ກະສັດສະບັບທີໜຶ່ງ 13:1-34
13 ພະເຢໂຫວາສັ່ງຜູ້ພະຍາກອນຄົນໜຶ່ງ+ຈາກຢູດາໃຫ້ໄປເມືອງເບເທນ. ຕອນທີ່ລາວໄປຮອດ ເຢໂຣໂບອາມກຳລັງຢືນຢູ່ຕໍ່ໜ້າແທ່ນບູຊາ+ແລະເຜົາເຄື່ອງບູຊາ.*
2 ຜູ້ພະຍາກອນຄົນນັ້ນເຮັດຕາມທີ່ພະເຢໂຫວາສັ່ງໂດຍຮ້ອງໃສ່ແທ່ນບູຊາວ່າ: “ແທ່ນບູຊາ ແທ່ນບູຊາເອີ້ຍ! ພະເຢໂຫວາບອກວ່າ ‘ຈະມີຜູ້ຊາຍຄົນໜຶ່ງເກີດມາຈາກລູກຫຼານຂອງດາວິດ ລາວຈະມີຊື່ວ່າໂຢສີຢາ.+ ລາວຈະເອົາພວກປະໂລຫິດທີ່ເຜົາເຄື່ອງບູຊາຢູ່ບ່ອນນະມັດສະການຕ່າງໆມາເຜົາຢູ່ເທິງເຈົ້າແລະລາວຈະເຜົາກະດູກຄົນຢູ່ເທິງເຈົ້າ.’”+
3 ໃນມື້ນັ້ນ ຜູ້ພະຍາກອນຂອງພະເຈົ້າໄດ້ເຮັດການອັດສະຈັນຢ່າງໜຶ່ງ. ລາວເວົ້າວ່າ: “ນີ້ແມ່ນການອັດສະຈັນທີ່ຢືນຢັນວ່າພະເຢໂຫວາເຄີຍເວົ້າວ່າ ຖ້າເບິ່ງເດີ້! ແທ່ນບູຊານີ້ຈະແຕກອອກຈາກກັນແລະຂີ້ເທົ່າ*ຢູ່ເທິງແທ່ນຈະຕົກຊະລົງ.”
4 ເມື່ອກະສັດເຢໂຣໂບອາມໄດ້ຍິນສິ່ງທີ່ຜູ້ພະຍາກອນຮ້ອງໃສ່ແທ່ນບູຊາຢູ່ເມືອງເບເທນ ລາວກໍຊີ້ມືໄປໃສ່ຜູ້ພະຍາກອນແລະສັ່ງຄົນຂອງລາວວ່າ: “ໄປຈັບມັນ!”+ ທັນໃດນັ້ນ ມືລາວກໍລີບແລະເໜັງບໍ່ໄດ້.+
5 ແລ້ວແທ່ນບູຊາກໍແຕກອອກຈາກກັນ ແລະຂີ້ເທົ່າກໍຕົກຊະລົງມາຄືກັບທີ່ພະເຢໂຫວາໄດ້ບອກຜູ້ພະຍາກອນ.
6 ກະສັດເວົ້າກັບຜູ້ພະຍາກອນວ່າ: “ຂໍໃຫ້ເຈົ້າອະທິດຖານອ້ອນວອນຫາພະເຢໂຫວາພະເຈົ້າຂອງເຈົ້າໃຫ້ຂ້ອຍແດ່ເພື່ອມືຂອງຂ້ອຍຈະເຊົາ.”+ ຜູ້ພະຍາກອນກໍອ້ອນວອນຫາພະເຢໂຫວາ ແລ້ວມືຂອງກະສັດກໍເຊົາ.
7 ຈາກນັ້ນ ກະສັດໄດ້ເວົ້າກັບຜູ້ພະຍາກອນວ່າ: “ໄປ໋ ໄປກິນເຂົ້າຢູ່ເຮືອນຂ້ອຍ ແລ້ວຂ້ອຍຈະເອົາຂອງຂວັນໃຫ້ເຈົ້າ.”
