ກະສັດສະບັບທີໜຶ່ງ 14:1-31
14 ມີມື້ໜຶ່ງອາບີຢາ*ລູກຊາຍຂອງເຢໂຣໂບອາມບໍ່ສະບາຍແຮງ
2 ເຢໂຣໂບອາມຈຶ່ງບອກເມຍວ່າ: “ໃຫ້ເຈົ້າປອມໂຕເພື່ອບໍ່ໃຫ້ໃຜຮູ້ວ່າເຈົ້າເປັນເມຍຂອງຂ້ອຍ ແລ້ວໄປຫາຜູ້ພະຍາກອນອາຮີຢາຢູ່ເມືອງຊີໂລ. ລາວເປັນຜູ້ທີ່ບອກວ່າຂ້ອຍຈະໄດ້ເປັນກະສັດປົກຄອງອິດສະຣາເອນ.+
3 ໃຫ້ເຈົ້າເອົາເຂົ້າຈີ່ 10 ກ້ອນ ເຂົ້າໜົມ ແລະນ້ຳເຜີ້ງແກ້ວໜຶ່ງໄປໃຫ້ລາວ. ແລ້ວລາວຈະບອກວ່າລູກຊາຍຂອງເຮົາຈະເປັນແນວໃດ.”
4 ເມຍຂອງເຢໂຣໂບອາມກໍເຮັດຕາມທີ່ຜົວບອກ. ລາວໄປເຮືອນຂອງຜູ້ພະຍາກອນອາຮີຢາຢູ່ເມືອງຊີໂລ.+ ຕອນນັ້ນ ຕາຂອງອາຮີຢາເບິ່ງບໍ່ເຫັນຮຸ່ງ ຍ້ອນລາວເຖົ້າຫຼາຍແລ້ວ.
5 ແຕ່ພະເຢໂຫວາໄດ້ບອກອາຮີຢາວ່າ: “ເມຍຂອງເຢໂຣໂບອາມຈະມາຖາມເຈົ້າເລື່ອງລູກຊາຍຂອງລາວທີ່ບໍ່ສະບາຍແຮງ. ເຮົາຈະບອກເຈົ້າວ່າຄວນເວົ້າກັບລາວແນວໃດ. ລາວຈະປອມໂຕມາຫາເຈົ້າ.”
6 ເມື່ອອາຮີຢາໄດ້ຍິນສຽງລາວຍ່າງເຂົ້າປະຕູມາ ອາຮີຢາກໍເວົ້າວ່າ: “ເມຍຂອງເຢໂຣໂບອາມ ເຂົ້າມາໂລດ. ເຈົ້າຊິປອມໂຕມາເຮັດຫຍັງ? ພະເຈົ້າສັ່ງຂ້ອຍໃຫ້ບອກຂ່າວຮ້າຍກັບເຈົ້າ.
7 ໃຫ້ໄປບອກເຢໂຣໂບອາມວ່າ ‘ພະເຢໂຫວາພະເຈົ້າຂອງອິດສະຣາເອນບອກວ່າ “ເຮົາໄດ້ເລືອກເຈົ້າຈາກປະຊາຊົນທັງໝົດໃຫ້ເປັນຜູ້ນຳພວກອິດສະຣາເອນປະຊາຊົນຂອງເຮົາ.+
8 ເຮົາໄດ້ຍຶດເອົາແຜ່ນດິນຈາກລູກຫຼານຂອງດາວິດແລ້ວເອົາໃຫ້ເຈົ້າ.+ ແຕ່ເຈົ້າບໍ່ເປັນຄືກັບດາວິດຜູ້ຮັບໃຊ້ຂອງເຮົາທີ່ເຮັດຕາມຄຳສັ່ງຂອງເຮົາ ເຊື່ອຟັງເຮົາສຸດຫົວໃຈ ແລະເຮັດສິ່ງທີ່ເຮົາເບິ່ງວ່າຖືກຕ້ອງ.+
9 ເຈົ້າໄດ້ເຮັດຊົ່ວຫຼາຍກວ່າທຸກຄົນທີ່ປົກຄອງກ່ອນເຈົ້າ. ເຈົ້າເຮັດໃຫ້ເຮົາໃຈຮ້າຍໂດຍສ້າງພະເຈົ້າໃໝ່ຂຶ້ນມາແລະໄດ້ຫຼໍ່ເປັນຮູບປັ້ນ.+ ເຈົ້າໄດ້ປະຖິ້ມເຮົາ.+
10 ຍ້ອນແນວນີ້ເຮົາຈະເຮັດໃຫ້ລູກຫຼານຂອງເຈົ້າຈິບຫາຍວາຍວອດ ແລະເຮົາຈະເຮັດໃຫ້ຜູ້ຊາຍ*ທຸກຄົນທີ່ເປັນລູກຫຼານຂອງເຈົ້າດັບສູນ ເຖິງວ່າລາວຈະເປັນຄົນທີ່ຕ່ຳຕ້ອຍທີ່ສຸດໃນອິດສະຣາເອນກໍຕາມ. ເຮົາຈະກຳຈັດລູກຫຼານຂອງເຈົ້າໃຫ້ໝົດ+ຄືກັບຄົນຜູ້ໜຶ່ງລ້າງຂີ້ສັດຈົນກ້ຽງ.
