ກະສັດສະບັບທີໜຶ່ງ 15:1-34
15 ໃນປີທີ 18 ທີ່ກະສັດເຢໂຣໂບອາມ+ລູກຊາຍຂອງເນບັດປົກຄອງອິດສະຣາເອນ ອາບີຢຳ*ກໍເປັນກະສັດປົກຄອງຢູດາ.+
2 ອາບີຢຳປົກຄອງຢູ່ເມືອງເຢຣູຊາເລັມ 3 ປີ. ແມ່ຂອງລາວຊື່ມາອາກາ*+ເປັນຫຼານສາວ*ຂອງອາບີຊາໂລມ.*
3 ອາບີຢຳເຮັດຊົ່ວຄືກັບພໍ່ຂອງລາວ ແລະບໍ່ໄດ້ຮັບໃຊ້ພະເຢໂຫວາພະເຈົ້າຂອງລາວສຸດຫົວໃຈ*ຄືກັບດາວິດທີ່ເປັນປູ່ຍ່າຕານາຍຂອງລາວ.
4 ແຕ່ຍ້ອນເຫັນແກ່ດາວິດ+ ພະເຢໂຫວາພະເຈົ້າຂອງອາບີຢຳຈຶ່ງໃຫ້ລາວມີລູກຫຼານປົກຄອງ*ຢູ່ເມືອງເຢຣູຊາເລັມ+ ແລະໃຫ້ເມືອງເຢຣູຊາເລັມມີຢູ່ຕໍ່ໄປ.
5 ດາວິດເຮັດສິ່ງທີ່ພະເຢໂຫວາເບິ່ງວ່າຖືກຕ້ອງແລະເຮັດຕາມຄຳສັ່ງຂອງເພິ່ນທຸກຢ່າງຕະຫຼອດຊີວິດຂອງລາວ. ຍົກເວັ້ນເລື່ອງທີ່ລາວເຮັດຕໍ່ອູຣີຢາຄົນເຮດ.+
6 ເຣໂຮໂບອາມກັບເຢໂຣໂບອາມເຮັດສົງຄາມຕໍ່ສູ້ກັນຕະຫຼອດ.+
7 ເລື່ອງຕ່າງໆຂອງອາບີຢຳແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດຢູດາ.+ ອາບີຢຳເຮັດສົງຄາມຕໍ່ສູ້ກັບເຢໂຣໂບອາມ+ຄືກັບພໍ່ຂອງລາວ.
8 ເມື່ອອາບີຢຳຕາຍ ເຂົາເຈົ້າຝັງລາວໄວ້ຢູ່ເມືອງຂອງດາວິດ. ອາຊາ+ລູກຊາຍຂອງລາວກໍເປັນກະສັດແທນ.+
9 ໃນປີທີ 20 ທີ່ກະສັດເຢໂຣໂບອາມປົກຄອງອິດສະຣາເອນ ອາຊາກໍເລີ່ມປົກຄອງຢູດາ.
10 ອາຊາປົກຄອງຢູ່ເມືອງເຢຣູຊາເລັມ 41 ປີ. ຍ່າຂອງລາວຊື່ມາອາກາ+ເປັນຫຼານສາວຂອງອາບີຊາໂລມ.
11 ອາຊາເຮັດສິ່ງທີ່ພະເຢໂຫວາເບິ່ງວ່າຖືກຕ້ອງ+ຄືກັບດາວິດທີ່ເປັນປູ່ຍ່າຕານາຍຂອງລາວ.
12 ລາວໄລ່ພວກຜູ້ຊາຍຂາຍໂຕຢູ່ວິຫານ*ອອກຈາກເຂດຢູດາ+ ແລະທຳລາຍຮູບບູຊາທັງໝົດທີ່ພະເຈົ້າຂີ້ດຽດ*ທີ່ປູ່ຍ່າຕານາຍຂອງລາວໄດ້ເຮັດຂຶ້ນມາ.+
13 ລາວຍັງໄດ້ປົດມາອາກາ+ທີ່ເປັນຍ່າຂອງລາວອອກຈາກຕຳແໜ່ງລາຊີນີ ຍ້ອນມາອາກາໄດ້ເຮັດຮູບບູຊາທີ່ເປັນຕາຂີ້ດຽດເພື່ອໃຊ້ນະມັດສະການເສົາໄມ້ສັກສິດ.* ອາຊາທຳລາຍຮູບບູຊາ+ທີ່ເປັນຕາຂີ້ດຽດນັ້ນ ແລ້ວເອົາໄປຈູດຖິ້ມຢູ່ຮ່ອມພູກິດໂຣນ.+
14 ແຕ່ລາວບໍ່ໄດ້ທຳລາຍບ່ອນນະມັດສະການພະເຈົ້າປອມ.+ ເຖິງວ່າເປັນແນວນັ້ນ ອາຊາກໍຮັບໃຊ້ພະເຢໂຫວາສຸດຫົວໃຈຕະຫຼອດຊີວິດຂອງລາວ.
