ໂຢຊວຍ 8:1-35
8 ພະເຢໂຫວາເວົ້າກັບໂຢຊວຍວ່າ: “ຢ່າຊູ່ຢ້ານ+ ໃຫ້ພາທະຫານທັງໝົດໄປຕໍ່ສູ້ກັບຄົນໃນເມືອງອາອີ. ເຮົາໄດ້ມອບກະສັດເມືອງອາອີ ຄົນຂອງລາວ ເມືອງຂອງລາວ ແລະແຜ່ນດິນຂອງລາວໄວ້ໃນມືຂອງເຈົ້າແລ້ວ.+
2 ໃຫ້ເຈົ້າເຮັດກັບເມືອງອາອີແລະກະສັດຂອງເມືອງນັ້ນຄືກັບທີ່ໄດ້ເຮັດກັບເມືອງເຢຣິໂກແລະກະສັດຂອງເມືອງເຢຣິໂກ.+ ເຈົ້າປຸ້ນເອົາເຄື່ອງຂອງແລະຍຶດເອົາຝູງສັດຂອງເມືອງນັ້ນມາເປັນຂອງເຈົ້າໄດ້. ໃຫ້ເຈົ້າຈັດທະຫານກອງໜຶ່ງເປັນກອງຊຸ້ມໄວ້ຢູ່ທາງຫຼັງເມືອງນັ້ນ.”
3 ແລ້ວໂຢຊວຍກໍພາທະຫານທັງໝົດຂຶ້ນໄປຕໍ່ສູ້ກັບທະຫານຂອງເມືອງອາອີ. ລາວໄດ້ເລືອກທະຫານທີ່ເກັ່ງໆ 30.000 ຄົນ ແລະໃຫ້ເຂົາເຈົ້າອອກໄປຕອນກາງຄືນ.
4 ລາວສັ່ງເຂົາເຈົ້າວ່າ: “ໃຫ້ພວກເຈົ້າໄປຊຸ້ມຢູ່ທາງຫຼັງເມືອງ ແຕ່ບໍ່ໃຫ້ຢູ່ໄກຫຼາຍ ແລະໃຫ້ທຸກຄົນກຽມພ້ອມຕະຫຼອດ.
5 ສ່ວນຂ້ອຍກັບທະຫານທີ່ເຫຼືອຈະໄປໂຈມຕີຢູ່ທາງໜ້າເມືອງ. ເມື່ອພວກທະຫານອອກມາຕໍ່ສູ້ກັບພວກເຮົາຄືກັບເທື່ອກ່ອນ+ ພວກເຮົາກໍຈະຖອຍອອກມາ.
6 ເມື່ອພວກເຂົາໄລ່ນຳຫຼັງພວກເຮົາ ພວກເຮົາກໍຈະລໍ້ພວກເຂົາໃຫ້ອອກໄປໄກຈາກເມືອງ. ແລ້ວພວກເຂົາກໍຈະເວົ້າວ່າ ‘ພວກມັນກຳລັງໜີອີກແລ້ວ’+ ແລະພວກເຮົາຈະຖອຍອອກມາ.
7 ຈາກນັ້ນກໍໃຫ້ກອງຊຸ້ມທີ່ຢູ່ທາງຫຼັງເມືອງເຂົ້າໄປຍຶດເມືອງ ເພາະພະເຢໂຫວາພະເຈົ້າຂອງພວກເຈົ້າຈະຊ່ວຍພວກເຈົ້າໃຫ້ຊະນະ.
8 ທັນທີທີ່ພວກເຈົ້າຍຶດເມືອງໄດ້ກໍໃຫ້ຈູດເມືອງໂລດ.+ ພວກເຈົ້າຕ້ອງເຮັດຕາມທີ່ພະເຢໂຫວາສັ່ງໄວ້. ທັງໝົດນີ້ແມ່ນຄຳສັ່ງຂອງຂ້ອຍ.”
9 ແລ້ວໂຢຊວຍກໍໃຫ້ທະຫານສ່ວນໜຶ່ງໄປຊຸ້ມຢູ່ທາງທິດຕາເວັນຕົກຂອງເມືອງ. ເຂົາເຈົ້າຊຸ້ມຢູ່ລະຫວ່າງເບເທນກັບເມືອງອາອີ. ສ່ວນໂຢຊວຍກໍຄ້າງຄືນຢູ່ກັບທະຫານທີ່ເຫຼືອ.
