ໂຢຊວຍ 18:1-28
18 ຈາກນັ້ນ ພວກອິດສະຣາເອນກໍມາປະຊຸມກັນຢູ່ເມືອງຊີໂລ+ ແລະເຂົາເຈົ້າໄດ້ຕັ້ງເຕັ້ນຂໍການຊີ້ນຳ*ຢູ່ຫັ້ນ+ ເພາະເຂົາເຈົ້າໄດ້ຍຶດເອົາແຜ່ນດິນການາອານເປັນຂອງໂຕເອງແລ້ວ.+
2 ແຕ່ຍັງມີອີກ 7 ຕະກູນຂອງອິດສະຣາເອນທີ່ຍັງບໍ່ໄດ້ດິນມູນເປັນຂອງໂຕເອງເທື່ອ.
3 ໂຢຊວຍຈຶ່ງເວົ້າກັບເຂົາເຈົ້າວ່າ: “ພວກເຈົ້າຖ້າຫຍັງຢູ່ ເປັນຫຍັງຄືບໍ່ພາກັນຍ້າຍເຂົ້າໄປຢູ່ແຜ່ນດິນທີ່ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຈົ້າໄດ້ເອົາໃຫ້ພວກເຈົ້າແລ້ວ?+
4 ໃຫ້ເລືອກຜູ້ຊາຍມາຕະກູນລະ 3 ຄົນ. ຂ້ອຍຈະສົ່ງເຂົາເຈົ້າໃຫ້ໄປສຳຫຼວດດິນມູນທີ່ຍັງເຫຼືອຢູ່ ແລະເຮັດແຜນທີ່. ເມື່ອແລ້ວໆ ເຂົາເຈົ້າຕ້ອງກັບມາຫາຂ້ອຍ.
5 ເຂົາເຈົ້າຕ້ອງແບ່ງດິນທີ່ໄດ້ໄປສຳຫຼວດນັ້ນອອກເປັນ 7 ສ່ວນ.+ ຕະກູນຢູດາຈະຢູ່ທາງໃຕ້+ ແລະລູກຫຼານຂອງໂຢເຊັບຈະຢູ່ທາງເໜືອ+ຂອງດິນມູນທີ່ຈະແບ່ງກັນນັ້ນ.
6 ພວກເຈົ້າຕ້ອງອອກໄປສຳຫຼວດດິນມູນທີ່ຍັງເຫຼືອຢູ່ ເຮັດແຜນທີ່ ແລະແບ່ງດິນເປັນ 7 ສ່ວນ ແລ້ວເອົາມາໃຫ້ຂ້ອຍຢູ່ນີ້. ຂ້ອຍຈະເປັນຄົນຈົກສະຫຼາກ+ໃຫ້ພວກເຈົ້າຕໍ່ໜ້າພະເຢໂຫວາພະເຈົ້າຂອງພວກເຮົາ.
7 ແຕ່ຕະກູນເລວີຈະບໍ່ໄດ້ຮັບດິນມູນ+ ຍ້ອນການຮັບໃຊ້ຢູ່ວິຫານຂອງພະເຢໂຫວາ*ເປັນມູນມໍລະດົກຂອງເຂົາເຈົ້າແລ້ວ.+ ສ່ວນຕະກູນຄາດ ຕະກູນຣູເບັນ ແລະເຄິ່ງໜຶ່ງຂອງຕະກູນມານາເຊ+ ໂມເຊຜູ້ຮັບໃຊ້ຂອງພະເຢໂຫວາໄດ້ແບ່ງດິນມູນທີ່ຢູ່ຟາກຕາເວັນອອກຂອງແມ່ນ້ຳຈໍແດນໃຫ້ເຂົາເຈົ້າແລ້ວ.”
8 ເມື່ອພວກທີ່ຈະອອກໄປສຳຫຼວດກຽມໂຕແລ້ວໆ ໂຢຊວຍກໍມາບອກເຂົາເຈົ້າວ່າ: “ໃຫ້ພວກເຈົ້າຍ່າງໄປທົ່ວແຜ່ນດິນນັ້ນ ເຮັດແຜນທີ່ ແລະກັບມາຫາຂ້ອຍ. ແລ້ວຂ້ອຍຊິຈົກສະຫຼາກໃຫ້ພວກເຈົ້າຕໍ່ໜ້າພະເຢໂຫວາໃນເມືອງຊີໂລນີ້.”+
9 ຜູ້ຊາຍເຫຼົ່ານັ້ນກໍເດີນທາງໄປທົ່ວແຜ່ນດິນ ເຮັດແຜນທີ່ ແລະໝາຍເມືອງຕ່າງໆໃສ່ໃນແຜນທີ່. ເຂົາເຈົ້າແບ່ງດິນນັ້ນອອກເປັນ 7 ສ່ວນ ແລະກັບມາຫາໂຢຊວຍຢູ່ຄ້າຍພັກທີ່ຢູ່ຊີໂລ.
