ໂຢຊວຍ 5:1-15
5 ເມື່ອກະສັດທຸກອົງຂອງຄົນອາໂມ+ທີ່ຢູ່ທາງທິດຕາເວັນຕົກຂອງແມ່ນ້ຳຈໍແດນ ແລະກະສັດທຸກອົງຂອງພວກການາອານ+ທີ່ຢູ່ໃກ້ທະເລໄດ້ຍິນວ່າພະເຢໂຫວາໄດ້ເຮັດໃຫ້ແມ່ນ້ຳຈໍແດນແຫ້ງເພື່ອພວກອິດສະຣາເອນຈະຂ້າມມາທາງນີ້ໄດ້ ພວກເຂົາກໍຢ້ານຈົນຫົວຫົດ+ແລະບໍ່ກ້າໄປສູ້ກັບພວກອິດສະຣາເອນ.+
2 ຕອນນັ້ນ ພະເຢໂຫວາບອກໂຢຊວຍວ່າ: “ໃຫ້ເຈົ້າເອົາຫີນຄົມໆມາເຮັດເປັນມີດ ແລະໃຫ້ສັ່ງພວກຜູ້ຊາຍອິດສະຣາເອນມາຮັບສິນຕັດ.”*+
3 ໂຢຊວຍກໍເອົາຫີນຄົມໆມາເຮັດເປັນມີດ ແລະພວກຜູ້ຊາຍອິດສະຣາເອນກໍໄດ້ຮັບສິນຕັດຢູ່ກີເບອາດອາຣາໂລດ.*+
4 ໂຢຊວຍໄດ້ໃຫ້ເຂົາເຈົ້າຮັບສິນຕັດ ຍ້ອນພວກຜູ້ຊາຍທຸກຄົນທີ່ເປັນທະຫານທີ່ອອກມາຈາກເອຢິບໄດ້ຕາຍໝົດແລ້ວຢູ່ໃນບ່ອນກັນດານຫຼັງຈາກທີ່ອອກມາຈາກເອຢິບ.+
5 ພວກຜູ້ຊາຍເຫຼົ່ານັ້ນທີ່ອອກມາຈາກເອຢິບໄດ້ຮັບສິນຕັດໝົດທຸກຄົນແລ້ວ ສ່ວນພວກທີ່ເກີດຢູ່ບ່ອນກັນດານຫຼັງຈາກອອກມາຈາກເອຢິບ ພວກນີ້ຍັງບໍ່ທັນໄດ້ຮັບສິນຕັດເທື່ອ.
6 ພວກຜູ້ຊາຍທີ່ເປັນທະຫານທີ່ອອກຈາກເອຢິບບໍ່ໄດ້ເຊື່ອຟັງພະເຢໂຫວາ+ ພວກອິດສະຣາເອນຈຶ່ງຕ້ອງໄດ້ເດີນທາງໄປໆມາໆຢູ່ບ່ອນກັນດານ 40 ປີ+ ຈົນຄົນເຫຼົ່ານັ້ນຕາຍໝົດ. ທຳອິດ ພະເຢໂຫວາໄດ້ສາບານກັບປູ່ຍ່າຕານາຍຂອງພວກເຮົາວ່າ ຊິເອົາແຜ່ນດິນທີ່ມີນ້ຳນົມກັບນ້ຳເຜີ້ງຫຼາຍ+ໃຫ້ພວກເຮົາ+ ແຕ່ໃນພາຍຫຼັງພະເຢໂຫວາກໍໄດ້ສາບານກັບພວກທີ່ບໍ່ເຊື່ອຟັງນີ້ວ່າ ຊິບໍ່ໃຫ້ເຂົາເຈົ້າໄດ້ເຂົ້າໄປໃນແຜ່ນດິນນັ້ນ.+
7 ເພິ່ນຈຶ່ງໃຫ້ລູກຫຼານຂອງເຂົາເຈົ້າເຂົ້າໄປຢູ່ແທນເຂົາເຈົ້າ.+ ໂຢຊວຍໄດ້ໃຫ້ເຂົາເຈົ້າຮັບສິນຕັດກໍຍ້ອນວ່າຕອນທີ່ເດີນທາງຢູ່ໃນບ່ອນກັນດານນັ້ນ ເຂົາເຈົ້າຍັງບໍ່ໄດ້ຮັບສິນຕັດເທື່ອ.
8 ເມື່ອຜູ້ຊາຍທຸກຄົນຮັບສິນຕັດແລ້ວ ເຂົາເຈົ້າກໍໄດ້ພັກຢູ່ຄ້າຍຈົນເຂົາເຈົ້າເຊົາເຈັບ.
