ຊາມູເອນສະບັບທີໜຶ່ງ 11:1-15
11 ນາຮາດກະສັດຂອງອຳໂມນ+ໄດ້ມາຕັ້ງຄ້າຍຕໍ່ສູ້ພວກຢາເບັດ+ຢູ່ເມືອງກິລຽດ. ພວກຢາເບັດຈຶ່ງເວົ້າກັບນາຮາດວ່າ: “ຂໍເຮັດສັນຍາກັບພວກເຮົາ ແລ້ວພວກເຮົາຈະຮັບໃຊ້ເຈົ້າ.”
2 ນາຮາດກະສັດອຳໂມນຈຶ່ງເວົ້າວ່າ: “ຂ້ອຍເຮັດສັນຍາກັບພວກເຈົ້າກະໄດ້ ແຕ່ຕ້ອງມີເງື່ອນໄຂ. ຂ້ອຍຈະຈົກຕາເບື້ອງຂວາຂອງພວກເຈົ້າທຸກຄົນອອກ. ຂ້ອຍຈະເຮັດແບບນີ້ເພື່ອໃຫ້ພວກອິດສະຣາເອນທຸກຄົນເສຍສັກສີ.”
3 ພວກຜູ້ນຳຂອງຢາເບັດຕອບລາວວ່າ: “ພວກເຮົາຂໍເວລາ 7 ມື້ເພື່ອຈະສົ່ງຄົນໄປແຈ້ງຂ່າວທົ່ວເຂດອິດສະຣາເອນ. ຖ້າບໍ່ມີຜູ້ໃດມາຊ່ວຍ ພວກເຮົາຈະຍອມແພ້ເຈົ້າ.”
4 ເມື່ອຄົນສົ່ງຂ່າວໄປຮອດເມືອງກີເບອາ+ທີ່ຊາອູນຢູ່ແລະແຈ້ງຂ່າວໃຫ້ປະຊາຊົນຮູ້ ປະຊາຊົນກໍຮ້ອງໄຫ້ສຽງດັງ.
5 ຕອນທີ່ຊາອູນຍ່າງນຳຫຼັງຝູງສັດກັບມາຈາກທົ່ງຫຍ້າ ລາວຖາມວ່າ: “ເກີດຫຍັງຂຶ້ນ? ເປັນຫຍັງທຸກຄົນຈຶ່ງໄຫ້?” ເຂົາເຈົ້າຈຶ່ງເລົ່າໃຫ້ລາວຟັງເລື່ອງທີ່ຄົນຈາກເມືອງຢາເບັດມາບອກ.
6 ເມື່ອຊາອູນໄດ້ຍິນເລື່ອງນັ້ນ ລາວກໍໄດ້ຮັບພະລັງຈາກພະເຈົ້າ+ ລາວຈຶ່ງໃຈຮ້າຍຫຼາຍ.
7 ຊາອູນໄດ້ເອົາງົວໂຕຜູ້ 2 ໂຕມາຂ້າແລະຕັດເປັນຕ່ອນ ແລ້ວໃຫ້ຜູ້ສົ່ງຂ່າວເອົາໄປຢາຍທົ່ວເຂດອິດສະຣາເອນ. ຜູ້ສົ່ງຂ່າວເວົ້າວ່າ: “ຖ້າໃຜບໍ່ເຮັດຕາມທີ່ຊາອູນແລະຊາມູເອນບອກ ຝູງງົວຂອງລາວກໍຈະເປັນແບບນີ້!” ພວກອິດສະຣາເອນມີຄວາມນັບຖືຕໍ່ພະເຢໂຫວາຫຼາຍ ເຂົາເຈົ້າຈຶ່ງພ້ອມໃຈກັນອອກໄປຕໍ່ສູ້.
8 ຊາອູນນັບຈຳນວນຄົນຢູ່ເບເຊັກ ມີ 30.000 ຄົນຈາກຕະກູນຢູດາແລະມີ 300.000 ຄົນຈາກຕະກູນອື່ນໆຂອງອິດສະຣາເອນ.
9 ຊາອູນແລະທະຫານຈຶ່ງບອກພວກຜູ້ສົ່ງຂ່າວວ່າ: “ໃຫ້ໄປບອກພວກຢາເບັດໃນກິລຽດວ່າ ‘ມື້ອື່ນຕອນສວາຍພວກເຈົ້າຈະລອດ.’” ພວກຜູ້ສົ່ງຂ່າວກໍໄປບອກພວກຢາເບັດຕາມນັ້ນແລະເຂົາເຈົ້າກໍດີໃຈຫຼາຍ.
10 ພວກຢາເບັດຈຶ່ງໄປບອກນາຮາດວ່າ: “ມື້ອື່ນພວກເຮົາຈະຍອມແພ້ເຈົ້າ ເຈົ້າຢາກເຮັດຫຍັງກັບພວກເຮົາກໍເຮັດໂລດ.”+
11 ມື້ຕໍ່ມາ ຊາອູນໄດ້ແບ່ງທະຫານອອກເປັນ 3 ກອງ. ເຂົາເຈົ້າບຸກເຂົ້າໄປໃນຄ້າຍຕອນເດິກໆ* ແລະນຳຂ້າພວກອຳໂມນ+ຈົນຮອດຕອນສວາຍ. ພວກທີ່ຍັງເຫຼືອກໍແຕກຊະໄປໃຜໄປມັນ.
12 ປະຊາຊົນຈຶ່ງບອກຊາມູເອນວ່າ: “ແມ່ນໃຜທີ່ເຄີຍເວົ້າວ່າ ‘ຊາອູນນິຫວະຈະເປັນກະສັດປົກຄອງພວກເຮົາ?’+ ໄປຈັບພວກມັນມານີ້ ພວກເຮົາຊິຂ້າຖິ້ມ.”
13 ແຕ່ຊາອູນບອກວ່າ: “ມື້ນີ້ບໍ່ຕ້ອງຂ້າໃຜ+ ເພາະມື້ນີ້ພະເຢໂຫວາໄດ້ຊ່ວຍພວກອິດສະຣາເອນໃຫ້ລອດ.”
14 ຕໍ່ມາ ຊາມູເອນບອກປະຊາຊົນວ່າ: “ໃຫ້ພວກເຮົາໄປເມືອງກິນການ+ເພື່ອປະກາດອີກເທື່ອໜຶ່ງເລື່ອງການແຕ່ງຕັ້ງຊາອູນ ໃຫ້ເປັນກະສັດ.”+
15 ທຸກຄົນກໍໄປເມືອງກິນການ. ຢູ່ຫັ້ນເຂົາເຈົ້າໄດ້ແຕ່ງຕັ້ງຊາອູນໃຫ້ເປັນກະສັດຕໍ່ໜ້າພະເຢໂຫວາ. ຫຼັງຈາກນັ້ນ ເຂົາເຈົ້າໄດ້ເຜົາເຄື່ອງບູຊາສ້າງຄວາມສະຫງົບສຸກໃຫ້ພະເຢໂຫວາ.+ ຊາອູນກັບປະຊາຊົນກໍພາກັນສະຫຼອງຢ່າງມ່ວນຊື່ນ.+
ຂໍ
^ ໝາຍເຖິງປະມານ 2 ໂມງເຊົ້າຈົນຮອດ 6 ໂມງເຊົ້າ
