ໂຢບ 21:1-34
21 ໂຢບຕອບວ່າ:
2 “ຕັ້ງໃຈຟັງຂ້ອຍດີໆເດີ້!ຖ້າພວກເຈົ້າເຮັດແນວນີ້ກໍສ່ຳກັບໃຫ້ກຳລັງໃຈຂ້ອຍແລ້ວ.
3 ອົດທົນຟັງຂ້ອຍເວົ້າກ່ອນຫຼັງຈາກນັ້ນຈຶ່ງຄ່ອຍເຍາະເຍີ້ຍຂ້ອຍກໍໄດ້.+
4 ຂ້ອຍບໍ່ໄດ້ຈົ່ມໃຫ້ມະນຸດເດີ້!
ຖ້າຂ້ອຍຈົ່ມໃຫ້ມະນຸດ ຂ້ອຍຄືຊິບໍ່ອົດທົນດົນປານນີ້.
5 ເບິ່ງຂ້ອຍແມ້ ພວກເຈົ້າຊິຕົກໃຈແລະເວົ້າຫຍັງບໍ່ອອກ.
6 ເມື່ອຂ້ອຍຄິດເຖິງເລື່ອງທີ່ເກີດຂຶ້ນກັບຂ້ອຍຂົນຄີງຂ້ອຍກໍລຸກ.
7 ເປັນຫຍັງຄົນຊົ່ວຈຶ່ງມີອາຍຸຍືນ+ແລະລວຍຂຶ້ນໆ?*+
8 ພວກລູກກໍຍັງຢູ່ນຳເຂົາເຈົ້າ.ເຂົາເຈົ້າອາຍຸຍືນຍາວຈົນໄດ້ເຫັນຫຼານເຫັນເຫຼນ.
9 ເຮືອນຂອງເຂົາເຈົ້າກໍໝັ້ນຄົງ ແລະເຮັດໃຫ້ເຂົາເຈົ້າບໍ່ຢ້ານ+ແລະພະເຈົ້າກໍບໍ່ໄດ້ລົງໂທດເຂົາເຈົ້າ.
10 ງົວໂຕຜູ້ຂອງເຂົາເຈົ້າບໍ່ເປັນໝັນແລະງົວໂຕແມ່ຂອງເຂົາເຈົ້າກໍບໍ່ຫຼຸລູກ.
11 ພວກເດັກນ້ອຍຂອງເຂົາເຈົ້າແລ່ນຫຼິ້ນຢູ່ທາງນອກເຮືອນຄືກັບຝູງສັດແລະເຕັ້ນໄປເຕັ້ນມາຢ່າງມ່ວນຊື່ນ.
12 ເຂົາເຈົ້າຮ້ອງເພງຕາມສຽງກອງແທມບູຣິນ*ແລະສຽງພິນແລະຟັງສຽງຂຸ່ຍຢ່າງມີຄວາມສຸກ.+
13 ເຂົາເຈົ້າມີຄວາມສຸກຕະຫຼອດຊີວິດ.ເຂົາເຈົ້າຕາຍຢ່າງສະຫງົບແລະຖືກຝັງ.*
14 ແຕ່ເຂົາເຈົ້າເວົ້າກັບພະເຈົ້າທ່ຽງແທ້ວ່າ ‘ຢ່າມາຫຍຸ້ງກັບພວກເຮົາ!
ພວກເຮົາບໍ່ຢາກຮູ້ຈັກຄຳສອນຂອງພະອົງດອກ.+
15 ຜູ້ມີລິດເດດສູງສຸດແມ່ນໃຜທີ່ພວກເຮົາຕ້ອງຮັບໃຊ້ເພິ່ນ?+
ຄັນພວກເຮົາຮູ້ຈັກເພິ່ນແລ້ວ ພວກເຮົາຊິໄດ້ຫຍັງ?’+
16 ແຕ່ຂ້ອຍຮູ້ວ່າຊີວິດຂອງເຂົາເຈົ້າຊິບໍ່ໄດ້ຈະເລີນຕະຫຼອດໄປ.+
ຂ້ອຍບໍ່ເຄີຍຄິດ*ຄືກັບຄົນຊົ່ວເລີຍ.+
17 ມີຈັກເທື່ອທີ່ຕະກຽງຂອງຄົນຊົ່ວມອດໄປ?+
ມີຈັກເທື່ອທີ່ເຂົາເຈົ້າເຈິຄວາມຈິບຫາຍ?
ມີຈັກເທື່ອທີ່ພະເຈົ້າໃຈຮ້າຍແລະທຳລາຍເຂົາເຈົ້າ?
18 ເຂົາເຈົ້າເຄີຍເປັນຄືກັບເຟືອງທີ່ຖືກລົມພັດໄປບໍ?ຫຼືເຄີຍເປັນຄືກັບຂີ້ແກບທີ່ຖືກພາຍຸພັດໄປບໍ?
19 ຖ້າຄົນໜຶ່ງເຮັດຊົ່ວ ພະເຈົ້າຊິລົງໂທດລູກຂອງລາວ.
