ກະສັດສະບັບທີໜຶ່ງ 16:1-34
16 ພະເຢໂຫວາບອກບາອາຊາຜ່ານທາງຜູ້ພະຍາກອນເຢຮູ+ລູກຊາຍຂອງຮານານີ+ວ່າ:
2 “ເຮົາໄດ້ຍົກເຈົ້າຂຶ້ນມາຈາກຖານະທີ່ຕ່ຳຕ້ອຍ ແລະໃຫ້ເຈົ້າປົກຄອງພວກອິດສະຣາເອນປະຊາຊົນຂອງເຮົາ.+ ແຕ່ເຈົ້າພັດພາພວກອິດສະຣາເອນເຮັດຜິດຄືກັບທີ່ເຢໂຣໂບອາມໄດ້ເຮັດ ແລະເຮັດໃຫ້ເຮົາໃຈຮ້າຍຍ້ອນຄວາມຜິດທີ່ເຂົາເຈົ້າເຮັດ.+
3 ດັ່ງນັ້ນ ເຮົາຈະກວາດລ້າງເຈົ້າກັບລູກຫຼານຂອງເຈົ້າຄືກັບທີ່ເຮົາໄດ້ເຮັດກັບລູກຫຼານຂອງເຢໂຣໂບອາມ+ລູກຊາຍຂອງເນບັດ.
4 ລູກຫຼານຂອງເຈົ້າຜູ້ທີ່ຕາຍຢູ່ໃນເມືອງຈະຖືກໝາກິນແລະຜູ້ທີ່ຕາຍຢູ່ທົ່ງຫຍ້າຈະຖືກນົກສັບກິນ.”
5 ເລື່ອງຕ່າງໆຂອງບາອາຊາ ສິ່ງທີ່ລາວໄດ້ເຮັດ ແລະຄວາມສຳເລັດຕ່າງໆຂອງລາວກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
6 ເມື່ອບາອາຊາຕາຍ ເຂົາເຈົ້າຝັງລາວໄວ້ຢູ່ເມືອງຕີຣະຊາ.+ ເອລາລູກຊາຍຂອງລາວກໍເປັນກະສັດແທນ.
7 ບາອາຊາເຮັດຄືກັບເຢໂຣໂບອາມແລະລູກຫຼານຂອງລາວໂດຍເຮັດສິ່ງທີ່ພະເຢໂຫວາເບິ່ງວ່າຊົ່ວແລະເຮັດໃຫ້ເພິ່ນໃຈຮ້າຍ ແລະລາວຍັງໄດ້ຂ້ານາດາບນຳອີກ. ຍ້ອນແນວນີ້ ພະເຢໂຫວາຈຶ່ງປະກາດຄຳຕັດສິນຂອງເພິ່ນຕໍ່ບາອາຊາແລະລູກຫຼານຂອງລາວຜ່ານທາງຜູ້ພະຍາກອນເຢຮູລູກຊາຍຂອງຮານານີ.+
8 ໃນປີທີ 26 ທີ່ກະສັດອາຊາປົກຄອງຢູດາ ເອລາລູກຊາຍຂອງບາອາຊາກໍເລີ່ມປົກຄອງອິດສະຣາເອນຢູ່ເມືອງຕີຣະຊາ. ລາວປົກຄອງ 2 ປີ.
9 ຊິມຣີທີ່ເປັນຫົວໜ້າເບິ່ງແຍງກອງທັບລົດມ້າເຄິ່ງໜຶ່ງຂອງເອລາໄດ້ວາງແຜນຂ້າເອລາຕອນທີ່ເອລາກິນເຫຼົ້າເມົາຢູ່ເຮືອນຂອງອາດຊາໃນເມືອງຕີຣະຊາ. ອາດຊາເປັນຜູ້ເບິ່ງແຍງວັງຢູ່ເມືອງຕີຣະຊາ.
10 ຊິມຣີໄດ້ເຂົ້າໄປໃນເຮືອນແລະຂ້າເອລາຕາຍ+ ແລ້ວລາວກໍຕັ້ງໂຕເອງເປັນກະສັດແທນເອລາ. ເລື່ອງນີ້ເກີດຂຶ້ນໃນປີທີ 27 ທີ່ກະສັດອາຊາປົກຄອງຢູດາ.
11 ຫຼັງຈາກຊິມຣີໄດ້ເປັນກະສັດ ລາວກໍຂ້າທຸກຄົນໃນຄອບຄົວຂອງບາອາຊາທັນທີ. ພວກຜູ້ຊາຍ*ທີ່ເປັນພີ່ນ້ອງ*ແລະໝູ່ຂອງບາອາຊາ ລາວກໍຂ້າຖິ້ມໝົດ.
