ກະສັດສະບັບທີໜຶ່ງ 19:1-21
19 ອາຮາບ+ເລົ່າທຸກສິ່ງທີ່ເອລີຢາເຮັດໃຫ້ເຢເຊເບນ+ຟັງ ລວມທັງເລື່ອງທີ່ເອລີຢາໄດ້ຂ້າພວກຜູ້ພະຍາກອນທຸກຄົນຂອງພະບາອານ.+
2 ເຢເຊເບນຈຶ່ງໃຫ້ຄົນໄປບອກເອລີຢາວ່າ: “ມື້ອື່ນໃນໂມງນີ້ ຖ້າຂ້ອຍບໍ່ໄດ້ຂ້າເຈົ້າໃຫ້ຕາຍຄືກັບພວກຜູ້ພະຍາກອນທີ່ເຈົ້າຂ້າ ຂໍໃຫ້ພະເຈົ້າທັງຫຼາຍລົງໂທດຂ້ອຍໜັກໆໂລດ!”
3 ເອລີຢາຢ້ານຫຼາຍ ລາວຈຶ່ງໜີ+ໄປຮອດເມືອງເບເອເຊບາ+ທີ່ຢູ່ໃນເຂດຂອງຕະກູນຢູດາ+ ແລະລາວໄດ້ປະຄົນຮັບໃຊ້ຂອງລາວໄວ້ຫັ້ນ.
4 ລາວເຂົ້າໄປໃນບ່ອນກັນດານແລະຍ່າງຕໍ່ໄປອີກ 1 ມື້ ແລ້ວໄປນັ່ງຢູ່ກ້ອງຟຸ່ມໄມ້ແລະອະທິດຖານຂໍໃຫ້ໂຕເອງຕາຍ. ລາວເວົ້າວ່າ: “ພະເຢໂຫວາເອີ້ຍ ພໍແລ້ວ! ຂ້າລູກໃຫ້ຕາຍສະ!+ ລູກບໍ່ໄດ້ດີກວ່າປູ່ຍ່າຕານາຍຂອງລູກດອກ.”
5 ແລ້ວລາວກໍນອນຫຼັບຢູ່ກ້ອງຟຸ່ມໄມ້ນັ້ນ. ທັນໃດນັ້ນກໍມີທູດສະຫວັນອົງໜຶ່ງມາແຕະໂຕລາວ+ແລະເວົ້າວ່າ: “ລຸກມາກິນເຂົ້າແມ້.”+
6 ເມື່ອລາວແນມເບິ່ງກໍເຫັນວ່າຢູ່ໃກ້ໆຫົວຂອງລາວມີເຂົ້າຈີ່ມົນໆກ້ອນໜຶ່ງຢອງຢູ່ເທິງກ້ອນຫີນທີ່ຮ້ອນໆແລະມີໂຖນ້ຳຢູ່ນຳ. ລາວລຸກຂຶ້ນມາກິນແລ້ວກໍນອນຕໍ່.
7 ຕໍ່ມາ ທູດສະຫວັນຂອງພະເຢໂຫວາມາຫາລາວອີກ ແລ້ວກໍແຕະໂຕລາວແລະເວົ້າວ່າ: “ລຸກມາກິນເຂົ້າແມ້ ຍ້ອນວ່າເຈົ້າຕ້ອງເດີນທາງໄກຫຼາຍ.”
8 ເອລີຢາກໍລຸກມາກິນເຂົ້າກິນນ້ຳ. ຂອງກິນຄາບນັ້ນເຮັດໃຫ້ລາວມີແຮງເດີນທາງຕໍ່ໄປໄດ້ອີກ 40 ມື້ 40 ຄືນຈົນຮອດພູໂຮເຣັບເຊິ່ງເປັນພູຂອງພະເຈົ້າທ່ຽງແທ້.+
9 ເມື່ອໄປຮອດ ລາວກໍເຂົ້າໄປໃນຖ້ຳ+ແລະນອນຄ້າງຄືນຢູ່ຫັ້ນ. ແລ້ວພະເຢໂຫວາກໍຖາມລາວວ່າ: “ເອລີຢາ ເຈົ້າມາເຮັດຫຍັງຢູ່ນີ້?”
10 ລາວຕອບວ່າ: “ລູກຮັບໃຊ້ພະເຢໂຫວາຜູ້ບັນຊາການກອງທັບດ້ວຍສຸດຫົວໃຈ+ ແຕ່ພວກອິດສະຣາເອນບໍ່ເຮັດຕາມຄຳສັນຍາທີ່ເຮັດກັບພະອົງ.+ ເຂົາເຈົ້າມ້າງແທ່ນບູຊາຂອງພະອົງຖິ້ມແລະກໍຍັງຂ້າຜູ້ພະຍາກອນຂອງພະອົງນຳອີກ.+ ຕອນນີ້ເຫຼືອແຕ່ລູກຄົນດຽວແລະເຂົາເຈົ້າກໍກຳລັງຊອກຂ້າລູກ.”+
11 ແຕ່ພະເຈົ້າບອກລາວວ່າ: “ໃຫ້ອອກຈາກຖ້ຳແລະໄປຢືນຢູ່ພູນີ້ຕໍ່ໜ້າພະເຢໂຫວາ.” ເມື່ອເອລີຢາອອກໄປ ພະເຢໂຫວາໄດ້ກາຍລາວໄປ+ແລະກໍມີລົມພາຍຸພັດມາບັກແຮງໆຈົນເຮັດໃຫ້ພູແຍກອອກຈາກກັນ ແລະຜາກໍແຕກອອກຈາກກັນຕໍ່ໜ້າພະເຢໂຫວາ+ ແຕ່ພະເຢໂຫວາບໍ່ໄດ້ຢູ່ໃນລົມພາຍຸນັ້ນ. ຫຼັງຈາກລົມພາຍຸກໍມີແຜ່ນດິນໄຫວ+ ແຕ່ພະເຢໂຫວາກໍບໍ່ໄດ້ຢູ່ໃນແຜ່ນດິນໄຫວນັ້ນ.