10 ມື້ຕໍ່ມາ ໂຢຊວຍກໍຕື່ນແຕ່ເຊົ້າແລະກຽມກອງທັບ. ລາວກັບພວກຜູ້ນຳຂອງອິດສະຣາເອນໄດ້ນຳໜ້າພວກທະຫານໄປເມືອງອາອີ.
11 ພວກທະຫານ+ທີ່ຢູ່ກັບລາວກໍເຄື່ອນທັບໄປທາງໜ້າເມືອງອາອີ. ເຂົາເຈົ້າຕັ້ງຄ້າຍຢູ່ທາງທິດເໜືອຂອງເມືອງອາອີ ໂດຍມີຮ່ອມພູຂັ້ນກາງລະຫວ່າງເຂົາເຈົ້າກັບເມືອງອາອີ.
12 ໃນລະຫວ່າງນັ້ນ ລາວໃຫ້ທະຫານ 5.000 ຄົນ ໄປຊຸ້ມຢູ່+ທາງທິດຕາເວັນຕົກຂອງເມືອງ. ເຂົາເຈົ້າຊຸ້ມຢູ່ລະຫວ່າງເບເທນ+ກັບເມືອງອາອີ.
13 ດັ່ງນັ້ນ ທະຫານກອງຫຼັກໄດ້ຕັ້ງຄ້າຍຢູ່ທາງທິດເໜືອຂອງເມືອງ.+ ສ່ວນທະຫານກອງຊຸ້ມໄດ້ຊຸ້ມຢູ່ທາງທິດຕາເວັນຕົກຂອງເມືອງ+ ແລະຄືນນັ້ນໂຢຊວຍໄດ້ອອກໄປກາງຮ່ອມພູ.
14 ເມື່ອກະສັດຂອງເມືອງອາອີເຫັນແນວນັ້ນ ລາວກໍຟ້າວພາທະຫານທີ່ຢູ່ໃນເມືອງອອກມາຕໍ່ສູ້ກັບທະຫານຂອງອິດສະຣາເອນຕັ້ງແຕ່ເຊົ້າໆ. ເຂົາເຈົ້າສູ້ຮົບກັນຢູ່ບ່ອນທີ່ແນມເຫັນບ່ອນກັນດານໄດ້. ແຕ່ກະສັດຂອງເມືອງອາອີບໍ່ຮູ້ວ່າມີທະຫານຂອງອິດສະຣາເອນອີກກອງໜຶ່ງຊຸ້ມຢູ່ທາງຫຼັງເມືອງ.
15 ເມື່ອທະຫານຂອງເມືອງອາອີອອກມາໂຈມຕີເຂົາເຈົ້າ ໂຢຊວຍກັບພວກທະຫານອິດສະຣາເອນກໍໄດ້ແລ່ນໜີໄປຕາມທາງທີ່ຈະໄປບ່ອນກັນດານ.+
16 ຜູ້ຊາຍທຸກຄົນທີ່ຍັງເຫຼືອຢູ່ໃນເມືອງອາອີກໍມາລວມໂຕກັນເພື່ອໄລ່ນຳຫຼັງພວກອິດສະຣາເອນ ແລ້ວໂຢຊວຍກໍໄດ້ລໍ້ພວກເຂົາໃຫ້ອອກໄປໄກຈາກເມືອງ.
17 ບໍ່ມີທະຫານເຫຼືອຢູ່ໃນເມືອງອາອີແລະເບເທນຈັກຄົນເລີຍ. ພວກເຂົາໄລ່ນຳຫຼັງພວກອິດສະຣາເອນແລະປະເມືອງໄວ້.
18 ພະເຢໂຫວາບອກໂຢຊວຍວ່າ: “ໃຫ້ເຈົ້າເດ່ຫອກຢູ່ມືຊີ້ໄປທາງເມືອງອາອີ+ ແລະເຮົາຊິມອບເມືອງນັ້ນໄວ້ໃນມືຂອງເຈົ້າ.”+ ແລ້ວໂຢຊວຍກໍເດ່ຫອກຢູ່ມືຊີ້ໄປທາງເມືອງນັ້ນ.
