ໂຢຊວຍ 23:1-16
23 ຫຼາຍປີຜ່ານໄປ ຫຼັງຈາກທີ່ພະເຢໂຫວາບໍ່ໄດ້ໃຫ້ພວກສັດຕູທີ່ຢູ່ອ້ອມຂ້າງມາຕໍ່ສູ້ກັບພວກອິດສະຣາເອນ+ ແລະໂຢຊວຍກໍເຖົ້າຫຼາຍແລ້ວ+
2 ໂຢຊວຍໄດ້ເອີ້ນພວກອິດສະຣາເອນ+ ພວກຜູ້ນຳ ພວກຫົວໜ້າ ພວກຜູ້ຕັດສິນ ແລະພວກຫົວໜ້າອື່ນໆ+ມາຫາ ແລ້ວເວົ້າກັບເຂົາເຈົ້າວ່າ: “ຂ້ອຍເຖົ້າຫຼາຍແລ້ວ ອາຍຸກໍຫຼາຍແລ້ວ.
3 ພວກເຈົ້າກໍເຫັນດ້ວຍໂຕເອງແລ້ວວ່າ ພະເຢໂຫວາພະເຈົ້າຂອງພວກເຈົ້າໄດ້ເຮັດຫຍັງແດ່ເພື່ອທຳລາຍຊາດຕ່າງໆ ເພາະພະເຢໂຫວາພະເຈົ້າຂອງພວກເຈົ້າເປັນຜູ້ທີ່ຕໍ່ສູ້ແທນພວກເຈົ້າ.+
4 ຂ້ອຍໄດ້ໄລ່ຊາດຕ່າງໆທີ່ຢູ່ທາງທິດຕາເວັນຕົກ ຕັ້ງແຕ່ແມ່ນ້ຳຈໍແດນໄປຈົນຮອດທະເລໃຫຍ່* ແລະໄດ້ແບ່ງແຜ່ນດິນໃຫ້ພວກເຈົ້າໂດຍການຈົກສະຫຼາກ.+ ເຖິງວ່າຍັງມີຊາດອື່ນໆເຫຼືອຢູ່ໃນແຜ່ນດິນ+ ແຕ່ແຜ່ນດິນນີ້ກໍເປັນຂອງພວກເຈົ້າແລ້ວ.+
5 ພະເຢໂຫວາພະເຈົ້າຂອງພວກເຈົ້າໄດ້ຊຸກພວກເຂົາຕໍ່ໜ້າພວກເຈົ້າ.+ ເພິ່ນໄດ້ໄລ່ພວກເຂົາອອກໄປ ແລະພວກເຈົ້າໄດ້ຍຶດເອົາແຜ່ນດິນຂອງພວກເຂົາຄືກັບທີ່ພະເຢໂຫວາພະເຈົ້າຂອງພວກເຈົ້າໄດ້ສັນຍາໄວ້.+
6 ຂໍໃຫ້ພວກເຈົ້າກ້າຫານ ເຊື່ອຟັງ ແລະເຮັດຕາມທຸກຢ່າງທີ່ຂຽນໄວ້ໃນປຶ້ມກົດໝາຍ+ຂອງໂມເຊຢ່າງເຄັ່ງຄັດ ແລະຢ່າເຈີດຊ້າຍເຈີດຂວາ.+
7 ຢ່າໄປກ່ຽວຂ້ອງກັບຊາດຕ່າງໆ+ທີ່ຍັງເຫຼືອຢູ່ໃນແຜ່ນດິນນີ້. ຢ່າສາບານໂດຍໃຊ້ຊື່ພະເຈົ້າຂອງພວກເຂົາ. ແມ່ນແຕ່ເວົ້າເຖິງຊື່ຂອງພະເຈົ້າເຫຼົ່ານັ້ນກໍບໍ່ໃຫ້ເວົ້າ.+ ຫ້າມພວກເຈົ້າໄປຂາບໄຫວ້ ຫຼືນະມັດສະການພະເຈົ້າຂອງພວກເຂົາ.+
8 ພວກເຈົ້າຕ້ອງສັດຊື່ຕໍ່ພະເຢໂຫວາພະເຈົ້າຂອງພວກເຈົ້າ+ຄືກັບທີ່ພວກເຈົ້າເຮັດມາຈົນຮອດທຸກມື້ນີ້.