8 ແຕ່ຜູ້ພະຍາກອນບອກກະສັດວ່າ: “ເຖິງວ່າທ່ານຈະເອົາຊັບສົມບັດໃຫ້ຂ້ອຍເຄິ່ງໜຶ່ງ ຂ້ອຍກໍຈະບໍ່ໄປກິນຫຍັງຢູ່ເຮືອນທ່ານ
9 ເພາະພະເຢໂຫວາສັ່ງຂ້ອຍວ່າ ‘ເຈົ້າຢ່າກິນຫຍັງຢູ່ຫັ້ນແລະຢ່າກັບເມືອທາງເກົ່າ.’”
10 ລາວຈຶ່ງກັບເມືອອີກທາງໜຶ່ງ ແລະບໍ່ໄດ້ກັບເມືອທາງເກົ່າທີ່ລາວມາເມືອງເບເທນ.
11 ມີຜູ້ພະຍາກອນຄົນໜຶ່ງທີ່ເຖົ້າຫຼາຍແລ້ວຢູ່ເມືອງເບເທນ. ພວກລູກຊາຍຂອງລາວໄດ້ກັບມາເຮືອນແລະເລົ່າໃຫ້ພໍ່ຟັງວ່າ ມື້ນັ້ນຜູ້ພະຍາກອນຂອງພະເຈົ້າໄດ້ເຮັດຫຍັງແດ່ຢູ່ເມືອງເບເທນແລະລາວໄດ້ເວົ້າຫຍັງແດ່ກັບກະສັດ. ເມື່ອເຂົາເຈົ້າເລົ່າແລ້ວ
12 ພໍ່ກໍຖາມວ່າ: “ລາວໄປທາງໃດ?” ພວກລູກຊາຍກໍບອກທາງທີ່ຜູ້ພະຍາກອນຈາກຢູດາໄປ.
13 ລາວຈຶ່ງບອກພວກລູກຊາຍວ່າ: “ເອົາອານໃສ່ຫຼັງລາໃຫ້ພໍ່.” ແລ້ວເຂົາເຈົ້າກໍເອົາອານໃສ່ຫຼັງລາໃຫ້ລາວ ແລະລາວກໍຂີ່ໄປ.
14 ຜູ້ພະຍາກອນທີ່ເປັນຜູ້ເຖົ້ານຳຜູ້ພະຍາກອນຄົນນັ້ນໄປແລະເຫັນລາວນັ່ງຢູ່ກ້ອງຕົ້ນໄມ້ໃຫຍ່. ຜູ້ພະຍາກອນທີ່ເປັນຜູ້ເຖົ້າຈຶ່ງຖາມວ່າ: “ເຈົ້າແມ່ນຜູ້ພະຍາກອນຂອງພະເຈົ້າທີ່ມາຈາກຢູດາບໍ?”+ ລາວຕອບວ່າ: “ແມ່ນແລ້ວ.”
15 ຜູ້ພະຍາກອນທີ່ເປັນຜູ້ເຖົ້າຊວນລາວວ່າ: “ໄປ໋ ໄປກິນເຂົ້າຢູ່ເຮືອນຂ້ອຍ.”
16 ແຕ່ລາວຕອບວ່າ: “ຂ້ອຍກັບໄປນຳເຈົ້າບໍ່ໄດ້ ເຮັດຕາມທີ່ເຈົ້າຊວນບໍ່ໄດ້ ຫຼືກິນຫຍັງຢູ່ເມືອງນີ້ກໍບໍ່ໄດ້
17 ເພາະພະເຢໂຫວາສັ່ງຂ້ອຍວ່າ ‘ເຈົ້າຢ່າກິນຫຍັງຢູ່ເມືອງນັ້ນ ແລະຢ່າກັບເມືອທາງເກົ່າ.’”
