ໂຢຊວຍ 7:1-26
7 ພວກອິດສະຣາເອນບໍ່ໄດ້ເຮັດຕາມທີ່ພະເຈົ້າສັ່ງກ່ຽວກັບສິ່ງທີ່ຈະຕ້ອງຖືກທຳລາຍ. ອາຄານ+ທີ່ເປັນລູກຊາຍຂອງກາມີ ເປັນຫຼານຂອງຊັບດີ ແລະເປັນເຫຼນຂອງເຊຣາຈາກຕະກູນຢູດາໄດ້ເອົາບາງຢ່າງທີ່ຈະຕ້ອງຖືກທຳລາຍມາ.+ ຍ້ອນແນວນັ້ນ ພະເຢໂຫວາຈຶ່ງໃຈຮ້າຍໃຫ້ພວກອິດສະຣາເອນຫຼາຍ.+
2 ຕໍ່ມາ ໂຢຊວຍໄດ້ສົ່ງຄົນຈາກເມືອງເຢຣິໂກໄປເມືອງອາອີ+ທີ່ຢູ່ໃກ້ກັບເມືອງເບັດອາເວນ ແລະຢູ່ທາງທິດຕາເວັນອອກຂອງເບເທນ.+ ລາວສັ່ງເຂົາເຈົ້າວ່າ: “ໃຫ້ພວກເຈົ້າຂຶ້ນໄປສອດແນມແຜ່ນດິນນັ້ນ.” ແລ້ວເຂົາເຈົ້າກໍຂຶ້ນໄປສອດແນມເມືອງອາອີ.
3 ເຂົາເຈົ້າກັບມາບອກໂຢຊວຍວ່າ: “ບໍ່ຕ້ອງໃຫ້ທະຫານຂຶ້ນໄປທຸກຄົນດອກ ເພາະຢູ່ຫັ້ນມີຄົນບໍ່ຫຼາຍ. ເອົາທະຫານສອງຫຼືສາມພັນຄົນຂຶ້ນໄປກໍຊິຊະນະເມືອງອາອີໄດ້ແລ້ວ. ບໍ່ຕ້ອງພາກັນຂຶ້ນໄປທັງໝົດໃຫ້ເມື່ອຍລ້າໆດອກ.”
4 ທະຫານປະມານ 3.000 ຄົນໄດ້ຂຶ້ນໄປເມືອງອາອີ ແຕ່ເຂົາເຈົ້າສູ້ທະຫານຂອງເມືອງນັ້ນບໍ່ໄດ້.+
5 ພວກອາອີໄລ່ນຳຫຼັງເຂົາເຈົ້າໄປ ຕັ້ງແຕ່ໜ້າປະຕູເມືອງ ລົງເນີນພູໄປໄກຈົນຮອດເຊບາຣີມ ແລະໄລ່ຂ້າເຂົາເຈົ້າໄປຕາມທາງ. ທະຫານຂອງພວກອິດສະຣາເອນຖືກຂ້າຕາຍ 36 ຄົນ. ເຂົາເຈົ້າກັບມາດ້ວຍຄວາມຢ້ານແລະໝົດກຳລັງໃຈ.*
6 ຕອນນັ້ນ ໂຢຊວຍກັບພວກຜູ້ນຳຂອງອິດສະຣາເອນກໍຈີກເສື້ອຂອງໂຕເອງ ແລະໝູບໜ້າລົງພື້ນຕໍ່ໜ້າຫີບສັນຍາຂອງພະເຢໂຫວາຈົນຮອດຄ່ຳ. ເຂົາເຈົ້າເອົາຂີ້ດິນໂຮຍໃສ່ຫົວຂອງໂຕເອງ.
