ຊາມູເອນສະບັບທີໜຶ່ງ 23:1-29
23 ຕໍ່ມາ ມີຄົນມາບອກດາວິດວ່າ: “ພວກຟີລິດສະຕີນມາໂຈມຕີເມືອງເກອີລາ+ແລະເຂົາເຈົ້າກຳລັງປຸ້ນເອົາເຂົ້າ.”
2 ດາວິດຈຶ່ງຖາມພະເຢໂຫວາວ່າ:+ “ລູກຄວນໄປຕໍ່ສູ້ພວກຟີລິດສະຕີນບໍ?” ພະເຢໂຫວາຕອບວ່າ: “ໄປໂລດ ແລະຊ່ວຍເມືອງເກອີລາໄວ້.”
3 ພວກທະຫານຂອງດາວິດເວົ້າກັບລາວວ່າ: “ຂະໜາດຢູ່ຢູດາພວກເຮົາກໍຍັງຮູ້ສຶກຢ້ານແລ້ວ+ ຄັນໃຫ້ໄປເກອີລາເພື່ອຕໍ່ສູ້ກັບພວກຟີລິດສະຕີນ ພວກເຮົາກໍແຮ່ງບໍ່ກ້າ!”+
4 ດາວິດຈຶ່ງຖາມພະເຢໂຫວາອີກເທື່ອໜຶ່ງ+ ພະເຢໂຫວາຕອບລາວວ່າ: “ໄປເມືອງເກອີລາໂລດ ເພາະເຮົາຈະໃຫ້ເຈົ້າຊະນະພວກຟີລິດສະຕີນ.”+
5 ແລ້ວດາວິດກໍພາພວກທະຫານໄປເກອີລາແລະຕໍ່ສູ້ກັບພວກຟີລິດສະຕີນ. ລາວເອົາຝູງສັດຂອງເຂົາເຈົ້າມາແລະຂ້າເຂົາເຈົ້າຕາຍບັກຫຼາຍໆ. ດາວິດຊ່ວຍຊີວິດຄົນໃນເມືອງເກອີລາໄວ້.+
6 ອາບີອາທາ+ລູກຊາຍຂອງອາຮີເມເລັກໜີໄປຫາດາວິດຢູ່ເມືອງເກອີລາ. ລາວເອົາເອໂຟດ*ໄປນຳ.
7 ມີຄົນບອກຊາອູນວ່າ: “ດາວິດມາເມືອງເກອີລາ.” ຊາອູນຈຶ່ງເວົ້າວ່າ: “ພະເຈົ້າມອບດາວິດໃຫ້ຂ້ອຍແລ້ວ.+ ລາວຖືກແຮ້ວຂອງໂຕເອງໂດຍເຂົ້າມາໃນເມືອງທີ່ມີປະຕູແລະມີກອນປະຕູ.”
8 ຊາອູນຈຶ່ງເອີ້ນທະຫານທຸກຄົນມາເພື່ອໄປຈັບດາວິດກັບພວກທະຫານຂອງລາວຢູ່ເມືອງເກອີລາ.
9 ເມື່ອດາວິດຮູ້ວ່າຊາອູນກຳລັງວາງແຜນມາຈັບລາວ ດາວິດຈຶ່ງບອກອາບີອາທາວ່າ: “ເອົາເອໂຟດມາໃຫ້ຂ້ອຍໄດ້ບໍ່.”+
10 ແລ້ວດາວິດກໍເວົ້າວ່າ: “ພະເຢໂຫວາພະເຈົ້າຂອງອິດສະຣາເອນ ຜູ້ຮັບໃຊ້ຜູ້ນີ້ຂອງພະອົງໄດ້ຍິນວ່າຊາອູນຕັ້ງໃຈຈະມາທຳລາຍເມືອງເກອີລາຍ້ອນລູກ.+
11 ພວກຜູ້ນຳຂອງເກອີລາຈະມອບລູກໃຫ້ຊາອູນບໍ? ຊາອູນຈະມາເມືອງນີ້ຕາມທີ່ລູກໄດ້ຍິນບໍ? ຂໍພະເຢໂຫວາພະເຈົ້າຂອງອິດສະຣາເອນບອກຜູ້ຮັບໃຊ້ຂອງພະອົງໃຫ້ຮູ້ແດ່.” ພະເຢໂຫວາຕອບວ່າ: “ລາວຈະມາ.”
