ຈົດໝາຍເຖິງຄລິດສະຕຽນໃນເມືອງໂຣມ 7:1-25
7 ພີ່ນ້ອງເອີ້ຍ ຕອນນີ້ຂ້ອຍຈະເວົ້າກັບຄົນທີ່ຮູ້ເລື່ອງກົດໝາຍ. ພວກເຈົ້າບໍ່ຮູ້ບໍວ່າກົດໝາຍຂອງໂມເຊມີອຳນາດເໜືອຄົນເຮົາສະເພາະຕອນທີ່ຍັງມີຊີວິດຢູ່?
2 ຕົວຢ່າງເຊັ່ນ: ຜູ້ຍິງທີ່ແຕ່ງດອງແລ້ວມີຂໍ້ຜູກມັດທາງກົດໝາຍຕອນທີ່ຜົວຍັງມີຊີວິດຢູ່ ແຕ່ຖ້າຜົວຕາຍແລ້ວ ລາວກໍພົ້ນຈາກກົດຂອງຜົວ.+
3 ດັ່ງນັ້ນ ຕອນທີ່ຜົວຍັງມີຊີວິດຢູ່ ຖ້າລາວແຕ່ງດອງກັບຜູ້ຊາຍຄົນອື່ນ ລາວກໍມີຊູ້.+ ແຕ່ຖ້າຜົວຕາຍ ລາວກໍພົ້ນຈາກກົດຂອງຜົວ ແລະຖ້າລາວແຕ່ງດອງກັບຜູ້ຊາຍຄົນອື່ນ ລາວກໍບໍ່ໄດ້ມີຊູ້.+
4 ພີ່ນ້ອງເອີ້ຍ ພວກເຈົ້າພົ້ນຈາກກົດໝາຍຂອງໂມເຊ*ແລ້ວ ຍ້ອນພະຄລິດສະລະຮ່າງກາຍເປັນເຄື່ອງບູຊາ. ເລື່ອງນີ້ເກີດຂຶ້ນເພື່ອພວກເຈົ້າຈະໄດ້ເປັນຄົນຂອງພະຄລິດ+ຜູ້ທີ່ຄືນມາຈາກຕາຍ.+ ບັດນີ້ ພວກເຮົາເຮັດສິ່ງທີ່ພະເຈົ້າພໍໃຈໄດ້.+
5 ຕອນທີ່ພວກເຮົາໃຊ້ຊີວິດຕາມຄວາມຕ້ອງການຂອງຮ່າງກາຍ ຄວາມຕ້ອງການທີ່ຊົ່ວທີ່ມີຢູ່ໃນໂຕພວກເຮົາກໍກະຕຸ້ນພວກເຮົາໃຫ້ເຮັດສິ່ງທີ່ພາໄປສູ່ຄວາມຕາຍ. ຄວາມຕ້ອງການນັ້ນເຫັນໄດ້ແຈ້ງຂຶ້ນຍ້ອນກົດໝາຍຂອງໂມເຊ.+
6 ແຕ່ດຽວນີ້ພວກເຮົາບໍ່ໄດ້ຢູ່ໃຕ້ກົດໝາຍນັ້ນ+ ຍ້ອນກົດໝາຍນັ້ນບໍ່ມີອຳນາດຄວບຄຸມພວກເຮົາແລ້ວ. ດັ່ງນັ້ນ ພວກເຮົາເປັນທາດພະເຈົ້າບໍ່ແມ່ນຍ້ອນກົດໝາຍຂອງໂມເຊຊີ້ນຳ+ ແຕ່ຍ້ອນພະລັງຂອງພະເຈົ້າຊີ້ນຳ.+
7 ພວກເຮົາກຳລັງເວົ້າວ່າກົດໝາຍຂອງໂມເຊບົກພ່ອງ*ບໍ? ບໍ່ແມ່ນ! ທີ່ຈິງ ຖ້າບໍ່ມີກົດໝາຍນັ້ນ ຂ້ອຍຄືຊິບໍ່ຮູ້ວ່າບາບແມ່ນຫຍັງ.+ ຕົວຢ່າງເຊັ່ນ: ຖ້າກົດໝາຍນັ້ນບໍ່ໄດ້ສັ່ງວ່າ: “ຢ່າໂລບ” ຂ້ອຍກໍຄືຊິບໍ່ຮູ້ວ່າຄວາມໂລບເປັນສິ່ງທີ່ຜິດ.+
8 ແຕ່ບາບກໍສວຍໂອກາດຈາກກົດໝາຍຂອງໂມເຊເພື່ອເຮັດໃຫ້ຂ້ອຍມີຄວາມຕ້ອງການທີ່ເຫັນແກ່ໂຕທຸກຮູບແບບ. ທີ່ຈິງ ຖ້າບໍ່ມີກົດໝາຍ ບາບກໍເຮັດຫຍັງບໍ່ໄດ້.+
9 ຕອນທີ່ຍັງບໍ່ມີກົດໝາຍຂອງໂມເຊ ຂ້ອຍກໍມີຊີວິດຢູ່ ແຕ່ເມື່ອມີກົດໝາຍນັ້ນ ຂ້ອຍກໍຮູ້ວ່າຂ້ອຍເປັນຄົນບາບແລະຕ້ອງຕາຍ.+
10 ກົດໝາຍນັ້ນຄວນຈະຊ່ວຍຂ້ອຍໃຫ້ມີຊີວິດ+ ແຕ່ພັດເຮັດໃຫ້ຂ້ອຍຮູ້ວ່າຂ້ອຍຕ້ອງຕາຍ.