18 ຜູ້ພະຍາກອນທີ່ເປັນຜູ້ເຖົ້າຈຶ່ງບອກລາວວ່າ: “ຂ້ອຍກໍເປັນຜູ້ພະຍາກອນຄືກັນ ແລະມີທູດສະຫວັນອົງໜຶ່ງຂອງພະເຢໂຫວາມາບອກຂ້ອຍວ່າ ‘ໃຫ້ເຈົ້າຊວນລາວກັບມາກິນເຂົ້າກິນນ້ຳຢູ່ເຮືອນເຈົ້າ.’” (ຜູ້ພະຍາກອນທີ່ເປັນຜູ້ເຖົ້າຕົວະລາວ.)
19 ລາວຈຶ່ງກັບໄປແລະກິນເຂົ້າກິນນ້ຳຢູ່ເຮືອນຂອງຜູ້ພະຍາກອນຄົນນັ້ນ.
20 ຕອນທີ່ເຂົາເຈົ້າກຳລັງກິນເຂົ້າ ພະເຢໂຫວາໄດ້ສົ່ງຂ່າວມາໃຫ້ຜູ້ພະຍາກອນທີ່ເປັນຜູ້ເຖົ້າ.
21 ແລ້ວລາວກໍເວົ້າສຽງດັງກັບຜູ້ພະຍາກອນທີ່ມາຈາກຢູດາວ່າ: “ພະເຢໂຫວາບອກວ່າ ‘ຍ້ອນເຈົ້າບໍ່ໄດ້ເຊື່ອຟັງພະເຢໂຫວາ ແລະບໍ່ເຮັດຕາມຄຳສັ່ງຂອງພະເຢໂຫວາພະເຈົ້າຂອງເຈົ້າ
22 ແຕ່ພັດກັບໄປກິນເຂົ້າກິນນ້ຳຢູ່ເມືອງທີ່ເຮົາສັ່ງເຈົ້າວ່າ “ຢ່າກິນຫຍັງຢູ່ຫັ້ນ.” ຍ້ອນແນວນີ້ ສົບຂອງເຈົ້າຈະບໍ່ຖືກຝັງຢູ່ນຳປູ່ຍ່າຕານາຍຂອງເຈົ້າ.’”+
23 ຫຼັງຈາກຜູ້ພະຍາກອນຈາກຢູດາກິນເຂົ້າກິນນ້ຳແລ້ວໆ ຜູ້ພະຍາກອນທີ່ເປັນຜູ້ເຖົ້າກໍເອົາອານໃສ່ຫຼັງລາໃຫ້ລາວ.
24 ແລ້ວຜູ້ພະຍາກອນຈາກຢູດາກໍເດີນທາງໄປ. ແຕ່ມີສິງໂຕໜຶ່ງອອກມາຫົນທາງ ແລ້ວກໍຂ້າລາວ.+ ລາວນອນຕາຍຢູ່ຫົນທາງ ແລະໂຕລາກັບໂຕສິງກໍຢືນຢູ່ຂ້າງສົບລາວ.
25 ຄົນທີ່ຍ່າງກາຍໄປກໍເຫັນສົບນັ້ນຢູ່ຫົນທາງ ແລະມີໂຕສິງຢືນຢູ່ທາງຂ້າງ. ເຂົາເຈົ້າກໍໄປເລົ່າເລື່ອງນີ້ໃນເມືອງທີ່ຜູ້ພະຍາກອນທີ່ເປັນຜູ້ເຖົ້າຢູ່.
26 ເມື່ອຜູ້ພະຍາກອນທີ່ເປັນຜູ້ເຖົ້າໄດ້ຍິນແບບນັ້ນ ລາວກໍເວົ້າອອກມາທັນທີວ່າ: “ນັ້ນແມ່ນຜູ້ພະຍາກອນທີ່ບໍ່ເຊື່ອຟັງຄຳສັ່ງຂອງພະເຢໂຫວາ.+ ພະເຢໂຫວາຈຶ່ງໃຫ້ໂຕສິງໂດດຄຸບແລະກັດລາວຕາຍຕາມທີ່ພະເຢໂຫວາໄດ້ບອກລາວ.”+
27 ຜູ້ພະຍາກອນທີ່ເປັນຜູ້ເຖົ້າບອກພວກລູກຊາຍວ່າ: “ເອົາອານໃສ່ຫຼັງລາໃຫ້ພໍ່ແດ່.” ເຂົາເຈົ້າກໍເຮັດຕາມ.
