ໂຢຊວຍ 3:1-17
-
ພວກອິດສະຣາເອນຂ້າມແມ່ນ້ຳຈໍແດນ (1-17)
3 ໂຢຊວຍກັບພວກອິດສະຣາເອນກໍຕື່ນແຕ່ເຊົ້າໆ ແລ້ວເດີນທາງອອກຈາກຊິດຕີມ+ໄປແມ່ນ້ຳຈໍແດນ. ເຂົາເຈົ້າຄ້າງຄືນຢູ່ຫັ້ນກ່ອນທີ່ຈະຂ້າມແມ່ນ້ຳ.
2 ຫຼັງຈາກນັ້ນ 3 ມື້ ພວກຫົວໜ້າ+ກໍຍ່າງໄປທົ່ວຄ້າຍພັກ
3 ແລະສັ່ງປະຊາຊົນວ່າ: “ຖ້າພວກເຈົ້າເຫັນປະໂລຫິດຄົນເລວີຫາມຫີບສັນຍາຂອງພະເຢໂຫວາພະເຈົ້າຂອງພວກເຈົ້າໄປ+ ໃຫ້ພວກເຈົ້ານຳຫຼັງເຂົາເຈົ້າໄປໂລດ.
4 ແຕ່ໃຫ້ຢູ່ຫ່າງຈາກເຂົາເຈົ້າ 2.000 ສອກ* ແລະບໍ່ໃຫ້ໄປໃກ້ກວ່ານັ້ນ ເພື່ອພວກເຈົ້າຈະຮູ້ວ່າຈະໄປທາງໃດ ເພາະພວກເຈົ້າບໍ່ເຄີຍໄປທາງນັ້ນຈັກເທື່ອ.”
5 ແລ້ວໂຢຊວຍກໍເວົ້າກັບປະຊາຊົນວ່າ: “ກຽມໂຕໃຫ້ພ້ອມ*+ ເພາະມື້ອື່ນພະເຢໂຫວາຈະເຮັດການອັດສະຈັນໃຫ້ພວກເຈົ້າ.”+
6 ໂຢຊວຍບອກພວກປະໂລຫິດວ່າ: “ໃຫ້ຫາມຫີບ+ສັນຍາອອກໄປກ່ອນປະຊາຊົນ.” ແລ້ວເຂົາເຈົ້າກໍຫາມຫີບສັນຍາອອກໄປ.
7 ພະເຢໂຫວາເວົ້າກັບໂຢຊວຍວ່າ: “ຕັ້ງແຕ່ມື້ນີ້ໄປພວກອິດສະຣາເອນຈະນັບຖືເຈົ້າ+ ເພາະເຂົາເຈົ້າຈະຮູ້ວ່າເຮົາກຳລັງຊ່ວຍເຈົ້າຢູ່+ຄືກັບທີ່ເຄີຍຊ່ວຍໂມເຊ.+
8 ເມື່ອພວກປະໂລຫິດຫາມຫີບສັນຍາໄປຮອດແມ່ນ້ຳຈໍແດນ ເຈົ້າຕ້ອງສັ່ງເຂົາເຈົ້າໃຫ້ລົງໄປຢືນຢູ່ໃນນ້ຳ.”+
9 ຈາກນັ້ນ ໂຢຊວຍເວົ້າກັບພວກອິດສະຣາເອນວ່າ: “ໃຫ້ມາຟັງສິ່ງທີ່ພະເຢໂຫວາພະເຈົ້າຂອງພວກເຈົ້າບອກພວກເຈົ້າ.”
10 ໂຢຊວຍເວົ້າວ່າ: “ສິ່ງທີ່ຈະເກີດຂຶ້ນຕໍ່ໄປນີ້ຈະເຮັດໃຫ້ພວກເຈົ້າຮູ້ວ່າພະເຈົ້າຜູ້ມີຊີວິດຢູ່ກຳລັງຢູ່ນຳພວກເຈົ້າ.+ ເພິ່ນຈະໄລ່ພວກການາອານ ພວກເຮດ ພວກຮີວີ ພວກເປຣິຊີ ພວກກີກາຊີ ພວກອາໂມ ແລະພວກເຢບຸດອອກໄປຈາກພວກເຈົ້າ.+
11 ຫີບສັນຍາຂອງຜູ້ທີ່ປົກຄອງໂລກທັງໝົດນີ້ຈະລົງໄປໃນແມ່ນ້ຳຈໍແດນກ່ອນພວກເຈົ້າ.
12 ຕອນນີ້ ໃຫ້ເຈົ້າເລືອກຜູ້ຊາຍ 12 ຄົນມາຈາກທຸກຕະກູນຂອງພວກອິດສະຣາເອນ ຕະກູນລະ 1 ຄົນ.+
13 ເມື່ອຕີນຂອງພວກປະໂລຫິດທີ່ຫາມຫີບສັນຍາຂອງພະເຢໂຫວາທີ່ເປັນຜູ້ປົກຄອງໂລກນີ້ທັງໝົດລົງໄປໃນແມ່ນ້ຳຈໍແດນ ນ້ຳກໍຈະເຊົາໄຫຼທັນທີແລະຕັ້ງຂຶ້ນຄືກັບກຳແພງ.”+
14 ຕອນທີ່ປະຊາຊົນກຽມໂຕເພື່ອຈະຂ້າມແມ່ນ້ຳຈໍແດນ ພວກປະໂລຫິດກໍຫາມຫີບ+ສັນຍາອອກໄປກ່ອນເຂົາເຈົ້າ.
15 ເມື່ອພວກປະໂລຫິດທີ່ຫາມຫີບສັນຍາໄປຮອດແມ່ນ້ຳຈໍແດນ ເຂົາເຈົ້າກໍລົງໄປໃນແມ່ນ້ຳ. (ຕອນນັ້ນເປັນລະດູເກັບກ່ຽວ ນ້ຳໃນແມ່ນ້ຳຈໍແດນຂຶ້ນສູງຈົນລົ້ນຕາຝັ່ງ.)+
16 ແລ້ວນ້ຳກໍເຊົາໄຫຼແລະຕັ້ງຂຶ້ນເປັນຄືກັບກຳແພງຢູ່ໄກໆຢູ່ເມືອງອາດາມ ເຊິ່ງຢູ່ໃກ້ໆກັບເມືອງຊາເຣທານ. ສ່ວນນ້ຳທີ່ເຫຼືອກໍໄຫຼລົງໄປທາງທະເລຂອງເຂດອາຣາບາທີ່ມີອີກຊື່ໜຶ່ງວ່າທະເລເກືອ.* ນ້ຳໃນແມ່ນ້ຳເຊົາໄຫຼ ແລະປະຊາຊົນກໍໄດ້ຂ້າມແມ່ນ້ຳຢູ່ແຖວເມືອງເຢຣິໂກ.
17 ພວກປະໂລຫິດທີ່ຫາມຫີບສັນຍາຂອງພະເຢໂຫວາໄດ້ຢືນຢູ່ກາງແມ່ນ້ຳຈໍແດນເທິງດິນທີ່ແຫ້ງ.+ ເຂົາເຈົ້າຢືນຢູ່ຫັ້ນຈົນພວກອິດສະຣາເອນຂ້າມແມ່ນ້ຳຈໍແດນໄປໝົດທຸກຄົນ.
ຂໍ
^ 890 ແມັດ. ເບິ່ງພາກຜະໜວກ ຂ14.
^ ແປຕາມໂຕວ່າ “ເຮັດໂຕໃຫ້ບໍລິສຸດ”
^ ໝາຍເຖິງທະເລຕາຍ