7 ໂຢຊວຍເວົ້າວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດ ເປັນຫຍັງພະອົງພາພວກນີ້ຂ້າມແມ່ນ້ຳຈໍແດນມາເພື່ອໃຫ້ພວກອາໂມທຳລາຍ? ຖ້າພວກເຮົາຍັງຢູ່ຟາກນັ້ນ*ຂອງແມ່ນ້ຳຈໍແດນກໍຍັງຊິດີກວ່າບໍ?
8 ພະເຢໂຫວາເອີ້ຍ ລູກບໍ່ຮູ້ຊິເວົ້າແນວໃດທີ່ພວກອິດສະຣາເອນສູ້ສັດຕູບໍ່ໄດ້ແບບນີ້.
9 ຖ້າພວກການາອານກັບຄົນໃນແຜ່ນດິນນີ້ໄດ້ຍິນເລື່ອງນີ້ ພວກເຂົາກໍຊິພາກັນມາລ້ອມແລະຂ້າພວກເຮົາ ຈົນບໍ່ມີຜູ້ໃດໃນໂລກນີ້ຈື່ຊື່ພວກເຮົາໄດ້ ແລ້ວພະອົງຊິເຮັດແນວໃດເພື່ອປົກປ້ອງຊື່ທີ່ສົມຄວນໄດ້ຮັບຄວາມນັບຖືຂອງພະອົງ?”+
10 ພະເຢໂຫວາເວົ້າກັບໂຢຊວຍວ່າ: “ລຸກຂຶ້ນ! ເຈົ້າຈະໝູບໜ້າຢູ່ນີ້ເຮັດຫຍັງ?
11 ພວກອິດສະຣາເອນໄດ້ເຮັດຜິດ. ເຂົາເຈົ້າບໍ່ໄດ້ເຮັດຕາມຄຳສັ່ງຂອງເຮົາຄືກັບທີ່ໄດ້ສັນຍາໄວ້.+ ເຂົາເຈົ້າລັກເອົາສິ່ງທີ່ຈະຕ້ອງຖືກທຳລາຍ+ມາເຊື່ອງ+ໄວ້ເປັນຂອງໂຕເອງ.+
12 ຍ້ອນແນວນີ້ ພວກອິດສະຣາເອນຈະສູ້ກັບສັດຕູບໍ່ໄດ້. ເຂົາເຈົ້າຈະຫັນຫຼັງແລະແລ່ນໜີສັດຕູ ຍ້ອນເຂົາເຈົ້າບໍ່ໄດ້ທຳລາຍສິ່ງທີ່ຈະຕ້ອງຖືກທຳລາຍ. ຖ້າພວກເຈົ້າບໍ່ທຳລາຍຄົນທີ່ເຮົາຈະບອກໃຫ້ພວກເຈົ້າທຳລາຍ ເຮົາກໍຈະບໍ່ຢູ່ນຳພວກເຈົ້າອີກຕໍ່ໄປ.+
13 ລຸກຂຶ້ນແລະກຽມປະຊາຊົນໃຫ້ພ້ອມ!*+ ບອກເຂົາເຈົ້າວ່າ ‘ໃຫ້ພວກເຈົ້າກຽມໂຕໃຫ້ພ້ອມສຳລັບມື້ອື່ນ ເພາະພະເຢໂຫວາພະເຈົ້າຂອງອິດສະຣາເອນບອກວ່າ “ພວກອິດສະຣາເອນເອີ້ຍ ມີຄົນທີ່ຈະຕ້ອງຖືກທຳລາຍຢູ່ນຳພວກເຈົ້າ. ຖ້າພວກເຈົ້າບໍ່ໄດ້ທຳລາຍຜູ້ນັ້ນ ພວກເຈົ້າກໍຈະສູ້ກັບສັດຕູບໍ່ໄດ້.
