ຈົດໝາຍເຖິງຄລິດສະຕຽນໃນເມືອງໂຣມ 5:1-21
5 ດັ່ງນັ້ນ ເມື່ອພະເຈົ້າຍອມຮັບພວກເຮົາແລ້ວຍ້ອນພວກເຮົາມີຄວາມເຊື່ອ+ ພວກເຮົາຈຶ່ງສາມາດມີສາຍສຳພັນທີ່ດີ*ກັບພະເຈົ້າໄດ້ໂດຍທາງພະເຢຊູຄລິດຜູ້ເປັນນາຍຂອງພວກເຮົາ.+
2 ຍ້ອນພວກເຮົາເຊື່ອໃນພະເຢຊູ ພວກເຮົາຈຶ່ງເຂົ້າຫາພະເຈົ້າໄດ້ແລະໄດ້ຮັບຄວາມກະລຸນາທີ່ຍິ່ງໃຫຍ່ຈາກເພິ່ນ.+ ພວກເຮົາມີຄວາມສຸກຍ້ອນມີຄວາມຫວັງວ່າພະເຈົ້າຈະແຕ່ງຕັ້ງພວກເຮົາໃຫ້ມີຕຳແໜ່ງທີ່ສູງ.
3 ພວກເຮົາມີຄວາມສຸກໄດ້ເຖິງວ່າຈະເຈິຄວາມທຸກລຳບາກ+ ຍ້ອນພວກເຮົາຮູ້ວ່າຄວາມທຸກລຳບາກຝຶກພວກເຮົາໃຫ້ມີຄວາມອົດທົນ.+
4 ເມື່ອພວກເຮົາມີຄວາມອົດທົນກໍເຮັດໃຫ້ພະເຈົ້າພໍໃຈ.+ ເມື່ອພະເຈົ້າພໍໃຈກໍເຮັດໃຫ້ພວກເຮົາມີຄວາມຫວັງ+
5 ແລະພວກເຮົາໝັ້ນໃຈວ່າຄວາມຫວັງນັ້ນຈະເປັນຈິງແນ່ນອນ.+ ພວກເຮົາໝັ້ນໃຈໄດ້ແບບນີ້ກໍຍ້ອນພະເຈົ້າໃຫ້ພະລັງບໍລິສຸດຂອງເພິ່ນກັບພວກເຮົາເພື່ອສະແດງວ່າເພິ່ນຮັກພວກເຮົາຫຼາຍ.+
6 ທີ່ຈິງ ຕອນທີ່ພວກເຮົາຍັງມີບາບ*+ ພະຄລິດມາຕາຍເພື່ອຄົນແບບພວກເຮົາຕາມເວລາທີ່ພະເຈົ້າກຳນົດໄວ້.
7 ມີໜ້ອຍຄົນແທ້ໆທີ່ຕາຍແທນຄົນທີ່ເຮັດສິ່ງທີ່ຖືກຕ້ອງຊື່ໆ ແລະອາດຈະມີບາງຄົນຍອມຕາຍແທນຄົນດີ.
8 ແຕ່ພະເຈົ້າສະແດງຄວາມຮັກຕໍ່ພວກເຮົາ ໂດຍໃຫ້ພະຄລິດມາຕາຍແທນພວກເຮົາທັງໆທີ່ພວກເຮົາຍັງເປັນຄົນບາບຢູ່.+
9 ຕອນນີ້ຍ້ອນພະເຈົ້າຍອມຮັບພວກເຮົາແລ້ວດ້ວຍເລືອດຂອງພະຄລິດ+ ພວກເຮົາກໍແຮ່ງໝັ້ນໃຈວ່າຈະລອດຈາກຄວາມໃຈຮ້າຍຂອງພະເຈົ້າໄດ້ແທ້ໆ.+
10 ແມ່ນແຕ່ຕອນທີ່ພວກເຮົາເປັນສັດຕູກັບພະເຈົ້າ ການຕາຍຂອງລູກຊາຍເພິ່ນຍັງເຮັດໃຫ້ພວກເຮົາເປັນໝູ່*ກັບເພິ່ນໄດ້.+ ຍ້ອນພວກເຮົາໄດ້ເປັນໝູ່ກັບພະເຈົ້າແລ້ວ ພວກເຮົາຈະລອດແນ່ນອນໂດຍທາງຊີວິດຂອງພະເຢຊູ.