9 ພະເຢໂຫວາເວົ້າກັບໂຢຊວຍວ່າ: “ມື້ນີ້ ເຮົາໄດ້ຊ່ວຍໃຫ້ພວກເຈົ້າບໍ່ຕ້ອງອັບອາຍຈາກການເຍາະເຍີ້ຍຂອງພວກເອຢິບອີກຕໍ່ໄປ.”* ເຂົາເຈົ້າຈຶ່ງເອີ້ນບ່ອນນັ້ນວ່າກິນການ*+ຈົນຮອດທຸກມື້ນີ້.
10 ພວກອິດສະຣາເອນໄດ້ຕັ້ງຄ້າຍພັກຢູ່ກິນການຕໍ່ໄປ. ໃນແລງວັນທີ 14 ຂອງເດືອນທີ 1+ ເຂົາເຈົ້າໄດ້ສະຫຼອງປັດສະຄາຢູ່ບ່ອນກັນດານເຢຣິໂກ.
11 ໃນມື້ທີ່ຕໍ່ຈາກວັນປັດສະຄາ ເຂົາເຈົ້າໄດ້ກິນເຂົ້າຈີ່ບໍ່ມີເຊື້ອ+ ເຂົ້າບາເລຂົ້ວ ແລະຜົນລະປູກອື່ນໆຈາກໄຮ່ຈາກສວນຂອງແຜ່ນດິນການາອານ.
12 ຕັ້ງແຕ່ມື້ທີ່ເຂົາເຈົ້າໄດ້ກິນຜົນລະປູກຈາກແຜ່ນດິນການາອານກໍບໍ່ມີມານາອີກຕໍ່ໄປ.+ ນັບຕັ້ງແຕ່ປີນັ້ນທີ່ພວກອິດສະຣາເອນໄດ້ກິນຜົນລະປູກຈາກແຜ່ນດິນການາອານ ເຂົາເຈົ້າກໍບໍ່ໄດ້ກິນມານາອີກເລີຍ.+
13 ຕອນທີ່ໂຢຊວຍຢູ່ໃກ້ໆເມືອງເຢຣິໂກ ລາວເຫັນຜູ້ຊາຍຄົນໜຶ່ງ+ຢືນຖືດາບຢູ່ຕໍ່ໜ້າລາວ+ ໂຢຊວຍຈຶ່ງຍ່າງເຂົ້າໄປຫາຜູ້ຊາຍຄົນນັ້ນ ແລະເວົ້າວ່າ: “ເຈົ້າຢູ່ຝ່າຍຂ້ອຍ ຫຼືຢູ່ຝ່າຍສັດຕູ?”
14 ຜູ້ຊາຍຄົນນັ້ນຕອບວ່າ: “ຂ້ອຍເປັນຫົວໜ້າກອງທັບຂອງພະເຢໂຫວາ.”+ ເມື່ອໂຢຊວຍໄດ້ຍິນແນວນັ້ນ ລາວກໍໝູບໜ້າລົງພື້ນແລະເວົ້າວ່າ: “ທ່ານມີຫຍັງຈະເວົ້າກັບຂ້ອຍທີ່ເປັນຜູ້ຮັບໃຊ້ຂອງທ່ານບໍ?”
15 ຜູ້ທີ່ເປັນຫົວໜ້າກອງທັບຂອງພະເຢໂຫວາຕອບວ່າ: “ໃຫ້ເຈົ້າປົດເກີບອອກ ເພາະບ່ອນທີ່ເຈົ້າຢືນຢູ່ນີ້ເປັນບ່ອນບໍລິສຸດ.” ໂຢຊວຍກໍເຮັດຕາມທີ່ລາວບອກທັນທີ.+
ຂໍ
^ ແປຕາມໂຕວ່າ “ໃຫ້ຮັບສິນຕັດອີກເທື່ອໜຶ່ງເປັນເທື່ອທີ 2.” ໝາຍເຖິງຕັດໜັງຫຸ້ມປາຍອະໄວຍະວະເພດຊາຍ.
^ ແປວ່າ “ເນີນແຫ່ງໜັງຫຸ້ມປາຍອະໄວຍະວະເພດຊາຍ”
^ ແປຕາມໂຕວ່າ “ກິ້ງການເຍາະເຍີ້ຍຂອງພວກເອຢິບອອກໄປຈາກພວກເຈົ້າ”
^ ແປວ່າ “ກິ້ງ; ກິ້ງອອກໄປ”