11 ລູກຫຼານຂອງເຈົ້າຜູ້ທີ່ຕາຍຢູ່ໃນເມືອງຈະຖືກໝາກິນແລະຜູ້ທີ່ຕາຍຢູ່ທົ່ງຫຍ້າຈະຖືກນົກສັບກິນຄືກັບທີ່ພະເຢໂຫວາໄດ້ບອກໄວ້.”’
12 ໃຫ້ເຈົ້າກັບເມືອສະ. ທັນທີທີ່ເຈົ້າເຂົ້າໄປໃນເມືອງ ລູກຊາຍຂອງເຈົ້າກໍຈະຕາຍໂລດ.
13 ພວກອິດສະຣາເອນຈະໄວ້ທຸກໃຫ້ລາວ ແລ້ວກໍຝັງລາວ. ໃນຄອບຄົວຂອງເຢໂຣໂບອາມມີແຕ່ລາວຄົນດຽວເທົ່ານັ້ນທີ່ຈະຖືກຝັງ ຍ້ອນພະເຢໂຫວາພະເຈົ້າຂອງອິດສະຣາເອນເຫັນວ່າມີແຕ່ລາວຜູ້ດຽວທີ່ຍັງມີບາງສິ່ງທີ່ດີຢູ່.
14 ພະເຢໂຫວາຈະຕັ້ງກະສັດອົງໜຶ່ງໃຫ້ປົກຄອງອິດສະຣາເອນ. ລາວຈະກຳຈັດລູກຫຼານຂອງເຢໂຣໂບອາມ+ເມື່ອຮອດເວລາ ແລະເວລານັ້ນກໍມາຮອດແລ້ວ.
15 ພະເຢໂຫວາຈະລົງໂທດພວກອິດສະຣາເອນແລະເຂົາເຈົ້າຈະເອນໄປເອນມາຄືກັບໄມ້ອໍ້ທີ່ຢູ່ໃນນ້ຳ. ເພິ່ນຈະຫຼົກພວກອິດສະຣາເອນຈົນໝົດຮາກໝົດເຫງົ້າອອກຈາກແຜ່ນດິນທີ່ດີທີ່ເພິ່ນເອົາໃຫ້ປູ່ຍ່າຕານາຍຂອງເຂົາເຈົ້າ+ ແລະເພິ່ນຈະເຮັດໃຫ້ເຂົາເຈົ້າກະຈັດກະຈາຍໄປຮອດອີກຟາກໜຶ່ງຂອງແມ່ນ້ຳເອິຟາຣາດ+ ຍ້ອນເຂົາເຈົ້າເຮັດເສົາໄມ້ສັກສິດ*+ເພື່ອເຮັດໃຫ້ພະເຢໂຫວາໃຈຮ້າຍ.
16 ເພິ່ນຈະປະຖິ້ມພວກອິດສະຣາເອນ ຍ້ອນເຢໂຣໂບອາມໄດ້ເຮັດຜິດແລະເປັນຕົ້ນເຫດພາໃຫ້ພວກອິດສະຣາເອນເຮັດຜິດ.”+
17 ແລ້ວເມຍຂອງເຢໂຣໂບອາມກໍກັບໄປເມືອງຕີຣະຊາ. ທັນທີທີ່ລາວໄປຮອດປະຕູທາງເຂົ້າວັງ ລູກຊາຍຂອງລາວກໍຕາຍ.
18 ແລ້ວເຂົາເຈົ້າກໍເອົາລູກຊາຍລາວໄປຝັງ ແລະພວກອິດສະຣາເອນກໍພາກັນໄວ້ທຸກຕາມທີ່ພະເຢໂຫວາໄດ້ບອກຜູ້ພະຍາກອນອາຮີຢາຜູ້ຮັບໃຊ້ຂອງເພິ່ນ.
19 ເລື່ອງຕ່າງໆຂອງເຢໂຣໂບອາມ ການຕໍ່ສູ້ໃນສົງຄາມ+ ແລະການປົກຄອງຂອງລາວກໍຂຽນໄວ້ໃນປຶ້ມປະຫວັດພວກກະສັດຂອງອິດສະຣາເອນ.
