ຂ່າວຄາວສະບັບທີໜຶ່ງ 28:1-21
28 ດາວິດໄດ້ເອີ້ນພວກເຈົ້ານາຍທຸກຄົນໃນອິດສະຣາເອນມາເມືອງເຢຣູຊາເລັມ. ຄົນເຫຼົ່ານັ້ນມີ: ພວກຫົວໜ້າຕະກູນ ພວກຫົວໜ້າກອງທະຫານຂອງກະສັດ+ ພວກຫົວໜ້າກອງພັນ ພວກຫົວໜ້າກອງຮ້ອຍ+ ພວກຫົວໜ້າທີ່ເບິ່ງແຍງຊັບສິນແລະຝູງສັດທັງໝົດຂອງກະສັດ+ກັບຂອງພວກລູກຊາຍກະສັດ+ ພວກທີ່ເຮັດວຽກຢູ່ໃນວັງ ຄົນທີ່ກ້າຫານແລະຄົນທີ່ມີຄວາມສາມາດ.+
2 ກະສັດດາວິດຢືນຂຶ້ນແລ້ວເວົ້າວ່າ:
“ພີ່ນ້ອງຂອງຂ້ອຍແລະປະຊາຊົນຂອງຂ້ອຍ ຂໍໃຫ້ຟັງຂ້ອຍ. ໃຈແທ້ໆຂ້ອຍຢາກສ້າງວິຫານເພື່ອເປັນບ່ອນໄວ້ຫີບສັນຍາຂອງພະເຢໂຫວາແລະເປັນບ່ອນວາງຕີນສຳລັບພະເຈົ້າຂອງເຮົາ+ ແລະຂ້ອຍກໍກຽມທີ່ຈະສ້າງແລ້ວ.+
3 ແຕ່ພະເຈົ້າທ່ຽງແທ້ບອກຂ້ອຍວ່າ ‘ເຈົ້າຈະບໍ່ໄດ້ສ້າງວິຫານເພື່ອສັນລະເສີນຊື່ຂອງເຮົາ+ ຍ້ອນເຈົ້າເຮັດສົງຄາມແລະຂ້າຄົນຕາຍຫຼາຍ.’+
4 ແຕ່ພະເຢໂຫວາພະເຈົ້າຂອງອິດສະຣາເອນໄດ້ເລືອກຂ້ອຍຈາກຕະກູນຂອງພໍ່ຂ້ອຍໃຫ້ເປັນກະສັດປົກຄອງອິດສະຣາເອນຕະຫຼອດໄປ.+ ເພິ່ນໄດ້ເລືອກຢູດາໃຫ້ເປັນຜູ້ນຳ.+ ໃນຕະກູນຢູດາ ເພິ່ນໄດ້ເລືອກຕະກູນຂອງພໍ່ຂ້ອຍ+ ແລະໃນພວກລູກຊາຍຂອງພໍ່ຂ້ອຍ ເພິ່ນໄດ້ເລືອກຂ້ອຍໃຫ້ເປັນກະສັດປົກຄອງອິດສະຣາເອນ.+
5 ພະເຢໂຫວາໄດ້ໃຫ້ຂ້ອຍມີລູກຊາຍຫຼາຍຄົນ+ ແລະໃນພວກລູກຊາຍຂອງຂ້ອຍ ພະເຢໂຫວາໄດ້ເລືອກໂຊໂລໂມນ+ໃຫ້ນັ່ງເທິງບັນລັງທີ່ເພິ່ນຈັດໃຫ້ເພື່ອປົກຄອງອິດສະຣາເອນ.+
6 ເພິ່ນບອກຂ້ອຍວ່າ ‘ໂຊໂລໂມນລູກຊາຍຂອງເຈົ້າຈະເປັນຜູ້ສ້າງວິຫານແລະເດີ່ນວິຫານໃຫ້ເຮົາ ຍ້ອນເຮົາເລືອກລາວໃຫ້ເປັນລູກຊາຍຂອງເຮົາແລະເຮົາຈະເປັນພໍ່ຂອງລາວ.+
7 ເຮົາຈະໃຫ້ລາວປົກຄອງຢ່າງໝັ້ນຄົງຕະຫຼອດໄປ+ ຖ້າລາວເຊື່ອຟັງຄຳສັ່ງຂອງເຮົາແລະເຮັດຕາມການຕັດສິນຂອງເຮົາ+ຄືກັບທີ່ລາວເຮັດຢູ່ໃນຕອນນີ້.’
