ຈົດໝາຍເຖິງຄລິດສະຕຽນໃນເມືອງໂຣມ 8:1-39
-
ພະລັງຂອງພະເຈົ້າເຮັດໃຫ້ມີຊີວິດແລະເປັນອິດສະຫຼະ (1-11)
-
ພະລັງຂອງພະເຈົ້າຢືນຢັນວ່າເປັນລູກຂອງເພິ່ນ (12-17)
-
ສິ່ງທີ່ພະເຈົ້າສ້າງລໍຖ້າຈະມີອິດສະຫຼະແບບທີ່ລູກຂອງເພິ່ນມີ (18-25)
-
“ພະລັງຂອງພະເຈົ້າຈະຂໍແທນພວກເຮົາ” (26, 27)
-
ພະເຈົ້າກຳນົດຄົນກຸ່ມໜຶ່ງໄວ້ລ່ວງໜ້າ (28-30)
-
ຄວາມຮັກຂອງພະເຈົ້າເຮັດໃຫ້ພວກເຮົາຊະນະ (31-39)
8 ດັ່ງນັ້ນ ຜູ້ທີ່ເປັນອັນໜຶ່ງອັນດຽວກັບພະຄລິດເຢຊູຈະບໍ່ຖືກຕັດສິນລົງໂທດ.
2 ກົດຂອງພະລັງຂອງພະເຈົ້າທີ່ໃຫ້ຊີວິດເຮັດໃຫ້ພວກເຈົ້າທີ່ເປັນຜູ້ຕິດຕາມພະຄລິດເຢຊູຫຼຸດພົ້ນ+ຈາກກົດຂອງບາບແລະຄວາມຕາຍແລ້ວ.
3 ສິ່ງທີ່ກົດໝາຍຂອງໂມເຊເຮັດບໍ່ໄດ້+ຍ້ອນຄວາມບໍ່ສົມບູນແບບ+ຂອງມະນຸດນັ້ນ ພະເຈົ້າໄດ້ເຮັດແລ້ວໂດຍສົ່ງລູກຊາຍຂອງເພິ່ນ+ມາໃນສະພາບຄືກັບມະນຸດ+ທີ່ມີບາບເພື່ອກຳຈັດບາບ. ພະເຈົ້າໄດ້ຕັດສິນລົງໂທດບາບທີ່ຢູ່ໃນຮ່າງກາຍມະນຸດ.
4 ພວກເຮົາຈຶ່ງເຮັດສິ່ງທີ່ດີແລະຖືກຕ້ອງແບບທີ່ກົດໝາຍຂອງໂມເຊຮຽກຮ້ອງໄດ້+ ໂດຍການໃຊ້ຊີວິດຕາມທີ່ພະລັງຂອງພະເຈົ້າຊີ້ນຳ ບໍ່ແມ່ນຕາມຄວາມຕ້ອງການຂອງຮ່າງກາຍ.+
5 ຄົນທີ່ໃຊ້ຊີວິດຕາມຄວາມຕ້ອງການຂອງຮ່າງກາຍກໍມີແຕ່ຄິດເຖິງສິ່ງທີ່ຮ່າງກາຍຢາກເຮັດ+ ແຕ່ຄົນທີ່ໃຊ້ຊີວິດຕາມທີ່ພະລັງຂອງພະເຈົ້າຊີ້ນຳກໍສົນໃຈແຕ່ສິ່ງທີ່ພະລັງນັ້ນຢາກໃຫ້ເຮັດ.+
6 ການສົນໃຈແຕ່ຄວາມຕ້ອງການຂອງຮ່າງກາຍຈະຈົບລົງດ້ວຍຄວາມຕາຍ+ ແຕ່ການສົນໃຈແຕ່ເລື່ອງກ່ຽວກັບພະລັງຂອງພະເຈົ້າຈະເຮັດໃຫ້ໄດ້ຊີວິດແລະສັນຕິສຸກ.+
7 ຄົນທີ່ສົນໃຈແຕ່ຄວາມຕ້ອງການຂອງຮ່າງກາຍກໍເປັນສັດຕູກັບພະເຈົ້າ+ ຍ້ອນເຂົາເຈົ້າບໍ່ເຊື່ອຟັງກົດໝາຍຂອງພະເຈົ້າ. ທີ່ຈິງແລ້ວ ເຂົາເຈົ້າຈະບໍ່ມີທາງເຊື່ອຟັງໄດ້ເລີຍ.
