ໂຢບ 40:1-24
40 ພະເຢໂຫວາເວົ້າກັບໂຢບຕໍ່ໄປວ່າ:
2 “ມີຜູ້ໃດຢາກລອງຈັບຜິດຜູ້ມີລິດເດດສູງສຸດບໍ?+
ຖ້າມີ ຜູ້ໃດຢາກຈະຕຳໜິພະເຈົ້າກໍຕອບມາໂລດ.”+
3 ໂຢບຕອບພະເຢໂຫວາວ່າ:
4 “ລູກບໍ່ໄດ້ສຳຄັນອີ່ຫຍັງ.+
ລູກບໍ່ກ້າຕອບພະອົງດອກ.
ລູກມີແຕ່ຈະເອົາມືອັດປາກໂຕເອງໄວ້.+
5 ລູກເວົ້າໄປເທື່ອໜຶ່ງແລ້ວ ລູກຈະຂໍບໍ່ເວົ້າອີກ.ທີ່ຈິງ ລູກເວົ້າໄປສອງເທື່ອຊ້ຳ ລູກຈະບໍ່ເວົ້າອີກແລ້ວ.”
6 ແລ້ວພະເຢໂຫວາກໍຕອບໂຢບຈາກລົມພາຍຸວ່າ:+
7 “ກຽມໂຕໃຫ້ພ້ອມ ໃຫ້ສົມກັບເປັນລູກຜູ້ຊາຍ.ເຮົາຈະຖາມເຈົ້າແລະໃຫ້ເຈົ້າຕອບເຮົາ.+
8 ເຈົ້າຈະບອກວ່າເຮົາບໍ່ຍຸຕິທຳບໍ?*
ເຈົ້າຈະຕຳໜິເຮົາເພື່ອຈະບອກວ່າເຈົ້າເປັນຝ່າຍຖືກບໍ?+
9 ແຂນຂອງເຈົ້າມີແຮງຫຼາຍຄືກັບແຂນຂອງພະເຈົ້າທ່ຽງແທ້ບໍ?+ສຽງຂອງເຈົ້າດັງຄືກັບສຽງຂອງພະເຈົ້າທີ່ດັງສ່ຳກັບສຽງຟ້າຮ້ອງບໍ?+
10 ໃຫ້ເຈົ້າພິສູດເບິ່ງວ່າເຈົ້າແຂງແຮງແລະມີກຳລັງຫຼາຍແລະສະແດງໃຫ້ເຮົາເຫັນເບິ່ງວ່າເຈົ້າຍິ່ງໃຫຍ່ແລະສົມຄວນໄດ້ຮັບກຽດ.
11 ໃຫ້ປົດປ່ອຍຄວາມໃຈຮ້າຍຂອງເຈົ້າອອກມາແລ້ວແນມເບິ່ງຄົນທີ່ຍິ່ງຈອງຫອງແລະເຮັດໃຫ້ເຂົາເຈົ້າຕົກຕ່ຳ.
12 ໃຫ້ແນມເບິ່ງຄົນທີ່ຍິ່ງຈອງຫອງແລ້ວເຮັດໃຫ້ເຂົາເຈົ້າຕ່ຳຕ້ອຍແລະຢຽບຄົນຊົ່ວຈົນມຸ່ນໃນບ່ອນທີ່ເຂົາເຈົ້າຢູ່.
13 ໃຫ້ເອົາດິນຖົມເຂົາເຈົ້າໄວ້ແລະມັດເຂົາເຈົ້າ*ໄວ້ໃນຂຸມຝັງສົບ.
14 ຖ້າເຈົ້າເຮັດໄດ້ແນວນີ້ ເຮົາກໍຈະຊົມເຊີຍເຈົ້າວ່າເຈົ້າໃຊ້ເຫື່ອໃຊ້ແຮງຂອງເຈົ້າປົກປ້ອງໂຕເອງໄດ້.
15 ບັດນີ້ ໃຫ້ມາຟັງເລື່ອງຂອງໂຕເບເຫໂມດ*ທີ່ເຮົາສ້າງມັນຂຶ້ນມາຄືກັບສ້າງເຈົ້າ.
ມັນກິນຫຍ້າຄືກັບງົວ.
16 ໃຫ້ເບິ່ງສະໂພກທີ່ມີແຮງຫຼາຍໆແລະກ້າມທ້ອງທີ່ແຂງແຮງຂອງມັນແມ້!
17 ຫາງຂອງມັນຊື່ແລະແຂງຄືຕົ້ນຊີດ້າ.*ເອັນກົກຂາຂອງມັນກໍຖັກເຂົ້າກັນ.
18 ກະດູກຂອງມັນເປັນຄືກັບທອງແດງແລະຂາຂອງມັນເປັນຄືກັບເຫຼັກ.
19 ມັນເປັນຜົນງານທີ່ດີທີ່ສຸດ*ຢ່າງໜຶ່ງຂອງພະເຈົ້າ.ມີແຕ່ຜູ້ສ້າງມັນເທົ່ານັ້ນທີ່ຂ້າມັນໄດ້.
20 ພູຕ່າງໆມີອາຫານໃຫ້ມັນແລະຢູ່ຫັ້ນກໍມີສັດປ່າແລ່ນຫຼິ້ນ.
21 ມັນນອນຢູ່ກ້ອງຟຸ່ມໜາມແລະມັນລີ້ຢູ່ກ້ອງຕົ້ນອໍ້ໃນໜອງນ້ຳ.
22 ຟຸ່ມໜາມເປັນຮົ່ມໃຫ້ມັນແລະຕົ້ນໄມ້*ຈາກຮ່ອມພູ*ກໍຢູ່ອ້ອມຮອບມັນ.
23 ເຖິງວ່ານ້ຳຈະໄຫຼແຮງ ແຕ່ມັນກໍບໍ່ຕົກໃຈ.
ເຖິງວ່າແມ່ນ້ຳຈໍແດນ+ໄຫຼຊັດໃສ່ໜ້າມັນ ແຕ່ມັນກໍຢູ່ໄດ້ສະບາຍໆ.
24 ຖ້າມັນແນມເບິ່ງຢູ່ ໃຜຈະຈັບມັນໄດ້ແລະໃຜຈະເອົາຂໍເກາະໄປເກາະດັງມັນໄດ້?”
ຂໍ
^ ຫຼື “ເຈົ້າຈະລົບລ້າງຄວາມຍຸຕິທຳຂອງເຮົາບໍ?”
^ ແປຕາມໂຕວ່າ “ໜ້າຂອງເຂົາເຈົ້າ”
^ ອາດໝາຍເຖິງຊ້າງນ້ຳ
^ ຕົ້ນແປກຊະນິດໜຶ່ງ
^ ແປຕາມໂຕວ່າ “ຜົນງານທຳອິດ”
^ ໃນພາສາເຮັບເຣີໝາຍເຖິງຕົ້ນໄມ້ທີ່ພົບເຫັນໄດ້ທົ່ວໄປຢູ່ແຄມແມ່ນ້ຳ. ໃນພາສາອັງກິດແມ່ນພ໋ອບລາ.
^ ຫຼື “ວາດີ.” ເບິ່ງສ່ວນອະທິບາຍຄຳສັບ.