8 ຂ້ອຍຂໍເວົ້າຕໍ່ໜ້າປະຊາຊົນຂອງພະເຢໂຫວາທຸກຄົນແລະຕໍ່ໜ້າພະເຈົ້າຂອງພວກເຮົາວ່າ ໃຫ້ພວກເຈົ້າເຊື່ອຟັງແລະເຮັດຕາມຄຳສັ່ງທຸກຢ່າງຂອງພະເຢໂຫວາພະເຈົ້າຂອງພວກເຈົ້າເພື່ອພວກເຈົ້າຈະໄດ້ຢູ່ແຜ່ນດິນທີ່ດີນີ້ຕໍ່ໄປ+ ແລະເອົາແຜ່ນດິນນີ້ເປັນມູນມໍລະດົກໃຫ້ລູກຫຼານຂອງພວກເຈົ້າຕໍ່ໆໄປ.
9 ໂຊໂລໂມນລູກພໍ່ ລູກຕ້ອງຮູ້ຈັກພະເຈົ້າຂອງພໍ່. ໃຫ້ລູກຮັບໃຊ້ເພິ່ນດ້ວຍສຸດຫົວໃຈ+ແລະຢ່າງມີຄວາມສຸກ* ຍ້ອນພະເຢໂຫວາກວດເບິ່ງຫົວໃຈຂອງທຸກຄົນ+ແລະຮູ້ຄວາມຄິດທຸກຢ່າງ.+ ຖ້າລູກຊອກຫາເພິ່ນ ລູກກໍຈະພົບເພິ່ນ+ ແຕ່ຖ້າລູກຖິ້ມເພິ່ນ ເພິ່ນກໍຈະຖິ້ມລູກຕະຫຼອດໄປ.+
10 ພະເຢໂຫວາເລືອກລູກໃຫ້ສ້າງວິຫານທີ່ສັກສິດຂອງເພິ່ນ. ໃຫ້ລູກກ້າຫານແລະເລີ່ມເຮັດໂລດ.”
11 ຈາກນັ້ນ ດາວິດໄດ້ເອົາແບບກໍ່ສ້າງ+ໃຫ້ໂຊໂລໂມນລູກຊາຍຂອງລາວ. ໃນແບບນັ້ນມີ: ຫ້ອງທີ່ຢູ່ທາງເຂົ້າທາງໜ້າ+ ຫ້ອງມ້ຽນເຄື່ອງ ຫ້ອງຊັ້ນເທິງ ຫ້ອງຕ່າງໆທີ່ຢູ່ທາງໃນ ຫ້ອງທີ່ພະເຈົ້າຍົກໂທດຄວາມຜິດ*ກັບຫ້ອງອື່ນໆ+
12 ເດີ່ນວິຫານຂອງພະເຢໂຫວາ+ ຫ້ອງກິນເຂົ້າອ້ອມວິຫານ ຄັງຊັບສິນໃນວິຫານຂອງພະເຈົ້າທ່ຽງແທ້ ແລະຄັງຊັບສິນສຳລັບເຄື່ອງຕ່າງໆທີ່ບໍລິສຸດ.*+ ພະເຈົ້າໃຊ້ພະລັງບໍລິສຸດຂອງເພິ່ນເພື່ອຊ່ວຍດາວິດໃຫ້ຮູ້ວ່າ*ວິຫານຕ້ອງເປັນແບບໃດ.
13 ດາວິດສອນໂຊໂລໂມນກ່ຽວກັບວິທີແບ່ງພວກປະໂລຫິດ+ແລະພວກເລວີເປັນກຸ່ມ ເລື່ອງໜ້າທີ່ຕ່າງໆໃນວິຫານຂອງພະເຢໂຫວາ ແລະເລື່ອງເຄື່ອງໃຊ້ຕ່າງໆທີ່ໃຊ້ໃນການນະມັດສະການຢູ່ວິຫານຂອງພະເຢໂຫວາ.