14 ມື້ອື່ນເຊົ້າ ໃຫ້ພວກເຈົ້າມາລວມໂຕກັນ. ຖ້າພະເຢໂຫວາເລືອກ+ຕະກູນໃດກໍໃຫ້ຕະກູນນັ້ນອອກມາ. ຖ້າພະເຢໂຫວາເລືອກຈຸ້ມເຈື້ອໃດກໍໃຫ້ຈຸ້ມເຈື້ອນັ້ນອອກມາ. ຖ້າພະເຢໂຫວາເລືອກຄອບຄົວໃດກໍໃຫ້ຄອບຄົວນັ້ນອອກມາ ແລະໃຫ້ຄົນໃນຄອບຄົວນັ້ນອອກມາເທື່ອລະຄົນ.
15 ຖ້າຜູ້ໃດຖືກຈັບໄດ້ວ່າມີສິ່ງຂອງທີ່ຈະຕ້ອງຖືກທຳລາຍ ຜູ້ນັ້ນຈະຕ້ອງຖືກຂ້າແລະເອົາໄປຈູດ+ ແລະທຸກສິ່ງທີ່ລາວເປັນເຈົ້າຂອງກໍຕ້ອງຖືກຈູດຄືກັນ ຍ້ອນລາວບໍ່ໄດ້ເຮັດຕາມຄຳສັ່ງຂອງພະເຢໂຫວາຄືກັບທີ່ສັນຍາໄວ້+ ແລະຍ້ອນລາວເຮັດສິ່ງທີ່ຊົ່ວຮ້າຍຫຼາຍໃນອິດສະຣາເອນ.”’”
16 ມື້ຕໍ່ມາ ໂຢຊວຍກໍລຸກແຕ່ເຊົ້າໆ ແລະໃຫ້ພວກອິດສະຣາເອນທຸກຕະກູນມາລວມໂຕກັນ ແລ້ວຕະກູນຢູດາກໍຖືກເລືອກ.
17 ລາວຈຶ່ງໃຫ້ຈຸ້ມເຈື້ອຕ່າງໆໃນຕະກູນຢູດາອອກມາ ແລ້ວຈຸ້ມເຈື້ອຂອງເຊຣາ+ກໍຖືກເລືອກ. ລາວຈຶ່ງໃຫ້ຄອບຄົວໃນຈຸ້ມເຈື້ອຂອງເຊຣາອອກມາເທື່ອລະຄອບຄົວ ແລ້ວຄອບຄົວຂອງຊັບດີກໍຖືກເລືອກ.
18 ໃນທີ່ສຸດ ລາວຈຶ່ງໃຫ້ຄົນໃນຄອບຄົວຂອງຊັບດີອອກມາເທື່ອລະຄົນ ແລ້ວອາຄານທີ່ເປັນລູກຊາຍຂອງກາມີ ເປັນຫຼານຂອງຊັບດີ ແລະເປັນເຫຼນຂອງເຊຣາຈາກຕະກູນຢູດາກໍຖືກເລືອກ.+
19 ໂຢຊວຍເວົ້າກັບອາຄານວ່າ: “ລູກເອີ້ຍ ໃຫ້ເຈົ້າໃຫ້ກຽດພະເຢໂຫວາພະເຈົ້າຂອງອິດສະຣາເອນແລະສາລະພາບຄວາມຜິດຂອງເຈົ້າກັບເພິ່ນເດີ້. ບອກຂ້ອຍດຸວ່າເຈົ້າໄດ້ເຮັດຫຍັງ. ບໍ່ຕ້ອງປິດບັງເດີ້.”
20 ອາຄານຕອບໂຢຊວຍວ່າ: “ຂ້ອຍໄດ້ເຮັດຜິດຕໍ່ພະເຢໂຫວາພະເຈົ້າຂອງອິດສະຣາເອນແທ້ໆ. ສິ່ງທີ່ຂ້ອຍໄດ້ເຮັດແມ່ນ
21 ຂ້ອຍເຫັນເສື້ອໂຕໜຶ່ງງາມໆຈາກຊີນາ+ກັບເງິນໜັກ 200 ເຊເກນ* ແລະແທ່ງຄຳໜັກ 50 ເຊເກນ.* ຂ້ອຍຢາກໄດ້ກໍເລີຍລັກເອົາ. ຂ້ອຍເຊື່ອງສິ່ງຂອງເຫຼົ່ານັ້ນໄວ້ໃນດິນໃນເຕັ້ນຂອງຂ້ອຍ ແລະມີເງິນຢູ່ກ້ອງຫັ້ນນຳ.”