ແຕ່ຂໍໃຫ້ພະເຈົ້າລົງໂທດຄົນນັ້ນຄືກັນ ເພື່ອລາວຊິຮູ້ວ່າລາວໄດ້ເຮັດຜິດ.+
20 ຂໍໃຫ້ລາວເຫັນຄວາມຈິບຫາຍດ້ວຍຕາຂອງໂຕເອງແລະຂໍໃຫ້ລາວເຈິຄວາມໃຈຮ້າຍຂອງຜູ້ມີລິດເດດສູງສຸດ.+
21 ເພາະຖ້າລາວຕາຍກ່ອນໄວລາວຊິບໍ່ສົນໃຈວ່າລູກຫຼານຂອງລາວຊິເປັນແນວໃດ?+
22 ໃຜຊິສອນ*ພະເຈົ້າໄດ້+ຍ້ອນເພິ່ນຕັດສິນແມ່ນແຕ່ພວກທີ່ມີຕຳແໜ່ງສູງສຸດ?+
23 ມີຄົນໜຶ່ງຕາຍໄປຕອນທີ່ຍັງມີເຫື່ອມີແຮງຢູ່*+ແລະຕອນທີ່ຊີວິດຂອງລາວສຸກສະບາຍ+
24 ຕອນທີ່ຂາໂຕ້ຂອງລາວໃຫຍ່ໆຕຸ້ຍໆແລະກະດູກຂອງລາວກໍຍັງແຂງແຮງ.
25 ແຕ່ມີອີກຄົນໜຶ່ງທີ່ມີຊີວິດທຸກທໍລະມານຈົນຮອດມື້ຕາຍແລະບໍ່ເຄີຍໄດ້ກິນແນວແຊບໆເລີຍ.
26 ເຂົາເຈົ້າທັງສອງຄົນຊິກັບໄປເປັນດິນ+ແລະສົບຂອງເຂົາເຈົ້າກໍຊິຖືກໂຕໜອນຈຶ.+
27 ຂ້ອຍຮູ້ດີວ່າພວກເຈົ້າຄິດຫຍັງຢູ່ແລະຂ້ອຍຮູ້ເດີ້ວ່າພວກເຈົ້າກຳລັງວາງແຜນຊົ່ວໃສ່ຂ້ອຍ.*+
28 ເພາະພວກເຈົ້າເວົ້າວ່າ ‘ເຮືອນຂອງຄົນສຳຄັນຢູ່ໃສແລະເຕັ້ນຂອງຄົນຊົ່ວໄປໃສແລ້ວ?’+
29 ພວກເຈົ້າບໍ່ເຄີຍຖາມພວກຄົນເດີນທາງບໍ?
ພວກເຈົ້າບໍ່ເຄີຍຕັ້ງໃຈຟັງເລື່ອງທີ່ເຂົາເຈົ້າເລົ່າບໍວ່າ
30 ເມື່ອຮອດມື້ຊິຖືກທຳລາຍ ຄົນຊົ່ວກໍລອດແລະເມື່ອຮອດມື້ຊິຈິບຫາຍ ເຂົາເຈົ້າກໍບໍ່ເປັນຫຍັງ?
31 ໃຜຊິບອກລາວວ່າລາວເຮັດບໍ່ຖືກແລະໃຜຊິລົງໂທດລາວຍ້ອນສິ່ງທີ່ລາວເຮັດ?
32 ເມື່ອສົບຂອງລາວຖືກຝັງແລ້ວກໍຍັງມີຄົນໄປເຝົ້າບ່ອນນັ້ນ
33 ແລະດິນທີ່ຖົມລາວກໍເບົາສະບາຍ.*+ຄົນທີ່ຕາຍກ່ອນລາວກໍເປັນຄືກັບລາວ+ແລະຄົນທີ່ຕາຍນຳຫຼັງລາວກໍຊິເປັນຄືກັນ.*
34 ເປັນຫຍັງພວກເຈົ້າໃຫ້ກຳລັງໃຈຂ້ອຍແບບນີ້?
ມັນບໍ່ມີປະໂຫຍດຫຍັງເລີຍ.+ ພວກເຈົ້າເວົ້າແຕ່ເລື່ອງຂີ້ຕົວະ!”
ຂໍ
^ ຫຼື “ມີອຳນາດຂຶ້ນເລື້ອຍໆ”
^ ກອງນ້ອຍທີ່ມີແສ່ງຕິດນຳ
^ ຫຼື “ລົງໄປຂຸມຝັງສົບ.” ເບິ່ງສ່ວນອະທິບາຍຄຳສັບ.
^ ຫຼື “ວາງແຜນ”
^ ຫຼື “ໃຫ້ຄວາມຮູ້”
^ ແປຕາມໂຕວ່າ “ໄຂກະດູກຊຸ່ມຊື່ນ”
^ ຫຼືອາດແປວ່າ “ທຳຮ້າຍຂ້ອຍ”
^ ແປຕາມໂຕວ່າ “ຫວານ”
^ ແປຕາມໂຕວ່າ “ແລະລາວຈະລາກທຸກຄົນໄປນຳຫຼັງລາວ”