12 ຊິມຣີໄດ້ກວາດລ້າງລູກຫຼານຂອງບາອາຊາຈົນໝົດຕາມທີ່ພະເຢໂຫວາໄດ້ບອກບາອາຊາຜ່ານທາງຜູ້ພະຍາກອນເຢຮູ.+
13 ບາອາຊາແລະເອລາລູກຊາຍຂອງລາວເຈິເລື່ອງແບບນີ້ຍ້ອນຄວາມຜິດທຸກຢ່າງທີ່ເຂົາເຈົ້າໄດ້ເຮັດ. ເຂົາເຈົ້າເປັນຕົ້ນເຫດເຮັດໃຫ້ພະເຢໂຫວາພະເຈົ້າໃຈຮ້າຍໃຫ້ພວກອິດສະຣາເອນ ຍ້ອນເຂົາເຈົ້າພາພວກອິດສະຣາເອນໄປນະມັດສະການຮູບບູຊາທີ່ບໍ່ມີປະໂຫຍດຫຍັງ.+
14 ເລື່ອງຕ່າງໆຂອງເອລາແລະທຸກສິ່ງທີ່ລາວເຮັດກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
15 ໃນປີທີ 27 ທີ່ກະສັດອາຊາປົກຄອງຢູດາ ຊິມຣີກໍຕັ້ງໂຕເອງເປັນກະສັດປົກຄອງອິດສະຣາເອນ. ລາວປົກຄອງ 7 ມື້ຢູ່ເມືອງຕີຣະຊາຕອນທີ່ກອງທັບອິດສະຣາເອນຕັ້ງຄ້າຍຕໍ່ສູ້ຢູ່ເມືອງກິດເບໂທນ+ຂອງພວກຟີລິດສະຕີນ.
16 ເມື່ອກອງທັບອິດສະຣາເອນທີ່ຕັ້ງຄ້າຍຢູ່ຮູ້ວ່າຊິມຣີໄດ້ວາງແຜນແລະຂ້າກະສັດຕາຍແລ້ວ ພວກທະຫານຈຶ່ງໄດ້ຕັ້ງອົມຣີ+ທີ່ເປັນຫົວໜ້າກອງທັບໃຫ້ເປັນກະສັດອິດສະຣາເອນໃນມື້ນັ້ນເລີຍຢູ່ຄ້າຍທະຫານ.
17 ແລ້ວອົມຣີກັບພວກທະຫານກໍເດີນທາງຈາກເມືອງກິດເບໂທນໄປລ້ອມເມືອງຕີຣະຊາ.
18 ເມື່ອຊິມຣີຮູ້ວ່າເມືອງຖືກຍຶດແລ້ວ ລາວກໍເຂົ້າໄປໃນປ້ອມທີ່ຢູ່ໃນວັງຂອງກະສັດ ແລ້ວກໍຈູດວັງເຜົາໂຕເອງຕາຍຢູ່ຫັ້ນ.+
19 ຊິມຣີເຮັດຜິດຍ້ອນລາວເຮັດສິ່ງທີ່ພະເຢໂຫວາເບິ່ງວ່າຊົ່ວ. ລາວເຮັດຄືກັບເຢໂຣໂບອາມທີ່ເປັນຕົ້ນເຫດພາໃຫ້ພວກອິດສະຣາເອນເຮັດຜິດ.+
20 ເລື່ອງຕ່າງໆຂອງຊິມຣີແລະແຜນການຊົ່ວຂອງລາວກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
21 ໃນຕອນນັ້ນ ພວກອິດສະຣາເອນໄດ້ແບ່ງເປັນ 2 ຝ່າຍ. ຝ່າຍໜຶ່ງສະໜັບສະໜູນຕິບນີລູກຊາຍຂອງກີນາດແລະຢາກຕັ້ງຕິບນີໃຫ້ເປັນກະສັດ ສ່ວນອີກຝ່າຍໜຶ່ງສະໜັບສະໜູນອົມຣີ.
22 ແຕ່ພວກທີ່ຢູ່ຝ່າຍອົມຣີໄດ້ຕໍ່ສູ້ຊະນະພວກທີ່ຢູ່ຝ່າຍຕິບນີລູກຊາຍຂອງກີນາດ. ເມື່ອຕິບນີຕາຍ ອົມຣີຈຶ່ງໄດ້ເປັນກະສັດ.
23 ໃນປີທີ 31 ທີ່ກະສັດອາຊາປົກຄອງຢູດາ ອົມຣີກໍເປັນກະສັດປົກຄອງອິດສະຣາເອນ. ລາວປົກຄອງຢູ່ເມືອງຕີຣະຊາ 6 ປີ. ລາວປົກຄອງລວມທັງໝົດ 12 ປີ.
24 ລາວຊື້ພູຊາມາເຣຍຈາກເຊເມເປັນເງິນໜັກ 2 ຕະລັນ* ແລ້ວລາວກໍສ້າງເມືອງຢູ່ເທິງພູໜ່ວຍນັ້ນ. ລາວຕັ້ງຊື່ເມືອງນັ້ນວ່າຊາມາເຣຍ*+ຕາມຊື່ຂອງເຊເມທີ່ເປັນເຈົ້າຂອງພູ.