15 ອາຊາເອົາເງິນ ຄຳ ແລະເຄື່ອງໃຊ້ຕ່າງໆທີ່ລາວກັບພໍ່ຂອງລາວໄດ້ແຍກໄວ້ຕ່າງຫາກສຳລັບພະເຈົ້າໄປໄວ້ໃນວິຫານຂອງພະເຢໂຫວາ.+
16 ອາຊາກັບບາອາຊາ+ກະສັດຂອງອິດສະຣາເອນເຮັດສົງຄາມຕໍ່ສູ້ກັນຕະຫຼອດ.
17 ບາອາຊາກະສັດຂອງອິດສະຣາເອນໄດ້ມາໂຈມຕີຢູດາ ແລະເຮັດໃຫ້ເມືອງຣາມາ+ເຂັ້ມແຂງຂຶ້ນ*ເພື່ອບໍ່ໃຫ້ຜູ້ໃດເຂົ້າອອກເຂດແດນຂອງອາຊາກະສັດຂອງຢູດາ.+
18 ອາຊາຈຶ່ງເອົາເງິນກັບຄຳທັງໝົດທີ່ຍັງເຫຼືອຢູ່ໃນຄັງຊັບສິນຢູ່ວິຫານຂອງພະເຢໂຫວາແລະໃນຄັງຊັບສິນຂອງກະສັດໃຫ້ພວກຂ້າລາຊະການຂອງລາວ ເພື່ອເອົາໄປໃຫ້ເບັນຮາດັດກະສັດຂອງຊີເຣຍ+ທີ່ຢູ່ເມືອງດາມາເຊ. ເບັນຮາດັດເປັນລູກຊາຍຂອງຕາບຣິມໂມນແລະເປັນຫຼານຂອງເຮຊີໂອນ. ອາຊາຝາກຄວາມໄປບອກເບັນຮາດັດວ່າ:
19 “ຂ້ອຍຢາກເຮັດສັນຍາກັບເຈົ້າຄືກັບທີ່ພໍ່ຂອງຂ້ອຍແລະພໍ່ຂອງເຈົ້າເຄີຍເຮັດສັນຍານຳກັນ. ນີ້ແມ່ນເງິນແລະຄຳທີ່ຂ້ອຍສົ່ງມາເປັນຂອງຂວັນໃຫ້ເຈົ້າ. ຂໍໃຫ້ເຈົ້າຍົກເລີກສັນຍາທີ່ເຮັດກັບບາອາຊາກະສັດຂອງອິດສະຣາເອນເພື່ອລາວຈະຖອຍກອງທັບໄປຈາກແຜ່ນດິນຂອງຂ້ອຍ.”
20 ເບັນຮາດັດໄດ້ເຮັດຕາມທີ່ກະສັດອາຊາຂໍ ແລະລາວໄດ້ສົ່ງພວກຫົວໜ້າກອງທັບໄປຕໍ່ສູ້ເມືອງຕ່າງໆຂອງອິດສະຣາເອນ. ເຂົາເຈົ້າໄດ້ຍຶດເອົາເມືອງອີໂຢນ+ ເມືອງດານ+ ເມືອງອາເບັນເບັດມາອະກາ ເຂດກິນເນເຣດທັງໝົດ ແລະເຂດຂອງຕະກູນນັບທາລີທັງໝົດ.
21 ທັນທີທີ່ບາອາຊາຮູ້ເລື່ອງນີ້ ລາວກໍເຊົາເຮັດໃຫ້ເມືອງຣາມາເຂັ້ມແຂງຂຶ້ນ ແລ້ວກັບໄປຢູ່ເມືອງຕີຣະຊາ.+
22 ກະສັດອາຊາໄດ້ເອີ້ນທຸກຄົນໃນຢູດາໃຫ້ມາຂົນຫີນຂົນໄມ້ທີ່ບາອາຊາເອົາມາສ້າງຢູ່ເມືອງຣາມາ. ແລ້ວກະສັດອາຊາກໍເອົາຫີນແລະໄມ້ເຫຼົ່ານີ້ໄປເຮັດໃຫ້ເມືອງເຄບາ+ໃນເຂດຂອງຕະກູນເບັນຢາມິນກັບເມືອງມິດຊະປາ+ເຂັ້ມແຂງຂຶ້ນ.
23 ເລື່ອງຕ່າງໆຂອງອາຊາ ຄວາມສຳເລັດຂອງລາວ ທຸກສິ່ງທີ່ລາວເຮັດ ແລະເລື່ອງເມືອງຕ່າງໆທີ່ລາວສ້າງກໍຂຽນໄວ້ໃນປຶ້ມປະຫວັດຂອງພວກກະສັດຢູດາ. ຕອນທີ່ອາຊາເຖົ້າ ລາວເປັນພະຍາດຢູ່ຕີນ.+
24 ຕໍ່ມາອາຊາກໍຕາຍແລະເຂົາເຈົ້າຝັງລາວໄວ້ຢູ່ເມືອງຂອງດາວິດທີ່ເປັນປູ່ຍ່າຕານາຍຂອງລາວ. ເຢໂຮຊາຟັດ+ລູກຊາຍຂອງລາວກໍເປັນກະສັດແທນ.