8 ດັ່ງນັ້ນ ຄົນທີ່ໃຊ້ຊີວິດຕາມຄວາມຕ້ອງການຂອງຮ່າງກາຍຈຶ່ງເຮັດໃຫ້ພະເຈົ້າພໍໃຈບໍ່ໄດ້.
9 ຖ້າພະລັງຂອງພະເຈົ້າຢູ່ໃນໂຕພວກເຈົ້າແທ້ໆ ພວກເຈົ້າກໍຈະໃຊ້ຊີວິດຕາມທີ່ພະລັງນັ້ນຊີ້ນຳ+ ບໍ່ແມ່ນຕາມຄວາມຕ້ອງການຂອງຮ່າງກາຍ. ແຕ່ຖ້າຜູ້ໃດບໍ່ມີຄວາມຄິດແບບພະຄລິດ ຜູ້ນັ້ນກໍບໍ່ແມ່ນຄົນຂອງເພິ່ນ.
10 ຖ້າພວກເຈົ້າເປັນອັນໜຶ່ງອັນດຽວກັບພະຄລິດ+ ເຖິງວ່າຮ່າງກາຍຂອງພວກເຈົ້າຈະຕາຍໄປຍ້ອນບາບ ແຕ່ພະລັງຂອງພະເຈົ້າກໍຈະເຮັດໃຫ້ພວກເຈົ້າມີຊີວິດຍ້ອນພະເຈົ້າຍອມຮັບພວກເຈົ້າ.
11 ພະເຈົ້າໃຊ້ພະລັງຂອງເພິ່ນປຸກພະຄລິດເຢຊູໃຫ້ຄືນມາຈາກຕາຍ.+ ຖ້າພະລັງນັ້ນຢູ່ໃນໂຕພວກເຈົ້າ ເພິ່ນກໍຈະໃຊ້ພະລັງດຽວກັນນັ້ນເພື່ອເຮັດໃຫ້ພວກເຈົ້າມີຊີວິດອີກ.*+
12 ດັ່ງນັ້ນ ພີ່ນ້ອງເອີ້ຍ ພວກເຮົາຕ້ອງບໍ່ໃຊ້ຊີວິດຕາມຄວາມຕ້ອງການຂອງຮ່າງກາຍ.+
13 ຖ້າພວກເຈົ້າໃຊ້ຊີວິດຕາມຄວາມຕ້ອງການຂອງຮ່າງກາຍ ພວກເຈົ້າຈະຕາຍແນ່ນອນ. ແຕ່ຖ້າພວກເຈົ້າເຊົາເຮັດບາບຢ່າງເດັດຂາດ+ດ້ວຍຄວາມຊ່ວຍເຫຼືອຈາກພະລັງຂອງພະເຈົ້າ ພວກເຈົ້າຈະມີຊີວິດ.+
14 ພະລັງຂອງພະເຈົ້າຊີ້ນຳຜູ້ໃດ ຜູ້ນັ້ນກໍເປັນລູກຂອງເພິ່ນ.+
15 ພະລັງຂອງພະເຈົ້າບໍ່ໄດ້ເຮັດໃຫ້ພວກເຮົາຕົກເປັນທາດຫຼືຕ້ອງຢ້ານອີກ ແຕ່ເຮັດໃຫ້ພວກເຮົາຖືກຮັບເປັນລູກ. ດ້ວຍພະລັງນີ້ພວກເຮົາຈຶ່ງເອີ້ນພະເຈົ້າວ່າ: “ອັບບາ* ພໍ່!”+