9 ພະເຢໂຫວາຈະໄລ່ຊາດຕ່າງໆທີ່ມີຄົນຫຼາຍກວ່າແລະມີກຳລັງຫຼາຍກວ່າໄປຈາກພວກເຈົ້າ.+ ຈົນຮອດຕອນນີ້ຍັງບໍ່ເຄີຍມີຜູ້ໃດຊະນະພວກເຈົ້າໄດ້.+
10 ພວກເຈົ້າຄົນດຽວຈະໄລ່ນຳສັດຕູ 1.000 ຄົນ+ ຍ້ອນພະເຢໂຫວາພະເຈົ້າຂອງພວກເຈົ້າຈະຕໍ່ສູ້ແທນພວກເຈົ້າ+ຄືກັບທີ່ເພິ່ນເຄີຍສັນຍາໄວ້.+
11 ດັ່ງນັ້ນ ໃຫ້ພວກເຈົ້າລະວັງໂຕຢູ່ສະເໝີ+ໂດຍຮັກພະເຢໂຫວາພະເຈົ້າຂອງພວກເຈົ້າ.+
12 ແຕ່ຖ້າພວກເຈົ້າປະຖິ້ມພະເຈົ້າແລະໄປກ່ຽວຂ້ອງກັບຊາດອື່ນໆທີ່ຍັງເຫຼືອຢູ່ໃນແຜ່ນດິນນີ້+ ໂດຍໄປເປັນດອງກັບພວກເຂົາ+ ໄປເປັນໝູ່ກັບພວກເຂົາ ແລະໃຫ້ພວກເຂົາມາເປັນໝູ່ກັບພວກເຈົ້າ
13 ໃຫ້ພວກເຈົ້າຮູ້ໄວ້ເລີຍວ່າພະເຢໂຫວາພະເຈົ້າຂອງພວກເຈົ້າຈະບໍ່ຊ່ວຍພວກເຈົ້າໄລ່ຊາດເຫຼົ່ານັ້ນອີກຕໍ່ໄປ.+ ພວກເຂົາຈະເປັນຄືກັບແຮ້ວ ກັບດັກ ແສ້ທີ່ມີແນວແຫຼມໆຟາດຫຼັງພວກເຈົ້າ+ ແລະສ້ຽນທີ່ຢູ່ໃນຕາພວກເຈົ້າ ຈົນກວ່າພວກເຈົ້າຈະຕາຍໄປຈາກແຜ່ນດິນດີໆນີ້ທີ່ພະເຢໂຫວາພະເຈົ້າຂອງພວກເຈົ້າໄດ້ເອົາໃຫ້ພວກເຈົ້າ.
14 ຂ້ອຍໃກ້ຊິຕາຍແລ້ວ ແລະພວກເຈົ້າກໍຮູ້ດີ*ວ່າຄຳສັນຍາດີໆທຸກຢ່າງທີ່ພະເຢໂຫວາພະເຈົ້າຂອງພວກເຈົ້າເວົ້າໄວ້ໄດ້ເກີດຂຶ້ນແທ້. ຄຳສັນຍາທັງໝົດໄດ້ເກີດຂຶ້ນແທ້. ບໍ່ມີຈັກເລື່ອງທີ່ບໍ່ໄດ້ເກີດຂຶ້ນ.+
15 ແຕ່ຄືກັບທີ່ພະເຢໂຫວາພະເຈົ້າຂອງພວກເຈົ້າໄດ້ເຮັດໃຫ້ຄຳສັນຍາດີໆທີ່ເພິ່ນເວົ້າໄວ້ເກີດຂຶ້ນແທ້+ ພະເຢໂຫວາກໍຈະເຮັດໃຫ້ຄວາມຈິບຫາຍທີ່ເພິ່ນສັນຍາໄວ້ເກີດຂຶ້ນກັບພວກເຈົ້າແນ່ນອນ ແລະຈະທຳລາຍພວກເຈົ້າໃຫ້ໝົດໄປຈາກແຜ່ນດິນດີໆນີ້ທີ່ພະເຢໂຫວາພະເຈົ້າຂອງພວກເຈົ້າໄດ້ເອົາໃຫ້ພວກເຈົ້າ.+
16 ຖ້າພວກເຈົ້າບໍ່ເຮັດຕາມທີ່ສັນຍາໄວ້ກັບພະເຢໂຫວາພະເຈົ້າຂອງພວກເຈົ້າແລະບໍ່ເຮັດຕາມຄຳສັ່ງຂອງເພິ່ນ ແລະຖ້າພວກເຈົ້າໄປຂາບໄຫວ້ແລະນະມັດສະການພະເຈົ້າອື່ນ ພະເຢໂຫວາຈະໃຈຮ້າຍໃຫ້ພວກເຈົ້າຫຼາຍ+ ແລະເພິ່ນຈະເຮັດໃຫ້ພວກເຈົ້າຕາຍໄປໄວໆຈາກແຜ່ນດິນດີໆທີ່ເພິ່ນເອົາໃຫ້ພວກເຈົ້າ.”+