19 ທັນທີທີ່ລາວເດ່ຫອກອອກໄປ ພວກທະຫານທີ່ຊຸ້ມຢູ່ກໍແລ່ນເຂົ້າໄປໃນເມືອງແລະຍຶດເອົາເມືອງນັ້ນ. ເຂົາເຈົ້າຈູດເມືອງນັ້ນທັນທີ.+
20 ເມື່ອພວກທະຫານຂອງເມືອງອາອີຫຼຽວຄືນຫຼັງກໍເຫັນຄວັນລອຍຂຶ້ນເທິງຟ້າຈາກເມືອງຂອງໂຕເອງ. ພວກເຂົາກໍໝົດກຳລັງໃຈແລະບໍ່ຮູ້ວ່າຊິໜີໄປທາງໃດ. ພວກທະຫານອິດສະຣາເອນທີ່ໜີໄປທາງບ່ອນກັນດານກໍໄດ້ກັບຄືນມາຕໍ່ສູ້ພວກເຂົາ.
21 ເມື່ອໂຢຊວຍກັບພວກທະຫານອິດສະຣາເອນເຫັນຄວັນລອຍຂຶ້ນຈາກເມືອງ ເຂົາເຈົ້າກໍຮູ້ວ່າພວກທະຫານກອງຊຸ້ມຍຶດເມືອງໄດ້ແລ້ວ. ເຂົາເຈົ້າຈຶ່ງຫັນກັບມາຕໍ່ສູ້ກັບພວກທະຫານຂອງເມືອງອາອີ.
22 ພວກທະຫານທີ່ຍຶດເມືອງໄດ້ກໍມາຊ່ວຍຕໍ່ສູ້. ທະຫານຂອງເມືອງອາອີຈຶ່ງຕິດຢູ່ທາງກາງ ມີທະຫານຂອງພວກອິດສະຣາເອນກອງໜຶ່ງລັດຢູ່ທາງໜ້າແລະອີກກອງໜຶ່ງລັດຢູ່ທາງຫຼັງ. ພວກທະຫານຂອງອິດສະຣາເອນໄດ້ຂ້າທະຫານຂອງເມືອງອາອີໝົດທຸກຄົນ. ບໍ່ມີຜູ້ໃດລອດຫຼືໜີໄປໄດ້ຈັກຄົນ.+
23 ແຕ່ກະສັດຂອງເມືອງອາອີ+ ເຂົາເຈົ້າບໍ່ໄດ້ຂ້າ. ເຂົາເຈົ້າຈັບລາວໄປໃຫ້ໂຢຊວຍ.
24 ຫຼັງຈາກທີ່ທະຫານອິດສະຣາເອນຂ້າທະຫານຂອງເມືອງອາອີທີ່ໄລ່ນຳຫຼັງເຂົາເຈົ້າໄປບ່ອນກັນດານຕາຍໝົດແລ້ວ ເຂົາເຈົ້າກໍກັບໄປໃນເມືອງແລະເອົາດາບຂ້າຄົນໃນເມືອງນັ້ນຕາຍໝົດ.
25 ໃນມື້ນັ້ນ ຄົນໃນເມືອງອາອີທີ່ຖືກຂ້າມີທັງຜູ້ຊາຍແລະຜູ້ຍິງ ລວມທັງໝົດ 12.000 ຄົນ.
26 ໂຢຊວຍເດ່ຫອກທີ່ຢູ່ມືໄປທາງເມືອງອາອີຢູ່ຈັ່ງຊັ້ນ+ ຈົນຄົນທີ່ຢູ່ໃນເມືອງຖືກຂ້າໝົດ ລາວຈຶ່ງເອົາມືລົງ.+
27 ພວກອິດສະຣາເອນໄດ້ປຸ້ນເອົາເຄື່ອງຂອງແລະຍຶດເອົາຝູງສັດທີ່ຢູ່ໃນເມືອງນັ້ນມາເປັນຂອງໂຕເອງ ຕາມທີ່ພະເຢໂຫວາໄດ້ສັ່ງໄວ້ກັບໂຢຊວຍ.+
28 ແລ້ວໂຢຊວຍກໍເຜົາເມືອງອາອີຈົນໄໝ້ໝົດເຫຼືອແຕ່ຊາກຫັກພັງ.+ ມັນເປັນແນວນັ້ນຈົນຮອດທຸກມື້ນີ້.