11 ພວກເຮົາມີຄວາມສຸກຍ້ອນໄດ້ເປັນໝູ່ກັບພະເຈົ້າ ເຊິ່ງເປັນໄປໄດ້ໂດຍທາງພະເຢຊູຄລິດຜູ້ເປັນນາຍຂອງພວກເຮົາ. ເພິ່ນເປີດໂອກາດໃຫ້ພວກເຮົາໄດ້ຄືນດີກັບພະເຈົ້າແລ້ວ.+
12 ບາບໄດ້ເຂົ້າມາໃນໂລກຍ້ອນຄົນຜູ້ດຽວ ແລະຄວາມຕາຍກໍເກີດຂຶ້ນຍ້ອນບາບນັ້ນ+ ແລ້ວຄວາມຕາຍຈຶ່ງລາມໄປຮອດທຸກຄົນຍ້ອນທຸກຄົນເປັນຄົນບາບ.+
13 ບາບມີຢູ່ໃນໂລກກ່ອນທີ່ຈະມີກົດໝາຍຂອງໂມເຊ ແຕ່ຕອນທີ່ບໍ່ມີກົດໝາຍກໍບໍ່ມີຜູ້ໃດຖືກຕັດສິນວ່າເປັນຄົນບາບ.+
14 ຄວາມຕາຍມີອຳນາດຄືກັບກະສັດເໜືອທຸກຄົນຕັ້ງແຕ່ອາດາມຈົນຮອດໂມເຊ. ມັນມີອຳນາດເໜືອທຸກຄົນເຖິງວ່າເຂົາເຈົ້າບໍ່ໄດ້ເຮັດຜິດຄືອາດາມ. ອາດາມມີບາງສິ່ງທີ່ຄ້າຍຄືກັບຜູ້ທີ່ມານຳຫຼັງ.+
15 ແຕ່ຂອງຂວັນຈາກພະເຈົ້າໃຫ້ຜົນຕ່າງຈາກການເຮັດຜິດຂອງອາດາມ. ການເຮັດຜິດຂອງຄົນຜູ້ດຽວເຮັດໃຫ້ຄົນຈຳນວນຫຼາຍຕ້ອງຕາຍ ແຕ່ຄວາມກະລຸນາທີ່ຍິ່ງໃຫຍ່ຂອງພະເຈົ້າແລະຂອງຂວັນທີ່ເພິ່ນໃຫ້ໂດຍທາງຄວາມກະລຸນາຂອງພະເຢຊູຄລິດຍິ່ງໃຫຍ່ກວ່ານັ້ນຫຼາຍ.+ ໂດຍທາງຂອງຂວັນນີ້ ພະເຈົ້າເຮັດໃຫ້ຫຼາຍຄົນໄດ້ຮັບພອນຕ່າງໆ.+
16 ຂອງຂວັນນັ້ນໃຫ້ຜົນຕ່າງຈາກການເຮັດຜິດຂອງອາດາມໃນອີກເລື່ອງໜຶ່ງນຳ.+ ການເຮັດຜິດແຕ່ເທື່ອດຽວເຮັດໃຫ້ມີການຕັດສິນລົງໂທດ+ ແຕ່ຂອງຂວັນນັ້ນເຮັດໃຫ້ພະເຈົ້າຍອມຮັບຄົນເຮົາໄດ້ທັງໆທີ່ເຮັດຜິດຫຼາຍເທື່ອ.+
17 ຄວາມຕາຍມີອຳນາດຄືກັບກະສັດຍ້ອນການເຮັດຜິດຂອງຄົນຜູ້ດຽວ.+ ແຕ່ພວກເຮົາໝັ້ນໃຈໄດ້ແທ້ໆວ່າຈະມີຄົນໄດ້ຊີວິດແລະປົກຄອງເປັນກະສັດ+ຍ້ອນຄົນຜູ້ດຽວ ຜູ້ນັ້ນແມ່ນພະເຢຊູຄລິດ.+ ເຂົາເຈົ້າໄດ້ຮັບປະໂຫຍດຈາກຄວາມກະລຸນາທີ່ຍິ່ງໃຫຍ່ຂອງພະເຈົ້າແລະຈາກຂອງຂວັນທີ່ເຮັດໃຫ້ພະເຈົ້າຍອມຮັບເຂົາເຈົ້າ.+
18 ດັ່ງນັ້ນ ຄືກັບທີ່ການເຮັດຜິດແຕ່ເທື່ອດຽວເຮັດໃຫ້ຄົນທຸກປະເພດຖືກຕັດສິນລົງໂທດ+ ການພິສູດຄວາມສັດຊື່ແຕ່ເທື່ອດຽວກໍເຮັດໃຫ້ພະເຈົ້າຍອມຮັບຄົນທຸກປະເພດໄດ້+ ແລະຍ້ອນແນວນັ້ນເຂົາເຈົ້າຈຶ່ງໄດ້ຊີວິດ.+
19 ຄືກັບທີ່ຫຼາຍຄົນຕ້ອງກາຍເປັນຄົນບາບຍ້ອນຄົນຜູ້ດຽວບໍ່ເຊື່ອຟັງ+ ພະເຈົ້າກໍຍອມຮັບຫຼາຍຄົນໄດ້ຍ້ອນຄົນຜູ້ດຽວເຊື່ອຟັງ.+
20 ພະເຈົ້າໃຫ້ມີກົດໝາຍຂອງໂມເຊກໍເພື່ອເຮັດໃຫ້ບາບຂອງຄົນເຮົາເຫັນໄດ້ແຈ້ງຂຶ້ນ+ ແລະເມື່ອບາບເຫັນໄດ້ແຈ້ງຂຶ້ນ ຄວາມກະລຸນາທີ່ຍິ່ງໃຫຍ່ກໍແຮ່ງເຫັນໄດ້ແຈ້ງຂຶ້ນຕື່ມອີກ.
21 ບາບແລະຄວາມຕາຍເຄີຍມີອຳນາດປົກຄອງຄືກັບກະສັດ+ ແຕ່ຕອນນີ້ຄວາມກະລຸນາທີ່ຍິ່ງໃຫຍ່ຂອງພະເຈົ້າມີອຳນາດປົກຄອງຄືກັບກະສັດ. ຍ້ອນຄວາມກະລຸນານີ້ ພະເຈົ້າຈຶ່ງຍອມຮັບພວກເຮົາໄດ້ ແລະພວກເຮົາຈະໄດ້ຊີວິດຕະຫຼອດໄປໂດຍທາງພະເຢຊູຄລິດຜູ້ເປັນນາຍຂອງພວກເຮົາ.+