12 ດາວິດຈຶ່ງຖາມວ່າ: “ພວກຜູ້ນຳຂອງເມືອງເກອີລາຈະມອບລູກແລະທະຫານຂອງລູກໃຫ້ຊາອູນບໍ?” ພະເຢໂຫວາຕອບວ່າ: “ເຂົາເຈົ້າຈະມອບພວກເຈົ້າໃຫ້ລາວ.”
13 ດາວິດກັບທະຫານ 600 ຄົນ+ຈຶ່ງຟ້າວໜີອອກຈາກເມືອງເກອີລາ ແລະໜີໄປເລື້ອຍໆເພື່ອຊອກຫາບ່ອນທີ່ປອດໄພ. ເມື່ອມີຄົນມາບອກຊາອູນວ່າດາວິດໜີອອກຈາກເມືອງເກອີລາແລ້ວ ລາວກໍເຊົາໄລ່ລ່າດາວິດ.
14 ດາວິດໄປຢູ່ບ່ອນທີ່ເຂົ້າໄປໄດ້ຍາກໃນເຂດພູທີ່ຢູ່ບ່ອນກັນດານຊິເຟ.+ ຊາອູນຊອກຫາດາວິດບໍ່ຢຸດບໍ່ເຊົາ+ ແຕ່ພະເຢໂຫວາບໍ່ຍອມໃຫ້ຊາອູນຈັບດາວິດໄດ້.
15 ດາວິດຮູ້ວ່າຊາອູນກຳລັງຊອກຂ້າລາວຢູ່ບ່ອນກັນດານຊິເຟຢູ່ໂຮເຣັດ.
16 ຕອນນັ້ນ ໂຢນາທານລູກຊາຍຂອງຊາອູນໄດ້ອອກໄປຫາດາວິດຢູ່ໂຮເຣັດເພື່ອໃຫ້ກຳລັງໃຈດາວິດວ່າພະເຢໂຫວາຈະຊ່ວຍລາວ.+
17 ໂຢນາທານບອກດາວິດວ່າ: “ບໍ່ຕ້ອງຢ້ານເດີ້. ພໍ່ຂ້ອຍຈະບໍ່ມີທາງຊອກເຈົ້າເຫັນ. ເຈົ້າຈະໄດ້ເປັນກະສັດປົກຄອງອິດສະຣາເອນ+ ແລະຂ້ອຍຈະເປັນຮອງຕໍ່ຈາກເຈົ້າ. ພໍ່ຂ້ອຍກໍຮູ້ເລື່ອງນີ້ດີ.”+
18 ແລ້ວທັງສອງກໍສັນຍາກັນ+ຕໍ່ໜ້າພະເຢໂຫວາ. ດາວິດກໍຢູ່ໂຮເຣັດຕໍ່ ແລະໂຢນາທານກໍກັບເມືອເຮືອນ.
19 ຕໍ່ມາ ຄົນໃນເມືອງຊິເຟໄດ້ໄປບອກຊາອູນຢູ່ເມືອງກີເບອາ+ວ່າ: “ດາວິດລີ້ຢູ່ໃກ້ໆພວກເຮົາ+ໃນບ່ອນທີ່ເຂົ້າໄປຫາໄດ້ຍາກຢູ່ໂຮເຣັດ+ ແຖວໂນນພູຮາກີລາ+ທີ່ຢູ່ທາງໃຕ້*ຂອງເຢຊີໂມນ.*+
20 ຖ້າກະສັດສະດວກຕອນໃດກໍມາໂລດ ແລ້ວພວກເຮົາຈະມອບລາວໃຫ້ກະສັດ.”+
21 ແລ້ວຊາອູນກໍເວົ້າວ່າ: “ຂໍໃຫ້ພະເຢໂຫວາອວຍພອນພວກເຈົ້າເດີ້ທີ່ອີ່ຕົນຂ້ອຍ.