10 ແລ້ວໂຢຊວຍກໍຈົກສະຫຼາກໃຫ້ເຂົາເຈົ້າຕໍ່ໜ້າພະເຢໂຫວາ+ ແລະເອົາດິນມູນໃຫ້ແຕ່ລະຕະກູນຕາມທີ່ຈົກສະຫຼາກໄດ້.+
11 ສະຫຼາກທຳອິດຕົກເປັນຂອງຕະກູນເບັນຢາມິນຕາມຈຸ້ມເຈື້ອຂອງເຂົາເຈົ້າ. ດິນມູນທີ່ເຂົາເຈົ້າໄດ້ຮັບຢູ່ລະຫວ່າງເຂດຂອງລູກຫຼານຢູດາ+ກັບເຂດຂອງລູກຫຼານໂຢເຊັບ.+
12 ເຂດແດນທາງທິດເໜືອຂອງເຂົາເຈົ້າເລີ່ມຈາກແມ່ນ້ຳຈໍແດນ ແລ້ວຂຶ້ນໄປທາງເນີນພູທີ່ຢູ່ທາງເໜືອຂອງເມືອງເຢຣິໂກ+ ໄປທາງທິດຕາເວັນຕົກ ຂ້າມພູໄປຮອດບ່ອນກັນດານເບັດອາເວນ.+
13 ຈາກນັ້ນ ເຂດແດນກໍໄປຜ່ານເນີນພູທີ່ຢູ່ທາງທິດໃຕ້ຂອງເມືອງລູເຊທີ່ມີອີກຊື່ໜຶ່ງວ່າເບເທນ+ ແລ້ວເຂດແດນກໍລົງໄປທາງເມືອງອາຕາໂຣດອັດດາ+ເຊິ່ງຢູ່ພູທີ່ຢູ່ທາງທິດໃຕ້ຂອງເມືອງເບັດໂຮໂຣນທ່າ.+
14 ເຂດແດນທາງທິດຕາເວັນຕົກເລີ່ມຈາກພູນັ້ນທີ່ຢູ່ທາງທິດໃຕ້ຂອງເມືອງເບັດໂຮໂຣນ ແລະໂຄ້ງໄປຈົນສຸດຢູ່ເມືອງກີຣິອາດບາອານທີ່ມີອີກຊື່ໜຶ່ງວ່າກີຣິອາດເຢອາຣີມ+ເຊິ່ງເປັນເມືອງຂອງຕະກູນຢູດາ.
15 ເຂດແດນທາງທິດໃຕ້ ເລີ່ມຈາກທິດຕາເວັນຕົກຂອງເມືອງກີຣິອາດເຢອາຣີມ ໄປຈົນຮອດນ້ຳອອກບໍ່ເນັບໂຕອາ.+
16 ຈາກນັ້ນ ເຂດແດນກໍໄປຜ່ານຕີນພູທີ່ຢູ່ທົ່ງພຽງເຣຟາຢິມ+ໃກ້ກັບຮ່ອມພູຮິນໂນມ*+ ແລ້ວກໍຜ່ານຮ່ອມພູຮິນໂນມໄປຈົນຮອດເນີນພູຂອງພວກເຢບຸດ+ທີ່ຢູ່ທາງທິດໃຕ້ ຈົນຮອດນ້ຳອອກບໍ່ເອັນໂຣເກນ.+
17 ຈາກບ່ອນນັ້ນ ເຂດແດນກໍຂຶ້ນໄປທາງເໜືອຈົນຮອດເອັນເຊເມັດ ແລະໄປຕໍ່ຈົນຮອດເກລີໂລດທີ່ຢູ່ໃກ້ກັບທາງຂຶ້ນພູອະດູມມີມ+ ແລະລົງໄປຈົນຮອດຫີນ+ຂອງໂບຫານ*+ທີ່ເປັນລູກຫຼານຂອງຣູເບັນ.