16 ພະລັງຂອງພະເຈົ້າເຮັດໃຫ້ພວກເຮົາໝັ້ນໃຈ+ວ່າພວກເຮົາເປັນລູກຂອງພະເຈົ້າ.+
17 ຖ້າພວກເຮົາເປັນລູກຂອງພະເຈົ້າ ພວກເຮົາຈະໄດ້ຮັບມໍລະດົກຈາກເພິ່ນແລະຈະໄດ້ຮັບມໍລະດົກ+ຮ່ວມກັບພະຄລິດນຳ. ແຕ່ພວກເຮົາຕ້ອງທົນທຸກຮ່ວມກັບພະຄລິດ+ກ່ອນເພື່ອຈະໄດ້ຮັບຖານະທີ່ສູງສົ່ງຮ່ວມກັບເພິ່ນຄືກັນ.+
18 ຂ້ອຍຖືວ່າການທົນທຸກໃນຕອນນີ້ຄຸ້ມຄ່າແທ້ໆເມື່ອທຽບກັບລາງວັນທີ່ຍິ່ງໃຫຍ່ທີ່ພວກເຮົາຈະໄດ້ຮັບ ເຊິ່ງພະເຈົ້າຈະເປີດເຜີຍກັບພວກເຮົາໃນອະນາຄົດ.+
19 ທຸກສິ່ງທີ່ພະເຈົ້າສ້າງກຳລັງຕັ້ງໃຈລໍຖ້າເວລາທີ່ຈະເຫັນພວກລູກຂອງພະເຈົ້າໄດ້ຮັບລາງວັນທີ່ຍິ່ງໃຫຍ່ນັ້ນ.+
20 ສິ່ງທີ່ພະເຈົ້າສ້າງຕົກຢູ່ໃນສະພາບທີ່ບໍ່ມີຄວາມຫວັງ+ ບໍ່ແມ່ນຍ້ອນເຂົາເຈົ້າເລືອກເອງ ແຕ່ຍ້ອນເພິ່ນຍອມໃຫ້ເປັນແນວນັ້ນ. ແຕ່ເພິ່ນກໍຍັງໃຫ້ຄວາມຫວັງພວກເຮົາ.
21 ເພິ່ນຮູ້ວ່າສິ່ງທີ່ເພິ່ນສ້າງຈະໄດ້ຮັບການປົດປ່ອຍ+ຈາກການເປັນທາດຂອງຄວາມເນົ່າເປື່ອຍແລະຈະມີອິດສະຫຼະແບບທີ່ລູກຂອງພະເຈົ້າມີ.
22 ພວກເຮົາຮູ້ວ່າທຸກສິ່ງທີ່ພະເຈົ້າສ້າງພາກັນເຈັບປວດແລະຮ້ອງຄາງຈົນຮອດຕອນນີ້.
23 ແຕ່ຕອນນີ້ ພວກເຮົາໄດ້ຮັບລາງວັນສ່ວນທຳອິດ*ເຊິ່ງແມ່ນພະລັງບໍລິສຸດ. ພວກເຮົາຮ້ອງຄາງຢູ່ໃນໃຈ+ໃນໄລຍະທີ່ຕັ້ງໃຈລໍຖ້າໃຫ້ພະເຈົ້າຮັບພວກເຮົາເປັນລູກ.+ ເພິ່ນເຮັດໄດ້ແບບນີ້ຍ້ອນພະຄລິດຈ່າຍຄ່າໄຖ່ເພື່ອປົດປ່ອຍພວກເຮົາຈາກຮ່າງກາຍນີ້.
