ໂຢນາ 3:1-10
3 ແລ້ວພະເຢໂຫວາກໍບອກໂຢນາເປັນເທື່ອທີ 2 ວ່າ:+
2 “ໃຫ້ເຈົ້າໄປເມືອງນີເນເວ ແລະປະກາດຂ່າວສານກັບຄົນໃນເມືອງ+ໃຫຍ່*ນັ້ນ ຕາມທີ່ເຮົາຈະບອກເຈົ້າ.”
3 ໂຢນາເຮັດຕາມຄຳສັ່ງຂອງພະເຢໂຫວາ+ແລະໄດ້ໄປເມືອງນີເນເວ.+ ນີເນເວເປັນເມືອງທີ່ໃຫຍ່ຫຼາຍ ຕ້ອງໃຊ້ເວລາ 3 ມື້ຈຶ່ງຈະຍ່າງອ້ອມຮອບເມືອງນີ້ໄດ້.
4 ແລ້ວໂຢນາກໍເຂົ້າໄປໃນເມືອງແລະຍ່າງຢູ່ໃນເມືອງໝົດມື້. ລາວປະກາດວ່າ: “ຍັງແຕ່ 40 ມື້ ເມືອງນີເນເວຈະຖືກທຳລາຍ.”
5 ແລ້ວຄົນໃນເມືອງນີເນເວກໍສະແດງຄວາມເຊື່ອໃນພະເຈົ້າ.+ ເຂົາເຈົ້າປະກາດໃຫ້ທຸກຄົນອົດເຂົ້າແລະນຸ່ງຜ້າເນື້ອຫຍາບ ຕັ້ງແຕ່ຜູ້ໃຫຍ່ຈົນຮອດເດັກນ້ອຍ.
6 ເມື່ອກະສັດເມືອງນີເນເວໄດ້ຍິນຂ່າວສານທີ່ໂຢນາປະກາດ ລາວກໍລຸກຈາກບັນລັງ ແກ້ຊຸດກະສັດອອກແລ້ວນຸ່ງຜ້າເນື້ອຫຍາບ ແລະນັ່ງຢູ່ເທິງກອງຂີ້ເທົ່າ.
7 ນອກຈາກນັ້ນ ກະສັດຍັງໃຫ້ປະກາດໄປທົ່ວເມືອງນີເນເວວ່າ:“ກະສັດກັບພວກເຈົ້ານາຍມີຄຳປະກາດວ່າ ຢ່າໃຫ້ຄົນແລະສັດກິນອີ່ຫຍັງເລີຍ. ຫ້າມກິນເຂົ້າກິນນ້ຳ.
8 ໃຫ້ທຸກຄົນນຸ່ງຜ້າເນື້ອຫຍາບ ແລ້ວກໍເອົາຜ້ານັ້ນໄປໃສ່ໃຫ້ໂຕສັດນຳ. ໃຫ້ທຸກຄົນຮ້ອງຫາພະເຈົ້າ ໃຫ້ເຊົາເຮັດຊົ່ວ ແລະໃຫ້ເຊົາທຳຮ້າຍຄົນອື່ນ.
9 ບາງເທື່ອພະເຈົ້າທ່ຽງແທ້ອາດຈະປ່ຽນໃຈ*ແລະບໍ່ເຮັດຕາມສິ່ງທີ່ເພິ່ນຄິດໄວ້. ເພິ່ນອາດຈະເຊົາໃຈຮ້າຍແລະບໍ່ທຳລາຍພວກເຮົາ.”
10 ເມື່ອພະເຈົ້າທ່ຽງແທ້ເຫັນເຂົາເຈົ້າປ່ຽນແປງໂຕເອງແລະເຊົາເຮັດຊົ່ວ+ ເພິ່ນກໍປ່ຽນໃຈແລະບໍ່ໄດ້ທຳລາຍເຂົາເຈົ້າ.+