18 ຈາກນັ້ນ ເຂດແດນກໍຂ້າມໂນນພູທີ່ຢູ່ທາງເໜືອຂອງເຂດອາຣາບາ ກ່ອນຊິເຂົ້າເຂດນັ້ນ.
19 ຈາກນັ້ນ ເຂດແດນກໍໄປຕໍ່ຈົນຮອດເນີນພູທີ່ຢູ່ທາງເໜືອຂອງເມືອງເບັດໂຮກລາ+ ແລ້ວກໍໄປສຸດຢູ່ອ່າວທີ່ຢູ່ທາງເໜືອສຸດຂອງທະເລເກືອ*+ເຊິ່ງເປັນບ່ອນທີ່ຢູ່ປາກແມ່ນ້ຳຈໍແດນ. ທັງໝົດນີ້ແມ່ນເຂດແດນທີ່ຢູ່ທາງທິດໃຕ້ຂອງດິນມູນຂອງເຂົາເຈົ້າ.
20 ເຂດແດນທີ່ຢູ່ທາງທິດຕາເວັນອອກຂອງເຂົາເຈົ້າແມ່ນແມ່ນ້ຳຈໍແດນ. ທັງໝົດນີ້ແມ່ນດິນມູນທີ່ພວກລູກຫຼານເບັນຢາມິນໄດ້ຕາມຈຸ້ມເຈື້ອຂອງເຂົາເຈົ້າ.
21 ເມືອງຕ່າງໆທີ່ຕະກູນເບັນຢາມິນໄດ້ຕາມຈຸ້ມເຈື້ອຂອງເຂົາເຈົ້າມີຄື: ເມືອງເຢຣິໂກ ເມືອງເບັດໂຮກລາ ເມືອງເອເມັກເກຊິດ
22 ເມືອງເບັດອາຣາບາ+ ເມືອງເຊມາຣາຢິມ ເມືອງເບເທນ+
23 ເມືອງອາວີມ ເມືອງປາຣາ ເມືອງໂອຟຣາ
24 ເມືອງເກຟາອຳໂມນີ ເມືອງໂອຟະນີ ແລະເມືອງເຄບາ.+ ລວມທັງໝົດມີ 12 ເມືອງພ້ອມກັບບ້ານຕ່າງໆທີ່ຢູ່ອ້ອມແອ້ມເມືອງເຫຼົ່ານັ້ນ.
25 ເມືອງກິເບໂອນ+ ເມືອງຣາມາ ເມືອງເບເອໂຣດ
26 ເມືອງມິດຊະປາ ເມືອງເກຟີຣາ ເມືອງໂມຊາ
27 ເມືອງເຣເກັມ ເມືອງອີຣະເປເອນ ເມືອງຕາຣາລາ
28 ເມືອງເຊລ້າ+ ເມືອງຮາເອເຫຼັບ ເມືອງເຢບຸດເຊິ່ງເປັນອີກຊື່ໜຶ່ງຂອງເຢຣູຊາເລັມ+ ເມືອງກີເບອາ+ ແລະເມືອງກີຣິຢາດ. ລວມທັງໝົດມີ 14 ເມືອງພ້ອມກັບບ້ານຕ່າງໆທີ່ຢູ່ອ້ອມແອ້ມເມືອງເຫຼົ່ານັ້ນ.
ທັງໝົດນີ້ແມ່ນດິນມູນທີ່ລູກຫຼານຂອງເບັນຢາມິນໄດ້ຕາມຈຸ້ມເຈື້ອຂອງເຂົາເຈົ້າ.
ຂໍ
^ ຫຼື “ເຕັ້ນສັກສິດ”
^ ຫຼື “ການຮັບໃຊ້ເປັນປະໂລຫິດຂອງພະເຢໂຫວາ”
^ ແປຕາມໂຕວ່າ “ຮ່ອມພູຂອງລູກຊາຍຮິນໂນມ.” ເບິ່ງຄຳວ່າ “ເກເຮັນນາ” ໃນສ່ວນອະທິບາຍຄຳສັບ.
^ ໝາຍເຖິງຫີນທີ່ເປັນຫຼັກແດນ
^ ໝາຍເຖິງທະເລຕາຍ