14 ນອກຈາກນັ້ນ ດາວິດຍັງບອກໂຊໂລໂມນວ່າຕ້ອງໃຊ້ຄຳແລະເງິນໜັກເທົ່າໃດເພື່ອເຮັດເຄື່ອງໃຊ້ທີ່ເປັນເງິນເປັນຄຳໃນການນະມັດສະການ
15 ຕ້ອງໃຊ້ເງິນແລະຄຳໜັກເທົ່າໃດເພື່ອເຮັດຂາຕະກຽງເງິນ ຂາຕະກຽງຄຳ+ ຕະກຽງເງິນແລະຕະກຽງຄຳ
16 ຕ້ອງໃຊ້ຄຳໜັກເທົ່າໃດເພື່ອເຮັດໂຕະຄຳສຳລັບວາງເຂົ້າຈີ່ທີ່ຢອງຊ້ອນກັນ*+ ຕ້ອງໃຊ້ເງິນໜັກເທົ່າໃດເພື່ອເຮັດໂຕະເງິນ
17 ແລະຕ້ອງໃຊ້ຄຳແທ້ໜັກເທົ່າໃດເພື່ອເຮັດສ້ອມ ຖ້ວຍ ໂຖໃສ່ນ້ຳ ແລະຕ້ອງໃຊ້ເງິນແລະຄຳໜັກເທົ່າໃດເພື່ອເຮັດຖ້ວຍນ້ອຍເງິນຖ້ວຍນ້ອຍຄຳ.+
18 ດາວິດຍັງບອກວ່າຕ້ອງໃຊ້ຄຳແທ້ໜັກເທົ່າໃດເພື່ອເຮັດແທ່ນບູຊາເຜົາເຄື່ອງຫອມ+ແລະເພື່ອເຮັດເຄຣູບ+ເຊິ່ງໝາຍເຖິງລາຊະລົດຂອງພະເຈົ້າ.*+ ເຄຣູບນີ້ພືປີກອອກແລະຫີບສັນຍາຂອງພະເຢໂຫວາກໍຢູ່ກ້ອງປີກຂອງເຄຣູບ.
19 ດາວິດເວົ້າກັບໂຊໂລໂມນວ່າ: “ພະເຢໂຫວາໄດ້ຊີ້ນຳພໍ່ແລະຊ່ວຍພໍ່ໃຫ້ມີຄວາມເຂົ້າໃຈເພື່ອຈະແຕ້ມແບບກໍ່ສ້າງນີ້ໄດ້.”+
20 ດາວິດເວົ້າກັບໂຊໂລໂມນຕື່ມອີກວ່າ: “ໃຫ້ລູກກ້າຫານ ເຂັ້ມແຂງ ແລະເລີ່ມເຮັດໂລດ. ລູກບໍ່ຕ້ອງຢ້ານເພາະວ່າພະເຢໂຫວາພະເຈົ້າຂອງພໍ່ຢູ່ກັບລູກ+ ເພິ່ນຈະບໍ່ປະຖິ້ມລູກ.+ ພະເຢໂຫວາຈະຢູ່ກັບລູກຈົນລູກສ້າງວິຫານຂອງເພິ່ນແລ້ວ.
21 ພວກປະໂລຫິດແລະພວກເລວີທີ່ແບ່ງເປັນກຸ່ມ+ກໍພ້ອມແລ້ວທີ່ຈະເຮັດວຽກໃນວິຫານຂອງພະເຈົ້າທ່ຽງແທ້. ຄົນທີ່ເຮັດວຽກເກັ່ງແລະຄົນທີ່ເຕັມໃຈເຮັດວຽກກໍຢູ່ນຳລູກແລ້ວ+ ແລະພວກຫົວໜ້າ+ກັບປະຊາຊົນຈະເຮັດຕາມທຸກຢ່າງທີ່ລູກບອກ.”
ຂໍ
^ ຫຼື “ແລະດ້ວຍຄວາມເຕັມໃຈ”
^ ຫຼື “ຫ້ອງທີ່ເອົາຝາຫີບໄວ້.” ໝາຍເຖິງຝາຂອງຫີບສັນຍາ.
^ ຫຼື “ສິ່ງຕ່າງໆທີ່ແຍກໄວ້ຕ່າງຫາກສຳລັບພະເຈົ້າ”
^ ຫຼື “ພະເຈົ້າດົນໃຈດາວິດເພື່ອຊ່ວຍໃຫ້ລາວຮູ້ວ່າ”
^ ໝາຍເຖິງເຂົ້າຈີ່ທີ່ຕັ້ງໄວ້. ເບິ່ງສ່ວນອະທິບາຍຄຳສັບ.
^ ລົດທີ່ກະສັດໃຊ້ໃນສະໄໝບູຮານ
