ໂຮເຊອາ 9:1-17
9 “ອິດສະຣາເອນເອີ້ຍ ຢ່າຟ້າວດີໃຈເດີ້.+ຢ່າຊູ່ດີໃຈຄືກັບຊາດອື່ນໆ.
ພວກເຈົ້າປະຖິ້ມພະເຈົ້າຂອງພວກເຈົ້າໂດຍເຮັດໂຕຄືກັບແມ່ຈ້າງ.*+
ພວກເຈົ້າຮັກຄ່າຈ້າງທີ່ໄດ້ຈາກການຂາຍໂຕຢູ່ຕາມລານຟາດເຂົ້າ.+
2 ແຕ່ຈະບໍ່ມີຫຍັງຢູ່ລານຟາດເຂົ້າກັບຢູ່ອ່າງຢຽບໝາກລະແຊັງໃຫ້ພວກອິດສະຣາເອນກິນແລະເຂົາເຈົ້າຈະບໍ່ມີເຫຼົ້າແວງໃໝ່ກິນ.+
3 ເຂົາເຈົ້າຈະບໍ່ໄດ້ຢູ່ໃນແຜ່ນດິນຂອງພະເຢໂຫວາອີກຕໍ່ໄປ.+ເອຟຣາຢິມຈະກັບໄປເອຢິບແລະເຂົາເຈົ້າຈະກິນແນວທີ່ບໍ່ສະອາດຢູ່ອັດຊີເຣຍ.+
4 ເຂົາເຈົ້າຈະບໍ່ໄດ້ເທເຄື່ອງບູຊາທີ່ເປັນເຫຼົ້າແວງໃຫ້ພະເຢໂຫວາອີກຕໍ່ໄປ+ແລະເພິ່ນຈະບໍ່ພໍໃຈເຄື່ອງບູຊາຂອງເຂົາເຈົ້າ.+
ເຂົາເຈົ້າຈະເປັນຄືກັບເຂົ້າຈີ່ທີ່ຄົນກິນຕອນໄວ້ທຸກແລະທຸກຄົນທີ່ກິນເຂົ້າຈີ່ນີ້ກໍຈະເຮັດໃຫ້ໂຕເອງບໍ່ສະອາດ.
ເຂົ້າຈີ່ນີ້ແມ່ນສຳລັບເຂົາເຈົ້າເອງ.ເຂົາເຈົ້າຈະບໍ່ໄດ້ເອົາມັນເຂົ້າມາໃນວິຫານຂອງພະເຢໂຫວາ.
5 ເຂົາເຈົ້າຈະເຮັດແນວໃດໃນມື້ທີ່ມາປະຊຸມກັນ*ຫຼືໃນມື້ເທດສະການຂອງພະເຢໂຫວາ?
6 ເຂົາເຈົ້າຈະຕ້ອງໜີ ຍ້ອນເຂົາເຈົ້າຈະຖືກທຳລາຍ.+
ເອຢິບຈະລວບລວມເຂົາເຈົ້າ+ ແລະເມັມຟິດຈະຝັງເຂົາເຈົ້າ.+
ເຄື່ອງຂອງທີ່ມີຄ່າຂອງເຂົາເຈົ້າທີ່ເປັນເງິນຈະມີຫຍ້າຂຶ້ນຢູ່ເຕັມແລະໃນເຕັ້ນຂອງເຂົາເຈົ້າກໍຈະມີຕົ້ນໜາມຂຶ້ນຢູ່ເຕັມຄືກັນ.
7 ມື້ຕັດສິນກຳລັງຈະມາຮອດ.+ມື້ລົງໂທດກຳລັງຈະມາຮອດແລະພວກອິດສະຣາເອນຈະຮູ້ເລື່ອງນີ້.
ຜູ້ພະຍາກອນຂອງເຂົາເຈົ້າຈະຂາຍໜ້າ ແລະຜູ້ທີ່ອ້າງວ່າເປັນຕົວແທນຂອງພະເຈົ້າຈະເບິ່ງຄືຄົນໂງ່.ຫຼາຍຄົນຈະຊັງພວກນີ້ຍ້ອນເຂົາເຈົ້າເຮັດຜິດຫຼາຍ.
8 ແຕ່ກີ້ ຜູ້ພະຍາກອນທີ່ເຄີຍເບິ່ງແຍງ+ເອຟຣາຢິມເຄີຍຢູ່ຝ່າຍພະເຈົ້າຂອງຂ້ອຍ.+
ແຕ່ຕອນນີ້ ພວກຜູ້ພະຍາກອນຂອງເຂົາເຈົ້າ+ເປັນຄືກັບກັບດັກທີ່ໃຊ້ຈັບນົກ.ມີແຕ່ຄວາມກຽດຊັງຢູ່ວິຫານພະເຈົ້າຂອງເຂົາເຈົ້າ.
