ໂອບາດີຢາ 1:1-21
1 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດໃຫ້ໂອບາດີຢາ*ເຫັນນິມິດກ່ຽວກັບເອໂດມ.+
ໂອບາດີຢາເວົ້າວ່າ:
“ພວກເຮົາໄດ້ຍິນວ່າພະເຢໂຫວາສົ່ງຕົວແທນໄປບອກຊາດຕ່າງໆວ່າ
‘ໃຫ້ກຽມພ້ອມໄປຕໍ່ສູ້ກັບເອໂດມ.’”+
2 ພະເຈົ້າເວົ້າວ່າ: “ເຮົາໄດ້ເຮັດໃຫ້ເຈົ້າເປັນປະເທດທີ່ບໍ່ສຳຄັນແລະຊາດອື່ນໆກໍພາກັນດູຖູກເຈົ້າ.+
3 ພວກເຈົ້າທີ່ຢູ່ຕາມໂກນຫີນແລະຢູ່ຕາມບ່ອນສູງໆເອີ້ຍ!ຍ້ອນພວກເຈົ້າຍິ່ງ+ ພວກເຈົ້າຈຶ່ງຄິດໃນໃຈວ່າ‘ບໍ່ມີໃຜເອົາພວກເຮົາລົງໄປຈາກບ່ອນນີ້ໄດ້ດອກ.’”
4 ແຕ່ພະເຢໂຫວາເວົ້າວ່າ: “ເຖິງວ່າເຈົ້າຈະຢູ່ບ່ອນສູງໆ*ຄືກັບນົກອິນຊີຫຼືຈະເຮັດຮັງຢູ່ບ່ອນສູງສ່ຳກັບດາວເຮົາກໍຈະເອົາເຈົ້າລົງມາຈາກບ່ອນນັ້ນ.
5 ຖ້າຂີ້ລັກຂຶ້ນເຮືອນຂອງເຈົ້າໃນຕອນກາງຄືນເຂົາເຈົ້າຈະເອົາແຕ່ສິ່ງທີ່ເຂົາເຈົ້າຢາກໄດ້ບໍ່ແມ່ນບໍ?
ຫຼືຖ້າມີຄົນໄປເກັບໝາກລະແຊັງຢູ່ສວນຂອງເຈົ້າ
ເຂົາເຈົ້າຈະຈົ່ງໝາກມັນໄວ້ຢູ່ເຄືອແດ່ບໍ່ແມ່ນບໍ?+ແຕ່ສັດຕູຈະທຳລາຍເຈົ້າຈົນບໍ່ເຫຼືອ!
6 ລູກຫຼານຂອງເອຊາວເອີ້ຍ ເຈົ້າຈະຖືກຄົ້ນທຸກຈອກທຸກແຈ
ແລະຊັບສົມບັດທີ່ເຈົ້າເຊື່ອງໄວ້ກໍຈະຖືກເອົາໄປໝົດ.
7 ພວກທີ່ເຮັດສັນຍາກັບເຈົ້າຈະຕົວະເຈົ້າ.
ເຂົາເຈົ້າຈະໄລ່ເຈົ້າອອກຈາກປະເທດຂອງເຂົາເຈົ້າ.
ຄົນທີ່ເຄີຍຢູ່ກັບເຈົ້າຢ່າງສະຫງົບສຸກຈະຕໍ່ສູ້ຊະນະເຈົ້າ.
ຄົນທີ່ເຄີຍກິນເຂົ້າຮ່ວມກັບເຈົ້າຈະວາງກັບດັກຈັບເຈົ້າແຕ່ເຈົ້າຈະບໍ່ຮູ້ໂຕ.”
8 ພະເຢໂຫວາເວົ້າວ່າ“ໃນມື້ນັ້ນ ເຮົາຈະທຳລາຍຄົນສະຫຼາດຂອງເອໂດມ+ແລະທຳລາຍຄົນທີ່ມີຄວາມເຂົ້າໃຈຢູ່ເຂດພູຂອງເອຊາວໃຫ້ໝົດ.
9 ເຕມານ*+ເອີ້ຍ ທະຫານທີ່ເກັ່ງໆຂອງເຈົ້າຈະຢ້ານຫຼາຍ+ຍ້ອນທຸກຄົນທີ່ຢູ່ເຂດພູຂອງເອຊາວຈະຖືກຂ້າໝົດ.+
10 ຍ້ອນເຈົ້າເຮັດຕໍ່ຢາໂຄບນ້ອງຂອງເຈົ້າແບບໂຫດຮ້າຍ+ເຈົ້າຈະຖືກເຮັດໃຫ້ອັບອາຍ+ແລະຈະຖືກທຳລາຍຕະຫຼອດໄປ.+
11 ໃນມື້ທີ່ສັດຕູ*ຈັບທະຫານຂອງນ້ອງເຈົ້າໄປເປັນຊະເລີຍ+ແລະຕອນທີ່ຄົນຕ່າງຊາດເຂົ້າໄປໃນເມືອງແລະຈົກສະຫຼາກ+ແບ່ງເຄື່ອງຂອງຢູ່ເຢຣູຊາເລັມເຈົ້າພັດຢືນເບິ່ງຢູ່ຊື່ໆແລະເຮັດຄືກັບເຂົາເຈົ້າ.
12 ເຈົ້າບໍ່ຄວນດີໃຈໃນມື້ທີ່ນ້ອງຂອງເຈົ້າມີບັນຫາ.+ເຈົ້າບໍ່ຄວນຍິນດີໃນມື້ທີ່ພວກຢູດາຖືກກຳຈັດ+ແລະເຈົ້າບໍ່ຄວນເວົ້າແບບຈອງຫອງໃນມື້ທີ່ເຂົາເຈົ້າເຈິຄວາມຍາກລຳບາກ.