20 ເຢໂຣໂບອາມປົກຄອງ 22 ປີແລ້ວລາວກໍຕາຍ.+ ນາດາບລູກຊາຍຂອງລາວກໍເປັນກະສັດແທນ.+
21 ຕອນນັ້ນ ເຣໂຮໂບອາມລູກຊາຍຂອງໂຊໂລໂມນເປັນກະສັດຂອງຢູດາ. ເຣໂຮໂບອາມເປັນກະສັດຕອນອາຍຸ 41 ປີ ແລະລາວປົກຄອງ 17 ປີຢູ່ເຢຣູຊາເລັມເຊິ່ງເປັນເມືອງທີ່ພະເຢໂຫວາເລືອກ+ຈາກທຸກເມືອງໃນຕະກູນຕ່າງໆຂອງອິດສະຣາເອນສຳລັບຊື່ຂອງເພິ່ນ.+ ແມ່ຂອງເຣໂຮໂບອາມຊື່ນາອາມາເປັນຄົນອຳໂມນ.+
22 ພວກຢູດາໄດ້ເຮັດສິ່ງທີ່ພະເຢໂຫວາເບິ່ງວ່າຊົ່ວ.+ ເຂົາເຈົ້າໄດ້ເຮັດຜິດແລະເຮັດໃຫ້ເພິ່ນໃຈຮ້າຍຫຼາຍກວ່າທີ່ປູ່ຍ່າຕານາຍຂອງເຂົາເຈົ້າໄດ້ເຮັດ.+
23 ເຂົາເຈົ້າໄດ້ສ້າງບ່ອນນະມັດສະການຕ່າງໆ ເຮັດເສົາຫີນສັກສິດແລະເສົາໄມ້ສັກສິດ+ຢູ່ໂນນພູທຸກບ່ອນ+ແລະຢູ່ກ້ອງຕົ້ນໄມ້ໃຫຍ່ທຸກຕົ້ນ.+
24 ນອກຈາກນັ້ນກໍຍັງມີພວກຜູ້ຊາຍຂາຍໂຕຢູ່ວິຫານ*ໃນເຂດຢູດານຳ.+ ພວກຢູດາໄດ້ເຮັດສິ່ງທີ່ເປັນຕາຂີ້ດຽດຄືກັບຊາດຕ່າງໆທີ່ພະເຢໂຫວາໄດ້ໄລ່ໜີໄປຈາກພວກອິດສະຣາເອນ.
25 ໃນປີທີ 5 ທີ່ກະສັດເຣໂຮໂບອາມປົກຄອງ ຊີຊາກ+ກະສັດຂອງເອຢິບໄດ້ມາໂຈມຕີເມືອງເຢຣູຊາເລັມ.+
26 ລາວເອົາຊັບສົມບັດທີ່ຢູ່ໃນວິຫານຂອງພະເຢໂຫວາແລະໃນວັງຂອງກະສັດໄປ.+ ລາວເອົາທຸກສິ່ງທຸກຢ່າງລວມທັງໂລ້ຄຳທັງໝົດທີ່ໂຊໂລໂມນໄດ້ເຮັດໄປນຳ.+
27 ກະສັດເຣໂຮໂບອາມຈຶ່ງເຮັດໂລ້ທອງແດງແທນ ແລະເອົາໂລ້ເຫຼົ່ານັ້ນໃຫ້ພວກຫົວໜ້າທະຫານທີ່ຍາມຢູ່ປະຕູທາງເຂົ້າວັງຂອງກະສັດ.
28 ທຸກເທື່ອທີ່ກະສັດມາວິຫານຂອງພະເຢໂຫວາ ພວກທະຫານຍາມຈະເອົາໂລ້ມາຖືໄວ້. ຈາກນັ້ນ ເຂົາເຈົ້າກໍຈະເອົາໂລ້ກັບໄປມ້ຽນຢູ່ຫ້ອງທະຫານຍາມຄືເກົ່າ.
29 ເລື່ອງຕ່າງໆຂອງເຣໂຮໂບອາມແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດຢູດາ.+
30 ເຣໂຮໂບອາມກັບເຢໂຣໂບອາມໄດ້ເຮັດສົງຄາມຕໍ່ສູ້ກັນຕະຫຼອດ.+
31 ເມື່ອເຣໂຮໂບອາມຕາຍ ເຂົາເຈົ້າຝັງລາວໄວ້ກັບປູ່ຍ່າຕານາຍຂອງລາວຢູ່ເມືອງຂອງດາວິດ.+ ແມ່ຂອງລາວຊື່ນາອາມາເປັນຄົນອຳໂມນ.+ ອາບີຢຳ*+ລູກຊາຍຂອງລາວກໍເປັນກະສັດແທນ.
ຂໍ
^ ລາວມີອີກຊື່ໜຶ່ງວ່າອາບີຢຳ
^ ແປຕາມໂຕວ່າ “ຄົນທີ່ຍ່ຽວໃສ່ກຳແພງ.” ເປັນສຳນວນພາສາເຮັບເຣີໝາຍເຖິງຜູ້ຊາຍແລະໃຊ້ໃນແບບດູຖູກ.
^ ເບິ່ງສ່ວນອະທິບາຍຄຳສັບ
^ ຄົນທີ່ຂາຍໂຕເພື່ອພິທີທາງສາສະໜາ
^ ລາວມີອີກຊື່ໜຶ່ງວ່າອາບີຢາ