25 ໃນປີທີ 2 ທີ່ກະສັດອາຊາປົກຄອງຢູດາ ນາດາບ+ລູກຊາຍຂອງເຢໂຣໂບອາມກໍເປັນກະສັດປົກຄອງອິດສະຣາເອນ. ນາດາບປົກຄອງອິດສະຣາເອນ 2 ປີ.
26 ລາວບໍ່ເຊົາເຮັດສິ່ງທີ່ພະເຢໂຫວາເບິ່ງວ່າຊົ່ວ. ພໍ່ຂອງລາວໄດ້ພາພວກອິດສະຣາເອນເຮັດຜິດ+ແລະລາວກໍພາພວກອິດສະຣາເອນເຮັດຜິດຄືກັນ.+
27 ບາອາຊາລູກຊາຍຂອງອາຮີຢາຈາກຕະກູນອິດຊາຄາໄດ້ວາງແຜນຂ້ານາດາບ. ລາວຂ້ານາດາບຕອນທີ່ນາດາບກັບພວກອິດສະຣາເອນກຳລັງລ້ອມເມືອງກິດເບໂທນ+ຂອງພວກຟີລິດສະຕີນ.
28 ໃນປີທີ 3 ທີ່ກະສັດອາຊາປົກຄອງຢູດາ ບາອາຊາໄດ້ຂ້ານາດາບ ແລ້ວລາວກໍເປັນກະສັດແທນນາດາບ.
29 ຫຼັງຈາກທີ່ບາອາຊາໄດ້ເປັນກະສັດ ລາວກໍຂ້າລູກຫຼານທຸກຄົນຂອງກະສັດເຢໂຣໂບອາມທັນທີ. ລາວບໍ່ໃຫ້ພວກລູກຫຼານຂອງເຢໂຣໂບອາມລອດຊີວິດຈັກຄົນ. ລາວກຳຈັດເຂົາເຈົ້າທຸກຄົນ. ເລື່ອງນີ້ເປັນໄປຕາມທີ່ພະເຢໂຫວາໄດ້ບອກອາຮີຢາຄົນຊີໂລທີ່ເປັນຜູ້ຮັບໃຊ້ຂອງເພິ່ນ.+
30 ເຢໂຣໂບອາມເຈິເລື່ອງແບບນີ້ກໍຍ້ອນວ່າລາວເຮັດຜິດ ແລະເປັນຕົ້ນເຫດພາໃຫ້ພວກອິດສະຣາເອນເຮັດຜິດ ແລະຍ້ອນວ່າລາວເຮັດໃຫ້ພະເຢໂຫວາພະເຈົ້າຂອງພວກອິດສະຣາເອນໃຈຮ້າຍຫຼາຍ.
31 ເລື່ອງຕ່າງໆຂອງນາດາບແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
32 ກະສັດອາຊາກັບກະສັດບາອາຊາຂອງອິດສະຣາເອນໄດ້ເຮັດສົງຄາມຕໍ່ສູ້ກັນຕະຫຼອດ.+
33 ໃນປີທີ 3 ທີ່ກະສັດອາຊາປົກຄອງຢູດາ ບາອາຊາລູກຊາຍຂອງອາຮີຢາກໍເລີ່ມປົກຄອງອິດສະຣາເອນຢູ່ເມືອງຕີຣະຊາ. ລາວປົກຄອງ 24 ປີ.+
34 ບາອາຊາບໍ່ເຊົາເຮັດສິ່ງທີ່ພະເຢໂຫວາເບິ່ງວ່າຊົ່ວ.+ ລາວພາພວກອິດສະຣາເອນເຮັດຜິດຄືກັບທີ່ເຢໂຣໂບອາມໄດ້ເຮັດ.+
ຂໍ
^ ລາວມີອີກຊື່ໜຶ່ງວ່າອາບີຢາ
^ ໝາຍເຖິງລູກຂອງລູກສາວ
^ ເບິ່ງຄືວ່າເປັນອີກຊື່ໜຶ່ງຂອງອັບຊາໂລມ
^ ຫຼື “ຢ່າງສັດຊື່”
^ ແປຕາມໂຕວ່າ “ຕະກຽງ”
^ ຄົນທີ່ຂາຍໂຕເພື່ອພິທີທາງສາສະໜາ
^ ຄຳນີ້ໃນພາສາເຮັບເຣີອາດກ່ຽວຂ້ອງກັບຄຳວ່າ “ຂີ້ສັດ” ແລະໃຊ້ໃນລັກສະນະດູຖູກ
^ ເບິ່ງສ່ວນອະທິບາຍຄຳສັບ
^ ຫຼື “ຟື້ນຟູເມືອງຣາມາຂຶ້ນໃໝ່”