22 ໂຢຊວຍໄດ້ສົ່ງຄົນໄປທີ່ເຕັ້ນຂອງອາຄານທັນທີ. ເຂົາເຈົ້າແລ່ນໄປທີ່ເຕັ້ນນັ້ນ ແລະເມື່ອເຂົ້າໄປໃນເຕັ້ນ ເຂົາເຈົ້າກໍເຫັນເສື້ອກັບເງິນທີ່ລາວເຊື່ອງໄວ້.
23 ເຂົາເຈົ້າຈຶ່ງເອົາເຄື່ອງເຫຼົ່ານັ້ນໄປໃຫ້ໂຢຊວຍກັບພວກອິດສະຣາເອນ ແລະເອົາໄປວາງໄວ້ຕໍ່ໜ້າພະເຢໂຫວາ.
24 ໂຢຊວຍກັບພວກອິດສະຣາເອນກໍເອົາອາຄານ+ທີ່ເປັນຫຼານຂອງເຊຣາ ພ້ອມກັບເງິນ ເສື້ອໂຕທີ່ງາມໆນັ້ນ ແທ່ງຄຳ+ ລູກຊາຍ ລູກສາວ ງົວ ລາ ແກະ ແບ້ ເຕັ້ນຂອງລາວ ແລະທຸກຢ່າງທີ່ລາວເປັນເຈົ້າຂອງໄປຮ່ອມພູອາໂຄ.+
25 ໂຢຊວຍເວົ້າກັບອາຄານວ່າ: “ເປັນຫຍັງເຈົ້າເຮັດໃຫ້ພວກເຮົາຈິບຫາຍ?+ ພະເຢໂຫວາຈະທຳລາຍພວກເຈົ້າໃນມື້ນີ້.” ແລ້ວພວກອິດສະຣາເອນກໍດຶກກ້ອນຫີນໃສ່ອາຄານ+ກັບຄົນໃນຄອບຄົວຂອງລາວຈົນຕາຍ. ຈາກນັ້ນກໍເອົາສົບຂອງເຂົາເຈົ້າໄປຈູດ.+
26 ເຂົາເຈົ້າເອົາຫີນມາກອງໄວ້ບ່ອນຈູດສົບຂອງລາວເປັນກອງໃຫຍ່ໆເຊິ່ງຍັງຢູ່ຈົນຮອດທຸກມື້ນີ້. ແລ້ວພະເຢໂຫວາຈຶ່ງຄ່ອຍເຊົາໃຈຮ້າຍ.+ ຍ້ອນແນວນີ້ ເຂົາເຈົ້າຈຶ່ງເອີ້ນບ່ອນນັ້ນວ່າຮ່ອມພູອາໂຄ*ຈົນຮອດທຸກມື້ນີ້.
ຂໍ
^ ແປຕາມໂຕວ່າ “ໃຈຂອງເຂົາເຈົ້າລະລາຍແລະເປັນຄືກັບນ້ຳ”
^ ໝາຍເຖິງທາງທິດຕາເວັນອອກ
^ ແປຕາມໂຕວ່າ “ເຮັດໂຕໃຫ້ບໍລິສຸດ”
^ 570 ກຣາມ
^ 2,28 ກິໂລກຣາມ. ເບິ່ງພາກຜະໜວກ ຂ14.
^ ແປວ່າ “ຄວາມຈິບຫາຍ; ການຖືກຕັດຂາດຈາກສັງຄົມ”