24 ພວກເຮົາມີຄວາມຫວັງນີ້ເມື່ອພະເຈົ້າຊ່ວຍພວກເຮົາໃຫ້ພົ້ນຈາກບາບ ແຕ່ຖ້າຜູ້ໃດໄດ້ຮັບສິ່ງທີ່ຫວັງໄວ້ແລ້ວ ລາວຄືຊິບໍ່ຕ້ອງຫວັງອີກແມ່ນບໍ? ຖ້າຜູ້ໃດໄດ້ຮັບສິ່ງໜຶ່ງແລ້ວ ລາວຍັງຈະລໍຖ້າສິ່ງນັ້ນອີກຢູ່ບໍ?
25 ແຕ່ຖ້າພວກເຮົາຫວັງ+ໃນສິ່ງທີ່ຍັງບໍ່ໄດ້ຮັບ+ ພວກເຮົາຈະລໍຖ້າສິ່ງນັ້ນດ້ວຍຄວາມອົດທົນ.+
26 ພະລັງຂອງພະເຈົ້າຍັງຊ່ວຍພວກເຮົາຕອນທີ່ພວກເຮົາອ່ອນແອ.+ ເມື່ອອະທິດຖານ ບາງເທື່ອພວກເຮົາບໍ່ຮູ້ວ່າຄວນຂໍຫຍັງ ແຕ່ພະລັງຂອງພະເຈົ້າຈະຂໍແທນພວກເຮົາຕອນທີ່ພວກເຮົາອຸກໃຈຫຼາຍຈົນບໍ່ຮູ້ວ່າຊິເວົ້າແນວໃດ.
27 ພະເຈົ້າຜູ້ກວດເບິ່ງຫົວໃຈ+ຮູ້ວ່າພະລັງຂອງເພິ່ນກຳລັງຂໍຫຍັງໃຫ້ພວກຜູ້ບໍລິສຸດ ຍ້ອນສິ່ງທີ່ຂໍນັ້ນສອດຄ່ອງກັບຄວາມຕ້ອງການຂອງເພິ່ນ.
28 ພວກເຮົາຮູ້ວ່າພະເຈົ້າເຮັດທຸກສິ່ງສອດຄ່ອງກັນເພື່ອປະໂຫຍດຂອງຄົນທີ່ຮັກເພິ່ນ ເຊິ່ງແມ່ນຄົນທີ່ຖືກເລືອກຕາມຄວາມຕ້ອງການຂອງເພິ່ນ.+
29 ເຂົາເຈົ້າເປັນຄົນກຸ່ມທຳອິດທີ່ພະເຈົ້າສົນໃຈ ແລະເພິ່ນກຳນົດໄວ້ລ່ວງໜ້າໃຫ້ເຂົາເຈົ້າມີລັກສະນະຄືກັບພະຄລິດລູກຊາຍຂອງເພິ່ນ.+ ພະຄລິດຈະໄດ້ເປັນອ້າຍກົກ+ຂອງເຂົາເຈົ້າ.+
30 ຄົນກຸ່ມນັ້ນທີ່ພະເຈົ້າກຳນົດໄວ້ລ່ວງໜ້າ+ກໍແມ່ນຄົນທີ່ເພິ່ນເລືອກ+ ແລະຄົນທີ່ເພິ່ນເລືອກກໍແມ່ນຄົນທີ່ເພິ່ນຍອມຮັບ+ ແລະຄົນທີ່ເພິ່ນຍອມຮັບກໍແມ່ນຄົນທີ່ເພິ່ນໃຫ້ກຽດ.+
31 ຄັນຊັ້ນ ໝາຍຄວາມວ່າແນວໃດ? ຖ້າພະເຈົ້າຢູ່ຝ່າຍພວກເຮົາ ໃຜຈະຕໍ່ສູ້ພວກເຮົາໄດ້?+
32 ຂະໜາດລູກຂອງເພິ່ນ ເພິ່ນຍັງບໍ່ຫວງ ແຕ່ຍອມໃຫ້ມາຕາຍເພື່ອພວກເຮົາທຸກຄົນ.+ ຖ້າເປັນແນວນັ້ນ ເປັນຫຍັງເພິ່ນຈະບໍ່ຍອມໃຫ້ສິ່ງອື່ນໆທັງໝົດກັບພວກເຮົາອີກ?