25 ອົມຣີບໍ່ເຊົາເຮັດສິ່ງທີ່ພະເຢໂຫວາເບິ່ງວ່າຊົ່ວ ແລະລາວກໍຊົ່ວກວ່າທຸກຄົນທີ່ປົກຄອງກ່ອນລາວ.+
26 ລາວເຮັດຊົ່ວຄືກັບເຢໂຣໂບອາມລູກຊາຍຂອງເນບັດ. ລາວເປັນຕົ້ນເຫດເຮັດໃຫ້ພະເຢໂຫວາພະເຈົ້າໃຈຮ້າຍໃຫ້ພວກອິດສະຣາເອນ ຍ້ອນລາວພາພວກອິດສະຣາເອນໄປນະມັດສະການຮູບບູຊາທີ່ບໍ່ມີປະໂຫຍດຫຍັງ.+
27 ເລື່ອງຕ່າງໆຂອງອົມຣີ ສິ່ງທີ່ລາວໄດ້ເຮັດ ແລະຄວາມສຳເລັດຕ່າງໆຂອງລາວກໍຂຽນໄວ້ໃນປຶ້ມປະຫວັດຂອງພວກກະສັດອິດສະຣາເອນ.
28 ເມື່ອອົມຣີຕາຍ ເຂົາເຈົ້າຝັງລາວໄວ້ຢູ່ເມືອງຊາມາເຣຍ. ອາຮາບ+ລູກຊາຍຂອງລາວກໍເປັນກະສັດແທນ.
29 ໃນປີທີ 38 ທີ່ອາຊາປົກຄອງຢູດາ ອາຮາບລູກຊາຍຂອງອົມຣີກໍເປັນກະສັດປົກຄອງອິດສະຣາເອນ. ລາວປົກຄອງຢູ່ເມືອງຊາມາເຣຍ+ 22 ປີ.
30 ອາຮາບລູກຊາຍຂອງອົມຣີເຮັດສິ່ງທີ່ພະເຢໂຫວາເບິ່ງວ່າຊົ່ວ. ລາວຊົ່ວຫຼາຍກວ່າທຸກຄົນທີ່ປົກຄອງກ່ອນລາວ.+
31 ອາຮາບບໍ່ພຽງແຕ່ເຮັດຊົ່ວຄືກັບເຢໂຣໂບອາມ+ລູກຊາຍຂອງເນບັດເທົ່ານັ້ນ ແຕ່ລາວໄດ້ແຕ່ງດອງກັບເຢເຊເບນ+ລູກສາວຂອງເອັດບາອານກະສັດຊີໂດນ+ ແລະລາວເລີ່ມນະມັດສະການຂາບໄຫວ້ພະບາອານ.+
32 ນອກຈາກນັ້ນ ລາວຍັງເຮັດແທ່ນບູຊາໃຫ້ພະບາອານ+ຢູ່ວິຫານທີ່ລາວສ້າງໃຫ້ພະບາອານໃນເມືອງຊາມາເຣຍ.
33 ອາຮາບຍັງໄດ້ເຮັດເສົາໄມ້ສັກສິດ*+ນຳອີກ. ລາວໄດ້ເຮັດໃຫ້ພະເຢໂຫວາພະເຈົ້າຂອງອິດສະຣາເອນໃຈຮ້າຍຫຼາຍກວ່າກະສັດທຸກອົງທີ່ປົກຄອງກ່ອນລາວ.
34 ຕອນທີ່ອາຮາບປົກຄອງ ຮີເອນຄົນເບເທນໄດ້ຟື້ນຟູເມືອງເຢຣິໂກຂຶ້ນມາໃໝ່. ຕອນທີ່ລາວວາງຮາກຖານຂອງເມືອງ ອາບີຣາມລູກຊາຍກົກຂອງລາວກໍຕາຍ ແລະຕອນທີ່ລາວໃສ່ປະຕູເມືອງເສກຸບ ລູກຊາຍຫຼ້າຂອງລາວກໍຕາຍ. ເລື່ອງນີ້ເປັນໄປຕາມທີ່ພະເຢໂຫວາໄດ້ບອກຜ່ານທາງໂຢຊວຍລູກຊາຍຂອງນູນ.+
ຂໍ
^ ແປຕາມໂຕວ່າ “ຄົນທີ່ຍ່ຽວໃສ່ກຳແພງ.” ເປັນສຳນວນພາສາເຮັບເຣີໝາຍເຖິງຜູ້ຊາຍແລະໃຊ້ໃນແບບດູຖູກ.
^ ຫຼື “ຜູ້ທີ່ມີສິດແກ້ແຄ້ນ”
^ 68,4 ກິໂລກຣາມ. ເບິ່ງພາກຜະໜວກ ຂ14.
^ ແປຕາມໂຕວ່າ “ເປັນຂອງພວກເຊເມ”
^ ເບິ່ງສ່ວນອະທິບາຍຄຳສັບ