12 ຫຼັງຈາກແຜ່ນດິນໄຫວກໍມີໄຟລຸກ+ບັກແຮງໆ ແຕ່ພະເຢໂຫວາກໍບໍ່ໄດ້ຢູ່ໃນໄຟນັ້ນ. ຫຼັງຈາກໄຟລຸກກໍມີສຽງເວົ້າຄ່ອຍໆແລະນຸ້ມນວນ.+
13 ເມື່ອເອລີຢາໄດ້ຍິນສຽງນັ້ນ ລາວກໍເອົາເສື້ອ*ມາບັງໜ້າໄວ້+ແລະອອກໄປຢືນຢູ່ປາກຖ້ຳ ແລ້ວກໍມີສຽງຖາມລາວວ່າ: “ເອລີຢາ ເຈົ້າມາເຮັດຫຍັງຢູ່ນີ້?”
14 ລາວຕອບວ່າ: “ລູກຮັບໃຊ້ພະເຢໂຫວາຜູ້ບັນຊາການກອງທັບດ້ວຍສຸດຫົວໃຈ ແຕ່ພວກອິດສະຣາເອນບໍ່ເຮັດຕາມຄຳສັນຍາທີ່ເຮັດກັບພະອົງ.+ ເຂົາເຈົ້າມ້າງແທ່ນບູຊາຂອງພະອົງຖິ້ມແລະກໍຍັງຂ້າຜູ້ພະຍາກອນຂອງພະອົງນຳອີກ. ຕອນນີ້ເຫຼືອແຕ່ລູກຄົນດຽວແລະເຂົາເຈົ້າກໍກຳລັງຊອກຂ້າລູກ.”+
15 ພະເຢໂຫວາບອກລາວວ່າ: “ໃຫ້ເຈົ້າກັບເມືອ ແລ້ວໄປບ່ອນກັນດານດາມາເຊ. ເມື່ອໄປຮອດຫັ້ນໃຫ້ເຈົ້າແຕ່ງຕັ້ງຮາຊາເອນ+ເປັນກະສັດຊີເຣຍ.
16 ໃຫ້ເຈົ້າແຕ່ງຕັ້ງເຢຮູ+ຫຼານຊາຍຂອງນິມຊີເປັນກະສັດອິດສະຣາເອນ ແລະແຕ່ງຕັ້ງເອລີຊາລູກຊາຍຂອງຊາຟາດຄົນອາເບັນເມໂຮລາໃຫ້ເປັນຜູ້ພະຍາກອນແທນເຈົ້າ.+
17 ຜູ້ທີ່ລອດຈາກດາບຂອງຮາຊາເອນ+ຈະຖືກເຢຮູຂ້າ+ ແລະຜູ້ທີ່ລອດຈາກດາບຂອງເຢຮູຈະຖືກເອລີຊາ*ຂ້າ.+
18 ເຮົາຍັງມີອີກ 7.000 ຄົນໃນອິດສະຣາເອນ+ທີ່ບໍ່ໄດ້ຄູ້ເຂົ່າລົງນະມັດສະການພະບາອານ+ແລະບໍ່ໄດ້ຈູບພະບາອານ.”+
19 ເອລີຢາຈຶ່ງໄປຈາກບ່ອນນັ້ນ ແລະໄປຫາເອລີຊາລູກຊາຍຂອງຊາຟາດທີ່ກຳລັງໄຖນາຢູ່. ຕອນນັ້ນ ມີງົວ 12 ຄູ່ຢູ່ທາງໜ້າເອລີຊາ ແລະລາວຢູ່ກັບຄູ່ທີ 12. ເອລີຢາຍ່າງໄປຫາເອລີຊາແລ້ວເອົາຊຸດຜູ້ພະຍາກອນ+ໃສ່ໃຫ້ລາວ.
20 ເອລີຊາກໍປະງົວໄວ້ ແລ້ວແລ່ນນຳຫຼັງເອລີຢາແລະເວົ້າວ່າ: “ຂ້ອຍຂໍໄປຈູບລາພໍ່ແມ່ກ່ອນແລ້ວຂ້ອຍຈະໄປນຳທ່ານ.” ເອລີຢາຈຶ່ງບອກລາວວ່າ: “ໄປໂລດ ຂ້ອຍບໍ່ໄດ້ຫ້າມເຈົ້າ.”
21 ແລ້ວເອລີຊາກໍກັບໄປ. ລາວເອົາງົວຄູ່ໜຶ່ງມາເຜົາເປັນເຄື່ອງບູຊາແລະເອົາຄັນໄຖໄປເຮັດຟືນເພື່ອຕົ້ມຊີ້ນງົວນັ້ນແລ້ວຢາຍໃຫ້ປະຊາຊົນກິນ. ຫຼັງຈາກນັ້ນ ເອລີຊາກໍໄປກັບເອລີຢາແລະເລີ່ມຮັບໃຊ້ລາວ.+