33 ຜູ້ໃດຈະຟ້ອງຮ້ອງຄົນທີ່ພະເຈົ້າເລືອກໄວ້?+ ເພິ່ນເອງເປັນຜູ້ທີ່ບອກວ່າເຂົາເຈົ້າເປັນຝ່າຍຖືກ.+
34 ຜູ້ໃດຈະຕຳໜິເຂົາເຈົ້າໄດ້? ພະຄລິດເຢຊູມາຕາຍແລະຖືກປຸກໃຫ້ຄືນມາຈາກຕາຍແລ້ວ. ຕອນນີ້ ເພິ່ນຢູ່ເບື້ອງຂວາມືຂອງພະເຈົ້າ+ແລະຊ່ວຍເວົ້າແທນພວກເຮົາຢູ່.+
35 ຊິມີຫຍັງມາຂັດຂວາງບໍ່ໃຫ້ພະຄລິດຮັກພວກເຮົາໄດ້ບໍ?+ ຖ້າພວກເຮົາເຈິຄວາມທຸກລຳບາກ ຄວາມທຸກໃຈ ການຂົ່ມເຫງ ຄວາມອຶດຢາກ ການບໍ່ມີເຄື່ອງນຸ່ງໃສ່ ໄພອັນຕະລາຍ ຫຼືຖືກຂູ່ວ່າຈະຂ້າ ມັນຈະເຮັດໃຫ້ພວກເຮົາບໍ່ໄດ້ຮັບຄວາມຮັກຈາກພະຄລິດບໍ?+
36 ຄືກັບທີ່ພະຄຳພີບອກໄວ້ວ່າ: “ພວກເຮົາເປັນຄົນຂອງພະອົງ ພວກເຮົາຈຶ່ງຖືກຂ້າທຸກມື້. ສັດຕູເບິ່ງພວກເຮົາເປັນຄືກັບແກະທີ່ຈະຖືກເອົາໄປຂ້າ.”+
37 ເຖິງວ່າຕ້ອງເຈິກັບເຫດການທັງໝົດນີ້ ພວກເຮົາກໍຜ່ານມັນມາໄດ້ແລະຊະນະໄດ້ໝົດທຸກຢ່າງ+ຍ້ອນຜູ້ທີ່ຮັກພວກເຮົາໄດ້ຊ່ວຍພວກເຮົາ.
38 ຂ້ອຍໝັ້ນໃຈວ່າຈະບໍ່ມີຫຍັງສາມາດຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາ. ບໍ່ວ່າຈະເປັນຄວາມຕາຍ ຫຼືຊີວິດ ຫຼືທູດສະຫວັນ ຫຼືລັດຖະບານ ຫຼືສິ່ງທີ່ມີຢູ່ຕອນນີ້ ຫຼືສິ່ງທີ່ຈະມາໃນອະນາຄົດ ຫຼືອຳນາດ+
39 ຫຼືຄວາມສູງ ຫຼືຄວາມເລິກ ຫຼືສິ່ງອື່ນໆທີ່ຖືກສ້າງຂຶ້ນມາ. ບໍ່ມີຫຍັງຈະສາມາດຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາຜ່ານທາງພະຄລິດເຢຊູຜູ້ເປັນນາຍຂອງພວກເຮົາ.
ຂໍ
^ ແປຕາມໂຕວ່າ “ເຮັດໃຫ້ຮ່າງກາຍທີ່ຕາຍໄດ້ຂອງພວກເຈົ້າມີຊີວິດ”
^ ເປັນຄຳພາສາເຮັບເຣີຫຼືພາສາອາຣາເມອິກທີ່ເດັກນ້ອຍໃຊ້ເອີ້ນພໍ່ແບບສະໜິດສະໜົມແຕ່ກໍຍັງນັບຖື
^ ແປຕາມໂຕວ່າ “ຜົນລະປູກຊຸດທຳອິດ”