11 ບາບສວຍໂອກາດຈາກກົດໝາຍນັ້ນເພື່ອພາຂ້ອຍເຮັດຜິດແລະຂ້າຂ້ອຍ.
12 ທີ່ຈິງແລ້ວ ກົດໝາຍຂອງໂມເຊບໍລິສຸດ ຍຸຕິທຳ ແລະດີ.+
13 ຖ້າເປັນແນວນັ້ນ ສິ່ງທີ່ດີເຮັດໃຫ້ຂ້ອຍຕ້ອງຕາຍບໍ? ບໍ່ແມ່ນ! ແຕ່ແມ່ນບາບທີ່ເຮັດໃຫ້ຂ້ອຍຕ້ອງຕາຍ.+ ກົດໝາຍນັ້ນດີ ແຕ່ມັນເຮັດໃຫ້ເຫັນແຈ້ງວ່າແມ່ນບາບທີ່ເຮັດໃຫ້ຂ້ອຍຕ້ອງຕາຍ. ກົດໝາຍຂອງໂມເຊເຮັດໃຫ້ຮູ້ວ່າບາບຊົ່ວຮ້າຍຫຼາຍສ່ຳໃດ.+
14 ພວກເຮົາຮູ້ວ່າກົດໝາຍຂອງໂມເຊມາຈາກພະເຈົ້າ ແຕ່ບັນຫາມັນເປັນຍ້ອນຂ້ອຍ ເພາະຂ້ອຍເປັນຄົນບາບທີ່ຖືກຂາຍໃຫ້ເປັນທາດຂອງບາບ.+
15 ຂ້ອຍບໍ່ເຂົ້າໃຈໂຕເອງວ່າກຳລັງເຮັດຫຍັງຢູ່. ແນວດີໆທີ່ຂ້ອຍຢາກເຮັດ ຂ້ອຍກໍບໍ່ເຮັດ ແຕ່ຂ້ອຍພັດໄປເຮັດແນວທີ່ຂ້ອຍຊັງ.
16 ຂ້ອຍຍອມຮັບວ່າກົດໝາຍຂອງໂມເຊນັ້ນດີ ແຕ່ຂ້ອຍຍັງເຮັດແນວທີ່ຂ້ອຍບໍ່ຢາກເຮັດ.
17 ດັ່ງນັ້ນ ບໍ່ແມ່ນຂ້ອຍທີ່ເປັນຜູ້ເຮັດສິ່ງເຫຼົ່ານີ້ ແຕ່ແມ່ນບາບທີ່ຢູ່ໃນໂຕຂ້ອຍເປັນຜູ້ເຮັດ.+
18 ຂ້ອຍຮູ້ວ່າໃນໂຕຂ້ອຍທີ່ເປັນຄົນບາບນັ້ນບໍ່ມີຫຍັງດີເລີຍ. ຂ້ອຍຢາກເຮັດດີ ແຕ່ກໍເຮັດບໍ່ໄດ້ຄືກັບທີ່ຢາກເຮັດ.+
19 ແນວດີໆທີ່ຂ້ອຍຢາກເຮັດ ຂ້ອຍພັດບໍ່ເຮັດ ແຕ່ແນວຊົ່ວໆທີ່ຂ້ອຍບໍ່ຢາກເຮັດ ຂ້ອຍພັດເຮັດເລື້ອຍໆ.
20 ດັ່ງນັ້ນ ຖ້າຂ້ອຍເຮັດແນວທີ່ຂ້ອຍບໍ່ຢາກເຮັດ ສະແດງວ່າບໍ່ແມ່ນໂຕຂ້ອຍເປັນຄົນເຮັດ ແຕ່ແມ່ນບາບທີ່ຢູ່ໃນໂຕຂ້ອຍທີ່ເຮັດ.
21 ຂ້ອຍເຫັນວ່າມີກົດຂໍ້ໜຶ່ງຢູ່ໃນໂຕຂ້ອຍ. ກົດນັ້ນແມ່ນ ເມື່ອຂ້ອຍຢາກເຮັດແນວທີ່ຖືກຕ້ອງ ຂ້ອຍພັດຢາກເຮັດແນວທີ່ຊົ່ວນຳ.+
22 ທີ່ຈິງແລ້ວ ໃຈຂ້ອຍມັກກົດໝາຍຂອງພະເຈົ້າຫຼາຍແທ້ໆ+
23 ແຕ່ຂ້ອຍເຫັນກົດອີກຢ່າງໜຶ່ງໃນຮ່າງກາຍທີ່ຕໍ່ສູ້ກັບກົດໃນໃຈຂ້ອຍ+ ແລະເຮັດໃຫ້ຂ້ອຍຕົກຢູ່ໃຕ້ກົດຂອງບາບ+ທີ່ຢູ່ໃນຮ່າງກາຍຂ້ອຍ.
24 ຈັ່ງແມ່ນຂ້ອຍສົມເພດໂຕເອງເດ້ ຜູ້ໃດຈະຊ່ວຍຂ້ອຍໃຫ້ພົ້ນຈາກຮ່າງກາຍທີ່ຕ້ອງຕາຍນີ້?
25 ຂ້ອຍຂອບໃຈພະເຈົ້າໂດຍທາງພະເຢຊູຄລິດຜູ້ເປັນນາຍຂອງພວກເຮົາ. ໃຈຂ້ອຍເປັນທາດກົດໝາຍຂອງພະເຈົ້າ ແຕ່ຮ່າງກາຍຂ້ອຍເປັນທາດກົດຂອງບາບ.+
