິມ.+ ໃຫ້ພວກເຈົ້າຖາງປ່າແລະອາໄສຢູ່ຫັ້ນ.”
16 ແຕ່ລູກຫຼານຂອງໂຢເຊັບເວົ້າວ່າ: “ມັນກໍແມ່ນຢູ່ທີ່ເຂດພູບໍ່ພໍສຳລັບພວກເຮົາ ແຕ່ພວກການາອານທີ່ຢູ່ທົ່ງພຽງມີລົດຮົບ+ທີ່ມີມີດເຫຼັກຍາວຕິດຢູ່ກົງລໍ້. ທັງພວກທີ່ຢູ່ເມືອງເບັດເຊອານ+ກັບເມືອງນ້ອຍໆທີ່ຢູ່ອ້ອມແອ້ມເມືອງນັ້ນ ແລະພວກທີ່ຢູ່ຮ່ອມພູເຢດຊະເຣເອນ+ກໍມີລົດຮົບແບບນັ້ນຄືກັນ.”
17 ໂຢຊວຍຈຶ່ງເວົ້າກັບຕະກູນເອຟຣາຢິມແລະຕະກູນມານາເຊທີ່ເປັນລູກຫຼານຂອງໂຢເຊັບວ່າ: “ພວກເຈົ້າມີຄົນຫຼາຍແລະທັງແຂງແຮງນຳ. ພວກເຈົ້າຈະໄດ້ດິນມູນຫຼາຍກວ່າສ່ວນໜຶ່ງ.+
18 ເຂດພູທີ່ເປັນປ່າກໍຈະເປັນຂອງພວກເຈົ້າຄືກັນ.+ ເຖິງວ່າຈະເປັນປ່າ ແຕ່ພວກເຈົ້າຈະຖາງມັນເອົາມາເປັນມູນຂອງໂຕເອງ. ເຖິງວ່າພວກການາອານຈະແຂງແຮງແລະມີລົດຮົບທີ່ມີມີດເຫຼັກຍາວຕິດຢູ່ກົງລໍ້ ແຕ່ພວກເຈົ້າຈະຂັບໄລ່ພວກເຂົາອອກໄປໄດ້.”+
ຂໍ
^ ໝາຍເຖິງທາງທິດຕາເວັນອອກ
^ ຫຼື “ວາດີ.” ເບິ່ງສ່ວນອະທິບາຍຄຳສັບ.
^ ໝາຍເຖິງທະເລເມດີແຕຣາເນ
