ຊາມູເອນສະບັບທີໜຶ່ງ 27:1-12
-
ພວກຟີລິດສະຕີນຍົກເມືອງຊິກລັກໃຫ້ດາວິດ (1-12)
27 ແຕ່ດາວິດຄິດໃນໃຈວ່າ: “ມື້ໜຶ່ງຂ້ອຍຕ້ອງຖືກຊາອູນຂ້າແທ້ໆ. ດີທີ່ສຸດແມ່ນຂ້ອຍຕ້ອງໜີ+ໄປຟີລິດສະຕີນ ຊາອູນຈຶ່ງຊິເຊົາໄລ່ລ່າຂ້ອຍທົ່ວເຂດອິດສະຣາເອນ+ ແລະຂ້ອຍກໍຈະລອດຈາກລາວ.”
2 ດາວິດຈຶ່ງພາທະຫານ 600 ຄົນ+ທີ່ຢູ່ນຳລາວໄປຫາອາກີເຊ+ກະສັດຂອງເມືອງກັດທີ່ເປັນລູກຊາຍຂອງມາໂອກ.
3 ດາວິດຢູ່ກັບອາກີເຊໃນເມືອງກັດ ພ້ອມກັບພວກທະຫານຂອງລາວແລະຄອບຄົວຂອງເຂົາເຈົ້າ. ດາວິດເອົາເມຍ 2 ຄົນໄປນຳ ຜູ້ໜຶ່ງຊື່ອາຮີໂນອາມ+ຄົນເຢດຊະເຣເອນ ແລະອີກຜູ້ໜຶ່ງຊື່ອາບີກາຍ+ຄົນກາເມນທີ່ເຄີຍເປັນເມຍຂອງນາບານ.
4 ເມື່ອມີຄົນມາບອກຊາອູນວ່າດາວິດໜີໄປເມືອງກັດ ຊາອູນກໍເຊົາໄລ່ລ່າດາວິດ.+
5 ດາວິດເວົ້າກັບກະສັດອາກີເຊວ່າ: “ຖ້າທ່ານເຫັນວ່າເໝາະສົມ ຂໍໃຫ້ທ່ານຍົກດິນຕອນໜຶ່ງທີ່ຢູ່ເມືອງນ້ອຍໆໃນເຂດບ້ານນອກໃຫ້ຂ້ອຍຢູ່ ເພື່ອຂ້ອຍຈະບໍ່ຕ້ອງຢູ່ໃນເມືອງຫຼວງກັບທ່ານ.”
6 ມື້ນັ້ນອາກີເຊຈຶ່ງຍົກເມືອງຊິກລັກ+ໃຫ້ດາວິດ. ເມືອງຊິກລັກຈຶ່ງເປັນຂອງພວກກະສັດຢູດາຈົນຮອດທຸກມື້ນີ້.
7 ດາວິດຢູ່ເມືອງນ້ອຍໆໃນເຂດບ້ານນອກຂອງຟີລິດສະຕີນ 1 ປີກັບ 4 ເດືອນ.+
8 ດາວິດກັບພວກທະຫານຂອງລາວໄປຕໍ່ສູ້ກັບພວກເກຊູ+ ພວກກີຊີ ແລະພວກອາມາເລັກ+ທີ່ອາໄສຢູ່ໃນເຂດຕັ້ງແຕ່ທີລາມໄປຈົນຮອດຊູເຣ+ແລະລົງໄປຮອດເອຢິບ.
9 ເມື່ອດາວິດໄປຕໍ່ສູ້ກັບພວກນີ້ ລາວຂ້າຜູ້ຊາຍແລະຜູ້ຍິງທຸກຄົນ+ ແຕ່ລາວເອົາຝູງແກະ ຝູງງົວ ຝູງລາ ຝູງອູດ ແລະເຄື່ອງນຸ່ງກັບມາໃຫ້ອາກີເຊ.
10 ເມື່ອອາກີເຊຖາມວ່າ: “ມື້ນີ້ເຈົ້າໄປຕໍ່ສູ້ຢູ່ໃສ?” ດາວິດຕອບວ່າ: “ທາງໃຕ້*ຂອງຢູດາ+ ແລະທາງໃຕ້ໃນເຂດຂອງພວກເຢຣາເມເອນ+ ແລະທາງໃຕ້ໃນເຂດຂອງພວກເກນີ.”+
11 ດາວິດຂ້າຜູ້ຊາຍແລະຜູ້ຍິງທຸກຄົນເພື່ອຈະບໍ່ຕ້ອງພາເຂົາເຈົ້າມາເມືອງກັດ. ດາວິດເວົ້າວ່າ: “ເຂົາເຈົ້າຈຶ່ງບໍ່ຕ້ອງບອກຄົນອື່ນວ່າ ‘ຂ້ອຍເປັນຜູ້ເຮັດ.’” (ດາວິດເຮັດແບບນີ້ຕະຫຼອດໄລຍະທີ່ຢູ່ເຂດບ້ານນອກຂອງຟີລິດສະຕີນ.)
12 ອາກີເຊຈຶ່ງເຊື່ອດາວິດແລະຄິດໃນໃຈວ່າ: ‘ພວກອິດສະຣາເອນຄືຊິຊັງລາວແຮງ ແລະລາວຈະຕ້ອງຮັບໃຊ້ຂ້ອຍຕະຫຼອດໄປ.’
ຂໍ ຄວາມ ໄຂ ເງື່ອນ
^ ຫຼື “ເນເກັບ”