ຂ່າວຄາວສະບັບທີໜຶ່ງ 10:1-14
-
ຊາອູນກັບພວກລູກຊາຍຕາຍ (1-14)
10 ມີມື້ໜຶ່ງພວກຟີລິດສະຕີນມາຕໍ່ສູ້ກັບພວກອິດສະຣາເອນ ພວກທະຫານອິດສະຣາເອນຕໍ່ສູ້ບໍ່ໄຫວຈຶ່ງໜີ ແລະມີຫຼາຍຄົນຖືກຂ້າຢູ່ເທິງພູກິນໂບອາ.+
2 ພວກທະຫານຟີລິດສະຕີນໄລ່ທັນຊາອູນກັບພວກລູກຊາຍ ແລ້ວໄດ້ຂ້າໂຢນາທານ ອາບີນາດາບ ແລະມັນກີຊົວ+ທີ່ເປັນລູກຊາຍຂອງຊາອູນ.
3 ເຂົາເຈົ້າຕໍ່ສູ້ກັບຊາອູນຢ່າງດຸເດືອດ. ເມື່ອພວກທະຫານຍິງທະນູເຫັນຊາອູນ ເຂົາເຈົ້າກໍຍິງທະນູໃສ່ລາວຈົນເຈັບໜັກ.+
4 ຊາອູນເວົ້າກັບຜູ້ທີ່ຖືອາວຸດໃຫ້ລາວວ່າ: “ເອົາດາບຂອງເຈົ້າມາແທງຂ້ອຍໃຫ້ຕາຍເພື່ອບໍ່ໃຫ້ພວກທີ່ນັບຖືພະເຈົ້າປອມ*ເຮັດກັບຂ້ອຍແບບໂຫດໆ+ແລ້ວກໍຂ້າຂ້ອຍ.” ແຕ່ທະຫານຜູ້ນັ້ນບໍ່ຍອມເຮັດຍ້ອນຢ້ານຫຼາຍ. ຊາອູນຈຶ່ງຖອດດາບຂອງໂຕເອງອອກມາແລ້ວຂ້າໂຕຕາຍ.+
5 ເມື່ອຜູ້ທີ່ຖືອາວຸດເຫັນວ່າຊາອູນຕາຍແລ້ວ ລາວກໍຖອດດາບອອກມາແລ້ວຂ້າໂຕຕາຍຄືກັນ.
6 ສະຫຼຸບແລ້ວ ຊາອູນ ລູກຊາຍ 3 ຄົນຂອງລາວ ແລະຄົນຂອງລາວຕາຍໃນການຕໍ່ສູ້ເທື່ອນີ້.+
7 ເມື່ອພວກອິດສະຣາເອນທີ່ຢູ່ແຖວຮ່ອມພູຮູ້ວ່າທຸກຄົນໜີໄປແລະຊາອູນກັບພວກລູກຊາຍກໍຕາຍແລ້ວ ເຂົາເຈົ້າຈຶ່ງປະຖິ້ມເຮືອນຊານແລະກໍໜີໄປຄືກັນ ແລ້ວພວກຟີລິດສະຕີນກໍເຂົ້າມາຍຶດເອົາເມືອງຂອງເຂົາເຈົ້າ.
8 ມື້ຕໍ່ມາ ເມື່ອພວກຟີລິດສະຕີນມາປົດເອົາເຄື່ອງຈາກສົບຄົນຕາຍ ເຂົາເຈົ້າກໍເຫັນວ່າຊາອູນກັບພວກລູກຊາຍຕາຍຢູ່ເທິງພູກິນໂບອາ.+
9 ເຂົາເຈົ້າຈຶ່ງຕັດຫົວຊາອູນ ແກ້ເອົາຊຸດນັກຮົບກັບອາວຸດຂອງລາວ ແລ້ວສົ່ງຂ່າວໄປວິຫານຂອງພະເຈົ້າປອມ+ແລະບອກຄົນທົ່ວແຜ່ນດິນຟີລິດສະຕີນໃຫ້ຮູ້ເລື່ອງນີ້.
10 ຈາກນັ້ນ ພວກຟີລິດສະຕີນກໍເອົາຊຸດນັກຮົບກັບອາວຸດຂອງຊາອູນໄປໄວ້ໃນວິຫານພະເຈົ້າຂອງເຂົາເຈົ້າ ແລະເອົາຫົວລາວໄປຫ້ອຍໄວ້ຢູ່ວິຫານຂອງພະດາໂກນ.+
11 ເມື່ອທຸກຄົນທີ່ຢູ່ເມືອງຢາເບັດ+ໃນກິລຽດໄດ້ຍິນສິ່ງທີ່ພວກຟີລິດສະຕີນເຮັດກັບຊາອູນ+
12 ພວກທະຫານທຸກຄົນຈາກເມືອງນັ້ນກໍໄປເອົາສົບຂອງຊາອູນແລະພວກລູກຊາຍຂອງລາວກັບມາເມືອງຢາເບັດ. ເຂົາເຈົ້າເອົາກະດູກຂອງຊາອູນກັບພວກລູກຊາຍໄປຝັງຢູ່ກ້ອງຕົ້ນໄມ້ໃຫຍ່ໃນເມືອງຢາເບັດ+ ແລະພາກັນອົດເຂົ້າ 7 ມື້.
13 ຊາອູນຕາຍຍ້ອນລາວບໍ່ສັດຊື່ຕໍ່ພະເຢໂຫວາ. ລາວບໍ່ໄດ້ເຊື່ອຟັງຄຳສັ່ງຂອງພະເຢໂຫວາ+ ແລະລາວຍັງຂໍໃຫ້ໝໍຜີຊ່ວຍ+
14 ແທນທີ່ຈະຂໍໃຫ້ພະເຢໂຫວາຊ່ວຍ. ດັ່ງນັ້ນ ເພິ່ນຈຶ່ງໃຫ້ຊາອູນຕາຍ ແລະໃຫ້ດາວິດລູກຊາຍຂອງເຢຊີເປັນກະສັດແທນລາວ.+
ຂໍ ຄວາມ ໄຂ ເງື່ອນ
^ ພວກທີ່ບໍ່ໄດ້ຮັບສິນຕັດ