13 ເຈົ້າບໍ່ຄວນເຂົ້າໄປໃນເມືອງປະຊາຊົນຂອງເຮົາໃນມື້ທີ່ເຂົາເຈົ້າຖືກທຳລາຍ.+ເຈົ້າບໍ່ຄວນດີໃຈກັບຄວາມຈິບຫາຍຂອງເຂົາເຈົ້າໃນມື້ທີ່ເຂົາເຈົ້າຖືກທຳລາຍແລະເຈົ້າບໍ່ຄວນເອົາຊັບສົມບັດຂອງເຂົາເຈົ້າໃນມື້ທີ່ເຂົາເຈົ້າຖືກທຳລາຍ.+
14 ເຈົ້າບໍ່ຄວນຢືນລັດທາງເພື່ອດັກຂ້າເຂົາເຈົ້າ+ແລະເຈົ້າບໍ່ຄວນຈັບເຂົາເຈົ້າໄປໃຫ້ສັດຕູໃນມື້ທີ່ເຂົາເຈົ້າເຈິຄວາມຍາກລຳບາກ.+
15 ມື້ທີ່ພະເຢໂຫວາຈະທຳລາຍຊາດອື່ນໆໃກ້ຈະມາຮອດແລ້ວ.+
ເຈົ້າເຮັດຫຍັງໄວ້ ເຈົ້າກໍຈະຖືກແນວນັ້ນຄືກັນ.+
ເຈົ້າເຮັດແນວໃດກັບຄົນອື່ນ ເຈົ້າກໍຈະເຈິແນວນັ້ນຄືກັນ.
16 ເຈົ້າກິນເຫຼົ້າແວງຢູ່ເທິງພູບໍລິສຸດຂອງເຮົາຫຼາຍສ່ຳໃດຊາດອື່ນໆກໍຈະກິນຄວາມໃຈຮ້າຍຂອງເຮົາຫຼາຍສ່ຳນັ້ນ.+
ເຂົາເຈົ້າຈະກິນຈົນອີ່ມແລະເຂົາເຈົ້າຈະສາບສູນໄປຄືກັບບໍ່ເຄີຍມີເຂົາເຈົ້າຢູ່ເລີຍ.
17 ແຕ່ປະຊາຊົນຂອງເຮົາຈະໜີໄປພູຊີໂອນ.+ພູນັ້ນຈະບໍລິສຸດ+ແລະລູກຫຼານຂອງຢາໂຄບຈະໄດ້ທຸກສິ່ງທີ່ເປັນຂອງເຂົາເຈົ້າຄືນ.+
18 ລູກຫຼານຂອງຢາໂຄບຈະເປັນຄືກັບໄຟແລະລູກຫຼານຂອງໂຢເຊັບຈະເປັນຄືກັບແປວໄຟ.ສ່ວນລູກຫຼານຂອງເອຊາວຈະເປັນຄືກັບຕໍເຟືອງ.ເຂົາເຈົ້າຈະຖືກໄຟໄໝ້ຈົນບໍ່ເຫຼືອ.ລູກຫຼານຂອງເອຊາວຈະບໍ່ມີຜູ້ໃດລອດຈັກຄົນເລີຍ+ຍ້ອນພະເຢໂຫວາເວົ້າໄວ້ແນວນີ້.
19 ປະຊາຊົນຂອງເຮົາຈະໄດ້ເຂດເນເກັບກັບເຂດພູຂອງເອຊາວ+ແລະຈະໄດ້ເຂດເຊເຟລາກັບແຜ່ນດິນຂອງພວກຟີລິດສະຕີນນຳ.+
ເຂົາເຈົ້າຈະໄດ້ທົ່ງຫຍ້າຂອງເອຟຣາຢິມກັບທົ່ງຫຍ້າຂອງຊາມາເຣຍ+ແລະເບັນຢາມິນຈະໄດ້ເຂດກິລຽດ.
20 ຄົນອິດສະຣາເອນຈາກປ້ອມນີ້ທີ່ເຄີຍເປັນຊະເລີຍ+ຈະໄດ້ແຜ່ນດິນການາອານໄປຈົນຮອດຊາເຣຟັດ.+
ຄົນເຢຣູຊາເລັມທີ່ເຄີຍເປັນຊະເລີຍຢູ່ເສຟາຣາດຈະໄດ້ເມືອງຕ່າງໆໃນເຂດເນເກັບ.+
21 ພວກຜູ້ທີ່ຊ່ວຍປະຊາຊົນໃຫ້ລອດຈະຂຶ້ນໄປພູຊີໂອນເພື່ອຈະຕັດສິນຜູ້ທີ່ຢູ່ເຂດພູຂອງເອຊາວ+ແລະພະເຢໂຫວາຈະປົກຄອງເປັນກະສັດ.”+
ຂໍ ຄວາມ ໄຂ ເງື່ອນ
^ ແປວ່າ “ຜູ້ຮັບໃຊ້ຂອງພະເຢໂຫວາ”
^ ຫຼືອາດແປວ່າ “ບິນຢູ່ບ່ອນສູງ”
^ ອາດໝາຍເຖິງເມືອງຂອງພວກເອໂດມທີ່ລູກຫຼານຂອງເຕມານອາໄສຢູ່
^ ແປຕາມໂຕວ່າ “ຄົນແປກໜ້າ”