28 ລາວເດີນທາງໄປແລະເຫັນສົບນັ້ນຢູ່ຫົນທາງ ແລະມີໂຕລາກັບໂຕສິງຢືນຢູ່ທາງຂ້າງ. ໂຕສິງບໍ່ໄດ້ກິນສົບນັ້ນແລະບໍ່ໄດ້ກິນລາ.
29 ລາວຈຶ່ງເອົາສົບຂຶ້ນຫຼັງລາ ແລະເອົາເຂົ້າໄປໃນເມືອງເບເທນເພື່ອໄວ້ທຸກແລ້ວກໍຝັງ.
30 ຜູ້ພະຍາກອນທີ່ເປັນຜູ້ເຖົ້າໄດ້ເອົາສົບໄປວາງໄວ້ຢູ່ບ່ອນຝັງສົບຂອງລາວ. ເຂົາເຈົ້າພາກັນຮ້ອງໄຫ້ແລະເວົ້າວ່າ: “ພີ່ນ້ອງເອີ້ຍ ເຈົ້າບໍ່ຄວນຕາຍຈັ່ງຊີ້!”
31 ຫຼັງຈາກຝັງສົບແລ້ວ ຜູ້ພະຍາກອນທີ່ເປັນຜູ້ເຖົ້າກໍບອກພວກລູກຊາຍວ່າ: “ຕອນພໍ່ຕາຍ ພວກລູກຕ້ອງເອົາສົບພໍ່ໄປຝັງໄວ້ຢູ່ບ່ອນທີ່ພໍ່ຝັງສົບຂອງຜູ້ພະຍາກອນຄົນນັ້ນ ແລະເອົາກະດູກຂອງພໍ່ໄປວາງໄວ້ທາງຂ້າງກະດູກຂອງລາວ.+
32 ສິ່ງທີ່ຜູ້ພະຍາກອນຈາກຢູດາບອກໄວ້ຕາມຄຳສັ່ງຂອງພະເຢໂຫວາກ່ຽວກັບແທ່ນບູຊາຢູ່ເມືອງເບເທນແລະບ່ອນນະມັດສະການ+ທີ່ຢູ່ເມືອງຕ່າງໆໃນເຂດຊາມາເຣຍຈະເກີດຂຶ້ນແທ້.”+
33 ເຖິງວ່າຈະເກີດເຫດການແບບນີ້ ແຕ່ເຢໂຣໂບອາມກໍຍັງບໍ່ເຊົາເຮັດຊົ່ວ. ລາວຍັງແຕ່ງຕັ້ງພວກປະໂລຫິດທີ່ບໍ່ໄດ້ຢູ່ໃນຕະກູນເລວີ+ໃຫ້ເຮັດວຽກຢູ່ຕາມບ່ອນນະມັດສະການຕ່າງໆ. ໃຜຢາກເປັນປະໂລຫິດ ລາວກໍໃຫ້ເປັນແລະເວົ້າວ່າ: “ໃຫ້ຜູ້ນີ້ເປັນປະໂລຫິດແລະເຮັດວຽກໃນບ່ອນນະມັດສະການ.”+
34 ຍ້ອນຄອບຄົວຂອງເຢໂຣໂບອາມ+ເຮັດຜິດແບບນີ້ ເຂົາເຈົ້າຈຶ່ງຖືກທຳລາຍແລະດັບສູນໄປຈາກໂລກນີ້.+
ຂໍ
^ ຫຼື “ເຄື່ອງບູຊາທີ່ມີຄວັນລອຍຂຶ້ນໄປ”
^ ໝາຍເຖິງຂີ້ເທົ່າທີ່ປົນກັບນ້ຳມັນສັດທີ່ເຜົາເປັນເຄື່ອງບູຊາ