29 ລາວໄດ້ຂ້າກະສັດຂອງເມືອງອາອີ ແລ້ວເອົາສົບໄປແຂວນໄວ້ເທິງເສົາ*ຈົນຮອດຕອນແລງ. ກ່ອນຕາເວັນຕົກດິນໂຢຊວຍໄດ້ສັ່ງໃຫ້ຄົນເອົາສົບລົງມາຈາກເສົາ+ ແລ້ວເອົາສົບນັ້ນໄປໂຍນຖິ້ມຢູ່ທາງເຂົ້າເມືອງແລະເອົາຫີນມາວາງທັບສົບນັ້ນເປັນກອງບັກໃຫຍ່. ກອງຫີນນັ້ນກໍຍັງຢູ່ຈົນຮອດທຸກມື້ນີ້.
30 ໂຢຊວຍສ້າງແທ່ນບູຊາໃຫ້ພະເຢໂຫວາພະເຈົ້າຂອງອິດສະຣາເອນຢູ່ພູເອບານ+
31 ຄືກັບທີ່ໂມເຊຜູ້ຮັບໃຊ້ຂອງພະເຢໂຫວາໄດ້ສັ່ງພວກອິດສະຣາເອນໄວ້ ແລະຄືກັບປຶ້ມກົດໝາຍ+ຂອງໂມເຊທີ່ຂຽນໄວ້ວ່າ: “ໃຫ້ສ້າງແທ່ນບູຊາຈາກຫີນທີ່ບໍ່ໄດ້ໃຊ້ເຄື່ອງມືທີ່ເປັນເຫຼັກຕັດແຕ່ງ.”+ ແລ້ວເຂົາເຈົ້າກໍເຜົາເຄື່ອງບູຊາເຜົາແລະເຄື່ອງບູຊາສ້າງຄວາມສະຫງົບສຸກໃຫ້ພະເຢໂຫວາຢູ່ເທິງແທ່ນນັ້ນ.+
32 ຈາກນັ້ນ ໂຢຊວຍກໍເອົາກົດໝາຍ+ທີ່ໂມເຊຂຽນຕໍ່ໜ້າພວກອິດສະຣາເອນມາກ່າຍຄືນໃສ່ຫີນ.+
33 ພວກອິດສະຣາເອນທັງໝົດ ພວກຜູ້ນຳ ພວກຫົວໜ້າ ແລະພວກຜູ້ຕັດສິນໄດ້ຢືນຢູ່ຄົນລະເບື້ອງຂອງຫີບສັນຍາ ຕໍ່ໜ້າພວກປະໂລຫິດຄົນເລວີທີ່ຫາມຫີບສັນຍາຂອງພະເຢໂຫວາ. ຄົນຕ່າງຊາດກໍຢູ່ຫັ້ນຄືກັນ.+ ຄົນເຫຼົ່ານີ້ເຄິ່ງໜຶ່ງຢືນຢູ່ຕໍ່ໜ້າພູເກຣີຊີມ ແລະອີກເຄິ່ງໜຶ່ງຢືນຢູ່ຕໍ່ໜ້າພູເອບານ+ (ຕາມທີ່ໂມເຊຜູ້ຮັບໃຊ້ຂອງພະເຢໂຫວາໄດ້ສັ່ງໄວ້ແລ້ວ)+ ເພື່ອພວກປະໂລຫິດຈະໄດ້ອວຍພອນໃຫ້ພວກອິດສະຣາເອນ.
34 ຫຼັງຈາກນັ້ນ ລາວອ່ານກົດໝາຍ+ທັງໝົດດ້ວຍສຽງດັງໆ ທັງຄຳອວຍພອນ+ແລະຄຳສາບແຊ່ງ+ຕາມທີ່ຂຽນໄວ້ໃນປຶ້ມກົດໝາຍ.
35 ໂຢຊວຍໄດ້ອ່ານທຸກຄຳທີ່ໂມເຊໄດ້ສັ່ງໄວ້. ລາວອ່ານດັງໆຕໍ່ໜ້າພວກອິດສະຣາເອນ+ ລວມທັງຜູ້ຍິງ ເດັກນ້ອຍ ແລະຄົນຕ່າງຊາດທີ່ຢູ່ນຳເຂົາເຈົ້າ.+
ຂໍ ຄວາມ ໄຂ ເງື່ອນ
^ ຫຼື “ຕົ້ນໄມ້”