9 ເຂົາເຈົ້າເຮັດຊົ່ວຫຼາຍຄືກັບທີ່ຄົນໃນເມືອງກີເບອາເຄີຍເຮັດ.+
ເພິ່ນຈະຈື່ຄວາມຜິດຂອງເຂົາເຈົ້າ ແລະເພິ່ນຈະລົງໂທດເຂົາເຈົ້າຕາມຄວາມຜິດທີ່ເຂົາເຈົ້າໄດ້ເຮັດ.+
10 ຕອນທີ່ເຮົາເຈິອິດສະຣາເອນ ເຂົາເຈົ້າເປັນຄືກັບໝາກລະແຊັງຢູ່ບ່ອນກັນດານ.+
ຕອນທີ່ເຮົາເຫັນປູ່ຍ່າຕານາຍຂອງເຂົາເຈົ້າ ເຂົາເຈົ້າເປັນຄືໝາກເດື່ອຊຸດທຳອິດຢູ່ຕົ້ນ.
ແຕ່ເຂົາເຈົ້າໄປນະມັດສະການພະບາອານທີ່ຢູ່ເປໂອ.+ເຂົາເຈົ້າອຸທິດໂຕເອງໃຫ້ສິ່ງທີ່ເປັນຕາໜ້າອາຍ*+ແລະເຂົາເຈົ້າກໍກາຍເປັນສິ່ງທີ່ເປັນຕາຂີ້ດຽດຄືກັບພະເຈົ້າທີ່ເຂົາເຈົ້ານະມັດສະການ.
11 ຄວາມຍິ່ງໃຫຍ່ຂອງເອຟຣາຢິມຫາຍໄປຄືກັບນົກທີ່ບິນໜີ.ເຂົາເຈົ້າຈະບໍ່ຖືພາແລະຈະບໍ່ເກີດລູກ.+
12 ເຖິງວ່າເຂົາເຈົ້າຈະມີລູກໃຫ້ລ້ຽງແຕ່ເຮົາຈະເອົາລູກຂອງເຂົາເຈົ້າໄປຈົນບໍ່ເຫຼືອຈັກຄົນ.+ເຂົາເຈົ້າຈະຈິບຫາຍເມື່ອເຮົາປະຖິ້ມເຂົາເຈົ້າ!+
13 ສຳລັບເຮົາ ເອຟຣາຢິມທີ່ຕັ້ງຢູ່ທົ່ງຫຍ້າເປັນຄືກັບເມືອງຕີເຣ.+ຕອນນີ້ ພວກເອຟຣາຢິມຕ້ອງເອົາພວກລູກຂອງເຂົາເຈົ້າອອກມາເພື່ອໃຫ້ສັດຕູຂ້າ.
14 ພະເຢໂຫວາເອີ້ຍ ຂໍໃຫ້ພະອົງລົງໂທດເຂົາເຈົ້າຕາມທີ່ເຂົາເຈົ້າສົມຄວນໄດ້ຮັບ.ໃຫ້ເຂົາເຈົ້າຫຼຸລູກແລະບໍ່ມີນົມໃຫ້ລູກກິນ.*
15 ເຂົາເຈົ້າເຮັດຊົ່ວທຸກຢ່າງຢູ່ກິນການ+ ເຮົາຈຶ່ງຊັງເຂົາເຈົ້າຫຼາຍຢູ່ຫັ້ນ.
ເຮົາໄລ່ເຂົາເຈົ້າອອກຈາກວິຫານຂອງເຮົາ ຍ້ອນເຂົາເຈົ້າເຮັດຊົ່ວ.+
ເຮົາຈະບໍ່ຮັກເຂົາເຈົ້າອີກຕໍ່ໄປ.+ພວກເຈົ້ານາຍທຸກຄົນຂອງເຂົາເຈົ້າເປັນຄົນຫົວແຂງ.
16 ເຮົາຈະປ້ຳເອຟຣາຢິມໃຫ້ລົ້ມລົງ.+
ຮາກຂອງເຂົາເຈົ້າຈະຫ່ຽວແຫ້ງແລະເຂົາເຈົ້າຈະບໍ່ເປັນໝາກ.
ເຖິງວ່າເຂົາເຈົ້າຈະເກີດລູກ ເຮົາກໍຈະຂ້າລູກຫຼານທີ່ເຂົາເຈົ້າຮັກ.”
17 ພະເຈົ້າຂອງຂ້ອຍຈະຖິ້ມເຂົາເຈົ້າຍ້ອນເຂົາເຈົ້າບໍ່ເຊື່ອຟັງເພິ່ນ.+ເຂົາເຈົ້າຈະໄປລີ້ຢູ່ນຳຊາດຕ່າງໆ.+
ຂໍ
^ ຫຼື “ຫຼິ້ນຊູ້; ເຮັດຜິດສິນລະທຳທາງເພດ”
^ ຫຼື “ມື້ທີ່ມີການລ້ຽງສະຫຼອງຕາມກຳນົດ”
^ ຫຼື “ພະເຈົ້າທີ່ເປັນຕາໜ້າອາຍ”
^ ຫຼື “ນົມແຫ້ງ”