22 ໃຫ້ພວກເຈົ້າໄປຊອກເບິ່ງຄັກໆວ່າລາວຢູ່ໃສແລະໃຜທີ່ເຫັນລາວຢູ່ຫັ້ນ. ມີຄົນບອກຂ້ອຍວ່າດາວິດນິມີເລ່ລ່ຽມຫຼາຍໄດ໋.
23 ໃຫ້ໄປຊອກຄັກໆໃນທຸກບ່ອນທີ່ລາວໄປລີ້ແລະເອົາຫຼັກຖານມາໃຫ້ຂ້ອຍ ແລ້ວຂ້ອຍຈະໄປນຳພວກເຈົ້າ. ເຖິງວ່າຂ້ອຍຕ້ອງຊອກລາວໃນທຸກຄອບຄົວຂອງຕະກູນຢູດາ ຂ້ອຍກໍຈະເຮັດ.”
24 ຈາກນັ້ນ ເຂົາເຈົ້າກໍກັບເມືອເມືອງຊິເຟ+ກ່ອນຊາອູນ. ຕອນນັ້ນດາວິດກັບພວກທະຫານຂອງລາວຢູ່ບ່ອນກັນດານມາໂອນ+ໃນເຂດອາຣາບາ+ທີ່ຢູ່ທາງໃຕ້ຂອງເຢຊີໂມນ.
25 ແລ້ວຊາອູນກັບພວກທະຫານກໍໄປຊອກຫາດາວິດ.+ ເມື່ອດາວິດຮູ້ກໍຟ້າວເຂົ້າໄປລີ້ຢູ່ໂກນຫີນ+ໃນບ່ອນກັນດານມາໂອນ. ມີຄົນມາບອກຊາອູນເລື່ອງນີ້ ລາວຈຶ່ງໄລ່ນຳດາວິດເຂົ້າໄປໃນບ່ອນກັນດານມາໂອນ.
26 ເມື່ອຊາອູນມາຮອດພູເບື້ອງໜຶ່ງ ດາວິດກັບພວກທະຫານກໍໜີໄປພູອີກເບື້ອງໜຶ່ງ. ດາວິດຟ້າວໜີ+ຈາກຊາອູນ ແຕ່ຊາອູນແລະພວກທະຫານກຳລັງໄລ່ນຳມາໃກ້ໆເພື່ອຈະຈັບດາວິດແລະພວກທະຫານຂອງດາວິດ.+
27 ແຕ່ມີຄົນມາບອກຊາອູນວ່າ: “ໃຫ້ຟ້າວກັບມາໄວໆ ພວກຟີລິດສະຕີນມາບຸກໂຈມຕີແຜ່ນດິນຂອງເຮົາແລ້ວ!”
28 ຊາອູນຈຶ່ງເຊົາໄລ່ລ່າດາວິດ+ແລະກັບໄປຕໍ່ສູ້ກັບພວກຟີລິດສະຕີນ. ຍ້ອນແນວນີ້ ບ່ອນນັ້ນຈຶ່ງຖືກເອີ້ນວ່າໂກນຫີນທີ່ເຮັດໃຫ້ແຍກຈາກກັນ.
29 ແລ້ວດາວິດກໍອອກຈາກຫັ້ນແລະໄປຢູ່ບ່ອນທີ່ເຂົ້າໄປໄດ້ຍາກໃນເມືອງເອັນເກດີ.+
ຂໍ
^ ເບິ່ງສ່ວນອະທິບາຍຄຳສັບ
^ ແປຕາມໂຕວ່າ “ເບື້ອງຂວາ”
^ ຫຼືອາດແປວ່າ “ທະເລຊາຍ; ບ່ອນກັນດານ”
